¹ À yẽ̌ lyì bí byɛ̀bɛ́ bə̀ y'à t'â pyà bə̀ la sú à wu mú pyà nɛ, à yẽ̌ lyì bí byɛ̀bɛ́ bə̀ y'à t'â pyà nɛ mɔ nə nɛ, à wə̀l dwí tɛ̀bɛ́ rə̀ y'à t'â byẽ̀ à yil ré mó ne: «Nyǐn ni, nyǐn ni.» ² Dɛ̃ gakó, à j'a cèlè à jɛ̃̀ y a ce dwí rí tɛ̀bɛ́ rə̀ n'ê cẽ à nyí ni mú ni, a ce lyì byɛ̀bɛ́ bə̀ kwè sɔ́má y kɛ̀bɛ́ è bə càn mɔ́ nɛ, byɛ̀bɛ́ bə̀ j'a pú bə̀ cìcì wun bùlə̀ né kùr mó ne. ³ Rə̀ wɔ́ dwí tɛ̀bɛ́ rə̀ n'ê ce à lyim j'â n'ê yì, pwə̀nə́ pwə̀nə́, twéé twéé gakó: bə̀ n'ê zwə́l vwə̃̀ báárɛ wẽ́, bə̀ n'ê ji nǔrh sǝ̀ lwẽ́ nã́nyǝ̀nyɛ̀lɛ́ myǐn bɔ-kwǎ yó, ⁴ bə̀ n'ê zwì bə̀ jòm lú-bɔ̀là wẽ́, bə̀ n'ê zwɛ̃̀ myə̀lə́ wẽ́, bə̀ n'ê dɔ̀m kùkú nàmá, bə̀ kùjú nə̀zhĩ̌sí j'a sú ǹdə́ kùjú kɔ̀bɔ́ ò zhe jìmdi; ⁵ bə̀ n'ê wə̀lə̀: «Dɛ̃̌ ǹ cìnə̀, bə̀k'á bwəlse à yala nɛ yé, b'à m'a ce ń jǐrh lò mó mɔ̀bɔ́ bə̀ n'ê nyàm ǹdə́ nyɔ̀mɔ̀ nánfɔ̀lɔ̀!» Tũ̀twə̃̀ə̃̀ né nə̀myɛ́ mɔ́ ce à myə̀lə́ né n'ê swí ǹdə́ nyɛ̀rh, ǹdə́ myǐn mə̀ j'â zhe, dɛ̃ gakó; ⁶ Sə bə̀ dɛ̃̌, nyǐ rə̀ kɛ̃, à yé né, rə̀myɛ́ mɔ́ ce à t'â la cẽ kɔn wɔ̀rhɔ́ yé, a cẽ be rə cǎrh yé, a cẽ be rə cǎrh kɔn búl e yí bi yé, ⁷ á lwɛlɛ rɛ́ ǹd'á nàmbala bɛ́ lwɛlɛ rɛ́ ga, rə̀ ga j'a tó dwã. À m'a pə lyì bí byɛ̀bɛ́ bə̀ y'à n'ê ji nǔrh sǝ̀ lwẽ́ nã́nyǝ̀nyɛ̀lɛ́ myǐn pyàr rɛ́ yó, è jà bə̀ y'à n'ê fuuli ni pyǎlsɛ́ yó mó, kwǎndɛ rə búl rə yí bi, rə mɛrhɛ bə̀ tũ̀twĩ̀ĩ̀ rí rə̀ lyɛ̃ mɔ́, wɔ́ Cinu nyí rí. ⁸ Nyǐ Cinu nyí rí: Ǹdə bə̀ gə tú bə̀ púrí də̀vɛ̃́-cǒ-byǎ bɛ́ porho w súwə́, bə zɛ̃̀ bə wɔ̀: «Bə̀k'á cɔ̀ w yé, bə̀ kɔn rɛ́ tɛ̀bɛ́ rə̀ càn mɔ́ wɔ ò wẽ́» né, wɔ́ èta àmyɛ m'a wɛ̀rhɛ́ nɛ́ à tùntùnnə bé yilə, mùnì ga à bə̀k'a cɔ̀ bə̀ yó w ga yé. ⁹ À m'a ce dwí shí Zhakɔɔbɛ wẽ́, à m'a ce lò mó mɔ̀bɔ́ ń mà n zwẽ à pyàr rɛ́ n cìní mú shí Zhəda zhə̀n ga: à lyì bí byɛ̀bɛ́ à cír mú m'a zwẽ re bə cìní, à tùntùnnə bé m'a jòm gàà. ¹⁰ Sarɔ̃ m'a jǐrh və̌-ywàálɛ gɔ-dɔ́m-jàà, Akɔɔrɛ pyə̀-gɔ́rɔ́ w m'a yə̀ vwàmá nánfwààlɛ́ pyə̀nə̀, à dwí rí tɛ̀bɛ́ rə̀ m'a pyà nɛ mɔ́ nɛ sãɔ̃ yilə. ¹¹ Sə ámyɛ̌ byɛ̀bɛ́ á yẽ̌ Cinu ni mú, á swě á Yi pyɔ̀ w yò mó, á n'á tɛnɛ kùjú á pɛ Gaadɛ nɛ mɔ́, á zɛ̃̀ á gùlí sáná dwã nɛ á sú ku á la tɛ̃́ ló á pə Meni ni mú, ¹² àmyɛ́ j'â n'â tɛnɛ ába à la búlə́ shù ni pɔ: á púlə́púlə́ m'ǎ jòm á nə̀dwə́nə́ yó, bə zwə́l ába! À zhə̀n ga byẽ̀ ába, sə á yə̀ shɛ̀ yé; a zɔ̀m a ce ába, sə á yə̀ cili yé. Á wɛ̀rhɛ́ kɔn rɛ́ tɛ̀bɛ́ rə̀ wɔ́ lwɛlɛ à yírh wə, á zɛ̃̀ á cír kɔn rɛ́ tɛ̀bɛ́ à bə só mó. ¹³ Rə̀myɛ́ ce, nyǐ Cinu Yi nyí rí: Nyǐ à tùntùnnə bé m'a jí, sə ámyɛ̌ m'ǎ yì nɔrh; nyǐ à tùntùnnə bé m'a nyɔ̀, sə nə̀nyɛ̀lsɛ̀ m'a zə ámyɛ̌; nyǐ à tùntùnnə bé m'a fùù ǹdə́ wu-nyɔ̃̀ nánfɔ̀lɔ̀, sə cìzhìl m'a zə ámyɛ̌; ¹⁴ nyǐ à tùntùnnə bé wu-nyɔ̃̀ w m'a ce, bə mà wu-nyɔ̃̀ búbwéése, sə ámyɛ̌ wu-zhùlù w m'a ce, á mà wu-zhùlù búbwéése, á wu-zhùlù w yilə, zhə̀n ga á wu gə́ m'a lo mó ce, á m'ǎ wǔrh! ¹⁵ À lyì bí byɛ̀bɛ́ à cír mú m'a zə á yil ré bə m'e súlí bə bwəl lwɛlɛ, bə̀ m'ê zhe: «Bə̀ Cinu Yi ce ń cì!» Sə wɔ́ Yil rə̀ j'â wɔ́ rə̀ dúdú, bə̀ m'a byẽ̀ bə m'e bwəl cɛ̀nɛ̀ à tùntùnnə bé yilə; ¹⁶ lò mɔ̀bɔ́ gakó ń nə́ ń yǎl n bwəl cɛ̀nɛ̀ n pə ń cìn ni cɛ y yó mó, mà n zə « zhə̀n rɛ́ Yi rí» n mə n bwəl, lò mɔ̀bɔ́ gakó ń la nyí dũ̌ cɛ y yó mó, mà n zə «zhə̀n rɛ́ Yi rí» n mə n dwĩ̀ ri. Zhə̀n ga, bə̀ m'a swě shãã shãã màbyə́ə́ré yò, zhə̀n ga rə̀ m'a shèè à yírh wə. ¹⁷ Nyǐ à m'a wɛ̀rhɛ́ dɛ̃̌ nándwǝ̃̀ ǹdə́ cɛ nándwǝ̃̀; èta bə̀ k'ê t'â la yi rí tɛ̀bɛ́ rə̀ lyɛ̃ mɔ́ yò lyǐrh yé, rə̀ yò w k'ô t'â bàn bùlə̀ né wẽ́ myɛ yé. ¹⁸ Sə è gaga mɔ́ wɔ́ wu-nyɔ̃̀ ǹdə́ fùwə́ nánfɔ̀lɔ̀ rə̀ m'a j'â ŋwɛ́nɛ́ twéé twéé mó, à la ce rə yə̀ nɛ́: fùwə́ nánfɔ̀lɔ̀ w kɔ̀bɔ́ à la ce o yə̀ nɛ́ mɔ́ m'a yə̀ Zhərəzalɛm, sə wu-nyɔ̃̀ w m'a yə̀ è dwí rí; ¹⁹ zhə̀n ga, à m'a fùù dɛ̃́dɛ̃́ Zhərəzalɛm shò kwã nɛ́, sə à wu m'a yə̀ nyàn à dwí rí shò kwã nɛ́! Bə̀ j'â k'ê t'â la cìlə́ ǹdə́ wìísi nyɔ̀ɔ̀ ò wẽ́ yé. ²⁰ Byì-shɛ̀mɛ́ k'ê t'â la cú è lul ré dwã màngɛlɛ́ kwã, ò wẽ́ yé, náncɛ myɛ t'â la cú ò wẽ́ ǹd'ê dwã nɛ́ yə̀ pyìrh yé; bə̀ lò mɔ̀bɔ́ ń mà n cì ń byinə zɔ̌m yó w mó mà n yə̀ bə̀ gakó nyɛ̃́ mɔ́, sə lò mɔ̀bɔ́ ń yó j'â bə nyɛ̀ bə̀ gakó wẽ́ mó, wɔ́ ń byinə zɔ̌m yó w ń mà n já n lyɛ̃̀ kùr ní. ²¹ Bə̀ m'a lù jìrh, sə bə̀ m'a jòm sə̀ wẽ́, bə̀ m'a zhele də̀vɛ̃́-cèmé, sə bə̀ m'a jí nə̀ byǎ bɛ́; ²² bə̀ k'ê t'â la lú, bə pə lò dõ ne n jòm yé, bə̀ k'ê t'â la zholo bə pə lò dõ ne n jí yé, bə̀ cǒ byinə né gə́ wɔ́ nɛ́, à dwí rí myɛ byinə né m'a yə̀ èta, à lyì bí byɛ̀bɛ́ à cír mú m'a jí bə̀ jɛ̀rh tumə né nyɔ̀ɔ̀rhɛ́. ²³ Bə̀ k'ê t'â la bə̀ cìn lyɔ̀ɔ̀ nánfò yé, bə̀ k'ê t'â la byǎ lúl bə pə bə gurhi yé, bə̀ bə̀ m'a yə̀ lyì bí byɛ̀bɛ́ Cinu cĩ́ bwəl bə̀ yó mó dwí rí, sə bə̀ byǎ bɛ́ m'a mɛ̃ ǹdə́ bɛ. ²⁴ Àmyɛ m'a shɛ̀ bɛ, ǹdə́ bə̀ gaga mɔ́ gwẽ̌ yə̀ ne byẽ̀ yé, à m'a dámǎ a cili bə̀ zɔ̀mà nɛ́ a zhɛ̀ ǹdə́ bə̀ gaga mɔ́ gwẽ̌ n'ê zɔ̀mà! ²⁵ Gɔ-kùlí ǹdə́ pyì-bwɛ̀lɛ́ m'a tó dwã rə dɔ̃̀ gɔ; bɔrɔ m'a dɔ̃̀ gɔ-cílə́ ǹdə nɔ̃ ta; sə è gə wɔ́ dɔm mɔ́ myɛ̌ yilə, shó w ò m'a yə̀ mə̀ kùjú. Lwɛlɛ də́-byǐ ǹdə́ cɔ̌ tũ̀twĩ̀ĩ̀ də́-byǐ k'ê t'â la tũ̌ à Yi pyɔ̀ w púlə́púlə́ yó yé, wɔ́ Cinu nyí rí.