¹ Lò mó mɔ̀bɔ́ ń shí Edɔm tənà y wa, Bɔsəra cɔ w wa, ǹdə́ shə̀shɛ̀mà ń gàndɛ́ nɛ, ń nə̀bán nyàl ń kàmə̀zwǐ y kùr wə, ń jàn rɛ́ nánfɔ̀lɔ̀ w ce n kwélé mó wɔ́ mɔ̌ lò? Wɔ́ àmyɛ́ à n'â zɔ̀m cángá tũ̀twĩ̀ĩ̀ rí zɔ̀mà, à n'â bwí búlə́ mùnì ga a zwẽ mó. ² È nə wɔ́ byè yil ǹ gɔ̀nɔ̀ w zhe shə̀shɛ̀mà, byè yil ǹ kàmə̀zwǐsí nyɛ̌ ǹdə lò mɔ̀bɔ́ ń nə́ ń pyárh də̀vɛ̃́-cǒ byǎ bɛ́, ń wɔ cǒ byǎ bɛ́ pyárh ku w wẽ́ kàmə̀zwǐsí ta? ³ À dúdú à pyárh də̀vɛ̃́-cǒ byǎ bɛ́, dwə́ né cəcəl wə, lò mə̀dù ga yà ń tɛ̀nɛ́ ǹdə́ nɛ yé; sə à lyim rí gə́ y'à zɛ̃̀ rə̀ n'ê yì mú ce, à nɔ̀m bɛ tɛ̃́ a pyárh, à lyim-cəcɔ̌ w ce, à zə nə̀kúl a tə́ bɛ; bə̀ nɛ̃̌ mɔ́ sàrh mə ló à kàmə̀zwǐsí yó, à gàndɛ́ gakó j'a tə̀ tə̀. ⁴ À wu w wẽ́, è y'à wɔ́ jim cṹ dɛ̃, byin rí tɛ̀bɛ́ à y'à mə̌ s'a ce à dwí rí nə rə̀ cìn mú y'à yúwə́. ⁵ À j'a nyǐ nyǐ: sɛ̃ɛ̃́ də́-byǐ ga y'à tɛ̀nɛ́ yé! à wu j'a zhìlì: lòlò tɛ̀nɛ́ ń mà n ji jɛ̃̀ yé! Rə̀myɛ́ yó, à jɛ̃̀ y zwẽ ne à lyim-cəcɔ̌ w yàl à sanna mɔ́. ⁶ À lyim rí ce, à j'a nɔ̀ dwə́ né tɛ̃́ a bɔbwɛlɛ, à lyim-cəcɔ̌ w ce, à j'a ce bə nyɔ̀ də̀vɛ̃́ y e zə bɛ: à yìrh bə̀ còrhó kɔn rɛ́ a ji tɛ̃́! Da mɔ́ nɔ̀nɔ̀-dǔr mú ǹdə́ ń byǎ bɛ́ zúzúnú wə́ ⁷ À m'a lyǐrh Cinu ywè-ècɛ̀nà nɛ́ yò, shə̀nə̀ né nyɛ̀bɛ́ nə̀ n'ê shènè Cinu mú yò, kɔn mɛrhɛ dwã ǹdə kɔn rɛ́ tɛ̀bɛ́ gakó Cinu wɛ̀rhɛ́ nə́ yil mú, ń sónó nánfɔ̀lɔ̀ w ń mə n twĩ̀ ǹdə́ ń wu-bɔ̀nɔ̀ w gə́ wɔ́ nɛ́, Esərayɛl dwí rí yil mú, ń ywè-ècɛ̀nà nɛ́ j'â já dɛ̃́dɛ̃́. ⁸ Ń yà ń wə̀lə̀ «Zhə̀n ga, bə̀ j'â wɔ́ à dwí, byǎ byɛ̀bɛ́ bə̀ t'â myìnì mú», sə ń yàl Zwennə bə̀ yilə, ⁹ bə̀ zúzúnú w gakó wẽ́. È də̀ lò ń twĩ̀ ń jàà wa, ráá lò ń twĩ̀ n vò n cĩ́ nyí yé, wɔ́ ńmyɛ̌ cìcì ń zwẽ be: wɔ́ ńmyɛ̌ cìcì ń zwẽ be ń sónó w ǹdə́ ń nɔ̀nɔ̀-dǔr mú yilə. Ń kwè be, ń zhĩ bi byinə né nyɛ̀bɛ́ nə̀ lyɛ̃ mɔ́ dwã nɛ́ gakó. ¹⁰ Sə bə̀myɛ́ zɛ̃̀ bə cẽ, bə̀ zhìlì ń Yi Eshirhə y wu ni. Rə̀myɛ́ ce n já n ká n jǐrh bə̀ zù-bal, ń cìcì mú já n zɛ̃̀ ń nə́ ń bwí ǹdə́ bɛ. ¹¹ Rə̀myɛ́ yó, ń dwí rí j'a lyǐrh Muyiisi yi rí dwã nɛ́ yò: «Yẽ̀ lò mó mɔ̀bɔ́ ń ce ń vwàmá nɛ́ kálna mɔ́ ká n shí nə̀-fɔ̀lɔ̀ w w n du mú nə ŋwɛ́nɛ́? Yẽ̀ Mɔ̀bɔ́ ń co ń Yi Eshirhə y ń wẽ́ mó nə ŋwɛ́nɛ́? ¹² Mɔ̀bɔ́ ń ce ń jɛ̃̀ y è n'ê jə́jɛ̀mɛ́ mɔ́ vò Muyiisi jə̀-jĩ́ sõ mó? Mɔ̀bɔ́ ń bɔ̀n nàná bɛ́ dwã nɛ bə̀ yé né, mùnì ga n ce ń yil du twéé twéé yil mú? ¹³ Mɔ̀bɔ́ ń ce bə tó nə̀-fɔ̀lɔ̀ w nánlyilyùmú w bə byɛrhɛ mɔ́? Bə̀ j'â yə̀ bə̀ nə̀rh mà yé, ǹdə eshã ta, gɔ-elũ èpòlò w wə, ¹⁴ Cinu Eshirhə y y'à zə bɛ è m'ê la shìrhə́ jàà wa, ǹdə vwàmá nyɛ̀bɛ́ nə̀ n'ê cə́cèlé nə̀ la vɔlɔ w ta.» Wɔ́ èta dõ ǹ kál ǹ dwí rí ní, ń mə́ ce ǹ yil rí j'a du ǹdə́ còrhó. ¹⁵ Zhǐ dɛ̃̌-yi rí wə, ǹ Yi pyɔ̌-kɛ̀lɛ́ y è j'â càn dɛ̃́dɛ̃́ mɔ́ wẽ́, ń nyǐ nyì wé: yẽ̀ ǹ sónó námməlyãlyɔ̃ɔ̃ w ǹdə́ ǹ wu-jɔ̀ wá, ǹdə́ ǹ nɔ̀nɔ̀-dǔr mú nə ŋwɛ́nɛ́? ǹ nə cə̀r ǹ wu-bɔ̀nɔ̀ w ǹ zhe à yil mú ń cĩ́ ǹ wẽ́ nà? ¹⁶ E jà wɔ́ ǹmyɛ́ ǹ wɔ́ nə́ Da mɔ́! Zhə̀n ga, Abəraam já ń yə̀l nə́ pár yé, Esərayɛl myɛ kə́ ń yə̀l nə́ pár yé; wɔ́ ǹmyɛ́ Cinu, ǹ wɔ́ nə́ Da mɔ́, nə́ twéé twéé ga Zwennə mó, wɔ́ rə̀myɛ́ rə̀ wɔ́ ǹ yil ré. ¹⁷ Cinu, è nə wɔ́ byè yil ǹ ce nə́ n'é yə́yɛ́lɛ́ dɛ̃̌, nə́ nyɛ ǹdə́ ǹ sɔ́msɛ́, ń ce nə́ wun ní kù, nə̀ k'ê wàr nə̀ n'ê nyàm mɔ́? K'á kwɛ̃̀ ń bà, ǹ tùntùnnə bé yilə, ǹ cəl-tənà y kwálsɛ́ yilə. ¹⁸ Ǹ Yi dwí rí cìní rə̀ cəl-tənà yá, sə kɔn yə̀ dɛnɛ myɛ yé; nə́ zwə̀ bé nɔ̀m ǹ còrhó-jì y tɛ̃́ bə bɔbwɛlɛ! ¹⁹ Sə nə́ gə́ wɔ́ lyì bí byɛ̀bɛ́ ǹ kə́ ǹ bə ŋwɔ̀nɔ́ zhe bə̀ yó wə, lyì bí byɛ̀bɛ́ ǹ yil ré k'ê t'â byẽ̀ bə̀ yó mó jàà y búl è nyɛ. Àá, ǹ gə y'à j'á kǎr dɛ̃̌-yi rí, ń só tɛ̃́, pyàr rɛ́ y'à m'a zhízhǐ ǹmyɛ́ yé né,