¹ Nyǐ kɔn dɛ̀bɛ́ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó zɔ̀m Mɔwaabɛ shò kwã nɛ́ mɔ́ : Zwini zhe Nəbo cɔ w lyì bí, bə̀ bə̀ cɔ w cɔ̀ ! Cìzhìl pú Cərəyətəyim cɔ wá, bə̀ bə̀ zwẽ bə̀ cɔ wá. Cizhìl pú Myəsəgabɛ, bə̀ bə̀ wǔr jàà èmyɛ́ bə̀ ló tɛ̃́. ² Jàà y èmyɛ́ mɔ́ k’ê tɛ̀nɛ́ yé, bə̀ wɔ́ jàà y èmyɛ́ è y’à ce Mɔwaabɛ yil ré du ; lyì zhǐ Eshəbɔ̃ cɔ w wa, bə̀ n’ê tɛ́rɛ́ ò cɔ̌ mɔ́ yò bə̀ zhe : Bà-nà nə́ vò nə́ cɔ̀ w o jé tɛ̃́ tənèsé cəcəl wə ! Mədəmɛ, lwar bə̀ bə̀ la ǹmyɛ cɔ̌ ; bə̀ búlə́ shù pú ǹ kùr ò bànà. ³ Lyì zhǐ Oronəcim ní bə̀ n’ê wǔrh bə̀ búbwéé bə̀ zhe : Nyǐ màbyóó nánfɔ̀lɔ̀ ǹdə́ wu-zhùlù nɔ nə́ba. ⁴ Mɔwaabɛ tənà y cɔ̀, è byǎ bɛ́ n’ê wǔrh bə̀ búbwéé. ⁵ Lyì bí n’ê kúrh bə̀ m’ê jìl Luyiiri pyɛ̀lɛ́ yá. Ǹ gə tú ǹ nə́ ǹ swé Oronayim pyɛ̀lɛ́ y ǹ já ǹ nyɛ̌ wu-zhìlù búbwéése sə̀ n’ê wǔrh sə̀ zhe : ⁶ Lò gakó zɛ̃̀ ń dùr ń zwẽ ǹ cìnə̀ ! Yál-na ǹdə zúzúnú cìnə́ byɛ̀bɛ́ bə̀ ŋwɛ́nɛ́ gɔ-elũ èpòlò w ta. ⁷ Bə̀ ǹ zɔ ǹ wẽ̀ ré ǹdə́ ǹ nə̀cɛ̀ndɛ́ zhə̀nà, wɔ́ rə̀myɛ́ è ce, bə̀ m’a ŋwɛ̀nɛ́ bə zə ǹmyɛ́ búlə́ né wẽ́, bə̀ zɛ̃̀ bə kwè Kəmɔɔsɛ ǹdə́ ń vwĩ̀-zwə́lnə bé ǹdə́ ń yé né cìnə́ gakó bə m’e vò yómə́ jè. ⁸ Rə̀myɛ́ yi ní, lò mó mɔ̀bɔ́ ń nə́ ń cɔ̀ mɔ́, mà n já n zɛ̃̀ zù cɔ cɔ gakó wẽ́, n cɔ̀ rɛ, rə jé tɛ̃́, òdù ga t’â la lú yé, ń mà n ce jə́ y jé tɛ̃́, n cɔ̀ jə́ y ǹdə́ vɔlɔ w ga. Kɔn tó ǹdə Bə-zhɔ-zhe gə́ wə̀l né. ⁹ Pə-na vɔ̀mɛ̀ Mɔwaabɛ tənà y nɛ e m’e zɛ̃̀ ! Ǹdə́ rə̀myɛ́ ga, è cɛmɛ nɛ́ b’a cɔ̀ nə jǐrh gɔ-elũ èpòlò, è k’ê t’â la numbyíní nɔ e jòm è wẽ́ yé. ¹⁰ Zwini b’a zə lò mɔ̀bɔ́ ń twĩ̀ Bə-zhɔ-zhe tum rí ǹdə́ yə̀l nə̀ kùrə̀ mó, zwini b’a zə lò mɔ̀bɔ́ ń cẽ ń yə̀ ń búlə́ shú w mə n ló jal tɛ̃́ mɔ́ ! ¹¹ Mɔwaabɛ́ bə̀sɔ́nɛ́ yi ní ga ń jòm shɛ́shɛ́ ǹdə́ yə̀-zùlə́, ǹdə də̀vɛ̃́ kɛ̀bɛ́ è ŋwɛ́nɛ́ è nə̀zhĩ̌ wẽ́ e jòm è zhǐ, bə̀ yə̀ y pyìrhí è nə̀zhĩ̌ y wẽ́ bə ló nə̀-zhĩ̌ dõ wẽ́ mó ta, bə̀ y’à t’â zal mɔ́ bə̀ zhə̀l yómə́ jè yé. Wɔ́ rə̀myɛ́ è ce, è nyàn rɛ́ j’a wɔ́ rə̀myɛ́, è zho w nyàn rɛ́ myɛ yə̀ lyə́r yé. ¹² Sə Bə-zhɔ-zhe wə̀lə̀, bə̀ dɛ̃ ŋwɛ́nɛ́ rə̀ bànà, à m’a twĩ̀ lyì bə b’e vùr be ku w bə̀ ŋwɛ́nɛ́ ò wẽ́ mó w bə ce ku dõ wẽ́, bə̀ zɛ̃̀ bə mà è kwǎlnɛ́ bə lo. ¹³ Sə cìzhìl b’a zə Mɔwaabɛ lyì bí Kəmɔɔshɛ yilə, ǹdə́ cìzhìl gə́ zɔ Esərayɛl byǎ bɛ́ Bətɛl mɔ́ bə̀ y’a zhe ń zhə̀n mɔ́ nɛ́ ta ! ¹⁴ Mɔwaabɛ lyì, è nə wɔ́ etər á nə m’a zɛ̃̀ á tó né á wɔ̀ : «Nə́ wɔ́ kàndar, nə́ wɔ́ shə̀dɛ́ɛ́sɛ́ nə́ zhǐ búlə́ bú yil» né ? ¹⁵ Rə̀myɛ́ yi ní, bə̀ j’a cɔ̀ Mɔwaabɛ, bə ji è cɛmɛ nɛ́ myǐn nə̀ nyɛ̀rh la yi wə, bə zə byɛ̀bɛ́ bə̀ yě kɔn du bə̀ dwã bɛ́ bə̀ la zwə́l, wɔ́ pyɔ̌ mɔ́, ń yil ré wɔ́ Bə-zhɔ-zhe ń cǐ jàn cìnə́ bé gakó mó ń zɔ̀m rə̀myɛ́. ¹⁶ Mɔwaabɛ cɔ̌ mɔ́ yú mə zhɛ̀, ń zwini rí n’ê dùr làlà rə̀ bànà. ¹⁷ Ámyɛ̌ byɛ̀bɛ́ gakó á jě á kə́kɛ́lɛ́ y á yě è yil ré gə́ du ní náàcɛ̀nɛ́ mɔ́, zɛ̃̀-na á n’á kúrh y á zhe : Wɔ́ etər jàn rɛ́ nánfɔ̀lɔ̀ w kɔ̀bɔ́ tó né, jàn rɛ́ rə̀ bə dõ zhe mó tó bə̀ m’e cɔ̀ rɛ mɔ́ ? ¹⁸ Ǎ Jəbɔ̃ lyì, só-nə tɛ̃́ á còrhó jàà y wa, jǒm-nə tɛ̃́ cə-kùlì y wə ! bə̀ nyǐ Mɔwaabɛ cɔ̀rna mɔ́ bàn bú ǹd’ába, n cɔ̀ á jààsɛ́ á lù á kə́kɛ́lɛ́ sɛ mɔ́. ¹⁹ Arɔwɛɛrɛ lyì, jǒm-nə sɔ́má y vɔ̃̀ nɛ á n’á nyǐ, lò mó mɔ̀bɔ́ ń dùr n lú mú gə tú ń yúwə́, n’á bwə̀rh : Wɔ́ bə̀kɔ́n yò ò wɛ̀rhɛ́ ? ²⁰ ń mà n lyár n wɔ̀ : Nyǐ Mɔwaabɛ nɔ cìzhìlə, bə̀ cɔ̀ wá. Wǔrh-nə, á búbwéé ! Zhǐ-nə Arənɔ̃ nɛ́ á bwə̀l á byili á wɔ̀ : Mɔwaabɛ cɔ̀ ! ²¹ Bə-zhɔ-zhe pɔ còrhò-tum jə́ y è wɔ dɛ̃̌ mó tənà y lyì bí ǹdə́ Olɔ̃ ǹdə́ Myəfaatɛ ²² ǹdə́ Jədɔ̃ ǹdə́ Nəbo ǹdə́ Bɛtɛ-Jəbələtəyim ²³ ǹdə́ Cərəyətəyim ǹdə́ Bɛtɛ-Gəmul ǹdə́ Bɛtɛ-Məwɔ̃ ²⁴ ǹdə́ Kərəyɔɔtɛ ǹdə́ Bɔsəra ǹdə́ Mɔwaabɛ tənà y cɛmɛ nɛ́ gakó, nyɛ̀bɛ́ nə̀ nyɛ ǹdə́ nyɛ̀bɛ́ nə̀ bwə́l ga mɔ́ nɛ. ²⁵ 25 Mɔwaabɛ tənà y jàn rɛ́ zhɛ̀, è vɔ̃̀ w kɔ́wá. Wɔ́ Bə-zhɔ-zhe ń zɔ̀m rə̀myɛ́. ²⁶ Ce-nə Mɔwaabɛ tənà y nyɔ̀ də̀vɛ̃́ e zə y e tutwi tɛ̃́, b’e zhẽ̌ è cìn dɛ̃̌ e dwene Bə-zhɔ-zhe ! Bə̀ Mɔwaabɛ tu ń tətɔɔlɛ́ wẽ́ n byíbyílí, mùnì ga ńmyɛ jǐrh mɔ̀n kɔna ! ²⁷ Esərayɛl myɛ nə yə̀ mɔ̀n kɔn yàl Mɔwaabɛ yil nà ? Mɔwaabɛ, Dɛ̃ rə̀dù ga, ǹ yà ǹ nɔ Esərayɛl bə̀ zɔ ŋwɔ̀là wẽ́, ń mə́ ǹ gə la è yò zɔ̌m gakó j’a wɔ́ ǹ yó dúdú ǹ nə́ ǹ zhízhí ǹ mə́ ǹ mɔ̀n y mɔ́ ? ²⁸ 28 Rə̀myɛ́ ce, Mɔwaabɛ lyì, du-nə á yẽ̌ á cɛmɛ nɛ́ á vò á jòm pyàr rɛ́ wa. Á yə̀ ǹdə épwẽ̌se shɛ̀bɛ́ sə̀ n’ê cĩ́ sə̀ jàlá pyɔ̀ gə̀gòló wẽ́ lò gə́ yír mə̀gã̌ mɔ́ ta ! ²⁹ Nə́ yě Mɔwaabɛ tənà cìn-byilu nánfɔ̀lɔ̀ w párá, è cìn dɛ̃̌ zhõ̌ mó, è cìn-nɛrɛ́ yá, è jàn wǒ wə, kɔn rɛ́ tɛ̀bɛ́ è n’ê pyà mɔ́, è cìn-byilu bùlə̀ né è wẽ́ mó gakó párá. ³⁰ Bə-zhɔ-zhe wə̀lə̀ : à yě è zɔ̃̀-fwə̀r ré, è tumə né nə̀ bə kùr zhe mɔ́ gakó párá. ³¹ Wɔ́ rə̀myɛ́ è ce à n’â kùrh Mɔwaabɛ nɛ, à n’â kúrh Mɔwaabɛ gakó nɛ. Lyì bí j’â n’ê kúrh Cər-Erɛɛsɛ lyì bí myɛ nɛ. ³² Ǹmyɛ́ Səbəma də̀vɛ̃́ cèmé, à n’â kúrh ába du Yazɛɛrɛ lyì bí. Nyǐ ǹ cèmé né tò nə̀ jɛ̀sɛ́ byì sə lyɛ̃ nə̀-fɔ̀lɔ̀ w sə yí Yazɛɛrɛ nə́-fɔ̀lɔ̀ wa. Sə mɔ̀bɔ́ ń nə́ cɔ̀ mɔ́ tu ǹ wẽ̀ ré ǹ jə̀r mó ǹdə́ də̀vɛ̃́ cèmé byǎ bɛ́ ǹ yà ǹ pɔ̌r mɔ́ yó n pwà. ³³ Èlǎsɛ̃́, wu-nyɔ̃̀ ǹdə́ fǔ mú bə̀ n’ê fùù mú jé cɛsɛ́ gɔ sõ mó ǹdə́ Mɔwaabɛ tənà y ga wẽ́ ; à ce də̀vɛ̃́ y zhɛ̀ nə̀bwǎnsɛ́ wẽ́, e pyárh də̀vɛ̃́ cèmé byǎ nèrh kùr w ǹd’e n’ê mɔ̀n e kǎrh mɔ́ jé tɛ̃́ ; e jǐrh wɔ́ búlə́ búbwéése sə ŋwɛ́nɛ́ è k’ê də̀ wu-nyɔ̃̀ búbwéése yé. ³⁴ Bə nyɛ̀ɛ̀ búbwéése sə̀ zhì Eshəbɔ̃ nɛ́ sə̀ n’ê búbwéé, lò gə zhǐ Elalɛ nɛ́ ń nyɛ̌, búbóó mó lyɛ̃ mə yí Yaasɛ, mə k’e zhì Səwaasɛ mə yí Oronəyim ǹdə́ Egəlaatɛ-Shələsha nɛ́, bə̀ bə̀ pwírí Nəmərim myɛ nɛ̃̌ mɔ́ jààsɛ́ cɔ̀. ³⁵ Bə-zhɔ-zhe wə̀lə̀ ; à j’â n’â yǎl a zhɛ̀ ǹdə́ Mɔwaabɛ tənà yá, è lò mɔ̀bɔ́ gakó ń nə́ ń zal vwə̃̀ námpúmə́ cɛ̃́ɛ̃́ ń twí ń zwə́l è yə né vwĩ̀-jùúlí yó, n ji wẽ̀ rə̀ lwẽ́ nã́nyə̀nyɛ̀lɛ́ myǐn ń mə́ ń cèrhé ne mó jé tɛ̃́ Mɔwaabɛ tənà y wa. ³⁶ À n’â kúrh Mɔwaabɛ nɛ à wẽ́ ǹdə wɔ́ wu-zhìlù wí è n’ê wúl ta, à n’â kúrh Cər-Erɛɛsɛ lyì bi ni à wẽ́ ǹdə wɔ́ wu-zhìlù wí è n’ê wúl ta, bə̀ nə̀cɛ̀ndɛ́ tɛ̀bɛ́ gakó bə̀ pwà bə cĩ́ mú gə́ jé mó yilə. ³⁷ Bə̀ nyǐ lyì bí gakó ywẽ́ né fɔ̀nà, bə̀ tama nɛ́ gakó fɔ̃̀, bə̀ jɛ̀sɛ́ gakó kǎr kǎr, bə nyal ywə́ə́le ǹdə gàndɛ ta bə lyẽ bə̀ cə̌rh ne. ³⁸ Kɔn zhì Mɔwaabɛ lyarha nɛ́ yó ǹdə́ cɔ w dwã-jóló jààsɛ́ wẽ́ mó gakó j’â wɔ́ wu-zhìlù cǐl dúdú ; bə̀ wɔ́ àmyɛ́ à mà Mɔwaabɛ a lo ǹdə nə̀zhĩ̌ kɛ̀bɛ́ è k’ê bə tum zhe ta, wɔ́ Bə-zhɔ-zhe ń zɔ̀m rə̀myɛ́. ³⁹ Bə̀ gə́ mà Mɔwaabɛ bə lo mó yilə ! Zɛ̃̀-na á n’á wɔ́wɔ́lɛ́ ǹdə́ wu-zhìlù ! bə̀ cìzhìl dúdú ce Mɔwaabɛ tənà y pyìrhí è yé e zǎ kwã ! Mɔwaabɛ jǐrh mɔ̀n ǹdə́ ywẽ kɔna, tənàsé shɛ̀bɛ́ sə̀ jě sə kə́kɛ́lɛ́ y mɔ́ yilə. ⁴⁰ Bə-zhɔ-zhe wòwə̀ : Nyǐ ń jǐrh ǹdə ènyə̀lá è zɛ̃̀ e lɛ̀lɛ̀ è vɔ̀mɛ̀ è wɔ Mɔwaabɛ yə́-pɛ̀lɛ́ w è n’ê yál ta. ⁴¹ Bə̀ zwẽ Kərəyɔɔtɛ, bə ŋwɛ̀nɛ́ bə zwẽ jààsɛ́ shɛ̀bɛ́ sə̀ wɔ́ bə̀ jàn rɛ́ mɔ́ myɛ bə súlí. Dɛ̃ rə̀myɛ́ yù wə̀, wu-zɛ̃̀ɛ̃́ m’a zə Mɔwaabɛ shə̀dɛ́ɛ́sɛ́ kàndar rɛ́ ǹdə wu-zɛ̃̀ɛ̃́ gə́ y’a zə kɛ̃ mɔ̀bɔ́ ń nə́ ń lùl né mó ta. ⁴² Mɔwaabɛ m’a jé tɛ̃́, è k’ê t’â la dwí yál, è gə́ zhẽ̌ è cìn dɛ̃̌ è bú ǹdə́ Bə-zhɔ-zhe mó yilə. ⁴³ Mɔwaabɛ lyì, nyǐ wɔ́ ywẽ ǹdə́ gɔ́rɔ́ nánlyilyùmú ǹdə́ pɔ̀mɔ̀ rə̀ zhǐ á yilə ! Wɔ́ Bə-zhɔ-zhe ń zɔ̀m rə̀myɛ́. ⁴⁴ lò ń gə la dùr ywẽ ré yé né, wɔ́ gɔ́rɔ́ nánlyilyùmú w wẽ́ ń la nɛ́ tu, sə lò mɔ̀bɔ́ ńmyɛ ká ń la gɔ́rɔ́ nánlyilyùmú w w shí n du mú, rə̀myɛ́ ná-cí wɔ́ pɔ̀mɔ̀ w wẽ́ ń la nɛ́ tu. Bə̀ nyǐ wɔ́ byin rí rə̀myɛ́ mɔ́ wẽ́, à la ce còrhò-tum bə̀ rə jòm ǹmyɛ́ Mɔwaabɛ yó mó, wɔ́ Bə-zhɔ-zhe ń zɔ̀m rə̀myɛ́. ⁴⁵ Sə lyì bí byɛ̀bɛ́ bə̀ dùr bə lú mú, m’a dùr dùr bə lyɛ̀ɛ̀ bə̀ yí Eshəbɔ̃ ywə́l mó w bə̀ zhì gàà mɔ́ ; sə myǐn m’a du Eshəbɔ̃ nɛ́, mə kwɛ̃́ myìn-zhù Səwɔ̃ cəcəl wə ; mə tó Mɔwaabɛ tənà y swã́ nɛ́ nɛ mə ji, kɔn m’e yí lyì bí byɛ̀bɛ́ bə̀ n’ê zhàrh búlə́ tɛ̃́ mɔ́ yó-kwə́ə́lé ne. ⁴⁶ Mɔwaabɛ, ǹ nɔ zwini tã̀ ! Nyǐ Kənɔɔshɛ lyì bí jé tɛ̃́. Bə̀ zɛ̃̀ bə pwà ǹ byǎ bɛ́ bə m’e vò yómə́ jé, bə zə ǹ bə̀kwá myɛ bə súlí bə lyɛ̃. ⁴⁷ Sə lwar bə̀ kɔn m’a dɛnɛ, rə̀myɛ́ kwã nɛ́, à m’a zə Mɔwaabɛ́ tənà y lyì bí a k’a m’a shí yómə́ jè bə kwɛ̃̀ bə bà. Wɔ́ Bə-zhɔ-zhe ń zɔ̀m rə̀myɛ́. Wɔ́ èta kɔn tó né Mɔwaabɛ còrhò-tum rí shò-kwã nɛ́.