¹ Búbwéé ǹdə́ ǹ byã y jàn rɛ́ gakó, bə̀ ǹ lyààrɛ́ nɛ gál yé, ce ǹ cəl ré yə̀ nánfɔ̀lɔ̀ ǹdə pɔ́lá y cəl ré ta, bwə̌l ń byili à dwí rí ni rə̀ yó-kùùli tũ̀twə̃̀ə̃̀ né, byili Zhakɔɔbɛ kɛ̀lɛ́ y nɛ è dwə́ə́ré. ² Dɛ̃ gakó, bə̀ j'â n'ê pyà sə bə sú àmyɛ́ wu, bə̀ wu-nyɔ̃̀ w wɔ́ bə lwar à sɔ́msɛ́ párá, ǹdə wɔ́ dwí tɛ̀bɛ́ rə̀ twĩ̀ cángá tũ̀twĩ̀ĩ̀, e jà rə̀ yə̀ kɔn rɛ́ tɛ̀bɛ́ rə̀ mə̌ ǹdə́ rə̀ Yi rí ni yẽ̌ ta. Bə̀ zhe à byã nɛ b'à bǔr bùrsí sə tó cángá tũ̀twĩ̀ĩ̀ rí gə́ n'ê yǎl nɛ́, bə̀ wu-nyɔ̃̀ w wɔ́ bə bwəlse Yi yala nɛ: ³ «Bə̀kɔ́n nyì-lyõṍ w n'ô pɛ nə́ba, e jà ǹ gə bə rɛ nɛ, Bə̀kɔ́n cìn-tɛ̃́-lwəl mó n'ê pɛ nə́ba, e jà ǹ yə̀l rə̀ nyí ni?» Á nyì-lyõṍ dɛ̃ rɛ́, á j'á yě kɔn rɛ́ tɛ̀bɛ́ rə̀ n'ê kwɛrhɛ á yò mó sõ cilu, á súlí á j'á n'á nwɛ̀nɛ̀ á tùntùnnə bé. ⁴ Á n'á lyẽ á nyí, e jà á j'á n'á pyà búlə́ ǹdə́ zɔ̀mà á n'á pun dwã ǹdə́ jə̀-gúlə́ ǹdə́ wu-bárhɛ́! Á t'á lyẽ á nyí ǹdə kɔn gə́ mə̌ nɛ́ dɛ̃ rɛ́ tɛ̀bɛ́ á n'á yǎl b'à nyɛ̀ɛ̀ á cəl ré dɛ̃̌-yi w mú ta yé. ⁵ Nyì-lõṍ w kɔ̀bɔ́ à só mó nə mə̌ dwã s'o yə̀ èta, dɛ̃ rɛ́ tɛ̀bɛ́ numbyíní y n'ê lwəl è cìn tɛ̃́ mɔ́? È nə wɔ́ e lwəl è yó tɛ̃́ ǹdə vwal-gɔ ta, e lyɛ̀lɛ̀ yóló ǹdə́ tɔ̀mɔ̀ tɛ̃́ e m'e yə̀ è pyə̀nə̀ nà? È nə wɔ́ rə̀myɛ́ yil ǹ vùr nyì-lyõṍ dɛ̃, dɛ̃ tɛ̀bɛ́ rə̀ yú Cinu pùbùlə̀ mó? ⁶ È nə də̀ nyì-lyõṍ dwí rí tɛ̀bɛ́ à só mó nà: e bwèlé wu-bárhɛ́ lyẽẽ́sé e bwèlé zhĩĩ rí lyẽẽ́sé, e ce lyì bí byɛ̀bɛ́ bə̀ y'à n'ê nwɛ̀nɛ̀ mɔ́ nə bə̀ cìn bə kwɛ̃̀, è n'ê yǎl e wɔ̀ b'ǎ bɔbwɛlɛ zhĩĩ dwí gakó! ⁷ È nə də̀ ń tə̀ ǹ búrú w ǹdə́ lò mɔ̀bɔ́ nɔrh zhe nà? E súlí myɛ: ǹ m'ǎ zwẽ nə̀mwà bɛ́ bə̀ bə zulə́ jàà zhe mó ǹ sõ, ǹ m'ǎ pyìlì lò mó mɔ̀bɔ́ ǹ nɔ ń wɔ́ nánlwè mó, ǹ tá ǹ la shòò lò mó mɔ̀bɔ́ á wɔ́ jal mə̀dù mú yé né yé. ⁸ Rə̀myɛ́ yó, ǹ pwẽ̀ ré m'a púrh ǹdə cɛ-lár rɛ́ ta, sə ǹ wárh mɔ́ m'a yə̀ làlà. Ǹ cángá tũ̀twĩ̀ĩ̀ rí m'à n'ê zhə̀l ǹ yé né, sə Cinu còrhó w m'a zɛ̃̀ o yə̀ ǹ kwã nɛ́ ò m'ô yìlì mú. ⁹ Rə̀myɛ́ yi ní, ǹ gə byẽ̀, Cinu mà n shɛ̀, ǹ gə búbwéé ń ce mo, ń mà n lyar n wɔ̀: «Nyǐn ni!» Ǹ gə ce zhĩĩ, ǹdə́ jə̀fɔ́lɛ́ kɛ̀bɛ́ è n'ê cĩ́ dóó lò yó wə, e súlí zɔ̀m-bəlwɛ̀lɛ́ jé tɛ̃́ ǹ sõ, ¹⁰ ǹ gə yẽ̌ ǹ sə̀pwà nyí kùjú w ni ń pə lò mó mɔ̀bɔ́ nɔrh zhe mó ne, ń pə zúzúnú cə́bal nɛ n jí n sú, ǹ pwẽ̀ ré m'a yə̌r cə-byín rí wẽ́, sə ǹ cə-byṹ w m'a yə̀ ǹdə nə̀nyɛ́nɛ́ ecəl ta. ¹¹ Cinu mà n já ń nə́ ń cĩ́ mú sɔ́má yó twéé twéé, má ǹ wɔ shɔ̃́ w cəcəl ré w myɛ, ń mà n pɔ̃́ ń jí ń sú, n ce ǹ kúr rí kwɛrhɛ rə zə jàn dɛ̃́dɛ̃́. Ǹ m'ǎ yə̀ ǹdə bɔ́ɔ́ kɔ̀bɔ́ nɛ̃̌ j'â n'ê yí w kɔn lyɛ̃ cɛ nɛ ta, ǹdə zhìlí kɛ̀bɛ́ è nàná bɛ́ t'â wĩ ta. ¹² Ǹmyɛ́ nə̀jɛ̀lɛ̀ yilə, bə̀ m'a k'a lù shãã shãã jì-bwə̀r ré bə cĩ́ dɛ̃̌, byinə né nə̀ lyɛ̃ lyɛ̃ jì-kùrə̀ né nyɛ̀bɛ́ bə̀ yẽ̌ mó, ǹ m'ǎ lù ni ń cĩ́ dɛ̃̌; bə̀ m'a byẽ̀ mó bə̀: «Bɔ̀là shinnə, ǹdə́ sɔ́msɛ́ kwàrhna, mùnì ga lyì ŋwɛ̀nɛ́ bə jòm ò wẽ́ mó.» ¹³ Ǹ gə yẽ̌ tumə tũ̌ ni shìrhə́ y dɛ̃ rɛ́, ń yẽ̌ ǹ nyɔ̀ɔ̀rhɛ́ tumə tũ̌ ni à Yi dɛ̃ rɛ́ yù wə, ǹ gə byẽ̀ shìrhə́ y dɛ̃ rɛ́ bə̀ «Wu-nyɔ̃̀ nánfɔ̀lɔ̀», ń byẽ̀ Cinu Yi dɛ̃ rɛ́ «Dɛ̃ rɛ́ tɛ̀bɛ́ rə̀ zhe zùwə́», ǹ gə nə́ ǹ yẽ̌ ǹ tumə̀ né tũ̌ ni, rə̀ nyɔ̀mɔ̀ yilə, ǹ nə́ ǹ yẽ̌ nyɔ̀ɔ̀rhɛ́ tum tũ̌ ni, ǹ nə́ ǹ yẽ̌ zɔ̀mà nɛ́ nyɛ̀bɛ́ nə̀ t'â zhɛ̀ mɔ́ nɛ, ¹⁴ ǹ m'ǎ nə ǹ wu-nyɔ̃̀ nánfɔ̀lɔ̀ w Cinu wẽ́, à m'a kwè mó ǹdə́ eshã-vwə̃tu a m'a vò Cɛ y pyàr rɛ́ yə́-pɛ̀lɛ́ wa, à m'a ce ń jí ǹ da Zhakɔɔbɛ cəl kɔn rɛ́ ń nə rə̀ nyàn. Zhə̀n ga, wɔ́ Cinu nyú w rə̀ shí ní.