¹ Cili-nə ne, ámyɛ̌ byɛ̀bɛ́ á n'á pyà cángá tũ̀twĩ̀ĩ̀ rí mú, ámyɛ̌ byɛ̀bɛ́ á n'á pyà Cinu mú: Nyǐ-nə nə́kulu w kɔ̀bɔ́ bə̀ m'e sə̀ ába mɔ́, ǹdə́ gɔ́rɔ́ w kɔ̀bɔ́ bə̀ vùr ába ò wẽ́ mó kùr rí; ² Nyǐ-nə Abəraam, á da mɔ́ ǹdə́ Sara mɔ̀bɔ́ ń lùl ába mɔ́; à byẽ̀ Abəraam ǹdə́ ń yà ń wɔ́ ń dúdú; sə à cĩ́ bwəl ń yó, a ce n pù. ³ Zhə̀n ga, Cinu nə́ ń zal Səyɔ̃ cɔ w wu ni, ń nə́ ń zal ò jì-bwə̀r ré gakó wun ni; ń nə́ ń ce ò gɔ-elũ èpòlò w yə̀ ǹdə Edɛ̃ɛ̃ ta, ò jə́ y zɛ̃̀ e yə̀ ǹdə Cinu bɔ́ɔ́ ta; wu-nyɔ̃̀ ǹdə́ fùwə́ nánfɔ̀lɔ̀ m'a k'a yə̀ ò wẽ́, e súlí nə̀bán-co nwíísi ǹdə́ wə̀-dúúri cǝlə. ⁴ Ámyɛ̌ byɛ̀bɛ́ á wɔ́ à dwí rí mú, à n'â lwə̀l ába b'ǎ cili ni náàcɛ̀nɛ́, ámyɛ̌ cɔ w lyì bí, pyèrhè-nə á zhã̌ á ce àmyɛ́ səta: bə̀ wɔ́ àmyɛ́ sõ nyí rí m'a shí ní, sə à m'a ce kɔn rɛ́ tɛ̀bɛ́ à kɔ́, rə̀ wɔ́ pwẽ̀ dwə́ né yil mú, yə̀ zhə̀n kɔna! ⁵ À cángá tũ̀twĩ̀ĩ̀ rí bwəlse; à vwǎrh mɔ́ n'ê dwi, sə wɔ́ à vɔ̀mɛ̀ nɛ́ nə̀ m'a kə́ dwə́ né bùrsi; cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ m'a zə à zhə̀nà, sə nə̀ m'à n'ê dɛ̃̀ à vɔ̃̀ wá. ⁶ Kwẽ̌-nə á nyǐ dɛ̃̌-yi rí, rə̀myɛ́ kwã, sə á lwəl tɛ̃́ á nyǐ cɛ yá: zhə̀n ga, dɛ̃̌-yi rí m'a jé tɛ̃́ ǹdə nyɛ̀rh ta, cɛ y m'a jí ǹdə kàmə̀zwǐ ta, sə è lyì bí m'a cì ǹdə vɔ̀mɛ̀-shirh ta. Sə à vwǎrh mɔ́ m'à j'â ŋwɛ́nɛ́ twéé twéé yilə, sə bə̀ t'â la à cángá tũ̀twĩ̀ĩ̀ rí tɛ̃́ ju gaga yé. ⁷ Cili-nə ne, ámyɛ̌ byɛ̀bɛ́ á yě cángá tũ̀twĩ̀ĩ̀ rí pár mɔ́, dwí rí tɛ̀bɛ́ rə̀ lyì bí cĩ́ à nyə́ né bə̀ wẽ́ mó, á bə̀k'á dùr numbyínsí tùùrhí yé né yé, sə̀ mɔ̀n nɛ́ bə̀k'a cĩ́ ába tɛ̃́ yé, ⁸ bə̀ səlɔ̀wà m'a jí si ǹdə kàmə̀zwǐ ta, zə̀zɔ̀mɛ́ m'a jí si ǹdə pyì-kur ta. Sə à cángá tũ̀twĩ̀ĩ̀ rí m'a j'â ŋwɛ́nɛ́ twéé twéé yilə, à vwǎrh mɔ́ myɛ m'a j'a yə̀ nɛ́ byin byin gakó. ⁹ Zɛ̃̀ ń du tɛ̃́, Cinu jɛ̃̀, zɛ̃̀ ń du tɛ̃́, zə ŋwɔ̀nɔ́, zɛ̃̀ ń du tɛ̃́, ǹdə shãã ga yi rí dwã nɛ́ wẽ́ ta, ǹdə byinə né nyɛ̀bɛ́ nə̀ lyɛ̃ mɔ́ wẽ́ ta. È nə də̀ ǹmyɛ́ ǹ kà nə̀-fɔ̀lɔ̀ ku w nánjə́gɔ́rɔ́ w ń bɔbwɛlɛ, ń zò Dɔm nánjə́gɔ́rɔ́ w nà? ¹⁰ È nə də̀ ǹmyɛ́ ǹ ce Nə̀-fɔ̀lɔ̀ wá, Gɔ́rɔ́ nánlyilyùmú nánfɔ̀lɔ̀ w nàná bɛ́ wĩ, ń ce nə̀-fɔ̀lɔ̀ w kùr ré jǐrh sɔ́má, mùnì ga lyì bí byɛ̀bɛ́ ǹ zwẽ mó kwè bə m'e lyɛ̃ nà? ¹¹ Lyì bí byɛ̀bɛ́ Cinu vwǎrh mɔ́ m'a kwɛ̃̀ bə bà, bə̀ m'a zù Səyɔ̃ ǹdə́ wu-nyɔ̃̀ búbwéése, shãã ga wu-nyɔ̃̀ w m'a yə̀ yó-kwə̀lə́ bə̀ yó wə. Wu-nyɔ̃̀ nánfɔ̀lɔ̀ ǹdə́ fùwə́ nánfɔ̀lɔ̀ m'a bə̀ rə sú cɛ, Wu-zhùlù ǹdə́ wɔ́wɔ́lɔ́ dùr rə jé. ¹² Wɔ́ àmyɛ́, wɔ́ àmyɛ́ à n'â zal á wun ni. Ǹmyɛ́ wɔ́ mɔ̌ ǹ mə́ ǹ dùr numbyíní y è n'ê cì mú ywẽ, Adã byǐ mú bə̀ n'ê zə bə̀ mɛrhɛ gɔ nɛ mɔ́, ¹³ ń zɛ̃̀ ń mə́ ń swě Cinu ń wɛ̀rhɛ́ mɔ́ mɔ́, ń lɛ̀lɛ̀ dɛ̃̌-yi rí dɛ̃̌ n zɛ̃̀ n cĩ́ cɛ y kùr rí tɛ̃́ mɔ́ yò, ǹ j'â mə́ ǹ kəkə dɛ̃ rɛ́ námpúm, ǹ bə shɛ̀ zhǔ, lò mó mɔ̀bɔ́ ń nə́ ń nwɛ̀nɛ̀ mɔ́ lyim-cəcɔ̌ w yé né, ǹdə ń gə́ wɔ̌ ń mà n ce ń jé tɛ̃́ ta? Sə è nə wɔ́ yẽ̀ lò mó mɔ̀bɔ́ ń nə́ ń nwɛ̀nɛ̀ mɔ́ mɔ́ lyim-cəcɔ̌ w ŋwɛ́nɛ́? ¹⁴ Làlà, nyǐ lò mó mɔ̀bɔ́ ń yà ń tu n zə ń yé n pú tɛ̃́ mɔ́ ń nɔ ń cìnə̀: ń tá ń la cú yé, ń tá ń la gɔ́rɔ́ w w co yé, búrú myɛ j'â t'â la mɔ mùrù gaga myɛ yé! ¹⁵ Wɔ́ àmyɛ́ à wɔ́ Cinu, ǹ Yi rí, rə̀ n'ê zhɛ̀rh nə̀-fɔ̀lɔ̀ wá, ò nə̀-zha y j'a zɛ̃̀ è n'ê ce dweme mó, rə̀ yil ré j'à wɔ́: lũ gakó Cinu mú. ¹⁶ À co à zɔ̀mà nɛ́ ǹ nyú wə, à shèè mó à jɛ̃̀ y ywə́l mó wə, à gə́ tú à n'â cìì dɛ̃̌-yi rí dɛ̃̌, a súlí à n'â cĩ́ cɛ y kùr rí tɛ̃́ ǹd'â gə́ y'à n'â wə̀l Səyɔ̃ nɛ: «Wɔ́ ǹmyɛ́ ǹ wɔ́ à dwí rí!» yi ní. ¹⁷ K'á zɛ̃̀ ń du tɛ̃́, k'á zɛ̃̀ ń du tɛ̃́, zɛ̃̌ ń zhì dɛ̃̌ Zhərəzalɛm, ǹmyɛ́ mɔ̀bɔ́ ǹ zwẽ Cinu lyim-cəcɔ̌ w kǎzɔ̌m mɔ́ ń jɔ̃̀ w ń nyɔ̀ mɔ́; yé-éjílə́ kǎzɔ̌m mɔ́, ǹ nyɔ̀ mɔ, ǹ fwərh mo. ¹⁸ Ń byǎ bɛ́ byɛ̀bɛ́ gakó ń lùl mú wẽ́, mə̀dù ga myɛ já ń yə̀ mə zə n vò n nyɔ̀ nɛ̃̌ yé; byǎ bɛ́ byɛ̀bɛ́ gakó ń kɔ̀n bə byì mú wẽ́, mə̀dù ga myɛ já ń yə̀ ń jɛ̃̀ nɛ zal yé! ¹⁹ Ywẽ̀ né nyɛ̀bɛ́ nə̀lyè y yú mú: mɔ̌ lò ń mà n kúrh mú? Cɔ̌ nánfɔ̀lɔ̀ ǹdə́ wu ni lo ǹdə́ nɔrh ǹdə́ búlə́ shù: mɔ̌ lò ń nə mà n zə ǹ wu ni? ²⁰ Ǹ byǎ bɛ́ j'â k'â wàr kaka bə̀ n'ê wɛ̀rhɛ́ yé, bə̀ tu bə̀ pyě jààsɛ́ gakó wẽ́, ǹdə pɔ̀lɔ̀ kɔ̀bɔ́ ò tu pɔ̀mɔ̀ wẽ́ ta, Cinu lyim-cəcɔ̌ wá, ǹ Yi rí búlə́ né ju mú ŋwɛ̀nɛ́ bɛ. ²¹ Rə̀myɛ́ ce ǹmyɛ́ mɔ̀bɔ́ ǹ nə́ ǹ nwɛ̀nɛ̀ mɔ́, ǹmyɛ́ mɔ̀bɔ́ ǹ nə́ ǹ tutwi, e j'à də̀ də̀vɛ̃́ è zhe mó mó, cili kɔn rɛ́ tɛ̀bɛ́: ²² Nyǐ ǹ Yó-cə́bal mɔ́, Cinu ǹ Yi rí, tɛ̀bɛ́ rə̀ n'ê zwẽ rə̀ dwí rí búlə́ rə̀ bwí mú, nyí rí: Nyǐ à zwẽ yé-éjílə́ kǎzɔ̌m mɔ́ ǹ jɔ̃̀ wa, à lyim-cəcɔ̌ w kǎzɔ̌m mɔ́, kɔn zhí zà ǹ kə́ ǹ tá ǹ la mɔ nyɔ́ gaga yé. ²³ À m'a ce mo lyì bí byɛ̀bɛ́ bə̀ n'ê nwɛ̀nɛ̀ mɔ́ mɔ́ jɔ̃̀ wa, lyì bí byɛ̀bɛ́ bə̀ y'à n'ê wə̀l mó: «Pyẽ̌ tɛ̃́ ń mɛrhɛ cɛ yá, mùnì ga nə́ tó ǹ yó nə́ lyɛ̃» mɔ́; rə̀myɛ́ yó, ǹ yà ǹ ce ǹ cã̌ y jǐrh cɛ, e y'à jǐrh sɔ́má lyì bí byɛ̀bɛ́ bə̀ y'à n'ê lyɛ̃