¹ Gaga, Cinu jɛ̃̀ y j'â də̀ ná-èkùlí dɛ̃́dɛ̃́, e ce è wàr lò è m'a zwẽ yé, ń zhɛ̃̌ rɛ́ j'â yə̀ shĩ kɔn lyɛ̃ cɛ nɛ, e ce rə̀ wàr rə̀ n'ê nyɛ̀ɛ̀ yé! ² Wɔ́ á lwɛlɛ rɛ́ rə̀ ce pɔ́rá ŋwɛ́nɛ́ ámyɛ̌ ǹd'á Yi rí cəcəl wə; wɔ́ á dwə́ə́ré rə̀ círhí rə̀ yé-zwã̌ yá, è j'â nyɛ ǹd'ába, è j'â nyɛ dɛ̃́dɛ̃́ ce rə̀ wàr rə̀ la á cəl nyɔ̀ɔ̀ yé. ³ B'ǎ jə̀-wun ní tə̀l ǹdə́ jal, lwɛlɛ dúdú á jə̀fɔ́lá myɛ j'â n'ê twĩ̀; kɔma dúdú á nyì-vɔr rɛ́ n'ê zɔ̀mà, myìnù zɔ̀mà dúdú á mə̀jòlò w j'â n'ô twìrhì. ⁴ Lò mə̀dù ga tá ń zə yò ń zhə̀l bùrsi ǹdə cángá tũ̀twĩ̀ĩ̀ rí gə́ n'ê yǎl nɛ́ yé, lò mə̀dù ga tá ń pyà yò w kɔrhɔ ǹdə́ wu-põ̀ yé; bə̀ n'ê zal kɔn rɛ́ tɛ̀bɛ́ rə̀ bə kùr zhe mó zhə̀nà, bə̀ n'ê zɔ̀m zɔ̃̀-fwə́ə́re, bə̀ n'ê jɛ̀nɛ̀ bə̀ tɛ́rɛ́ lwɛlɛ rɛ́, bə zɛ̃̀ bə twĩ̀ yò wə́! ⁵ È wɔ́ kɔn rɛ́ tɛ̀bɛ́ rə̀ n'ê fwàl tɛ̃́ ǹdə́ rə̀ pǔ mú càlà nɛ́ bə̀ n'ê ce nə̀ lwərhə, ǹdə́ elyɛnɛ́ jìrh bə̀ n'ê swɛ̃̀; lò mɔ̀bɔ́ ń dɔ̀m bə̀ càlà nɛ́, nə́ ń cì; cɛ̀lɛ̀ rɛ́ gə lowə, rə̀ n'ê lwərhə: sə è wɔ́ kùwə̀! ⁶ Wẽ̀ ré tɛ̀bɛ́ bə̀ n'ê swɛ̃̀ mɔ́, wàr gɔ̀nɔ̀ rə̀ la wɔ̀rhɔ́ gaga yé, bə̀ wẽ̀ ré wàr rə̀ m'a pyìlì yé; bə̀ wẽ̀ ré wɔ́ wẽ̀ tɛ̀bɛ́ rə̀ n'ê wɛ̀rhɛ́ lwɛlɛ! jɔ́ɔ́rɛ wɔ̀rhɔ́ tũ̀twə̃̀ə̃̀ dúdú nə̀ wɔ bə̀ jə̀-wun ní wẽ́! ⁷ 7 Bǝ̀ nèsé n'ê dùr sə̀ zǎ lwɛlɛ rɛ́ səta, bǝ̀ n'ê dùr bə̀ bàn bə-dóó-zhe-cí jal tɛ̃́ ló yilə; bə̀ bùlə̀ né j'â wɔ́ bùlə̀ námməlwǎlsɛ, bǝ̀ gǝ tó mǝ̀gã̌ j'â wɔ́ cɔ̌ ǹdǝ́ e lo e bɔbwɛlɛ dúdú. ⁸ Bǝ̀ yǝ̀l yǝ̀-zùlǝ́ sɔ́má y pár yé, bə̀ j'â t'â jəl kɔn rɛ́ tɛ̀bɛ́ rə̀ mə̌ mɔ́ bə̀ sɔ́má y yó yé; bə̀ n'ê ji sə-byǐrh námməjə́lse bə̀ cìn yilə, lò mɔ̀bɔ́ ń nə́ ń kwè se bə yə̀-zùlə́ zhe yé. ⁹ Sə rə̀myɛ́ mɔ́ ce bùrsí bǔr mú j'a zɛ̃̀ mə̀ nyɛ ǹdə́ nə́ba cángá tũ̀twĩ̀ĩ̀ rí zɛ̃̀ rə̀ t'â yí nə́ sõ yé. Nə́ y'ǎ n'é dɛ̃̀ pwẽ̀ ré, e k'â wɔ́ cə-byín rí, nə́ y'ǎ né dɛ̃̀ nəkɔkɔ́lɛ́ pwẽ̀ ré, e k'â wɔ́ cə-byṹ fúrí wẽ́ nə́ n'é zhə̀l né. ¹⁰ Nə́ n'é tə́tɛ̀lɛ́ ǹdə lyìlyə̌r gə́ n'ê tə́tɛ̀lɛ́ byílí cã̌ nɛ́, nə́ n'é tə́tɛ̀lɛ́ ǹdə lyì byɛ̀bɛ́ bə̀ bə yírhə́ zhe ta. Nə́ n'é mà nə́ nə̀rh nə̀nyɛ́nɛ́ ecəl w ǹdə cɛ y gə tú è n'ê byíbyílí yi ní ta, nə́ j'á jɛ̀, e jà nə́ wɔ́ ǹdə cùùri ta. ¹¹ Nə́ gakó j'á n'é kúrh ǹdə cílə́-kùúli ta, nə́ j'á n'é kúrh zúzúnú cǐl ǹdə épwěnse ta. Nə́ y'ǎ n'é dɛ̃̀ bǔrsí bǔr mú, sə kaka də́-byǐ! nə́ y'ǎ n'é dɛ̃̀ cìn-nɛrɛ́ yá, sə è jàà y nyɛ ǹdə́ nə́ba! ¹² Nyǐ wɔ́ nə́ yó-kùùli tũ̀twə̃̀ə̃̀ né gə́ j'â já dɛ̃́dɛ̃́ ǹ yé né mó è ce, nə́ dwə́ə́ré myɛ n'ê cĩ́ yò nə́ yó wə; zhə̀n ga nə́ yó-kùùlí tũ̀twə̃̀ə̃̀ né dɛ̃ nə́ba, nə́ j'á yě nə́ lwɛlɛ rɛ́ pár pamparɛ̃ɛ̃: ¹³ e cẽ nyí ni, e zhɛ̃̀ Cinu, e kwɛ̃̀ e vò è kwã nɛ́ pyépyé e zə nyan ǹdə́ nə́ Yi rí, e tɛnɛ jɔ́ɔ́rɛ ǹdə́ myìnù tũ̀twə̃̀ə̃̀ è la tũ̌, e tɛ́rɛ́ kɔma zɔ̀mà ǹd'ê wu gakó e súlí e zɔ̀m nɛ. ¹⁴ Wɔ́ rə̀myɛ́ rə̀ ce bùrsí bǔr mú kwàrh sə k'a vò kwã, cángá tũ̀twĩ̀ĩ̀ rí myɛ j'a zɛ̃̀ rə swə́rh rə̀ zhǐ pyépyé. Nyǐ wɔ́ zhə̀n rɛ́ gə́ mà rə̀ nà dwã-joló jàà y wa, wu-põ̀ w myɛ zɛ̃̀ ò wàr ò yí gàà mɔ́ è ce; ¹⁵ bə̀ púrí zhə̀n rɛ́ y'à tɛ̀nɛ́ yé, bə zɛ̃̀ bə̀ n'ê bubu lò mó mɔ̀bɔ́ ń zhɔ̃̀ lwɛlɛ mɔ́! Cinu nɔ rɛ, sə bùrsì bǔr gə́ j'â tɛ̀nɛ́ gaga mɔ́ yàl kɔ-bəlwɛ̀lɛ́ ń yírh wə. ¹⁶ Ń púrí bə̀ lòlò yà ń tɛ̀nɛ́ yé, ń wu zhìlì lòlò gə́ tá ń wɛ̀rhɛ́ kaka mɔ́ yilə; rə̀myɛ́ yó, wɔ́ ń vɔ̃̀ w ò ce ń mə n twĩ̀ cìn-nɛrɛ́ tum rí, ń cángá tũ̀twĩ̀ĩ̀ rí zɛ̃̀ rə kwɛ̃́ mɔ. ¹⁷ Ń zù cángá tũ̀twĩ̀ĩ̀ rí ǹdǝ cɔ̀bɔ́ kàmə̀zwǐ ta, n pú cìn-nɛrɛ́ y ǹdǝ cɔ̀bɔ́ yǝ́-pú ta; ń zù jim cṹ kàmə̀zwǐ y ǹdə ń kàmə̀zù-pɔ́lɛ́ ta, n pyìlì ń cín ǹdə́ sónó kɔ̀bɔ́ ò lyɛ̃ cɛ nɛ mɔ́ ǹdə kàmə̀zù-fwɛ̀lɛ̀ ta. ¹⁸ Tũ̀twə̃̀ə̃̀ né gə́ yàl nɛ́ mɔ́, èta myɛ nə̀ kwǎndɛ́ ń la pɔ mɔ́ m'a yə̀ nɛ́, lyim-cəcɔ̌ ǹdə́ ń búl-dwã bɛ́, còrhò-tum pɔ ń zwə̀ bé ne! Ń mà n pə còrhò-tum cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ nɛ. ¹⁹ Rə̀myɛ́ ce, bə̀ b'a nyàm Cinu yil ré, kɔn gə́ zhì yi-zùr sõ è m'ê la mɔ́, sə bə̀ b'a nyàm ń zùwə́ y kɔn gə́ zhì yi-púrhí sõ è m'ê la mɔ́, bə̀ ń mà n bə̀ ǹdə bù-fwɛ̀lɛ̀ ná-éshɛ́nɛ́ kɛ̀bɛ́ Cinu shíshìrhə́ né ce è nɛ̃̌ mɔ́ n'ê wùl ta. ²⁰ Ń wɔ́ Zwennǝ mó ń mà n bə̀ Sǝyɔ̃ yilə, Zhakɔɔbɛ kwálá y lyì bí byɛ̀bɛ́ bə̀ yẽ̌ bə̀ yó-kùùlí tũ̀twə̃̀ə̃̀ né ne mó yilə, wɔ́ Cinu nyí rí. ²¹ È gə wɔ́ àmyɛ́ yilə, nyǐ à dɔbrɛ́ à la zal ǹdə́ bɛ mɔ́ gə́ m'a yə̀ nɛ́, wɔ́ Cinu nyí rí: À Eshirhə y è só ǹ yó w mó, ǹd'â zɔ̀mà nɛ́ à co ǹ nyú w mú, j'â t'â la ǹ nyú w shə́r yé, nə̀ t'â la ǹ byǎ bɛ́ nyú w shə́r yé, nə̀ t'â la ǹ byǎ bɛ́ byǎ bɛ́ nyú w shə́r gaga yé, kɔn zhì èlǎsɛ̃́ ǹdə́ twéé twéé yilə.