¹ ǹ yà ǹ m'ǎ yə̀ ǹdə myǐn mɔ̀bɔ́ mə̀ n'ê jí swààlɛ ta, ń yə̀ ǹdə myǐn mɔ̀bɔ́ mə̀ n'ê ce nàná n'ê shɛ̃̀ ta, ǹ la ń mə́ ce ǹ búl-dwã bɛ́ lwar ǹ yil ré; wu-zɛ̃̀ɛ̃́ nánfɔ̀lɔ̀ y'à m'a gu tənèsé ǹ yé né, ² ǹ gə yà ǹ nə́ ǹ wɛ̀rhɛ́ wẽ̀ tɛ̀bɛ́ rə̀ n'ê zɛ̃̀ wu ni, nə́ t'á dɛ̃̀ mɔ́: ǹ yà ǹ m'ǎ só tɛ̃́, sə pyàr rɛ́ y'à m'a zhízhǐ ǹ yé né. ³ Bə̀ j'â gwẽ̌ yə̀ nyɛ̀ɛ̀, bə̀ j'â gwẽ̌ yə̀ nyɛ̀ɛ̀ bə̀ n'ê wə̀l myɛ, yírh myɛ j'â gwẽ̌ yə̀ nɛ, bə̀ yi rə̀dù ga wɛ̀rhɛ́ kɔn rə pə lò mɔ̀bɔ́ ń zɔ rə̀ zhə̀n nɛ yé, è gə də̀ ǹmyɛ́ dúdú sásá. ⁴ Ǹ nə́ ǹ jàr lò mó mɔ̀bɔ́ ń wu nyɛ̀, cángá tũ̀twĩ̀ĩ̀ rí ń nə́ ń twĩ̀ mú yilə, lyì bí byɛ̀bɛ́ bə̀ n'ê lyǐrh ǹ yò ǹ sɔ́msɛ́ yó mó. Nyǐ mú ǹ lyim zɛ̃̀ rə̀ n'ê yì, nə́ gə́ ywə̀r nə́ yẽ̌ sɔ́msɛ́ nɛ mɔ́ yilə; e j'à wɔ́ shãã ga sɔ́msɛ́ sə̀myɛ́ mɔ́ yó nə́ m'ǎ nə nə́ cìn ní. ⁵ Nə́ gakó púlə́púlə́ yàl ǹdə jìmdi cə́bal mɔ́ ta, nə́ cángá tũ̀twə̃̀ə̃̀ né gakó yàl ǹdə gàndɛ́ tɛ̀bɛ́ lòlò tá ń yǎl n yí rə̀ nyí ni mú ta; Nə́ gakó púlə́púlə́ pyɛ̀nɛ̀ ǹdə vɔ w ta, nə́ lwɛlɛ rɛ́ n'ê pwà nə́ba rə̀ m'ê lyɛ̃ ǹdə zho w ta. ⁶ Lòlò kə́ ń tá ń byẽ̀ ǹ yil ré ń mə́ ń lwə̀l sɛ̃ɛ̃́ yé, lòlò kə́ ń tá ń bùrhì sə n cĩ́ mú ri yé, bə̀ ǹ shèè nə́ba ǹ yé-zwã̌ yá, ǹ yẽ̌ nə́ba nə́ tu nə́ lwɛlɛ rɛ́ jɔ̃̀ wa, mùnì ga nə́ j'á jǐrh lwɛlɛ cìnə́ námpúm. ⁷ E jà wɔ́ ǹmyɛ́ ǹ já ǹ wɔ́ nə́ Da mɔ́, Cinu; nə́myɛ̌ wɔ́ dɔ wá, sə wɔ́ ǹmyɛ́ ǹ nə́ ǹ mwɛ nə́ba, nə́ gakó j'á wɔ́ ǹmyɛ́ jɛ̃̀ y tum rí kɔna. ⁸ Cinu, bə̀k'á kwè lyim kɔn lyɛ̃ cɛ nɛ yé, bə̀k'á já ǹ nə́ ǹ lyǐrh nə́ lwɛlɛ rɛ́ yò, kɔn j'â m'ê la gaga yé. J'á nyì wé: wɔ́ nə́myɛ̌ gakó nə́ j'á wɔ́ ǹ dwí rí! ⁹ Ǹ Yi cɛmɛ nɛ́ wɔ́ gɔ-elũ èpòlò, Səyɔ̃ wɔ́ gɔ-elũ èpòlò, Zhərəzalɛm wɔ́ wu-zhùlù jàà. ¹⁰ Ǹ cɛmɛ nɛ́ jǐrh èpòlò, Sǝnyɔ̃ wɔ́ èpòlò, Zhǝrǝzalɛm zhǐ ò dúdú. ¹¹ Nə́ Yi jì y è y'à càn dɛ̃́dɛ̃́ mɔ́, nə́ dabá gə́ y'à n'ê nún ǹ shə̀nə̀ né mə̀gã̌ mɔ́, jú myǐn lyə́m lyə́m, kɔn rɛ́ tɛ̀bɛ́ nə́ y'ǎ só kɔn lyɛ̃ cɛ nɛ mɔ́, j'a cɔ̀ kókó! ¹² Sə rə̀myɛ́ mɔ́ gakó yé né, ǹ nə m'ǎ ŋwɛ̀nɛ́ ń zə ǹ cìn Cinu? Ǹ tá ǹ la kaka wɔ̀rhɔ́, ǹ m'ǎ ce nə́ba cìzhìl kɔn lyɛ̃ cɛ nɛ?