¹ Só tɛ̃́ tɛ̃́tɛ̃́, tu ń jòm tɛ̃́ shó w wə, ǹmyɛ́ kɛ̃-byǐ kɛ̀bɛ́ è yə̀l bal pár mɔ́, Babyəlɔnɛ bə̀kɔ́ mɔ́, tu ǹ kùr zə cɛ nɛ, ǹ gə́ kə́ ǹ bə pyɛ̀lɛ̀ də̀gwã́ zhe mó yilə, Kalədɛ lyì bə̀kɔ́, bə̀ ǹ já ǹ kə́ ǹ tá ǹ la nɔ bə k'e byẽ̀ mó bə̀ «Bóm ǹdə́ lò mɔ̀bɔ́ ń já ń só lũ w wu-nyɔ̃̀ w mɔ́» gaga yé. ² Kwě nə̀mú wə́, nɔ́m mún mú, pǎr ǹ yó kàmə̀jɛ̃̀ yá; kwɛ̃̌ ǹ kàmə̀zwǐ yə́, yẽ̌ ǹ cə̃́ né ne pwẽ̀ ne, byɛrhɛ bù-fwàlsɛ́: ³ bə̀ m'a nə ǹ cə̀-lwè yə́, bə nə kɔn rɛ́ tɛ̀bɛ́ rə̀ ce bə mɔ̀n mɔ́ mɔ́. Jim rí yilə, à m'a j'a cĩ́ ri, sə à t'â la lòlò sɛ̃ɛ̃́ y tum zal yé: ⁴ Lò mó mɔ̀bɔ́ ń nə́ ń zwẽ nə́ba mɔ́ yil ré wɔ́ lũ gakó Cinu, Esərayɛl Yi rí rə̀ bə dõ zhe mó. ⁵ Tu ń jòm tɛ̃́ sə ǹ bə̀ ǹ nyí púr yé, zú cə-byín rí wẽ́, Kalədɛ lyì bí bə̀kɔ́, bə̀ ǹ já ǹ kə́ ǹ tá ǹ la nɔ bə k'e byẽ̀ mó bə̀ «Pyə̀-tənèsé Cǐnnə» gaga yé. ⁶ À lyim y'à zɛ̃̀ rə̀ n'ê yì à dwí rí: à y'à co à cəl-tənà y cìzhìlə̀, à y'à co be ǹ jɔ̃̀ wa; sə ǹ já ǹ yə̀ bə̀ nɔ̀nɔ̀ dùr námpɔ́lɛ́ myɛ cìcì yé, ǹ ce ǹ zhĩĩ rí yə̀ vwə̀lí ezhɛ̌nsɛ́ yó wə, kɔn lyɛ̃ cɛ nɛ. ⁷ Ǹ yà ǹ nə́ ǹ wə̀lə̀: «À m'à j'â wɔ́ cǐnnə twéé twéé, gaga yilə». Ǹ yə̀ ywẽ̀ né kùr tɛ́rɛ́ ǹ wẽ́ yé, ǹ yə̀ nə̀ gə́ la nɛ́ yál mɔ́ myɛ yò w bùl yé. ⁸ Sə èlǎsɛ̃́, cili kɔn rɛ́ tɛ̀bɛ́, ǹmyɛ́ mɔ̀bɔ́ ǹ já ǹ só lũ w wu-nyɔ̃̀ w mɔ́, ǹ jě ǹ wu t'â zɛ̃̀ mɔ́, ǹmyɛ́ mɔ̀bɔ́ ǹ yà ǹ nə́ ń wə̀l ǹ wẽ́: «Àmyɛ́ dúdú à wɔ́ yò wə́, sə kɔn rɛ́ tɛ̀bɛ́ rə̀ dàl mɔ́ wɔ́ kɔn nánfò. Gaga, à j'â t'â la ejə̃̀-kɛ̃ mãɔ̃ yé, à bə̀sɔ́ná bɛ́ t'â la tɛ̃́ jó bə yẽ̌ ne yé.» ⁹ Ywẽ̀ né nyɛ̀bɛ́ nə̀lyè y ga m'a j'a jàr jàr nə yí mú, dɛ̃ rə̀dù: ǹ bə̀sɔ́ná bɛ́ tɛ̃́ jó mó ǹdə́ ejə̀ndé ga, è m'a yə̀ màbyóó! rə̀ m'a yí mú, jə̀-myaarhɛ tumə né bə̀ byili byili mú nánzhəzhɔ̌ w ǹdə́ ǹ ŋwɔ̀nɔ́ námməlwɛ̀lɛ́ tũ̀twə̃̀ə̃̀ né ǹ nə́ ǹ twĩ̀ kɔn lyɛ̃ cɛ nɛ mɔ́ yírh w ga. ¹⁰ Ǹ wu y'à jě, ǹ gə́ yà ǹ zhe ǹ tũ̀twə̃̀ə̃̀ námməlwǎlsɛ́ ŋwɔ̀nɔ́ w zhə̀n yilə, ǹ yà ǹ nə́ ǹ wə̀lə̀: «Lòlò bə nɛ nɛ yé.» Wɔ́ ǹ «lárma» mɔ́ ǹdə́ ǹ «lwar» mɔ́, wɔ́ rə̀myɛ́ rə̀ dwĩ̀ mú. Ń zɛ̃̀ ǹ yà ǹ nə́ ǹ wə̀l ǹ wẽ́: «À dúdú à wɔ́ yò wə́, kɔn rɛ́ tɛ̀bɛ́ rə̀ dàl mɔ́ wɔ́ kɔn nánfò!» ¹¹ Nyǐ lwɛlɛ bàn mɔ́ pú: ǹ wàr rɛ ǹ la pɔ́ ń ce kwã yé, nyǐ màbyóó j'â bàn mɔ́ zal: ǹ wàr ò yé ne ǹ la nɛ́ cə̌r yé; cɔ̌ mɔ̀bɔ́ ǹ já ǹ yə̀l mə̀ lwɛlɛ rɛ́ gə́ la nɛ́ yál mɔ́ m'a jàr jàr mə yí mú. ¹² Gwẽ̌ tɛnɛ ń zhì ǹ ŋwɔ̀nɔ́ námməlwɛ̀lɛ́ y tũ̀twə̃̀ə̃̀ né tũ̌ mú cə́cəl wə, ǹdə́ ǹ jə̀-myaarhɛ tumə né nánzhəzhɔ̌ w yó, rə̀myɛ́ tɛ̀bɛ́ ǹ nwɛ̀nɛ̀ ǹ cìn rə̀ yil ǹ bə̀sɔ́nɛ́ yi ní ga mɔ́: dɛ̀ga rə̀ m'a zə nyɔ̀ɔ̀rhɛ́ ǹ yilə, dɛ̀ga rə̀ m'a ce ń zɛ̃̀ rə̀ wu ni! ¹³ Cúcú nánzhəzhɔ̌ dɛ̃́dɛ̃́ j'â n'ê lyɛ̀ɛ̀ mɔ́: bə̀ du bə zhì, sə bə vwǎrh mɔ́, lyì bí byɛ̀bɛ́ bə̀ n'ê bɔ̀n dɛ̃̌-yi rí kə̀kàlsɛ̀ kə̀kàlsɛ̀ mɔ́, bə̀ n'ê myə̀lɛ́ càmə́sɔ̌sɛ́ bə̀ pyà kɔn sə̀ wẽ́ mó, bə j'à n'ê byili càn-dùlí gakó, kɔn rɛ́ tɛ̀bɛ́ rə̀ bàn mɔ́! ¹⁴ Nyǐ bə̀ m'a yə̀ ǹdə gɔ ta, myǐn m'a jí bi, bə̀ wàr bə̀ m'a lú myìn-zhù nánshɔ̃̀ w yé né yé: è k'ê t'â la e yə̀ myìn-cala ywə̌l yil yé, ráá kúl myǐn bə̀ la mə̀ yé né jǒm yé! ¹⁵ Wɔ́ èta bə̀ wɔ́ nɛ́ ǹ yilə, lyì bí byɛ̀bɛ́ ǹ lyɛ̀ɛ̀ ǹ cìn bə̀ yil mú, lyì bí byɛ̀bɛ́ bə̀ j'â n'ê myìnì mú ǹ bə̀sɔ́nɛ́ yi ní ga mɔ́: bə̀ j'â n'ê zhə̀l dɛ̃̌, lò gakó la ń gə́ la má, bə̀ mə̀dù ga já ń də̀ zwennə ǹmyɛ́ yil yé!