¹ Bə-zhɔ-zhe zɔ̀m ǹdə́ nyì-zwennə Zheremyi Shilishiti lyì bí shò-kwã nɛ́ ; ǹdə́ Faraɔ̃ yà ń gwẽ̌ yə̀ bwí ǹdə́ Gaza gə́ cǐ mə̀gwã̌ nyí rí yé. ² Bə-zhɔ-zhe zɔ̀m n wɔ̀ : Nyǐ nɛ̃̌ mə̀ shí lũ jə̀-gwã̀ sõ mə̀ bànà, mə́ j’â sú cɛ, mə jǐrh bù-fwɛ̀lɛ̀ kɛ̀bɛ́ è su e bɔrh, e mɔ́lɛ́ tənà y ǹdə́ wẽ̀ ré tɛ̀bɛ́ rə̀ ŋwɛ́nɛ́ è wẽ́ mó ; è cɛmɛ nɛ́ ǹdə́ nə̀ lyì bí. Lyì bí j’a zɛ̃̀ bə̀ n’ê wǔrh bə̀ búbwéé ǹdə́ wu-zhìlù, bə̀ gə́ nyɛ̀ɛ̀ shəshesé nèsé dome ré ǹdə́ búlə́ eshərh-vwɛ̃tur rí wùwùlì rí ǹdə́ rə̀ nèsé dome ré mó yilə. ³ Shəshesé nèsé dome ré, ǹdə́ búlə́ eshə-vwɛ̃túr rí wùwùlì rí ǹdə́ rə̀ nèsé sɔ̀ w ce byǎ bɛ́ ǹdə́ dabá bɛ́ wɛ̀rhɛ́ wɛ̀rhɛ́ bə ga, bə̀ jɛ̀sɛ́ lyɛ̀ɛ̀, bə dwĩ̀ bə̀ byǎ bɛ́ nɛ, bə̀ yə̀ pyìrhí bə̀ nyǐ bə̀ sõ yé. ⁴ Bə̀ Shilisəti lyì bí byɛ̀bɛ́ bə̀ y’à dàl Tiiri ǹdə́ Sədɔ̃ nɛ́, bə̀ n’ê tó bə̀ sɛ̃ Shilisəti lyì bí ni mú, yò cɔ̌ dɛ̃ rɛ́ yúwə́, bə̀ wɔ́ Bə-zhɔ-zhe ń la Shilisəti lyì bí cɔ w ǹdə́ Kafətɔɔsɛ cɔ w ò wɔ nɛ̃̌ mɔ́ cəcəl w mó lyì bí cɔ̌. ⁵ Nyǐ wù-zhìlù nánfɔ̀lɔ̀ zhe Gaza lyì bí, bə tə̀ rə̀ yil bə fɔ̃̀ bə̀ ywẽ́ né bə yẽ̌ náncɔ̀ɔ́lɛ ; Ashəkəlɔ̃ lyì bí k’ê wàr bə̀ n’ê púr bə̀ nyí yé, ǹdə́ byɛ̀bɛ́ á dàl á jě vɔlɔ w mɔ́ ga. À nə m’a tə̀ rə yil á zɛ̃̀ á n’á kǎr á yala nɛ́ á la m’a yí dǒ ? ⁶ Ǎ Bə-zhɔ-zhe búlə́ shù, dǒ ǹ nə la yõ̌ ń shǐrh ? Ká bə̀ zù ǹ pyá w wa, yẽ̌ èta, sə́ zhì shɛ́ɛ́ ! ⁷ Búlə́ shù, etər ǹ nə m’a tó né ń zhì shǐrh ? E jà wɔ́ Bə-zhɔzhe ń nə́ ń twĩ̀ mú mú, wɔ́ twĩ́ ń twĩ̀ mú ǹ la vò ń bú ǹdə́ Ashəkəlɔ̃ lyì bí ǹdə́ lyì bí byɛ̀bɛ́ bə̀ jě nə́-fɔ̀lɔ̀ w nyí ni mú.