¹ Cinu Yi Eshirhǝ y ŋwɛ́nɛ́ ǹdǝ́ nɛ. Zhə̀n ga, Cinu cír ni, ń twĩ̀ ni b'à zhəl a cĩ́ wu-nyɔ̃̀ nyí nǝ̀mwà bɛ́ nɛ, s'a shíshéré lyì bí byɛ̀bɛ́ bə̀ wun lo mó wun ni; s'a bwə̀l a byili lyì bí byɛ̀bɛ́ bǝ̀ zɔ bɛ yómə́ mó ne bə̀ bə̀ b'a nə bə̀ cìnə̀, s'a byili lyì bí byɛ̀bɛ́ bə̀ ŋwɛ́nɛ́ byǝ̀nǝ́-jù w mú ni bǝ̀ bǝ̀ yírhə́ b'a nə pwẽ̀ ré, ² s'a bwǝ̀l Cinu nɔ̀nɔ̀-dǔr byin rí a byili ǹdə́ nə́ Yi rí jim cṹ dɛ̃ rɛ́, s'a pə wu-jɔ̀ lyì bí byɛ̀bɛ́ bə̀ wɔ cu wu-zhùlù wẽ́ mó ne, ³ s'a pú pyɛ̀lɛ̀ yə́-pú Səyɔ̃ lyì bí byɛ̀bɛ́ bə̀ wɔ cu wu-zhùlù wẽ́ mó ne, a pú bi pyɛ̀lɛ̀ yə́-pú òmyɛ́ mɔ́ tɔ̀mɔ̀ w jàà wa, a ló nwə̃̌ bə̀ yó wə, è n'ê byili wu-nyɔ̃̀ wá, sə è də̀ wu-zhùlù yé, a zù bi gɔ̀nɔ̀ w kɔ̀bɔ́ ò tó còrhó pɔ nɛ́, ò də̀ wu-zhùlù gɔ̀nɔ̀ yé. Bə̀ m'a ce bə̀ yil bə̀ «Cángá tũ̀twĩ̀ĩ̀ tərəbɛ̃́təbá, Cinu cèmé né, nə̀ mə̌ sə nə ce ń zùwə́ y du mú». ⁴ Bə̀ m'a k'a lù shãã shãã jì-bwə̀r ré bə cĩ́ dɛ̃̌, bə̀ m'a k'a lù jààsɛ́ shɛ̀bɛ́ lyì bí y'à wǔr bə m'e pə wu-zhùlù nánfɔ̀lɔ̀ w bə̀ nàmbala bɛ́ nɛ mɔ́ bə cĩ́ dɛ̃̌, bə̀ m'a k'a lù cɛmɛ nɛ́ nyɛ̀bɛ́ nə̀ y'à cɔ̀ mɔ́ nə yə̀ nándùn, jì-bwə̀r ré tɛ̀bɛ́ rə̀ j'â ŋwɛ́nɛ́, rə̀ byinə né j'a pú pú dwã nɛ mɔ́. ⁵ Lyì bə̀ m'a shí jààsɛ dúdúmə́ dúdúmə́ m'a yìlì á və̌-ywàálɛ́ bə pə nɛ gɔ nə dɔ̃̀, zhə-bal mɔ́ byǎ bɛ́ m'a vɔ̀ á kálsɛ́, bə súlí bə nyǐ á də̀vɛ̃́-cèmé né cɛsɛ́ yò, bə pə ába. ⁶ Sə è gə wɔ́ ámyɛ̌ yilə, bə̀ m'a byẽ̀ ába bə̀ «Cinu Vwĩ̀-zwə́lnə», bə̀ m'a ce á yil bə̀ «Lyì bí byɛ̀bɛ́ bə̀ n'ê twĩ̀ nə́ Yi rí còrhó tumə né»; á m'ǎ jí tə̀nèsé nə̀cɛ̀ndɛ́, sə á m'ǎ cèrhé á cìnə̀, á gə́ ce sə̀ còrhó w jǐrh ámyɛ̌ còrhó mó yilə. ⁷ Á cìzhìl nɔ twər rə̀lyè nyǎn rɛ́ jàà wa, lyì bí myɛ tùùrhí súlí rə yə̀ á cəl ré jàà wa, á b'ǎ nə cələ kùrə̀ nə̀lyè bə̀ cɛ y wẽ́, sə shãã ga wu-nyɔ̃̀ nánfɔ̀lɔ̀ w m'a yə̀ á kɔn rɛ́ tɛ̀bɛ́ á j'á zhe twéé twéé mó. ⁸ Bə̀ àmyɛ́ Cinu, à j'â só kɔn rɛ́ tɛ̀bɛ́ rə̀ mə̌ mɔ́, à súl ŋwɔ̀lɛ̀ rɛ́ rə̀ tó ǹdə́ myìnù, à m'à j'â n'â pɛ á nyɔ̀ɔ̀rhɛ́: à m'a zə dɔbrɛ tɛ̀bɛ́ rə̀ m'à j'â ŋwɛ́nɛ́ twéé twéé ǹd'ába. ⁹ Á byǎ bɛ́ yil m'a du tənèsé gakó wẽ́, á byǎ bɛ́ byǎ bɛ́ yil m'a du dwə́ né wẽ́; lyì bí byɛ̀bɛ́ gakó bə̀ m'a nə bɛ mɔ́ m'a lwar bə̀ bə̀ wɔ́ dwí tɛ̀bɛ́ Cinu cĩ́ bwəl rə̀ yó. ¹⁰ À wu j'â nyɛ̀ dɛ̃́dɛ̃́, ò j'â búl ò nyɛ̀ zhə̀n zhə̀nà, Cinu yilə, à wu w n'ô fùù ǹdə́ wu-nyɔ̃̀ nánfɔ̀lɔ̀ à Yi rí yilə, bə̀ rə̀ zù ni cìn-nɛrɛ́ y kàmə̀zwǐ yə́, rə̀ pyípyílí ni ǹdə́ cángá tũ̀twĩ̀ĩ̀ kàmə̀zù-fwɛ̀lɛ̀ yá, ǹdə bɔ́bɔ́ mɔ̀bɔ́ ń pyà bɔ́m gə́ pú pyɛ̀lɛ̀ yə́-pú ǹdə vwĩ̀-zwə́lnə ta nɛ́, ǹdə bóm mɔ̀bɔ́ bə̀ pyà gə́ bò ń cìn ǹdə́ ń bwẽ́ wẽ̀ ré né. ¹¹ Zhə̀n ga ǹdə cɛ y gə́ y'a ce è wẽ̀ ré byǎ bɛ́ púrh tɛ̃́ nɛ́, ǹdə bɔ́ɔ́ myɛ gə́ y'a ce ò wə̀-dwí rí púrh tɛ̃́ nɛ́, wɔ́ èta Cinu myɛ mà n ce cángá tũ̀twĩ̀ĩ̀ rí, ǹdə́ ńmyɛ̌ còrhó w pɔ mɔ́ púrh tənèsé gakó yé né né.