¹ Zhakɔɔbɛ kɛ̀lɛ́ lyì, cili-nə kɔn rɛ́ tɛ̀bɛ́, ámyɛ̌ byɛ̀bɛ́ á n'á shɛ̀ Esərayɛl yil ré mó, ámyɛ̌ byɛ̀bɛ́ á shí Zhəda nàná bɛ́ w mɔ́, ámyɛ̌ byɛ̀bɛ́ á n'á zə Cinu yil ré á m'á dwĩ̀ nyí mú, á n'á byẽ̀ Esərayɛl Yi rí á k'á bwérhé, e j'à də̀ ǹdə́ wu-põ̀ ráá cángá mɔ́: ² bə̀ n'ê byẽ̀ bə̀ cìn bə̀ «Yi Cɔ w lyì bí», bə̀ n'ê wə̀l bə̀ Esərayɛl Yi rí, rə̀ yíl ré wɔ́ «lũ gakó Cinu mú», nyí wɔ bə̀ kwã. ³ À dámǎ a swal ywẽ̀ nã́yə́ə́ né shãã ga, nə̀ shí à nyú wə, à ce bə nyɛ̀ɛ̀ nɛ: à j'a jàr jàr a twĩ̀, sə nə̀ yàl nɛ́. ⁴ À gə́ yě bə̀ ǹ wɔ́ wu-kùlù cə́bal mɔ́, ǹ byã y wɔ́ cɔ̀bɔ́ nyɔnɔ, ǹ cíl ré wɔ́ kàmmɔ mɔ́ ce, ⁵ à dámǎ a swal mɔ́ ywẽ̀ né shãã shãã ga; à ce ń nyɛ̀ɛ̀ nɛ, éfòró nə yí, mùnì ga ǹ bə̀k'á wɔ̀: «Wɔ́ à yi rí èsã̌yùlú w ò n'ô twĩ̀ tɛ̀bɛ́ yé, wɔ́ à dɔ yi rí ráá à kàmmɔ yi rí rə̀ pɔ nyə́ né nyɛ̀bɛ́ yé.» ⁶ Á nyɛ̀ɛ̀ kɔn rɛ́ tɛ̀bɛ́ bə̀ dámǎ bə swal mɔ́: nyǐ-nə re rə̀ pyìrh. Ámyɛ zɛ̃̀ á t'á la rɛ́ bwə̌l á byili nà? Èlǎsɛ̃́ à m'a ce ń nyɛ̀ɛ̀ ywẽ̀ nándùn, nə̀ y'à cə̀r nə cĩ́ mú, nyɛ̀bɛ́ ǹ yà ǹ yə̀l nə̀ pár mɔ́. ⁷ Wɔ́ èlǎsɛ̃́ à ce nə̀ ŋwɛ́nɛ́ nɛ́, sə è də̀ shãã shãã ga yé, è wɔ́ zà dɛ̃ rɛ́ kùr-jirə́ yə́, sə ǹ yà ǹ já ǹ gwẽ̌ yə̀ nɛ nyɛ̀ɛ̀ gaga yé, mùnì ga ǹ bə̀k'á wɔ̀: «À nɔ nɛ! à y'à yě nə̀ pár» yé. ⁸ Zhə̀nà!, ǹ yə̀ nyɛ̀ɛ̀ yé; zhə̀nà! ǹ yə̀ nə̀ pár lwar yé; zhə̀nà! ǹ zhɛ̃̌ rɛ́ y'à yə̀ dámǎ rə jɛ̀nɛ̀ rə pul shãã ga yé, b'à yě bə̀ ǹ myìnì, ń k'á bwérhé myìnì, bə̀ j'â n'ê byẽ̀ mó bə̀ «Mɔ̀bɔ́ ń cẽ nyí ni ń ná wẽ́ ga»! ⁹ Wɔ́ à yil ré nyɔ̀mɔ̀ w yilə, à n'â ce à lyim rí mɛrhɛ, còrhó w kɔ̀bɔ́ bə̀ mə̌ dwã sə bə m'e cèrhé ne mó ò ce à n'â zal à cìn ǹdə́ mɔ́, mùnì ga à bə̀k'a ce ń jé tɛ̃́ yé. ¹⁰ Nyǐ à vùr ǹ jìmdí, sə è də̀ sə̀byǐ mú mɔ̀bɔ́ bə̀ n'ê yə̌l myǐn w mú wẽ́ yé, è wɔ́ cìzhìl nánfɔ̀lɔ̀ dɛnnɛ à tó né a m'a súlí ǹ cɛ̀nɛ̀ rɛ́. ¹¹ Wɔ́ à yil ré nyɔ̀mɔ̀ yilə, àmyɛ́ cìcì yil ré nyɔ̀mɔ̀ yilə, à wɛ̀rhɛ́ rə̀myɛ́ mɔ́, è nə wɔ́ byè yil bə̀ m'a zhìlì à yil ré? À j'â t'â la à còrhó w lò dõ ne pɔ yé. ¹² Cili ni, Zhakɔɔbɛ, Esərayɛl, ǹmyɛ́ mɔ̀bɔ́ à n'â byẽ̀ mó, wɔ́ èta à j'â wɔ́ nɛ́: wɔ́ àmyɛ́ à wɔ́ nã́yə́ə́ mó, wɔ́ àmyɛ́ myɛ à wɔ́ nánkwaá mɔ́. ¹³ Zhə̀n ga, wɔ́ àmyɛ́ jɛ̃̀ è cĩ́ cɛ y kùr ré tɛ̃́, à jə̀-jĩ́ y è lɛ̀lɛ̀ dɛ̃̌-yi rí dɛ̃̌; à gə byẽ̀ re, làlà ǹdə́ rə̀ túwə́. ¹⁴ Á gakó bà-na dwã yó á cili! Wɔ́ mɔ̌ ń yàl ń dwã bɛ́ cəcəl w ń swal ywẽ̀ né nə̀myɛ́ mɔ́: lò mó mɔ̀bɔ́ Cinu só mó mà n wɛ̀rhɛ́ kɔn rɛ́ tɛ̀bɛ́ rə̀ wɔ́ ń bùlə̀ Babyəlɔnɛ ǹd'ô dwí rí, Kalədɛ lyì bí shò kwã nɛ́ mɔ́. ¹⁵ Wɔ́ àmyɛ́, wɔ́ àmyɛ́ à wə̀lə̀; zhə̀n ga à byẽ̀ mo, à ce n bà, sə ń tum rí m'a yí rə̀ yó-gurə́ yə́! ¹⁶ Twẽ̌-nə á yí à yala nɛ, á cili kɔn rɛ́ tɛ̀bɛ́: kùr-ju yi ní ga, à j'â gwẽ̌ yə̀ shèè a m'a zɔ̀m yé; kɔn zhì rə̀myɛ́ mɔ́ gə́ wɛ̀rhɛ́ yi ní ga mɔ́, à j'â ŋwɛ́nɛ́: Sə èlǎsɛ̃́ mɔ́, wɔ́ Cinu Yi ń twĩ̀ ni, ǹdə́ ń Eshirhə yə́. ¹⁷ Nyǐ Cinu mú mɔ̀bɔ́ ń nə́ ń zwẽ mó mó, Esərayɛl Yi rí, rə̀ bə dõ zhe mó nyí rí: Wɔ́ àmyɛ́ à wɔ́ Cinu, ǹ Yi rí, à n'â cèrhè mó mùnì ga ń nə nyɔ̀ɔ̀rhɛ́ rə̀ wẽ́, àmyɛ́ à ce ǹ nə́ ǹ zhə̀l sɔ́má y kɛ̀bɛ́ ǹ kwè mó yó. ¹⁸ Nyì wé! ǹ gə yà ǹ kwè à nyə́ né ǹdə kɔn ta, ǹ yə̀-zùlə́ né y'à m'a yə̀ ǹdə bù-fwɛ̀lɛ̀ ta, ǹ cángá tũ̀twĩ̀ĩ̀ rí zɛ̃̀ rə yə̀ ǹdə nə̀-fɔ̀lɔ̀ w nə̀-wùlmə̀ mó ta; ¹⁹ 19 ǹ dwí rí m'a yə̀ ǹdə nyɔ̀rhɔ́ nɛ, rə̀ byǎ bɛ́ yə̀ ǹdə nə́shə̀ná ta: ń yil ré y'à j'â t'â la vǔr rə̀ y'à j'â t'â la jó myɛ àmyɛ́ yé né gaga yé. ²⁰ Du-nə Babyəlɔnɛ nɛ́! Dǔr-nə á shə́r Kalədɛ lyì bí sõ! Bwə̌l-nə re ǹdə́ cəl nánfɔ̀lɔ̀ á byili, ce-nə bə nyɛ̀ɛ̀ rɛ, ce-nə rə yí lũ w cə-yala gakó, á wɔ̀: «Cinu zwẽ ń tùntùnnə Zhakɔɔbɛ!» ²¹ Nə̀nyɛ̀lsɛ yə̀ be zal pòpwə̀ə̀lé tɛ̀bɛ́ ń zə bɛ n mə n vò rə̀ wẽ́ mó w yé. Wɔ́ nə̀mù-pyɔ̀ w w ń ce nɛ̃̌ shí ní mə du n pə bɛ, zhə̀n ga, ń lo nə̀mù-pyɔ̀ w dwã wa, nɛ̃̌ shí ò wẽ́ mə du! ²² Sə lyì-bəlwǎlsɛ́ j'â t'â la yə̀-zùlə́ nɔ gaga yé, wɔ́ Cinu nyí rí.