¹ Zɛ̃̀ ń du tɛ̃́ Səyɔ̃, zɛ̃̀ ń du tɛ̃́, zə ŋwɔ̀nɔ́, zú ǹ kàmə̀zwǐsí shɛ̀bɛ́ sə̀ càn dɛ̃́dɛ̃́ mɔ́, Zhərəzalɛm, Yi cɔ, bə̀ kɔn zhí zà, lò mɔ̀bɔ́ ń yə̀ gòm, lò mɔ̀bɔ́ ń zhe jìmdi kə́ ń wàr ń mà n kwɛ̃̀ n bə̀ ǹ sõ gaga yé. ² Zhərəzalɛm, ǹmyɛ́ mɔ̀bɔ́ bə̀ zɔ yóm mó, du kɔ́kɔ̀rhɔ́ w wa, vɔvwa ǹ cìnə̀, zɛ̃̀ ń zhì dɛ̃̌, Səyɔ̃ bə̀kɔ́ mɔ́, ǹmyɛ́ mɔ̀bɔ́ bə̀ zɔ yóm mó, sə́ nyáná nɛ́ ǹ byã nɛ́. ³ Zhə̀n ga, nyǐ Cinu nyí rí: È wɔ́ nánfò bə̀ yè ába, rə̀myɛ́ ce bə̀ t'â la sə̀byǐ kwã̀ɔ̃́ bə m'e zwẽ ába yé! ⁴ Zhə̀n ga, nyǐ Cinu Yi nyí rí: Kùr-jirə́ yə́, wɔ́ Ezhibti ní à dwí rí zhə̀l rə vò rə jòm né; yó gurə́ yə́, wɔ́ Ashəri è twĩ̀ bi jɔ́ɔ́rɛ́ tumə; ⁵ sə èlǎsɛ̃́, bə̀kɔ́n rə̀ wɔ́ à nyɔ̀ɔ̀rhɛ́, nyɔ̀nɔ̀ mɔ́? wɔ́ Cinu nyí rí: Bə̀ bə̀ zɔ à dwí rí bə m'e lyɛ̃ nánfò, rə̀ pyǎ bɛ́ bə̀ wɔ́ wu-bárhɛ́ cìnə́ mó n'ê wùrhə́, dɛ̃ rɛ́ námpúm, bə̀ j'â n'ê fuuli à yil ré, bə̀ ŋwɛ́nɛ́ bə̀ ŋwɛ́nɛ́! Wɔ́ Cinu nyí rí. ⁶ Rə̀myɛ́ ce, à dwí rí m'a j'a lwar à yil ré; rə̀myɛ́ ce, dɛ̃ rɛ́ rə̀myɛ́ mɔ́ yù wə, rə̀ m'a lwar b'à wɔ́ lò mó mɔ̀bɔ́ ń nə́ ń wə̀lə̀: «Nyǐn ni!» mú. ⁷ Bə̀ j'â n'ê zwẽ tùntúm mɔ̀bɔ́ ń nə́ ń cĩ́ nə́ba yə̀-zùlə́ nyí rí, ń nə́ ń cĩ́ wu-bɔ̀nɔ̀ nyí, ń nə́ ń cĩ́ nə́ba cìn-nɛrɛ́ nyí rí, ń nə́ ń wə̀l Səyɔ̃ nɛ: «Ǹ Yi rí n'ê jí pyɛ̀lɛ̀» mɔ́, zhəəle náàcɛ̀nɛ́ pyàr rɛ́ yə́-pɛ̀lɛ́ wa. ⁸ Wɔ́ ǹ yìlnə bé cəl ré! bə̀ n'ê zhẽ̌ bə̀ cələ né dɛ̃̌, bə̀ tó dwã bə̀ n'ê mà wu-nyɔ̃̀ búbwéé, bə̀ bə̀ nə ǹdə́ bə̀ cìcì yírhə́, Cinu ń kwɛ̃̀ ń bàn Səyɔ̃. ⁹ Tó-nə dwã á búbwéé, mǎ-na wu-nyɔ̃̀ búbwéése, Zhərəzalɛm jì-bwə̀r, bə̀ Cinu nə́ ń zal ń dwí rí wu ni, ń nə́ ń zwẽ Zhərəzalɛm. ¹⁰ Cinu nə́ ń ce ń jɛ̃̀ y è n'ê byili bə̀ ń bə dõ zhe mó pwẽ̀ ne, tənèsé gakó lyì bí yírh wə, sə lũ w cə-yala gakó m'a nə nə́ Yi rí vwǎrh mɔ́. ¹¹ Zhəl-nə, zhəl-nə, du-nə gàà; á bə̀k'á dwə̀rh kɔn rɛ́ tɛ̀bɛ́ rə̀ zhe jìmdi yé; du-nə Babyəlɔnɛ nɛ́, vǔr-nə á jìmdí, ámyɛ̌ byɛ̀bɛ́ á n'á zhĩ Cinu còrhó w wẽ̀ ré mó. ¹² Sə á t'á la làlà wɔ̀rhɔ́ á m'á du yé, á t'á la zhəl ǹd'á n'á zhizhiri dɛ̃̌ myɛ yé; bə̀ lò mó mɔ̀bɔ́ ń ma n yə̀ á yé né ń nə́ ń zhə̀l mó, è m'a yə̀ Cinu, sə mɔ̀bɔ́ ń mà n yə̀ á kwã á m'á vò mó, è m'a yə̀ Esərayɛl Yi rí. Yi zhẽ̌ tùntùnnə mó mɔ̀bɔ́ numbyínə́ bé n'ê nwɛ̀nɛ̀ mɔ́ yó dɛ̃̌ ¹³ Nyǐ à tùntùnnə mó kɔn gakó m'a zwẽ nyí, bə̀ m'a cĩ́ mu còrhó jàà wẽ́, bə̀ m'a pɔ̃ pyɛ̀lɛ̀, bə̀ m'a zhẽ̌ ń yó dɛ̃̌ kɔn lyɛ̃ cɛ nɛ. ¹⁴ Ǹdə wu-zɛ̃̀ɛ̃́ nánfɔ̀lɔ̀ gə́ zɔ lyì-zhǎ bɛ́ ń shò kwã nɛ́, bə̀ ń yà ń kə́ ń də̀ ǹdə numbyíní ta, ń gə́ yà ń kə́ ń də̀ lò mɔ̀bɔ́ bə̀ wɔ̌ bə̀ nyǐ mú yilə, n súlí ń yà ń kə́ ń bə nyɛ̌ ǹdə Adã byǎ bɛ́ ta mɔ́ yi ní yilə, ¹⁵ èta myɛ, tənèsé lyì-zhǎ bɛ́ myɛ wun m'a yə̀ nyàn dɛ̃́dɛ̃́, pyǎ nyə́ m'a jǐrh cám, bə̀ bə̀ nə kɔn tɛ̀bɛ́ bə̀ y'à j'â gwẽ̌ yə̀ be cĩ́ mú, bə̀ n'ê nyǐ kɔn tɛ̀bɛ́ bə̀ y'à j'â gwẽ̌ yə̀ rə̀ yò zɔ̀m bə nyɛ̀ɛ̀ mɔ́.