¹ Zɛ̃̀ tɛ̃́, yǝ̌r pwẽ̀, bǝ̀ ǹ pwẽ̀ ré yúwǝ́, bǝ̀ Bǝ-zhɔé-zhe zùwǝ́ zɛ̃̀ è zhǐ ǹ yó wǝ. ² Nyǐ cə-byín rí pyi cɛ y zhə̀n ga, ébɔ̃ pyi cɛmɛ nɛ́, sə Cinu mà n zɛ̃̀ n du ǹ yó wə, ń zùwə́ y è la ǹ yó w du mú bwəlse. ³ 3 Tənèsé m'a zɛ̃̀ sə̀ n'ê zhə̀l sə zǎ ǹ pwẽ̀ ré səta, sə pyǎ bɛ́ m'a zǎ ǹ gə́ nə́ ń zɛ̃̀ mə̀gã̌ mɔ́ pwẽ̀ ré səta. ⁴ Nyǐ kɔn gə́ kə́kɛ́lɛ́ mɔ́ nyí rí ma ń nyì wé: bə̀ gakó n'ê twí dwã yó, bə̀ bàn ǹ səta, ǹ bala-byǎ bɛ́ m'a shí pyépyé bə bà, bə̀ kwè ǹ kana-byǎ bɛ́ bə ce cã̌ wa. ⁵ Rə̀myɛ́ yi ní ǹ m'ǎ na, ǹ yé y m'a sú ǹdə́ wu-nyɔ̃̀, kɔn m'a dwə̀rh mó sə ǹ wu m'a sú ǹdə́ wu-nyɔ̃̀ nánfɔ̀lɔ̀, bə̀ bə̀ m'a k'a zə nə̀-fwààlɛ́ nə̀cɛ̀ndɛ́ bə m'e bə̀ ǹ sono, tənèsé jɛ̃̀-kɔn rɛ́ m'a bə̀ ǹ sono. ⁶ Yómde nánzhəzhɔ̌ m'a bə̀ rə sú cɛ ǹ sono, Majã ǹdə́ Efa yómde námbwààlɛ; Saba lyì bí gakó m'a bà, bə̀ m'a zə sánə́má ǹdə́ ãsã́ bə m'e bà, sə bə̀ m'a zə bə̀ cìn bə yə̀ lyì bí byɛ̀bɛ́ bə̀ n'ê bwə̀l Cinu còrhó wə́. ⁷ Bə̀ m'a cĩ́ Kədaarɛ lyì bí və̌-ywàálɛ́ dwã yó ǹmyɛ́ yilə, Nəbayɔɔtɛ pyì-byesé m'a yə̀ ǹ còrhó tumə né tũ̌ yilə; sə̀ m'a jì à vwĩ̀-jùlú w yó, sə à m'a swéné se; zhə̀n ga, à m'a ce à zùwə́ y jì y zùwə́ y du. ⁸ Wɔ́ byɛ̌ lyì ǹdə́ byɛ̀bɛ́? Bə̀ n'ê zɛ̃̀ bə̀ wɔ dɛ̃̌ ǹdə ébɔ̃ ta, ǹdə épwěnse sə̀ la sə̀ jààsɛ́ wẽ́ ta; ⁹ zhə̀n ga, cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ n'ê yǎl nə bə̀ a sõ, Tərəshiisi bǔ-bwələ né tó yé, mùnì ga nə zə ǹ byǎ bɛ́ nə shí pyépyé nə m'e bà, bə̀myɛ́ ǹdə́ bə̀ sə̀byǐ mú ǹdə́ bə̀ sánə́má mɔ́ ga, Cinu, ǹ Yi rí yil ré còrhó yilə, Esərayɛl Yi rí rə̀ bə dõ zhe mó còrhó yilə, bə̀ rə̀ pɔ mɔ́ rə̀ zùwə́ yə́. ¹⁰ Zhə-bal mɔ́ byǎ bɛ́ m'a k'a lù ǹ byíl-fwàlsɛ́, sə bə̀ pyǎ bɛ́ m'a ji jɛ̃̀ ǹ còrhó tumə né tũ̌ mú yilə, b'à y'à mà mɔ́ à lyìm rí gə́ y'à zɛ̃̀ yi ní, sə à sónó w yilə, à m'a byili mú à wu-bɔ̀nɔ̀ wá. ¹¹ Bə̀ m'a j'a yẽ̌ ǹ bwə̀ə̀lé ne rə pul twéé twéé, cəcɛ̃ ǹdə́ nə̀nyɔ́nɔ́ ga, rə̀ j'â t'â la pyu gaga yé, mùnì ga bə zə tənèsé shə̀dɛ́ɛ́sɛ́ bə b'e ce ǹ sõ, sə̀myɛ́ ǹdə́ sə̀ pyǎ bɛ́, bə̀ ce bə pú pú dwã nɛ mɔ́! ¹² Tənà kɛ̀bɛ́ ǹdə́ pyə̀-tənà kɛ̀bɛ́ è cẽ tũ̌ e pɔ̃́ mɔ́ m'a jé tɛ̃́, tənèsé m'a j'a cɔ̀ lyə́m lyə́m. ¹³ Lyəbã còrhó wə́, səpərɛ́ɛ́sɛ́ y ǹdə́ orəmɛ y ǹdə́ bwǐsi y ga m'a tó dwã rə bə̀ ǹ sõ, mùnì ga rə ce à jì y kùr ré gə́ ju mə̀gã̌ mɔ́ zə còrhó; zhə̀n ga, à m'a ce jàà y à nèsé cĩ́ è wẽ́ mó zə còrhó. ¹⁴ Bə̀ m'à n'ê kwé tɛ̃́ bə̀ m'ê twí ǹ sõ, lyì bí byɛ̀bɛ́ bə̀ y'à n'ê nwɛ̀nɛ̀ mɔ́ mɔ́ byǎ bɛ́, bə̀ m'a tu ǹ nə̀rh kùr wə, lyì bí byɛ̀bɛ́ gakó bə̀ y'à n'ê fuuli mú mú. Bə̀ m'a byẽ̀ mó bə̀ «Cinu cɔ wá», «Esərayɛl Yi rí tɛ̀bɛ́ rə̀ bə dõ zhe mó Səyɔ̃ wá». ¹⁵ Ǹ kə́ ǹ tá ǹ la mɔ̀bɔ́ bə̀ zhɔ̃̀ mɔ́ ǹdə́ mɔ̀bɔ́ bə̀ súl mú, ǹdə́ mɔ̀bɔ́ lòlò kə́ ń tá ń twí ǹ sõ mó yál yé, sə à m'a ce ń yə̀ byinə nánzhəzhɔ̌ yó-dɛ̃̌ zhõ̌ mó, ǹdə́ byinə nə̀ j'â la gaga mɔ́ wu-nyɔ̃̀ wá. ¹⁶ Ǹ m'ǎ ŋwɔ̀ tənèsé yil mú, ǹ m'ǎ jí pyǎ bɛ́ nə̀cɛ̀ndɛ́ ǹdə́ shil nánfɔ̀lɔ̀, ǹ m'ǎ zɛ̃̀ ń lwar bə̀ ǹ Zwennə mó wɔ́ àmyɛ́ Cinu, bə̀ lò mó mɔ̀bɔ́ ń nə́ ń zwẽ mó mó wɔ́ Zhakɔɔbɛ Yi rí Lòlò-bə-rə̀-jàn-rɛ́-yàlà-zhe mó! ¹⁷ À m'a ce sánə́má bə̀ kàmmɔ jàà wa, a ce sə̀byǐ bə̀ lù jàà wa, a ce kàmmɔ bə̀ dǎr jàà wa, a súlí a ce lù bə̀ nə́kulu jàà wa. À m'a ce Yə̀-zùlə́ yə̀ nɛ́ ǹ yùlù yilə, a zɛ̃̀ a ce Cángá tũ̀twĩ̀ĩ̀ rí yə̀ nɛ́ ǹ cìnú ǹdə́ jàn yilə. ¹⁸ Bə̀ j'â k'ê t'â la jɔ́ɔ́rɛ tũ̀twə̃̀ə̃̀ yò nyɔ̀ɔ̀ ǹ tənà y w yé, ǹdə́ cɔ̌ ǹdə́ wẽ̀ lo yò nyɔ̀ɔ̀ ǹ tənà y nyí rí wẽ́ yé. Ǹ m'ǎ ce ǹ byíl-fwàlsɛ́ yil bə̀ «Cìn-nɛrɛ́», ń ce ǹ bwə̀rsé yil bə̀ «Còrhó». ¹⁹ Nə̀nyɔ́nɔ́ w pwẽ̀ ré j'â k'ê t'â la cə-kɔ́lɔ́ pwẽ̀ ré yál ǹmyɛ́ yil yé, cànà y ǹd'ê pwẽ̀ ré j'â k'ê t'â la cəcɛ̃ pwẽ̀ ré yál ǹmyɛ́ yil yé. Wɔ́ Cinu ń mà n yə̀ pwẽ̀ tɛ̀bɛ́ rə̀ j'â ŋwɛ́nɛ́ twéé twéé ǹmyɛ́ yilə, wɔ́ ǹ Yi rí rə̀ m'a yə̀ ǹ cɛ̀nɛ̀ rɛ́. ²⁰ Ǹ nə̀nyɔ́nɔ́ w j'â k'ô t'â la zú yé, ǹ cànà y j'â k'ê t'â la zú yé, bə̀ Cinu mà n yə̀ pwẽ̀ ré tɛ̀bɛ́ rə̀ j'â ŋwɛ́nɛ́ twéé twéé ǹmyɛ́ yilə, sə ǹ cu wu-zhùlù w dwã nɛ́ m'a zhɛ̀. ²¹ Sə ǹ dwí rí, rə̀ lyì bí gakó m'a yə̀ cángá cìnə́, bə̀ m'a cìní tənà y twéé twéé yilə, bə̀myɛ́ byɛ̀bɛ́ bə̀ wɔ́ à cèmé né dɔ̌ w à zhele mó, kɔn rɛ́ tɛ̀bɛ́ à jɛ̀sɛ́ wɛ̀rhɛ́ mɔ́, rə̀ mə̌ sə rə ce à zùwə́ y du mú. ²² Bə̀ ga námpɔ́lɛ́ y m'a jǐrh nunə mɔ̀rhɔ̀, bə̀ ga nánkwàrà y m'a jǐrh dwí tɛ̀bɛ́ rə̀ lyì bí yú mɔ̀ɔ̀rhɛ̀ yàà. Rə̀ yi rí gə tú rə̀ yúwə́, àmyɛ́ Cinu, à m'a ce rə pyìrh làlà.