¹ Mɔ̌ lò ń nə zwẽ kɔn rɛ́ tɛ̀bɛ́ bə̀ cĩ́ nə́ba mɔ́ nyí? Mɔ̌ lò yil Cinu co ń jɛ̃̀ y pwẽ̀ ne? ² Ń tùntúm mú du ǹdə tǒ námpɔ́lɛ́ ta ń yé né, ǹdə cǒ nà kɛ̀bɛ́ è shí cə-kùlì w è n'ê dwi ta; ń kaka y'à yə̀ yírh swí, ń kaka myɛ y'à tɛ̀nɛ́ rə̀ càn rə̀ y'à m'a ce nə́ nyǐ mu nə́ nə yé, kaka myɛ tɛ̀nɛ́ ń yala nɛ rə̀ y'à m'a ce nə́ pyà mɔ yé. ³ Numbyínsí y'à n'ê fuuli mu, sə̀ y'à pɔr mɔ sə cĩ́ vɔ̃̀ nɛ, ń wɔ́ zúzúnú cə́bal, lò mó mɔ̀bɔ́ ń myɛ̀rhɛ̀ nɔ̀nɔ̀ w mɔ́, ń wɔ́ ǹdə lò mó mɔ̀bɔ́ bə̀ n'ê pyìlì bə̀ yə́rh ń yé né ta; zhə̀n ga, bə̀ gə́ fuuli mu mú ce, nə́ y'ǎ t'á kwè mo ǹdə lò ne yé. ⁴ E jà wɔ́ nə́ nɔ̀nɔ̀ w ń zwẽ n zhĩ, nə́ yala yin rí ń zwẽ ń nə́ ń yì, sə nə́myɛ̌ j'ǎ y'ǎ n'é nyǐ mu ǹdə wɔ́ lò mó mɔ̀bɔ́ ń nɔ còrhò-tum ta, Yi mà mɔ rə súlí rə ce mo cìzhìl ta. ⁵ E j'à wɔ́ nə́ yó-kùùlí tũ̀twə̃̀ə̃̀ né nə̀ ce bə ce mo cìzhìlə̀, bə̀ bɔbwɛlɛ mɔ nə́ lwɛlɛ rɛ́ yilə: còrhò-tum rí tɛ̀bɛ́ rə̀ n'ê byili bə̀ nə́ b'ǎ nə yə̀-zùlə́ zhə̀n ga mɔ́ jòm ń yó wə, sə nə́ wárh mɔ́ y'à wɔ ń nyəla nɛ́ wẽ́. ⁶ Nə́ gakó y'ǎ j'á n'é zhə̀l tɛ̃́ ǹdə və̌-ywàálɛ ta, lò gakó yà nə́ ń kwè ń sɔ́má, sə Cinu ce nə́myɛ̌ gakó lwɛlɛ rɛ́ nyɔ̀ ń yó wə. ⁷ Bə̀ wɛ̀rhɛ́ mɔ jàn, sə ń lwəl ń cìn tɛ̃́; ń yə̀ ń nyí púr yé, ǹdǝ pyì-bwɛ̀lɛ́ kɛ̀bɛ́ bǝ̀ n'ê vwɛ̃ bǝ̀ m'ê la gu jàà w ta, ǹdǝ pyìrhǝ̀ kɛ̀bɛ́ è wɔ lyì bí byɛ̀bɛ́ bǝ̀ n'ê gɔrh è kur rí yé né mó ta: è nyí j'â wɔ́ cám; ńmyɛ̌ yə̀ ń nyí púr yé. ⁸ Bə̀ nwɛ̀nɛ̀ mɔ, bə kə́ ń bùrsì, bə zɛ̃̀ bə gu mu, mɔ̌ lò ń nə nə́ ń lyǐrh ń yi rí rə̀myɛ́ mɔ́ lyì bí yò? Zhə̀n ga, bə̀ vùr mu lyì-nyìrh cɛ y yó, bə̀ mà mɔ ń dwí rí dóó w yilə. ⁹ Bə̀ co mo ǹdə́ lyì-bəlwǎlsɛ́, ń bɔ̀l mɔ́ wɔ ǹdə́ nə̀cànà bɛ́ bɔ̀là bɛ́, e jà ń yə̀ lwɛlɛ wɛ̀rhɛ́, kɔma myɛ yə̀ ń nyú w shí yé. ¹⁰ Cinu zə nɔ̀nɔ̀ n pyárh mɔ n bɔbwɛlɛ. Ǹ gə ce ń nyǔ mú yə̀ yò kɔrhɔ vwĩ̀, ń mà n nə dwí, ń myə̌l m'a zə dwɛ̀lɛ̀, sə Cinu pùbùlə̀ né m'a pyìrh. ¹¹ Ń gə́ shɛ̀nɛ́ nɔ̀nɔ̀ mɔ́ ce, ń yírhə́ m'a nə ń dwí rí, ń mà n búl n cɛ; bə̀ gə́ m'a j'a lwar bə̀ ń wɔ́ cángá cə́bal mɔ́ yi ní, ńmyɛ̌ à Tùntùnnə mó mà n ce lyì nánjə̀jóló jǐrh cánga cìnə́, ń cìcì mú gə́ zwẽ bə̀ dwə́ə́ré n zhĩ mú yilə. ¹² Rə̀myɛ́ ce, à m'a ce n nə cəl lyì-zhǎ bɛ́ wẽ́, sə è wɔ́ lyì mɔ̀ɔ̀rhɛ̀ yàà bə̀ m'a yə̀ ń cəl ré, ń gə́ shɛ̀nɛ́ n lwǝl ń cìn tɛ̃́, kɔn m'e yí n cì mú, n shɛ̀nɛ́ bə gə̀ mɔ bə ce yə̀-bəlwàálɛ́ cìnə́ bé wẽ́, ńmyɛ̌ ǹdə́ ń gə́ wɔ́ nɛ́ mɔ́, gə́ shɛ̀nɛ́ n zhĩ lyì-zhǎ bɛ́ dwə́ə́ré, n súlí n yə̀ cã̌-zalna yə̀-bəlwàálɛ cìnə̀ yil mú yilə.