¹ Bə-zhɔ-zhe zɔ̀mɛ̀ rɛ́ ń zɔ̀m ǹdə́ nyì-zwennə Zheremyi tənèsé yil mó. ² È wɔ́ Ezhibti tənà y pyɔ̌ Faraɔ̃ Nəbo shə̀dɛ́ɛ́sɛ́, Babyəlɔnɛ pyɔ̌ Nabəkɔdɔnɔzɔɔrɛ bú búlə́ n ŋwɛ̀nɛ́ Nəko ǹdə́ Nəko yà ń wɔ Efəratɛ bù-fwɛ̀lɛ̀ y nyí ni, Karəkəmyiishi ní mú. Rə̀myɛ́ yó né, ǹdə́ Zhɔzhaasɛ byǐ Zhowəcim Zhidə pyɔ̌ mɔ́ pyɛ̀lɛ̀ rɛ́ zhe byinə nə̀na. ³ Shə̀dɛ́ɛ́sɛ́ yó-cìnə́ bé zɛ̃̀ sə wɔ̀ sə̀ shə̀dɛ́ɛ́sɛ́ nɛ : tɛnɛ-na á zɛ̃̀ á kwè wẽ̀ ré bə̀ m’e cə̀r cìn yé né búlə́ jàà w mɔ́ nánfwààlɛ́ ǹdə́ rə̀ námpɔ́lsɛ́, á m’á la búlə́ né jàà wa ! ⁴ Lyẽ-nə eshəsé wẽ̀ ré sə̀ nɛ ! eshə-jòmnə, zɛ̃̀-na á jǒm eshəsé ! Pú-nə á shə̀dɛ́ɛ́sɛ yə́-púr ri ! Dwèlè-nə á swə̌ né nyə́ né nə du nánsə́sɔ́msɛ ! Zwǐ-nə á cɔ̌brɛ kàmə̀zwǐsí ! ⁵ Sə wɔ́ bə̀kɔ́n à nə èta mɔ́ ? Nyǐ bə̀ wun n’ê gɛ, bə̀ k’â n’ê kwɛ̃̀ ! Bə̀ ŋwɛ̀nɛ́ bə̀ shə̀dɛ́ɛ́sɛ́ kã̀dar rɛ́ ; bə̀ n’ê dùr bə̀ làà dwã nɛ, bə̀ n’ê dùr bə̀ t’â pyìrhí bə̀ nyǐ bə̀ kwã nɛ́ yé ! wu-zɛ̃̀ɛ̃́ nánfwɛ̀lɛ̀ wɔ cə-yala gakó, wɔ́ Bə-zhɔ-zhe ń zɔ̀m rə̀myɛ́. ⁶ Bá lò mɔ̀bɔ́ ń zhe ywə́l du ń dwã bɛ́ mɔ́ cìcì mú wàr ń la dùr n lú yé, lò mɔ̀bɔ́ ń wɔ́ kàndɔ du ń dwã bɛ́ myɛ wàr ń cìn ń la zõ yé ! Bə̀ m’a n’ê mà bə̀ nèrh bə̀ lwé tɛ̃́, Efəratɛ bù-fwɛ̀lɛ̀ y bù-cǔ w ò ŋwɛ́nɛ́ jə̀-gwã̀ sõ mó yó ! ⁷ Wɔ́ lò ń wɔ̌ ń mà n já ń nə́ súlí ń la ǹdə Niili y nɛ̃̌ mɔ́, èmyɛ́ bù-fwɛ̀lɛ̀ y kɛ̀bɛ́ è nɛ̃̌ mɔ́ n’ê swí y mə̀ bɔrh mɔ́ nɛ ta ? ⁸ Wɔ́ Ezhibti tənà y è wɔ́ ǹdə Niili y è nɛ̃̌ mɔ́ y’’à j’â n’ê swí y mə bɔrh ǹdə bù-fwwɛ̀lɛ̀ nɛ̃̌ nɛ mɔ́ ta. Ezhibti tənà y y’à n’ê wə̀lə̀ : À nɛ̃̌ mɔ́ m’a j’â n’ê súlí, mə mɔ́lɛ́ cɛ yá, à m’a ce cɛmɛ nɛ́ lyì bí jé tɛ̃́. ⁹ Esherh, zhəl-nə ! eshə-vwɛ̃tur jòmnə, Dùr-nə á vò á jì bə̀ yó ǹdə́ lyim ! Bə̀ nyǐ kàndar rɛ́ tɛ̀bɛ́ rə̀ du rə̀ dwã bɛ́ mɔ́ du rə̀ la búlə́ né yilə : È wɔ́ Kuushi ǹdə́ Puuti lyì bí byɛ̀bɛ́ bə̀ yě wẽ̀ ré tɛ̀bɛ́ bə̀ m’ê cə́r cìn yé né búlə́ jàà w zú mú, ǹdə́ Luudi lyì bí byɛ̀bɛ́ bə̀ yě twesé tɔ mɔ́ ! ¹⁰ Dɛ̃ rɛ́ rə̀myɛ́ mɔ́, wɔ́ Cǐnnə Bə-zhɔ-zhe mó ń cǐ jàn cìnə́ bé gakó mó dɛ̃ ; rə̀ wɔ́ ń jim cṹ dɛ̃, ń la ń jim cṹ ń zwə̀ bé yó rə̀myɛ́ yù wə̀. Rə̀myɛ́ yù wə, búlə́ shù m’a jí o sú, o nyɔ̀ jal mə zə w o tutwi tɛ̃́. Bə̀ nyǐ rə̀myɛ́ wɔ́ vwĩ̀ bə̀ zwə́l bə pə Cǐnnə Bə-zhɔ-zhe ne, jə̀-gwã̀ sõ tənà y wa, Efəratɛ bù-fwɛ̀lɛ̀ y nyí ni mú. ¹¹ Ezhibti kɛ̃ byǐ ǹ yə̀l bal párá, zɛ̃̀ ń vò Galaadɛ, ń zwẽ cə́m. E jà wɔ́ ǹ cìn ǹ nə́ ǹ lyɛ̀ɛ̀ ǹ pyà cə́mə́ nánzhəzhɔ̌ nánfò, lwar bə̀ mə̀myɛ́ mə̀dù ga wàr mɔ́ mə̀ la wárh yé. ¹² Nyǐ tenèsé lyì bí lwar ǹ cìzhìl ré yò, bə̀ ǹ cǐl ré sú lũ w púlə́púlə́ wə, bə̀ búlə́ kàndar rɛ́ òdù gakó n’ô dùr ò zhə̀r ò dõ ne ; rə̀ tó dwã rə̀ lwé tɛ̃̀. ¹³ Nyǐ Bə-zhɔ-zhe zɔ̀m ǹdə́ nyì-zwennə Zheremyi, bə̀ ń byili mú bə̀ Babyəlɔnɛ pyɔ̌ Nabəkɔdɔnɔzɔɔrɛ bàn bú ǹdə́ Ezhibti tənà yá. Bə̀-zhɔ-zhe wò mo bə̀ ń wál : ¹⁴ Zɛ̃̀-na, á bwə̀l Ezhibti tənà y wa, á bwə̀l Myəgədɔɔlɛ nɛ́, á bwə̀l Mɛmfyiisi ǹdə́ Təpənɛɛsɛ nɛ́ myɛ, á wɔ̀ : Zɛ̃̀ ń zhì dɛ̃̌ ! Tɛnɛ, bə̀ nyǐ búlə́ shù tú ò zhǐ o kə́kɛ́lɛ́ mɔ́ ! ¹⁵ Wɔ́ bə̀kɔ́n yil bə̀ zɔ ǹ búlə́ kàndar rɛ́ bə̀ m’e lyɛ̃ mɔ́ ? Bə̀ yə̀ ŋwɛ̀nɛ́ bə̀ zhì kẽlẽ. Nyǐ wɔ́ Bə-zhɔ-zhe ń yìrh be n ji tɛ̃́. ¹⁶ Ń ce bə̀ nánzhəzhɔ̌ tu tɛ̃́, bə tu dwã yó, bə zɛ̃̀ bə zhe : Bà-nà nə́ k’á kwɛ̃̀ nə́ vò nə́ dwí rí sono, nə́ gə́ lùl mə̀gã̌ tənà y w mɔ́, búlə́ shú w ò n’ô gwi mú yé né ! ¹⁷ Bə zhì gàà mɔ́ bə búbwéé bə wɔ̀ : Ezhibti pyɔ̌ Faraɔ̃, ǹ yẽ̌ kɔn lyɛ̃, ǹ zɛ̃̀ ń tàkwã ń nə́ ń ce sɔ̀. ¹⁸ Nyǐ à wɔ́ nã́nyì ! Wɔ́ pyɔ̌ mɔ́ ń zɔ̀m rə̀myɛ́, ń yil ré wɔ́ Bə-zhɔ-zhe, mɔ̀bɔ́ ń cǐ jàn cìnə́ bé gakó mó ! Nyǐ, zù-bal bànà, ǹdə Tabɔɔrɛ gə́ ŋwɛ́nɛ́ pyàr cəcəl w né ta, ǹdə Karəmɛl pyɔ w gə́ wɔ nə̀-fɔ̀lɔ̀ w yə́-pɛ̀lɛ́ w nɛ́ ta. ¹⁹ Ezhibti lyì, Ezhibti bə̀kɔ́ ! Zɛ̃̀ ń tɛnɛ ǹ zhĩĩ rí ǹ mə́ ǹ la yóm rɛ jè y mó ! Bə̀ Nɔfɛ m’a jǐrh gɔ-elũ èpòlò, bə̀ m’a ji w myǐn, lòlò kə́ ń tá ń la ò wẽ́ jǒm yé. ²⁰ Ezhibti nyɛ̌ ǹdə nə̀-cɛl tɛ̀bɛ́ rə̀ càn dɛ̃́dɛ̃́ ta…, sə cɔ̀rna mɔ́ la lũ jə̀-gwã̀ sõ shú n bà, ń yúwə́… ²¹ Shə̀dɛ́ɛ́sɛ́ bə̀ y’à kwè bə̀ n’ê kwɛ̃̌ Ezhibti ní mú, y’à wɔ́ ǹdə nə̀-byə-twə́ə́le tɛ̀bɛ́ bə̀ n’ê kɔ̀n cɛ̀nɛ̀ mɔ́ ta. Shə̀dɛ́ɛ́sɛ́ sə̀myɛ́ gakó kwɛ̃̀ sə dùr sə̀ yə̀ zhì yé, bə̀ sə̀ zwini rí dɛ̃ rɛ́ yúwə́. Bə̀ còrhò-tum pɔ yi rí yúmə́. ²² Ezhibti lyì bí shə̀dɛ́ɛ́sɛ́ j’a dùr sə̀ nèrh dweme n’ê dom tɛ̃́ ǹdə wɔ́ dɔm mə̀ n’ê nə́nǎ tɛ̃́ ta, bə̀ sə̀ zwə̀ bé y’à zɔ shə̀dɛ́ɛ́sɛ́ bə̀ m’ê bàn sɛ ǹdə́ dwə̌l ne ǹdə də̀-kàrna bə̀ bàn dǎr kǎ ta. ²³ Bə̀ n’ê kà Ezhibti tù wə́, ǹdə́ lò wàr ń nə́ ń zwì ò wẽ́ ga yírh wə ! Wɔ́ Bə-zhɔ-zhe ń zɔ̀m rə̀myɛ́ ? ²⁴ Bə̀ wɔ́ nunə nánjə̀jóló du səsɛ̀mɛ̀, lò wàr bə̀ yó ń la gál n lwar yé. ²⁵ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó wə̀lə̀ : Nyǐ à m’a pə còrhò-tum No cɔ w yi Amɔ̃ ǹdə́ Faraɔ̃ ǹdə́ Ezhibti tə̀nà y ǹd’ê pyǎ bɛ́ nɛ, ǹdə́ Faraɔ̃ lyì bí byɛ̀bɛ́ gakó bə̀ zhí mu ǹdə bə̀ yi ta mɔ́ myɛ nɛ. ²⁶ À m’a zə bɛ a ce Babyəlɔnɛ pyɔ̌ Nabəkɔdɔnɔzɔɔrɛ ǹdə́ ń tùntùnnə bé bə̀ n’ê pyà ń gu mú jɔ̃̀ wa ; rə̀myɛ́ gə rə̀ lyɛ̃ kwã nɛ́, numbyínsi m’a k’a bə̀ sə jòm Ezhibti ní ǹdə shãã ga mɔ́ ta. Wɔ́ Bə-zhɔ-zhe ń zɔ̀m rə̀myɛ́. ²⁷ À tùntùnnə Zhakɔbɛ, è gə wɔ́ ǹmyɛ́ yilə, ǹ bə̀ká dùr ywẽ yé, Esərayɛl, ǹ bə̀ká kəkə yé ! Nyǐ à m’a vwǎrh mɔ́ lũ w jàà kɛ̀bɛ́ è nyɛ wẽ́, À m’a vwǎrh ǹ nɛ̀mɛ́ nɛ́ tənà y kɛ̀bɛ́ bə̀ wɔ́ yómə́ è wẽ́ mó wə ; Zhakɔbɛ mà n ká n kwɛ̃̀ n bə̀ jè, n jòm shìrhə́ ǹdə́ yə̀-zùlə́ wẽ́, lò kə́ ń tá la mɔ jə́jɔ́ yé. ²⁸ Ǹmyɛ́ à tùntùnnə Zhakɔbɛ, ǹ bə̀ká dùr ywẽ yé, wɔ́ Bə-zhɔ-zhe ń zɔ̀m rə̀myɛ́ ; bə̀ nyǐ à ŋwɛ́nɛ́ ǹdə́ mɔ́. À m’a cɔ̀ tənèsé shɛ̀bɛ́ à y’à jì mú a ce sə̀ wẽ́ mó ; sə ǹdə́ rə̀myɛ́ ga, à m’a pɔ̃́ còrhò-tum ǹdə́ cángá, à t’â la mɔ́ yõ̌ nánfò yé.