¹ Cili-nə, ámyɛ̌ cɛmɛ nɛ́ nyɛ̀bɛ́ nɛ̃̌ kə́kɛ́lɛ́ ába mɔ́, pyèrhè-nə á zhã̌ á cili, dwə́ né nyɛ̀bɛ́ nə̀ wɔ pyépyé mó: Cinu byẽ̀ ne ǹd'â gwẽ̌ wɔ à ná wẽ́ ga, ń byẽ̀ à yil ré n ká n bwérhé, ǹd'â gwẽ̌ wɔ à ná pǔ wə. ² Ń dwèlè à nyí rí rə̀ wɔ́ ǹdə búlə́ shù kɔ̀bɔ́ ò zhe nyí ta, ń shèè ne ń jɛ̃̀ y ywə́l mó wə. Ń tɛnɛ nɛ à wɔ́ ǹdə cam tɛ̀bɛ́ rə̀ nyí rí wɔ́ nánsə́sɔ́mɛ́ ta, ń shèè ne ń swã̀ y wẽ́. ³ Ń wə̀l ne: «Wɔ́ ǹmyɛ́ ǹ wɔ́ à tùntùnnə mó, Esərayɛl, ǹmyɛ́ mɔ̀bɔ́ à la ǹ dɛnnɛ tó a ce à zùwə́ y du mú.» ⁴ Sə àmyɛ́ y'à n'â wə̀lə̀: «Nyǐ à j'a lyɛ̀ɛ̀ à cìn nánfò, wɔ́ nánfò yilə, zho yilə, à j'a zhɛ̀ à jàn rɛ́ gakó!» E jà kɔn rɛ́ tɛ̀bɛ́ à mə̌ ǹdə́ rɛ mɔ́ y'à n'ê dɛ̃̀ nɛ Cinu yala nɛ, à nyɔ̀ɔ̀rhɛ́ y'à n'ê dɛ̃̀ nɛ à Yi rí yala nɛ. ⁵ Sə èlǎsɛ̃́, Cinu zɔ̀m, ńmyɛ̌ mɔ̀bɔ́ ń mɛ́nɛ́ nɛ ǹd'â gwẽ̌ ŋwɛ́nɛ́ à ná wẽ́ mùnì ga a yə̀ ń tùntùnnə mó, mùnì ga a zə Zhakɔɔbɛ a kwɛ̃̀ a bə̀ ń sõ mó, mùnì ga a cĩ́ Esərayɛl dwã yó a pɔ̃ mɔ́, n wɔ̀: kɔn zhí rə̀myɛ́ mɔ́, à zhe kùr Cinu yírh wə, sə à ŋwɔ̀nɔ́ wá, wɔ́ à Yi rí. ⁶ Rə̀ wə̀l ne: «Kɔn gwẽ̌ wɔ́ námpɔ́lɛ́ dɛ̃́dɛ̃́ bə̀ ǹ yál tùntùnnə àmyɛ́ yilə, ǹ gə́ m'ǎ kwẽ̌ Zhakɔɔbɛ kwálsɛ́ ń cĩ́ dɛ̃̌, e jà ń ce Esərayɛl lyì bí byɛ̀bɛ́ bə̀ lú mú kwɛ̃̀ bə bə̀ mɔ́; à ce ǹ la yə̀ lũ w tənèsé gakó pwẽ̀, mùnì ga à vwǎrh mɔ́ yí lũ w cə-yala gakó.» ⁷ Nyǐ Cinu, Zwennə mó, ǹdə́ Esərayɛl Yi rí tɛ̀bɛ́ rə̀ bə dõ zhe mó nyí rí, lò mó mɔ̀bɔ́ bə̀ n'ê nyǐ bə̀ mùrì mú, lũ w lyì bí n'ê nyǐ ǹdə pɔrha kɔn ta mɔ́, pyǎ bɛ́ bə̀ wɔ́ wu-bárhɛ́ cìnə́ yóm mó, yil mú: Pyǎ m'a nə mɔ, sə bə̀ m'a zɛ̃̀ bə zhì dɛ̃̌, yó-cìnə́ myɛ m'a nə mɔ, sə bə̀ m'a wùlì tɛ̃́, Cinu mɔ̀bɔ́ ń zhǐ ń nà y yó mó nyɔ̀mɔ̀ yilə, Esərayɛl Yi rí rə̀ bə dõ zhe, rə̀ cír mu mú yilə. ⁸ Nyǐ Cinu nyí rí: À gə́ y'à n'â ce nyí ǹ kwã yi rí wə, à zwẽ ǹ lwǝ̌l mó; cìn-nɛrɛ́ y dɛ̃ rɛ́, à tú a sɛ̃ mɔ́; à cə̀r mó a cĩ́, a ce ǹ la ń yə̀ dwí rí dɔbrɛ́ ǹ gə́ m'ǎ kwẽ̌ tənà y ń cĩ́ dɛ̃̌ mɔ́, ǹdə́ ǹ gə́ m'ǎ tə̀ cəl tənèsé shɛ̀bɛ́ sə̀ cɔ̀ lyə́m lyə́m èta ń pə mɔ́, ⁹ ǹdə́ ǹ gə́ m'ǎ wɔ̀ lyì bí bə̀ zɔ yómə́ mó ne: «Du-nə!» mó, ǹdə́ lyì bí byɛ̀bɛ́ bə̀ wɔ cə-byín rí w mú ni: «Du-nə pwẽ̀ ré ne!» mó yi ní. Bə̀ m'a nə gɔ bə dɔ̃̀ sɔ́msɛ́ vɔ̀mɛ̀ nɛ́ nɛ, bə nə gɔ-dɔ́m-jààsɛ pyǎlsɛ́ shɛ̀bɛ́ gakó sə̀ ywẽ́ né pyě nánsə̀rh mó yó. ¹⁰ Nɔrh ǹdə́ nə̀nyɛ̀lsɛ t'â la bɛ nɔ̀nɔ̀ yé, nyɔ̀rhɔ́ lumi rí ǹdə́ nə̀nyɔ́nɔ́ lumi rí t'â la bɛ fúl yé; bə̀ lò mó mɔ̀bɔ́ ń wu w j'a sú ǹdə́ wu-bɔ̀nɔ̀ bə̀ yil mú mà n kál bɛ, ń mà n zə bɛ n vò bə nyɔ̀ nɛ̃̌ nə̀-bùlsí yó. ¹¹ À m'a ce pyàr rɛ́ gakó jǐrh sɔ́má, sə bə̀ m'a zhẽ̌ sɔ́msɛ́ dɛ̃̌ àmyɛ́ yilə. ¹² Nyǐ bi: bə̀ j'a shí pyépyé bə̀ bànà, bə̀ jàlà shí jə̀-gwã̀ sõ ǹdə́ yi-zùr sõ, bə̀ dwã shí Ezhibti tənà y wa. ¹³ Dɛ̃̌-yi, mǎ wu-nyɔ̃̀ búbwéése; cɛ, fǔ ǹdə́ wu-nyɔ̃̀, pyàr rɛ́, mǎ-na wu-nyɔ̃̀ búbwéése, bə̀ Cinu nə́ ń zal ń dwí rí wu ni, sə ń nə́ ń dùr rə̀ nə̀mwà bɛ́ nɔ̀nɔ̀. ¹⁴ Səyɔ̃ cɔ w y'à n'ô wə̀lə̀: «Cinu yǎrh nɛ tɛ̃́, à yó-cə́bal mɔ́ swě à yò!» ¹⁵ Kɛ̃ nə ya n swě ń byì-shɛ̀mɛ́ y yò, ń nə ya n swě ǹdə́ ń jal byǐ mú nɔ̀nɔ̀ dǔr? Má kana bɛ́ bə̀myɛ́ mɔ́ gə n'ê swě myɛ, àmyɛ́ j'â t'â la ǹ yò sǒ yé! ¹⁶ Nyǐ à kɛ̃ ǹ sə̀sã̌yùlú w à jɛ̀sɛ́ wun ní wẽ́, à yírhə́ j'â pyǎ ǹ byíl-fwàlsɛ́ ǹ mə́ kə́kɛ́lɛ́ ǹ cìn mú yó twéé twéé. ¹⁷ Lyì bí byɛ̀bɛ́ bə̀ k'â la kɔrhɔ bə lù mú mú n'ê dùr bə̀ bànà, sə lyì bí byɛ̀bɛ́ bə̀ y'à wǔr mú mú, ǹ cɔ̀rna bɛ́, n'ê twẽ̌ ǹ nyí ni bə̀ la pyépyé. ¹⁸ Nyǐ kɔn gə́ kə́kɛ́lɛ́ mɔ́ nyí rí ń nyì wé: bə̀ gakó j'â n'ê kal dwã, bə̀ bàn ǹ sono. Ǹd'âmyɛ́ mɔ̀bɔ́ à wɔ́ nã́nyì mú, ǹ m'ǎ ce be ǹdə bwẽ́ ku ta zhə̀n zhə̀nà, ǹ m'ǎ lyẽ be ǹ cã̌ nɛ́ ǹdə kɛ̃-byǐ kɛ̀bɛ́ bə̀ n'ê pɛ byal nɛ ta, wɔ́ Cinu nyí rí. ¹⁹ Zhə̀n ga, ǹ já ǹ wɔ́ cɔ̌ nánfɔ̀lɔ̀ ǹdə́ wu-zhùlù nánfɔ̀lɔ̀, ǹdə́ jì-bwə̀r tənà, Sə kɔn zhì zà, ǹ m'ǎ j'á jǐrh ná-éshɛ́nɛ́ dɛ̃́dɛ̃́ lò mó mɔ̀bɔ́ ń jě ǹ wẽ́ mó yilə, rə̀myɛ́ yi ní ǹdə́ lyì bí byɛ̀bɛ́ bə̀ y'à ce ǹ nə́ ǹ jé tɛ̃́ mɔ́ m'a dùr bə vò pyépyé bə yẽ̌ mó. ²⁰ Sə byǎ bɛ́ byɛ̀bɛ́ ǹ yà ǹ nə́ ǹ nwɛ̀nɛ̀, bə̀ gə́ y'à k'ê tɛ̀nɛ́ ǹdə́ mɔ́ mɔ́ yil mó, m'a k'a zɔ̀m ǹ zhã̌ wa, bə wɔ̀: «Bwə̌l mó j'â wɔ́ ná-éshɛ́nɛ́ dɛ̃́dɛ̃́ àmyɛ́ yilə! Bə̀ pɛ̃ bwə̌l! Twẽ̌ ń vò mùnì ga a ŋwɛ̀nɛ́ a jòm.» ²¹ Ǹ m'ǎ zɛ̃̀ ń bwə̀rh ǹ cìn ǹ wẽ́ ń wɔ̀: «Mɔ̌ lò ń lùl byɛ̀bɛ́ n pɛ̃? Àmyɛ́ y'à bə byǐ zhe yé, à y'à wɔ́ eju, à y'à wɔ yómə́-jè né, à y'à jé tɛ̃́; Sə byɛ̀bɛ́ èta mɔ́ myɛ, mɔ̌ lò ń nə kɔ̀n bɛ bə byì? Nyǐ à y'à j'â jě à dúdú, byɛ̀bɛ́ èta mɔ́, wɔ́ yẽ̀ bə̀ nə y'à ŋwɛ́nɛ́?» ²² Nyǐ Cinu Yi nyí rí: Nyǐ à m'a cèlè à jɛ̃̀ y a zǎ tənèsé ne, à m'a zhẽ̌ à myɔrhɔ w a zǎ dwə́ né ne: bə̀ m'a kwɛ̃̀ bə bə̀ ǹdə́ ǹ byǎ bɛ́ bə̀ jɛ̀rh w bə b'e pɔ̃́, sə bə̀ m'a kwè ǹ bə̀kwá bɛ́ bə cĩ́ bə̀ pyə́pyɛla wa. ²³ Pyǎ m'a yə̀ ǹ dabá bə nyǐ ǹ yò, sə bə̀ bə̀kwá bɛ́ m'a yə̀ ǹ kɔ̀nna bɛ́. Bə̀ m'a tu bə zə bə̀ yə́rh bə pú tɛ̃́ ǹmyɛ́ yé né, bə̀ m'a jə̀l ǹ nèsé shó wə́. Ǹ m'ǎ zɛ̃̀ ń lwar bə̀ wɔ́ àmyɛ́ à wɔ́ Cinu mú; cìzhìl j'â t'â la byɛ̀bɛ́ bə̀ n'ê dɛ̃̀ kɔn àmyɛ́ sõ mó zal gaga yé. ²⁴ Bə̀ nə wɔ̌ bə̀ m'a zwẽ kɔn rɛ́ tɛ̀bɛ́ búlə́ kàndɔ w pwà búlə́ jàà w mɔ́ ò jɔ̃̀ wa? Bə̀ nə wɔ̌ bə̀ m'a ce lò mó mɔ̀bɔ́ wu-bárhɛ́ cə́bal zɔ yóm mó nə ń cìnə̀? ²⁵ Zhə̀nà, nyǐ Cinu nyí rí: Rə̀ wɔ̌! bə̀ m'a k'a zwẽ kɔn rɛ́ tɛ̀bɛ́ búlə́ kàndɔ w pwà búlə́ jàà w mɔ́ ò jɔ̃̀ wa, bə̀ m'a ce lò mó mɔ̀bɔ́ wu-bárhɛ́ cə́bal mɔ́ zɔ yóm mó nə ń cìnə̀! Ǹ búl-dõ mó, wɔ́ àmyɛ́ à m'a bú ǹdə́ mɔ; ǹ byǎ bɛ́, wɔ́ àmyɛ́ à m'a ce bə nə bə̀ cìnə̀. ²⁶ À m'a ce lyì bí byɛ̀bɛ́ bə̀ n'ê nwɛ̀nɛ̀ mɔ́ mɔ́ dɔ̃̀ bə̀ cìcì yala nɛ́ nàmá bɛ́, bə̀ m'a nyɔ̀ bə̀ cìcì jal mɔ́ mə zə bɛ ǹdə də̀vɛ̃́ kɛ̀bɛ́ è y'ǎ gwẽ̌ n'ê shí də̀vɛ̃́-cǒ byǎ bɛ́ pyárh ku w wẽ́ è dwi, gə́ n'ê zal nɛ́; sə numbyínsí gakó m'a lwar bə̀ lò mó mɔ̀bɔ́ ń nə́ ń vwǎrh mɔ́, wɔ́ àmyɛ́ Cinu, bə̀ lò mó mɔ̀bɔ́ ń nə́ ń zwẽ mó mó, wɔ́ Zhakɔɔbɛ Yi rí Lòlò-bə-rə̀-jàn-rɛ́-yàlà-zhe mó!