¹ Bɛl tu ń nə̀dwə́nə́ yó, nyǐ Nəbo ń nə́ ń lwəl tɛ̃́: bə̀ n'ê cĩ́ nə̀ sə̀sã̌yùúlí vwàmá nɛ́ nyɛ̀bɛ́ nə̀ n'ê zhĩ zhə̃ə̃ né mó yó. Kɔn rɛ́ tɛ̀bɛ́ á y'ǎ n'á kwè á ce dɛ̃̌ á zhĩ mú, nyǐ ri bə̀ n'ê zhĩ, rə̀ jǐrh zhĩĩ vwàmá nɛ́ nyɛ̀bɛ́ nə̀ lyɛ̀ɛ̀ mɔ́ yilə, ² nyɛ̀bɛ́ nə̀ n'ê lwəl tɛ̃́ e jà nə̀ n'ê twi nə̀ nə̀dwə́nə́ yó mó; nə̀ wàr nə̀ zhĩĩ rí nə̀ la vwǎrh yé, nə̀myɛ́ cìcì mú la yómə́-jè. ³ Cili-nə ne, Zhakɔɔbɛ kɛ̀lɛ́ y lyì, Esərayɛl lyì bí Kùr ré rə̀ dàl mɔ́ gakó, ámyɛ̌ byɛ̀bɛ́ bə̀ j'â n'ê nyǐ á yò, á ná pǔ w yi ní ga mɔ́, bə zhẽ̌ ába bə ce dɛ̃̌ bə zhĩ ǹd'á gwẽ̌ wɔ á ná wẽ́. ⁴ À m'a j'a gwẽ̌ yə̀ ǹdə à gə́ wɔ́ nɛ́, kɔn m'e yí á caarɛ́, àmyɛ́ à m'a ce nyí á kwã nɛ́, kɔn b'e yí á ywésé pwèlè wɔ́ àmyɛ́ à co à twə́r né, àmyɛ́ à gwẽ̌ m'a zhĩ ába, wɔ́ àmyɛ́ à m'a ce nyí á kwã nɛ́, à m'a súlí a vwǎrh ába. ⁵ Á n'á zə nɛ á mwì dwã nɛ ǹdə́ mɔ̌, mɔ̌ nɛ á m'ǎ zə nɛ á nyɛrhɛ? Mɔ̌ nɛ á m'ǎ zə nɛ á m'á jə̀ə̀le, mùnì ga nə́ nyɛrhɛ dwã? ⁶ Lyì jàlà n'ê pyìrhí sánə́má mɔ́ bə̀ lɔ̀brɛ́ wẽ́ mó tɛ̃́, bə jə̀ə̀lè bə̀ sə̀byǐ mú dùmì rí ǹdə́ dùmì mɔrhɔ ku wə́, bə kwè yǎ-bal bə ŋwɛ́ɛ́ mɔ mùnì ga n zùrhì yi, bə zɛ̃̀ bə̀ n'ê wùlì tɛ̃́, bə súlí bə̀ n'ê twi bə̀ nə̀dwə́nə́ yó rə̀ yé né! ⁷ Wɔ́ bə̀myɛ́ bə̀ n'ê kwè re bə̀ zhĩ bə̀ pyə́pyəla wa, bə̀ n'ê cĩ́ ri jàà wẽ́ rə shǐrh, e jà è y'à mə̌ s'e yə̀ rə̀myɛ́ rə̀ n'ê zhĩ bi. Rə̀ j'â n'ê zhì jàà èdù: rə̀ t'â twẽ̌ rə̀ jàà y w yé. Lò gə byẽ̀ n ce re myɛ, rə̀ t'â lyár yé, rə̀ t'â zwẽ mo ń zúzúnú w wẽ́ yé. ⁸ Lyǐrh-nə kɔn rɛ́ rə̀myɛ́ mɔ́, mùnì ga á súlí á bɛlɛ rɛ́, yó-kùùli cìnə́, lyǐrh-nə rə̀ yò á wun ní wẽ́, ⁹ lyǐrh-nə ywẽ̀ nã́yə́ə́ né yò, shãã ga nyàná nɛ́: zhə̀n ga, àmyɛ́ à wɔ́ Yi, rə̀ dõ tɛ̀nɛ́ yé, à wɔ́ Yi, kɔn rɛ́ tɛ̀bɛ́ bə̀ la m'e mɛrhɛ nɛ mɔ́ wɔ́ kɔn nánfò. ¹⁰ Kùr-ju yi ní, à y'à dámǎ a swal kɔn rɛ́ tɛ̀bɛ́ rə̀ la pú mú, shãã ga yi ní, à y'à dámǎ a swal kɔn rɛ́ tɛ̀bɛ́ rə̀ gwẽ̌ yə̀ wɛ̀rhɛ́ mɔ́. À n'â wə̀lə̀: «Kɔn rɛ́ tɛ̀bɛ́ à tɛ́rɛ́ à la wɔ̀rhɔ́ mɔ́ m'a zhì, à m'a wɛ̀rhɛ́ kɔn rɛ́ tɛ̀bɛ́ à n'â yǎl mɔ́ gakó.» ¹¹ À n'â byẽ̀ kṹ-zɔlɔ́ o shí yi-púrhí sõ o bà; a byẽ̀ lò mó mɔ̀bɔ́ à cír ń la kɔn rɛ́ tɛ̀bɛ́ à tɛ́rɛ́ à la wɔ̀rhɔ́ mɔ́ n shí tənà kɛ̀bɛ́ è nyɛ́ w n bà, kɔn rɛ́ tɛ̀bɛ́ à zɔ̀m rə̀ yò mó, à la ce rə pyìrh náàcɛ̀nɛ́ mɔ́, kɔn rɛ́ tɛ̀bɛ́ à tɛnɛ e j'à la wɔ̀rhɔ́ mɔ́. ¹² Cili-nə ne, ámyɛ̌ byɛ̀bɛ́ á wun j'â də̀ sṍ kɔn gaga mɔ́, ámyɛ̌ byɛ̀bɛ́ á j'á nyɛ ǹdə́ cángá tũ̀twĩ̀ĩ̀ rí mú: ¹³ à ce à cángá tũ̀twĩ̀ĩ̀ rí wɔ bwə́bwə́ləə, è k'ê bə nyɛ yé, sə à vwǎrh mɔ́ k'ê t'â la dɔnɔ yé; à m'a pə vwǎrh mɔ́ Səyɔ̃ nɛ́, a pə à zùwə́ y Esərayɛl nɛ.