¹ Nyǐ Cinu nyí rí: Wɛ̀rhɛ́-na kɔn rɛ́ tɛ̀bɛ́ rə̀ mə̌ mɔ́ sə á twĩ̀ cángá tũ̀twĩ̀ĩ̀, b'à vwǎrh mɔ́ yú mə zhɛ̀, à cángá tũ̀twĩ̀ĩ̀ rí myɛ m'a du á yírh wə. ² Wu-nyɔ̃̀ cí wɔ́ lò mó mɔ̀bɔ́ ń nə́ ń wɛ̀rhɛ́ rə̀myɛ́ mɔ́, Adã byǐ mɔ̀bɔ́ ń zhǐ rə̀ nà y yó, ń nə́ ń nyàm shìrhə́ y dɛ̃ rɛ́, ń já ń tá ń fuuli ri yé, ń nə́ ń zal ń jɛ̃̀ y è t'â wɛ̀rhɛ́ lwɛlɛ rə̀dù ga myɛ yé. ³ Zhə-bal byǐ mú bə̀ká n wɔ̀, ńmyɛ̌ mɔ̀bɔ́ ń já ń ŋwɛ́nɛ́ ǹdə́ Cinu mú, bə̀ká n wɔ̀: «Cinu mà n já n vùr ni ń dwí rí wẽ́!» yé, sə tùm-byǐ mú myɛ bə̀ká n wɔ̀: «Nyǐ à wɔ́ cǒ nánkùlù!» yé. ⁴ Nyǐ Cinu nyí rí rə̀ shò kwã nɛ́: tùm-byǎ bɛ́ byɛ̀bɛ́ bə̀ n'ê nyàm à shìrhə́ dwã nɛ́, bə̀ cír bə̀ n'ê wɛ̀rhɛ́ kɔn rɛ́ tɛ̀bɛ́ à só, e jà bə̀ zhǐ à dɔbrɛ́ nà y yó mó, ⁵ à m'a cə̀r nə́kulu òdù a cĩ́ bə̀ dúdú yilə, à jì y wẽ́, ǹd'â byílsí gə́ kə́kɛ́lɛ́ má nyí rí wẽ́, bə̀ yilə né kɛ̃ ò yó. Rə̀myɛ́ mɔ́ m'a cɛ̀nɛ̀ bala-byǎ ǹdə́ kana-byǎ; à m'a kɛ̃ yil tɛ̀bɛ́ rə̀ m'à j'â ŋwɛ́nɛ́ twéé twéé mó ò yó, rə̀ t'â la jó gaga mɔ́. ⁶ Zhə-bal mɔ́ byǎ byɛ̀bɛ́ bə̀ j'â ŋwɛ́nɛ́ ǹdə́ Cinu mùnì ga bə twĩ̀ ń còrhó tumə né, bə swéné Cinu yil ré, sə bə yə̀ ń tùntùnnə mó, lyì bí byɛ̀bɛ́ gákó bə̀ n'ê nyàm shìrhə́ y dɛ̃ rɛ́ e jà bə̀ t'â fuuli ri, e jà bə̀ j'â zhǐ à dɔbrɛ́ nà y yó mó, ⁷ à m'a ce bə bə̀ à Yi pyɔ̀ w yó, à m'a ce bə fùù ǹdə́ wu-nyɔ̃̀ nánfɔ̀lɔ̀ jì y kɛ̀bɛ́ bə̀ n'ê ce ne è wẽ́ mó w mó; à m'a zwẽ bə̀ vwə̃̀ námpúmə́ cɛ̃́ɛ̃́ nɛ́ ǹdə́ bə̀ pansɛ́ bə̀ n'ê pɛ nɛ à vwĩ̀-jùlú w yó mó, bə̀ bə̀ m'a byẽ̀ à jì y bə̀: «Dwə́ né gakó yi-co jì». ⁸ Nyǐ Cinu Yi mú, mɔ̀bɔ́ ń nə́ ń cĩ́ Esərayɛl lyì bí byɛ̀bɛ́ bə̀ y'à jì mú dwã yó mó nyí rí: à m'a k'a cĩ́ bə̀ dwã myɛ dwã yó, bə kə́kɛ́lɛ́ mɔ, a súlí byɛ̀bɛ́ bə̀ jɛ̀rɛ̀ bə̀ ŋwɛ́nɛ́ dwã yó mó ne! Yə̀-bəlwàálɛ́ cìnə́ bé byɛ̀bɛ́ bə̀ súl bə̀ lwɛlɛ rɛ́ mɔ́ b'a nə sǔbri ⁹ Ámyɛ̌ gɔ-vwàmá nɛ́ gakó, bà-na á dɔ̃̀ gɔ, ámyɛ̌ gɔ-wẽ̀ ré á wɔ túr rí wẽ́ mó: ¹⁰ nyǐ wɔ́ lyìlyə̌r rə̀ wɔ́ yìlnə bé; bə̀myɛ́ yó w gakó gə́ wɔ́ nɛ́, bə̀ j'â yə̀l kaka yé; bə̀ wɔ́ kǔlse shɛ̀bɛ́ sə̀ nyə́ né dɛ̃, sə̀ wàr sə̀ wə̌rh yé, sə̀ j'â pyě tɛ̃́, sə̀ n'ê dàrhà, sə̀ só jàn dɔ̀ɔ̀, ¹¹ bə̀ wɔ́ kǔlse shɛ̀bɛ́ sə̀ j'â só kùjú dɛ̃́dɛ̃́ myɛ, sə̀ j'â yə̀l wál: «Kɔn mǎ!» yé, e j'à wɔ́ bə̀myɛ́ bə̀ wɔ́ ènɔ̀nà bɛ́! bə̀ yə̀l kaka yé shò yé, bə̀ mə̀dù gakó já ń nə́ ń kwè ń sə̀pwà sɔ́má, lò gakó já n kə́ n zǎ ń ŋwɔ̀lɛ̀ kɔn rɛ́ nɛ, kɔn b'e yí n nə rɛ: ¹² Zhǝ̀nà, á m'ǎ du ǹdǝ́ wu-nyɔ̃̀, a: ǹdǝ́ yǝ̀-zùlǝ́; pyàr rɛ́ ǹdǝ́ pyǎlsɛ́ m'a kǎrh ǹdǝ́ wu-nyɔ̃̀ á YÉ né, gɔ sõ cèmé né gakó m'a mà jɛ̀rh nǝ ce á kùr wǝ. ¹³ Sɔr k'ê t'â la nɛ́ yál yé wɔ́ sǝpɛrɛsɛ* è la nɛ́ yál, ronce* t'â la nɛ́ yál yé wɔ́ myrte, sǝ è m'a yǝ̀ còrhó, kɔn rǝ̀ zhǐ rǝ̀ t'â cɔ̀ gaga yé.