¹ Nyǐ Cinu nyí rí: Sə è nə wɔ́ yẽ̀ zhɔ̃́ sɛ́bɛ́ rɛ́ tɛ̀bɛ́ rə̀ n'ê byili b'à zhɔ̃̀ á ná mɔ́ ŋwɛ́nɛ́? Ráá, lyì byɛ̌ à zhe bə̀ jimə mə̀dù sõ à nə kwè ába a yè né a m'a ŋwɛ̃́ɛ̃́ à jim ń sõ mó? Nyì wé: wɔ́ á lwɛlɛ rɛ́ rə̀ ce bə yè ába, wɔ́ á yó-kùùlí tũ̀twə̃̀ə̃̀ né nə̀ ce bə zhɛ̃̀ á ná mɔ́. ² Etəra! À túwə́, e jà lòlò də́-byǐ... À byẽ̀, lòlò zɛ̃̀ ń yə̀ shɛ̀? À jɛ̃̀ y nə j'â wɔ́ ná-èkùlí, ná-èkùlí dɛ̃́dɛ̃́, ce è wàr è m'a zwẽ lò? À nə j'â bə jàn də́-byǐ myɛ zhe à la m'a vwǎrh lò? Nyǐ à gə bya nə̀-fɔ̀lɔ̀ w nàná bɛ́, o j'a wĩ à n'â ce ò bù-fwàlsɛ́ jǐrh gɔ-elũ èpòlò; nɛ̃̌ gə́ tɛ̀nɛ́ mɔ́ ce, mɔ́mɔ̌sɛ́ zɛ̃̀ sə̀ n'ê cì, sə̀ dɛ̀rhɛ̀ nə̀nyɛ̀lsɛ n'ê gwi si. ³ À n'â zə byín à zwì dɛ̃̌-yi rí, a zə yóló o yə̀ gàmə̀lyɔ̀nɔ̀, a pyìlì ri. ⁴ Cinu Yi pɔ nɛ cə̀rhnə̀-byǐ nyì-púpwírí: ń nə́ ń ce à nɛ zɔ̀mɛ̀ à byili mùnì ga a ŋwɛ̀nɛ́ a pə jàn lò mó mɔ̀bɔ́ ń jàn rɛ́ zhɛ̀ rə yẽ̌ mo mó ne. Nəkɔkɔ́lɛ́ gakó, ń nə́ ń ce a pyèrhè à zhɛ̃̌, mùnì ga a cili ǹdə cə̀rhnə̀-byǎ bɛ́ ta. ⁵ Cinu Yi pul à zhɛ̃̌ rɛ́. Sə àmyɛ́ j'â yə̀ à nà tɛ̃́ pɛ a cẽ yé, à yə̀ kwɛ̃̀ a twə̀r a vò à kwã yé. ⁶ À pɔ à cã̌ y lyì bí byɛ̀bɛ́ bə̀ y'à n'ê mà nɛ mɔ́ nɛ, a pə à pə̀pésé lyì bí byɛ̀bɛ́ bə̀ y'à n'ê mǔr à tama nɛ́ mɔ́ nɛ; à yə̀ à yé-zwã̌ y círhí tùùrhi ǹdə́ tə̀tàr pǔrh à yé y w mó yé né yé. ⁷ Wɔ́ Cinu Yi gə́ nə́ ń ce nyí à kwã mɔ́ yilə: rə̀myɛ́ ce à j'â t'â dùr tùùrhí yé né yé, rə̀myɛ́ ce myɛ, à j'a kù à yé y ǹdə nə́kulu ta, b'à lwar b'à t'â la cìzhìl jú yé. ⁸ Lò mó mɔ̀bɔ́ ń nə́ ń ce à jí bùrì mú wɔ bwə́lbwə́ləə! Mɔ̌ lò ń nə́ ń yǎl n bùr ǹdə́ nɛ? Nə́ zə dwã nə́ vò bù-kárna mó yé né! Mɔ̌ lò ń mà n yə̀ à búl-dõ bùrsí bǔr mú wẽ́? Ń twẽ̌ ǹ bə̀ à yala nɛ! ⁹ 9 Zhə̀n ga, Cinu Yi nə́ ń sɛ̃ nɛ: Mɔ̌ lò ń mà n ŋwɛ̀nɛ́ n cĩ́ dóó à yó wə? Zhə̀nà, lyì bí bə̀myɛ́ mɔ́ gakó m'a jí ǹdə kàmə̀zwǐ ta, səlɔ̀wà m'a jí bi. ¹⁰ Lò nə ŋwɛ́nɛ́ á cəcəl w ń nə́ ń nyàm Cinu, ń nə́ ń cili ń tùntùnnə mó cəl ré, ń zhə̀l cə-byín rí wẽ́ e jà ń já ń yə̀ pwẽ̀ də́-byǐ myɛ nɛ? Ń zə Cinu yil ré zhə̀nà, sə n zhí ń Yi rí ni! ¹¹ Sə è gə wɔ́ ámyɛ̌ byɛ̀bɛ́ gakó á n'á jéé myǐn yilə, á jě ǹdə́ wẽ̀ rə̀ zhe myǐn á kə́kɛ́lɛ́ mɔ́, zhəl-nə á cìcì myìn-zhù nánshɔ̃̀ w wẽ́, wẽ̀ ré tɛ̀bɛ́ rə̀ zhe myǐn, á n'á kwɛrhɛ rə̀ myǐn mú á ce né mó cəcəl wə. Wɔ́ à jɛ̃̀ y è la rə̀myɛ́ mɔ́ tũ̌ á yilə: á m'ǎ cì nɔ̀nɔ̀ nánfɔ̀lɔ̀ wẽ́!