¹ Mǎ wu-nyɔ̃̀ búbwéése, ǹmyɛ́ kə-eju mɔ̀bɔ́ ǹ yà ǹ kə́ ǹ tá ǹ lùl mú, mǎ wu-nyɔ̃̀ búbwéése, ń jəjere, ǹmyɛ́ mɔ̀bɔ́ ǹ yà ǹ kə́ ǹ tá ǹ lùl byǐ gaga mɔ́; nyǐ bi nánzhəzhɔ̌, kɛ̃ mɔ̀bɔ́ bǝ̀ yǎrh tɛ̃́ mɔ́ byǎ bɛ́, bə̀ j'â du kɛ̃ mɔ̀bɔ́ ń wɔ ń byal sõ mó byǎ bɛ́, wɔ́ Cinu nyí rí. ² Wɛ̀lɛ̀ ǹ kòrhó wə́, bə̀ lɛ̀lɛ̀ ǹ kwə̀ə́rhé kàmə̀jɛ̀sɛ́ bə súlí! Bə̀ kaka vùr ń cĩ́ kwã yé! Súlí ǹ nyínsí dwɛ̀lɛ̀ rɛ́, sə ń kwɛrhɛ ń fwar ǹ pálá nɛ́ tɛ̃́ náàcɛ̀nɛ́. ³ bə̀ ǹ m'ǎ bɔrh jə̀-jĩ́ ǹdə́ jə̀-gwã̀ ga sõ: ǹ byǎ bɛ́ m'a zwẽ tənə̀rh bə cìní, sə sə̀ lyì bí m'a b'e jòm cɛmɛ nɛ́ nyɛ̀bɛ́ bə̀ shə́r bə yẽ̌ mó wẽ́. ⁴ Bə̀k'á dùr ywẽ yé, bə̀ ǹ kə́ ǹ tá ǹ la cìzhìl jú yé, ǹ wu bə̀k'a cɔ̀ yé, bə̀ bə̀ k'ê t'â la mɔ́ fuuli yé, ǹ m'ǎ swě fuulu mú mɔ̀bɔ́ bə̀ m'e fuuli mú ǹ bə̀sɔ́nɛ́ yi ní mú yò, ǹ kə́ ǹ tá ǹ la cìzhìl ré tɛ̀bɛ́ ǹ nɔ ǹ ejə̀ndé yi ní mú yò lyǐrh yé. ⁵ Bə̀ lò mó mɔ̀bɔ́ ń wɛ̀rhɛ́ mɔ́ n cĩ́ lũ yó mó, wɔ́ ńmyɛ̌ ń wɔ́ ǹ byal mɔ́: Lũ gakó Cinu, wɔ́ rə̀myɛ́ rə̀ wɔ́ ń yil ré; Esərayɛl Yi rí rə̀ bə dõ zhe mó, wɔ́ rə̀myɛ́ rə̀ n'ê zwẽ mó mó, rə̀ yíl lũ w gakó Yi rí. ⁶ Bə̀ ǹ yà ǹ nyɛ̌ ǹdə kɛ̃ mɔ̀bɔ́ bə̀ yǎrh tɛ̃́, wu-zhùlù bàn gu ta, sə Cinu kə́ n byẽ̀ mó, ń kwɛ̃̀ ń bà. Ǹ Yi rí wə̀lə̀: «Bə̀ nə m'a zhɛ̃̀ kɛ̃ mɔ̀bɔ́ bə̀ jú bɔ́bwár yi ní zhə̀nà?», ⁷ À y'à yẽ̌ mó tɛ̃́, sə kɔn yə̀ dɛnɛ yé, à m'a k'a cĩ́ mú dwã yó, ǹdə́ wu-bɔ̀nɔ̀ twéé twéé. ⁸ À lyim gə́ y'à zɛ̃̀ rə̀ n'ê yì dɛ̃́dɛ̃́ mɔ́ ce, à y'à shèè mó à yé-zwã̌ y jàà y kɛ̀bɛ́ è nyɛ ǹdə́ mɔ́ mɔ́ wẽ́, sə kɔn yə̀ dɛnɛ yé, sə à m'a byili mú à wu-bɔ̀nɔ̀ wá, dɔbrɛ tɛ̀bɛ́ rə̀ bə zhɔ̌ zhe yilə, wɔ́ Cinu mú mɔ̀bɔ́ ń nə́ ń zwẽ mó mó nyí rí. ⁹ È m'a yə̀ ǹdə Nəwee nàná bɛ́ yi ní ta: à bwəl nyí bə̀ Nəwee nàná bɛ́ bə̀myɛ́ mɔ́ k'ê t'â la lũ w zõ gaga yé; èta myɛ à n'â bwəl mó nyí b'à k'â t'â la lyim kǒ ǹdə́ mɔ́, à k'â t'â la mɔ́ búlə́ ju gaga yé. ¹⁰ Pyàr rɛ́ gə twẽ̌ rə̀ jààsɛ́ w myɛ, pyǎlsɛ́ gə zɛ̃̀ sə̀ n'ê zhízhǐ myɛ, à dɔbrɛ́ t'â la ǹ nyí ni tõ̌ rə vò pyépyé yé, sə à yə̀-zùlə́ dɔbrɛ́ j'â t'â la zhízhǔ gaga yé, wɔ́ Cinu mú mɔ̀bɔ́ ń nə́ ń byili mú ń wu-bɔ̀nɔ̀ w mɔ́ nyí rí. ¹¹ Ǹ wu zhìlì, ǹ bə jàà èdù zhǐ yé, bə̀ t'â zal ǹ wu ni yé, nyǐ àmyɛ́ m'a cĩ́ ku námpùlú nà a m'a kə́kɛ́lɛ́ kə́kɛ́lɛ́ ǹ nə́kulə né, a zɛ̃̀ a ji ǹ kùr ré səfyííribáa yó, ¹² à m'a zə orubyisibá b a m'a lù ǹ byíl-fwàlsɛ́ dɛ̃̌-sõ mó, a zə nə́kulə nyɛ̀bɛ́ nə̀ n'ê jə́jɛ̀mɛ́ a m'a lù ǹ bwə̀rsé, a zɛ̃̀ a zə nə́kulə nyɛ̀bɛ́ nə̀ n'ê súlí ǹ bɔ́bwár rɛ́ mɔ́ a m'a lù a kə́kɛ́lɛ́ ǹ púlə́púlə́. ¹³ Ǹ byǎ bɛ́ gakó m'a yə̀ Cinu kwã-lyì, sə ǹ byǎ bɛ́ yə̀-zùlə́ né m'a yə̀ nánfɔ̀lɔ̀. ¹⁴ Ǹ m'ǎ cĩ́ kùr cángá tũ̀twĩ̀ĩ̀ rí wẽ́, sə jɔ́ɔ́rɛ tũ̀twə̃̀ə̃̀ né m'a zə nyan ǹdə́ mɔ́: ǹ kə́ ǹ tá ǹ la kaka ywẽ dǔr yé; wu-zɛ̃̀ɛ̃́ nánfɔ̀lɔ̀ m'a zə nyan ǹdə́ mɔ́: è k'ê t'â bàn ǹ nyí ni yé. ¹⁵ Bə̀ n'ê zɔ̀m bə̀ cĩ́, bə̀ shèè bə̀ n'ê tɛnɛ bə̀ la bú ǹdə́ mɔ́? Rə̀myɛ́ mɔ́ t'â shí àmyɛ́ sõ yé! Lò mó mɔ̀bɔ́ ń shèè n tɛnɛ ń la bú ǹdə́ mɔ́ mɔ́ mà n já n tu ǹ yé né. ¹⁶ Nyì wé, wɔ́ àmyɛ́ à wɛ̀rhɛ́ lò mó mɔ̀bɔ́ ń nə́ ń wɛ̀rhɛ́ wẽ̀ ré mó, mɔ̀bɔ́ ń nə́ ń fúfǔ myìn-cala nɛ́, n zɛ̃̀ n ce búlə́ ku kɔ̀bɔ́ bə̀ la m'e twĩ̀ tum rí tɛ̀bɛ́ ò mə̌ s'o twĩ̀ mú du nə̀ wẽ́ mó; wɔ́ àmyɛ́ myɛ à wɛ̀rhɛ́ cɔ̀rna mɔ́ cɔ̌ mɔ́ yilə! ¹⁷ Búlə́ ku kɔ̀bɔ́ gakó bə̀ zùrhì bə̀ la m'e bú ǹdə́ mɔ́ mɔ́ wàr mɔ́ kaka ò la wɔ̀rhɔ́ yé, mə̀jòlò kɔ̀bɔ́ gakó ò cĩ́ yò ǹ yó bùrsi jàà wa, ǹ m'ǎ ŋwɛ̀nɛ́ ń ce o lwar bə̀ dóó ŋwɛ́nɛ́ ò yó wə. Wɔ́ rə̀myɛ́ rə̀ m'a yə̀ Cinu tùntùnnə bé cəl ré. Wɔ́ rə̀myɛ́ rə̀ m'a yə̀ bə̀ cángá tũ̀twĩ̀ĩ̀ rí rə̀ n'ê shí àmyɛ́ sõ mó, wɔ́ Cinu nyí rí.