¹ Nyǐ Cinu nyí rí: Dɛ̃̌-yi rí wɔ́ à pyɛ̀lɛ̀ dǝ̀gwã́, cɛ y zɛ̃̀ è wɔ́ à nǝ̀rh cṹ jàà. È nə wɔ́ jì dwí tɛ̌ á m'ǎ lù á pɛ̃? yẽ̀ à shìrhə́ jàà y m'a yǝ̀ nɛ́? ² E súlí myɛ, wẽ̀ ré rə̀myɛ́ mɔ́ gakó, wɔ́ àmyɛ́ jɛ̃̀ y è wɛ̀rhɛ́ rɛ, sə wɔ́ àmyɛ́ à cǐ ri, wẽ̀ ré rə̀myɛ́ mɔ́ gakó mó, nyǐ lò mó mɔ̀bɔ́ à n'â nyǐ ń sõ mó: lò mɔ̀bɔ́ ń wɔ́ nə̀mɔ̀ mɔ́, lò mɔ̀bɔ́ ń wu zhìlì mú, e jà ń gə nyɛ̀ɛ̀ à zɔ̀mɛ̀ rɛ́ n já ń nə́ ń kəkə mó. Wɔ́ Cinu nyí rí. ³ Bə̀ n'ê zwə́l nɔ̃ wá, e jà bə̀ n'ê gwi numbyíní myɛ bə súlí! bə̀ n'ê zwə́l pyìrhə̀ yə́, e jà bə̀ n'ê mà kùlí myɛ bə̀ gwi bə súlí! bə̀ n'ê zhẽ̌ pɛnɛ́ bə ce dɛ̃̌ bə̀ pɛ, e jà wɔ́ kùkú jal! bə̀ n'ê ji ãsã́ myǐn, e yə̀ lyìrhə́ kɔna, e jà wɔ́ bə m'e cèrhé yi tɛ̀bɛ́ rə̀ n'ê wɛ̀rhɛ́ lwɛlɛ mɔ́ nɛ! Zhə̀n zhə̀n ga, lyì bí bə̀myɛ́ èta mɔ́, n'ê cír bə̀ sə̀pwà sɔ́msɛ, sə bə̀ wun nyɛ̀ pwarha tũ̀twə̃̀ə̃̀ né nyɛ̀bɛ́ bə̀ n'ê twĩ̀ mú yilə. ⁴ Zhə̀n zhə̀n ga, àmyɛ́ m'a wɛ̀rhɛ́ bɛ shirh, a m'a mɔ̀n bɛ, sə à m'a ce kɔn tɛ̀bɛ́ rə̀ m'a zɛ̃̀ bə̀ wun ni dɛ̃́dɛ̃́ mɔ́ yíní bi. À zhə̀n ga byẽ̀, sə lòlò myɛ yə̀ shɛ̀ yé, à zɔ̀m a ce be, sə bə̀ yə̀ cili yé; bə̀ wɛ̀rhɛ́ kɔn tɛ̀bɛ́ rə̀ wɔ́ lwɛlɛ à yírh wə, bə̀ cír kɔn rɛ́ tɛ̀bɛ́ à bə só mó. ⁵ Cili-nə Cinu zɔ̀mɛ̀ rɛ́, ámyɛ̌ byɛ̀bɛ́ à gə n'â zɔ̀m á n'á kəkə mó: á da-byǎ bɛ́ byɛ̀bɛ́ bə̀ súl ába, bə̀ tə̀ à yil ré yilə, bə̀ n'ê jì ába bə̀ cəcəl w mó, wə̀lə̀: «Bə̀ Cinu byili ń zùwə́ yə́, sə á fùù fùwə́ nánfɔ̀lɔ̀ nə́ nyì wé!» Nyǐ wɔ́ bə̀myɛ́ bə̀ la cìzhìl jú. ⁶ Nyǐ cəl, sɔ̀ ò n'ô shí cɔ w wa, cəl, rə̀ n'ê shí Còrhó-jì y wə! È wɔ́ Cinu cəl ré: ń nə́ ń càrh ń zwə̀ bé ne kɔn rɛ́ tɛ̀bɛ́ bə̀ wɛ̀rhɛ́ mɔ mɔ́. ⁷ Səyɔ̃ cɔ w lùl ǹd'ô pwǐ y gwẽ̌ yə̀ zɛ̃̀ yé, ò nɔ ò cìn o lù bal-byǐ ǹd'ô pwǐ y yin rí gwẽ̌ yə̀ zɛ̃̀ yé. ⁸ Mɔ̌ lò ń nə gwẽ̌ nyɛ̀ɛ̀ yò òmyɛ́ mɔ́ dwí rí? Mɔ̌ lò ń nə gwẽ̌ nɔ yò òmyɛ́ mɔ́ dwí rí? Bə̀ nə y'a lù tənà dɛ̃ rə̀dù sá nà? bə̀ nə y'a j'a lù dwí twər rə̀dù sá nà, Səyɔ̃ cɔ w j'a m'o lù ò byǎ bɛ́, e jà ò pwǐ y yə̀ yì e yí yé né? ⁹ Cinu ń nə́ ń bwə̀rhə̀: Àmyɛ́ nə m'a pul sɔ́má a pə nyǔ ni mə̀ la yə̀ nɛ́, a zɛ̃̀ a ce bə̀ t'â lùl byǐ? Ǹ Yi rí n'ê bwə̀rhə̀: Àmyɛ́ mɔ̀bɔ́ à n'â ce bə̀ lùl byǐ mú, à nə m'a pə nyí bə̀ n'ê cə̀r nyǔ mú? ¹⁰ Tó-nə Zhərəzalɛm cɔ w nɛ á fùù dɛ̃́dɛ̃́, Ce-nə á wun zə nyàn dɛ̃́dɛ̃́ ò shò kwã, ámyɛ̌ byɛ̀bɛ́ gakó á só w mó; Tó-nə w á ce á wun zə nyàn, búl á ce á wun zə nyàn zhə̀n zhə̀nà, ámyɛ̌ byɛ̀bɛ́ gakó á y'ǎ wɔ cu wu-zhùlù wẽ́ ò shò kwã mɔ́. ¹¹ Ŋwɔ́-na o yil rí rə̀ n'ê zal wu ni mú yil mú á sú! Ŋwɔ́-na yil mɔ̀bɔ́ á j'á wɔ̌ mɔ́ gakó, Zhərəzalɛm yil ré rə̀ zhe còrhó mó wẽ́, sə á wun yə̀ nyàn rə̀myɛ́ mɔ́ yilə! ¹² Bə̀ nyǐ Cinu nyí rí: Nyǐ à m'a ce yə̀-zùlə́ bə̀ Zhərəzalɛm ǹdə bù-fwɛ̀lɛ̀ ta, a súlí a ce tənèsé còrhó w bə̀ ǹdə nə̀-gɔ̀lɔ̀ kɔ̀bɔ́ ò sú ò n'ô bɔrh ta. Bə̀ m'a ŋwɔ̀ ába, bə ce ába cã̌ wa, bə cĩ́ ába nə̀dwə́nə́ yó bə jə́jɛ̀nɛ́. ¹³ È m'a yə̀ ǹdə lò mɔ̀bɔ́ ń ná nə́ ń jə́jɛ̀nɛ́ ta: wɔ́ àmyɛ́ à m'a zə á wu ni èta, bə̀ m'a zə á wu ni, Zhərəzalɛm nɛ́ zhə̀n ga. ¹⁴ Á m'ǎ púrí á wun ní sú ǹdə́ wu-nyɔ̃̀, á kúr rí m'a k'a zə jàn ǹdə gɔ ta. Cinu jɛ̃̀ y m'a ce ń tùntùnnə bé lwar è párá, sə ń mà n ce ń zwə̀ bé lwar bə̀ ń lyim n'ê yì: ¹⁵ Nyǐ Cinu gaga mɔ́: wɔ́ myǐn w ń wɔ nɛ́ ń bànà, ń shəshə-vwə̃tur rí wɔ́ ǹdə zho nánfɔ̀lɔ̀ ta, ń la ń lyim jim rí cṹ ǹdə́ lyim-cəcɔ̌, e súlí ń búlə́ né jim rí cṹ ǹdə́ myìn-zhù. ¹⁶ Zhə̀n ga, Cinu zə myǐn, ń súlí ń zhe ń búlə́ shù w ń la n mə n bùr ǹdə́ numbyíní dwí gakó: lyì bí byɛ̀bɛ́ ń la zó mó m'a zə jɛ́nɛ́. ¹⁷ Lyì bí byɛ̀bɛ́ bə̀ n'ê yǎl bə yə̀ «lyì bɛ̀bɛ́ bə̀ n'ê nyàm ǹdə́ nyɔ̀mɔ̀ nánfɔ̀lɔ̀ mɔ́», bə súlí bə yə̀ wárhgáá mùnì ga bə tó mɔ̀bɔ́ ń wɔ́ nã́yə́ə́ mó ń wɔ bə̀ cəcəl w mó kùrə̀, báárɛ́ wẽ́ zú yil mú, byɛ̀bɛ́ bə̀ n'ê jí kùkú, ǹdə́ vwàmá nɛ́ nyɛ̀bɛ́ nə̀ wɔ́ pɔrha kɔn mɔ́, e súlí tə̀tó, bə̀myɛ́ gakó m'a cì, wɔ́ Cinu nyí rí! ¹⁸ Wɔ́ àmyɛ́ à m'a ce bə twĩ̀ bə̀ tumə né, e jà a ce bə̀ surhə né bə̀ wẽ́; à tú à la cĩ́ tənèsé lyì bí gakó ǹdə́ dwə́ zɔ̀mà nɛ́ gakó dwã yó; nə̀ m'a bà, sə nə̀ b'a nə à zùwə́ yə́: ¹⁹ zhə̀n ga, à m'a ce myɔrhɔ yə̀ bə̀ cəcəl wə. À m'a súlí a ce lyì bí byɛ̀bɛ́ bə̀ lú bə̀ wɔ bə̀ sõ mó, shə́r bə vò tənə̀rh dwã wẽ́: Tərəshiisi ǹdə́ Puuli e súlí ǹdə́ Luudi, tənə̀rh shɛ̀bɛ́ sə̀ lyì bí n'ê tɛ twərh mó, ǹdə́ Təbal ǹdə́ Yavã ǹdə́ cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ, nə̀ wɔ pyépyé, nə̀ gwẽ̌ yə̀ nyɛ̀ɛ̀ bə̀ n'ê zɔ̀m à zɔ̀mà mɔ́, nə̀ j'â gwẽ̌ yə̀ à còrhó w nɛ mɔ́; nə̀ m'a bwə̀l à zùwə́ y tənèsé wə. ²⁰ Lyì bí m'a zə á da-byǎ bɛ́ gakó, bə m'e shí tənèsé gakó w bə bà, bə yə̀ pɛnɛ́ bə pə Cinu ni, ǹdə́ shəshərh ǹdə́ eshə-vwə̃tur ǹdə́ pyə̀nde, ǹdə́ bə̀nərh e súlí yómde yó, bə yí à Yi pyɔ̀ wá, Zhərəzalɛm, ǹdə Esərayɛl byǎ bɛ́ gə́ m'a zə bə̀ pɛnɛ́ y nə̀zhĩ̌sí shɛ̀bɛ́ bə̀ vùr sə̀ jìmdí mú wẽ́, bə m'e bə̀ Cinu jì y wẽ́ mó ta, wɔ́ Cinu nyí rí. ²¹ Cinu wə̀lə̀, à gaga mɔ́ m'a vùr vwĩ̀-zwə́lnə ǹdə́ Levyi dwí rí lyì bə̀ cəcəl wə. ²² Zhə̀n ga ǹdə dɛ̃̌ nándwǝ̃̀ y ǹdə́ cɛ nándwǝ̃̀ y à ce rə̀ ŋwɛ́nɛ́ gə́ j'â zhǐ kẽkẽ à yé né mó ta, èta myɛ á dwí rí ǹd'á yil ré myɛ m'à j'â zhǐ kẽkẽ, wɔ́ Cinu nyí rí! ²³ Cinu wə̀lə̀, rə̀ yi m'a yí, numbyíní dwí gakó m'a b'e wùlì tɛ̃̀ àmyɛ́ yé né, càn-dùlí càn-dùlí gakó ǹdə́ shìrhə́ dɛ̃ shìrhə́ dɛ̃ gakó. ²⁴ Sə bə̀ gə tú bə̀ n'ê dwi cɔ w w yi ní, bə̀ m'a nə lyì bí byɛ̀bɛ́ bə̀ cẽ bə̀ yə̀ à nyí ni shɛ̀nɛ́ mɔ́ cùùrí: zə̀zɔ̀mɛ́ nɛ́ nə̀ n'ê jí bi mú j'â t'â la cú yé, myǐn mú mɔ̀bɔ́ mə̀ n'ê jí bi mú myɛ j'â t'â la cú yé, bə̀ m'a yə̀ kɔn rɛ́ tɛ̀bɛ́ numbyíní gakó j'â súl mú.