¹ Cángá cə́bal mɔ́ já ń nə́ ń cì, e jà lòlò tá ń cili yò w òmyɛ́ mɔ́ sõ yé, bə̀ n'ê pwà lyì-twěsé, e jà lòlò myɛ jà ń tá ń lwar bə̀ wɔ́ wu-bárhɛ́ è n'ê ce bə̀ zal cángá cə́bal mɔ́ yé! ² Sə yə̀-zùlə́ né m'a bà, lyì bí byɛ̀bɛ́ bə̀ n'ê zhə̀l cángá mɔ́ m'a pyẽ̀ bə shǐrh bə̀ pyə̀nə̀ y wə. ³ 3 È gə wɔ́ ámyɛ̌, kə-cɔ̀lɔ̀ byǎ, twẽ̌-nə á bwəlse nyɔ̀nɔ̀, bə-nə̀fòló ǹdə́ kə-nə̀fòló byǎ: ⁴ Mɔ̌ lò á n'á mɔ̀n mɔ́? Mɔ̌ lò ne á kǎl á nyə́ né á ce éta mɔ́, e jà á n'á lyəlyɔ á mə̀jə̀ə̀lé á ce? Á nə də̀ yó-kùùli byǎ nà, kɔma cìnə́ dwí nà? ⁵ Á n'á byìrh bárhɛ́ tərəbɛ̃́tɛbá nyí ni, cǒ kɔ̀bɔ́ gakó ò púrh vɔr nánzhəzhɔ̌ kùr wə; á n'á zwə́l á byǎ bɛ́ nə̀-gwààlɛ́ wẽ́, ǹdə́ pyàr rɛ́ gógwə̀ə́lé wẽ́. ⁶ Nə̀-gɔ̀lɔ̀ w nə́kuulí nánsə́swə́ə́lé, wɔ́ rə̀myɛ́ rə̀ wɔ́ ǹ cəl ré, nyǐ ǹ cəl ré, nyǐ ri, nyǐ ri! wɔ́ nə́kuulí rə̀myɛ́ nɛ ǹ nə́ ǹ lwé də̀vɛ̃́ tɛ̃́ ǹ pɛ, rə̀myɛ́ nɛ ǹ nə́ ǹ pɛ pansɛ! Sə rə̀myɛ́ mɔ́ nə wɔ̌ rə̀ m'a swẽ à wu ni? ⁷ Ǹ cĩ́ ǹ pyə̀nə̀ y pyɔ̀ w kɔ̀bɔ́ ò yó w wɔ dɛ̃̌dɛ̃̌ mɔ́ yó wə, e zɛ̃̀ wɔ́ gàà ǹ jìl ní, vwĩ̀ rí zwə́l yilə. ⁸ Ǹ cĩ́ ǹ lyìrhə́-kɔn rɛ́ bòlò w kwã nɛ́, ò sarh rɛ́ nɛ. Zhə̀n ga, ǹ gə́ yà ǹ nyɛ ǹdə́ nɛ yi ní, ǹ lwə̌r ǹ gàndɛ́, ǹ jìl ń vò, ǹ súlí ǹ pyə̀nə̀ y wàn rɛ́, ǹ pɔ cəl tɛ̀bɛ́ rə̀ já ǹ cìn ni lyì bí byɛ̀bɛ́ ǹ só bə̀ pyə̀nə̀ y mɔ́ nə̀jɛ̀lɛ̀ yilə; ǹ j'á búl nyǐ bɛlɛ rɛ́! ⁹ Ǹ só ń dùr ń vò Məlɛɛkɛ sõ ǹdə́ nwə̃̌, ǹ pɔ wẽ̀ ré rə̀ lwẽ́ nã́nyə̀nyɛ̀lɛ́ rə̀ y'à búl rə̀ já, ń twĩ̀ ǹ tùntúmə́ bə vò jààsɛ́ shɛ̀bɛ́ sə̀ búl sə̀ wɔ pyépyé mó wẽ́, sə ǹ tó rə̀ dɛnnɛ ń só ń vò cúlú. ¹⁰ Sɔ́má y èmyɛ́ mɔ́ gakó ǹ zhə̀l mó j'a lyɛ̀ɛ̀ mɔ́, e jà ǹ tá ǹ wə̀lə̀: «Rə̀ lyɛ̃̀ kùrə̀!» yé. ǹ k'á nə ǹ jɛ̃̀ y jàn rɛ́, rə̀myɛ́ ce ǹ já ǹ bə tɛ̃́ jě ǹdə́ wu-zhùlù yé. ¹¹ Ǹ gə́ wɔ́ myìnnə mó ce, mɔ̌ lò ń ce ǹ wu zɛ̃̀, e jà ń ywẽ zɔ mɔ́? Ǹ já ǹ tá ǹ lyǐrh àmyɛ́ yò yé, ǹ yə̀ nɛ ǹ wẽ́ cĩ́ yé! È nə də̀ zhə̀n b'à dɛnɛ dɛ̃́dɛ̃́ à j'â gwẽ̌ yə̀ kɔn wɛ̀rhɛ́, rə̀myɛ́ ce ń zɛ̃̀ ǹ tá ǹ nyàm nɛ yé. ¹² Sə àmyɛ́ m'a bwə̀l ǹ «cángá tũ̀twĩ̀ĩ̀ rí» a byili, sə ǹ tumə né t'â la nyɔ̀ɔ̀rhɛ́ də́-byǐ ga myɛ zal ǹ yil yé. ¹³ Ǹ gə tú ǹ nə́ ǹ búbwéé, sə yə né nánzhəzhɔ̌ w ǹ zhe ǹ sõ mó vwǎrh mɔ́! Zho m'a zə nə̀ gakó o m'o lyɛ̃, zho námpɔ́lɛ́ m'a pwà nɛ. Sə lò mɔ̀bɔ́ ń zə àmyɛ́ n mə n yə̀ ń shòò jàà, mà n nə cɛ y e yə̀ ń cəl-tənà, ǹd'â Yi pyɔ̀ w n cìní. ¹⁴ Sə bə̀ m'a wɔ̀: Shĩ-nə sɔ́má y gwáárɛ́, pul-nə sɔ́má yá, kwě-nə ku kɔ̀bɔ́ ò m'a lyə́lyɛ́rɛ́ dwí gakó à dwí rí sɔ́má y yó. ¹⁵ Bə̀ nyǐ mɔ̀bɔ́ ń já ń wɔ dɛ̃̌dɛ̃̌ dɛ̃́dɛ̃́ mɔ́, ń já ń ŋwɛ́nɛ́ gaga yilə, e jà ń yil ré j'à wɔ́ rə̀ dúdú mú, nyí rí: À j'â wɔ dɛ̃̌dɛ̃̌, à bə dõ zhe yé, à ŋwɛ́nɛ́ ǹdə́ lò mɔ̀bɔ́ bə̀ pyárh tɛ̃́ bə bɔbwɛlɛ, ń wɔ́ cìn-lwəl cə́bal ń wu w wẽ́ mó, mùni ga a ce cìn-lwəl cìnə́ bé zə nyǔ, s'a ce lyì bí byɛ̀bɛ́ bə̀ pyárh tɛ̃́ bə bɔbwɛlɛ mɔ́ wun ni k'a zə wu-jɔ̀. ¹⁶ À t'â la j'â n'â ji búlə́ nə̀ t'â zhɛ̀ yé, è də̀ twéé twéé à m'à j'â n'â kwè lyim yé, è gə də̀ rə̀myɛ́ shíshìrhə́ né ǹdə́ wə̀-nyìr rí tɛ̀bɛ́ à wɛ̀rhɛ́ mɔ́ jàn rɛ́ m'a zhɛ̀ à yé né. ¹⁷ Esərayɛl ŋwɔ̀lɛ̀ rɛ́ námməlyãlyɔ̃ɔ̃́ ce, à lyim zɛ̃̀, à pyìrhí à yé a ce kwã a m'a mà ya; à lyim y'à zɛ̃̀: è y'à j'â n'ê wɛ̀rhɛ́ yó-kùlù, è n'ê tó è wu-bùlə̀ né ne; ¹⁸ à búl a nə è sɔ́msɛ́! Sə ǹdə́ rə̀myɛ́ ga à m'a wárh ya, à m'a byili y sɔ́má yá, à m'a zə è wu ni dɛ̃́dɛ̃́, èmyɛ́ ǹd'ê lyì bí byɛ̀bɛ́ bə̀ wɔ cu wu-zhùlù wẽ́ mó, ¹⁹ à m'a ce núrh shí bə̀ nyú wə. Lò mó mɔ̀bɔ́ ń nyɛ ǹdə́ lò mó mɔ̀bɔ́ ń bwə́l mó ga nə yə̀-zùlə́, yə̀-zùlə́, Zhə̀n ga, à m'a wárh mɔ, wɔ́ Cinu nyí rí! ²⁰ Sə lyì-bəlwǎlsɛ́ nyɛ̌ dwã ǹdə nə̀-fɔ̀lɔ̀ kɔ̀bɔ́ ò n'ô fùù, ò wàr ò zhì shɛ́ɛ́ ta, ò nàná bɛ́ j'â n'ê gùlí bɔ̀bɔ̀rɔ̀ w ǹdə́ mɔ́rhɔ́ w ga dwã nɛ. ²¹ À Yi rí wə̀l bə̀ lyì-bəlwǎsɛ́ j'â t'â la yə̀-zùlə́ də́-byǐ ga nɔ yé!