¹ À t'â la à nyí shũ̌ Səyɔ̃ shò kwã nɛ́ yé, à t'â la shɛ́ɛ́ jǒm Zhərəzalɛm shò kwã, kɔn m'e yí è cángá tũ̀twĩ̀ĩ̀ rí k'a du ǹdə pwẽ̀ ta, sə è cìn-nɛrɛ́ y kwɛ̃́ e zə ǹdə pàntɛ́mɛ́ ta yé. ² Tənèsé m'a nə ǹ cángá tũ̀twĩ̀ĩ̀ rí, pyǎ bɛ́ gakó myɛ nə ǹ zùwə́ yə́. Bə̀ m'a byẽ̀ mó ǹdə́ yil nándùl, yil ré tɛ̀bɛ́ rə̀ la Cinu nyú w shú mú. ³ Ǹ m'ǎ yə̀ còrhó yə́-pú Cinu jɔ̃̀ wa, ń yə̀ pyɛ̀lɛ̀ yó-bɔrɔ́ ǹ Yi rí jə̀-tarh wa. ⁴ Bə̀ k'ê t'â la mɔ́ byõ̌ bə̀: «Kɛ̃ mɔ̀bɔ́ bə̀ zhɔ̃̀ mɔ́ yé», bə̀ k'ê t'â la ǹ cɛ y nɛ wál bə̀: «Wu-zhùlù cə́kɛ̃» yé, sə bə̀ m'a byẽ̀ mó bə̀ «Kɛ̃ mɔ̀bɔ́ ń nə́ ń pɛ nɛ wu-nyɔ̃̀ mɔ́», bə zɛ̃̀ bə byẽ̀ ǹ cɛ y bə̀ «Kɛ̃ mɔ̀bɔ́ bə̀ vùr mú», bə̀ ǹ m'ǎ yə̀ Cinu wu-nyɔ̃̀ kɔna, sə ǹ cɛ y m'a nə byal. ⁵ Ǹdə ébɔ́-dǎl mɔ́ gə́ yà n jí ń kɛ̃ mɔ́ nɛ́, èta ǹ byǎ bɛ́ myɛ m'a jí mú ní, ǹ Yi rí wu m'a zə nyàn ǹdə́ mɔ́, ǹdə ébɔ́ wu gə́ y'a zə nyàn ǹdə́ ń bóm mɔ̀bɔ́ ń pyà mɔ́ nɛ́. ⁶ À ce yìlnə j'â zhǐ ǹ byíl-fwàlsɛ́ yó, Zhərəzalɛm; cəcɛ̃ y námpúm ǹdə́ nə̀nyɔ́nɔ́ w námpúm, bə̀ bə mə̌ sə bə shĩ̌ bə̀ nyí yé: «Ámyɛ̌ byɛ̀bɛ́ á n'á ce Cinu lyǐrh mú, shìrhə́ j'â tɛ̀nɛ́ á yil yé! ⁷ Á bə̀k'á yẽ̌ ńmyɛ nɛ n já n shǐrh yé, kɔn m'e yí ń gə́ mà n ce Zhərəzalɛm jòm cɛ̀nɛ̀, n súlí n ce e yə̀ ‹còrhó kɔn cɛ yó mó›.» ⁸ Cinu zə ń jə̀-jĩ́ y ǹdə́ ń vɔ̃̀ w ò zhe jàn mɔ́ n mə n bwəl nyí n wɔ̀: À j'â k'â t'â la ǹ bə̀lɛ́ y ǹ zwə̀ bé nə pɔ e yə̀ bə̀ kùjú gaga yé, zhə-bal mɔ́ byǎ bɛ́ j'â k'ê t'â la ǹ də̀vɛ̃́ y kɛ̀bɛ́ ǹ lyɛ̀ɛ̀ è yil mú nyɔ́ gaga yé. ⁹ Sə wɔ́ lyì byɛ̀bɛ́ bə̀ kwar bə̀lɛ́ y mɔ́ bə̀ m'a zə y bə m'e kɔ̃̀ bə̀ cìnə̀, sə bə̀ m'a cèrhé Cinu, lyì bí byɛ̀bɛ́ bə̀ pɔ̌r də̀vɛ̃́-cèmé né byǎ bɛ́ mɔ́, m'a nyɔ̀ nə̀ də̀vɛ̃́ y à jì y kɔ̀nɔ́ w wẽ́. ¹⁰ Du-nə, tó-nə bwə̀rsé á du, pul-nə sɔ́má, dwí rí sɔ́má yá, shĩ-nə, shĩ-nə sɔ́má y gwáárɛ́, pyìlì-nə y ǹdə́ nə́kulə, cìì-nə myɔrhɔ tɛ̃́ dwə́ né yé né. ¹¹ Nyǐ kɔn tɛ̀bɛ́ Cinu nə́ ń byili, rə̀ yú lũ w cə-yala gakó mó: Wál-na Səyɔ̃ bə̀kɔ́ mɔ́ nɛ: Nyǐ ǹ zwennǝ mó yúwǝ́, kwǎndɛ́ ŋwɛ́nɛ́ ń sono, sǝ còrhò-tum b'a jɛ̀rɛ̀ rǝ yí. ¹² Bə̀ m'a byẽ̀ be bə̀ «Yi lyì », «Lyì byɛ̀bɛ́ Cinu zwẽ mó», sə bə̀ m'a byẽ̀ ǹmyɛ́ bə̀ «Cɔ kɔ̀bɔ́ bǝ̀ pyà mɔ́», «Cɔ kɔ̀bɔ́ bə̀ yə̀ yẽ̌ mɔ́».