¹ Nyǐ Cinu nyí rí ń pɔ mɔ̀bɔ́ ń cír mú ni mú: Səruusi mú mɔ̀bɔ́ à zhe ń jə̀-jĩ́ jɛ̃̀ nɛ, mùnì ga a ce tənèsé lwəl sə̀ cìn tɛ̃́ ń yé né, a ce n lwə̌r pyǎ cã̌-tàndɛ, a m'a pul bwə̀ə̀lé jɛ̀sɛ́ ń yé né, mùnì ga bwə̀ə̀lé bə̀k'a pyi yé: ² Àmyɛ́ cìcì mú m'a yə̀ ǹ yé né à n'â zhə̀lə̀, à m'a ce cɛsɛ́ shɛ̀bɛ́ sə̀ zhe də̀dwə́ə́le mó mɛrhɛ dwã, à m'a bɔbwɛlɛ kàmmɔ bwə̀ə̀lé jɛ̀sɛ́, à m'a kə́ lù sàfɔ̌r rɛ́. ³ À m'a pɔ̃́ nə̀cɛ̀ndɛ́ tɛ̀bɛ́ bə̀ cĩ́ cə-byín rí wẽ́ mó, ǹdə́ jɛ̃̀-kɔn rɛ́ tɛ̀bɛ́ bə̀ shèè shòò jààsɛ wẽ́ mó: rə̀myɛ́ yi ní ǹ m'ǎ zɛ̃̀ ń lwar bə̀ wɔ́ àmyɛ́ à wɔ́ Cinu mú, mɔ̀bɔ́ ń nə́ ń zə ǹ yil ré ń mə́ ń byẽ̀ mó mó, Esərayɛl Yi rí. ⁴ Wɔ́ à tùntùnnə Zhakɔɔbɛ yilə, Esərayɛl, mɔ̀bɔ́ à cír mú yilə, à zə ǹ yil ré a m'a byẽ̀ mó; à co mó yil wə, e jà ǹ yà ǹ yə̀l à pár yé. ⁵ Wɔ́ àmyɛ́ à wɔ́ Cinu mú, ń dõ tɛ̀nɛ́ yé, è gə də̀ àmyɛ́ dúdú, yi dõ tɛ̀nɛ́ yé! À lyẽ cã̌-tɔ̀nɔ̀ w ǹ cã̌ nɛ́ e jà ǹ yà ǹ yə̀l à pár yé, ⁶ mùnì ga bə lwar, yi-púrhí sõ ǹdə́ yi-zùr sõ ga, bə̀ kɔn gə lyɛ̃ àmyɛ́: wɔ́ kɔn nánfò! Wɔ́ àmyɛ́ à wɔ́ Cinu mú, ń dõ tɛ̀nɛ́ yé; ⁷ à n'â ce pwẽ̀ ré yàl nɛ́, a ce cə-byín myɛ yə̀ nɛ́, à n'â ce wu-nyɔ̃̀ yàl nɛ́, a ce wu-zhùlù myɛ yə̀ nɛ́: wɔ́ àmyɛ́ Cinu, à n'â wɛ̀rhɛ́ rə̀myɛ́ mɔ́ gakó. ⁸ Dɛ̃̌-yi, zhǐ dɛ̃̌-yi rí w ń nyɔ̀ ǹdə myɔ̀nɔ̀ ta, sə éban rɛ́ nyɔ̀ cángá tũ̀twĩ̀ĩ̀ rə dùr tɛ̃́, sə cɛ y pul, sə vwǎrh mɔ́ púrh ǹdə pùnə́ ta, sə cángá tũ̀twĩ̀ĩ̀ rí myɛ tó mo rə púrh! Wɔ́ àmyɛ́ Cinu, à wɛ̀rhɛ́ numbyíní y èmyɛ́ mɔ́. ⁹ Lwɛlɛ zhe lò mó mɔ̀bɔ́ ń wɔ́ dɔ kwǎl-byǐ, dɔ kwǎl-byǎ bɛ́ cəcəl wə, ń mà n zɛ̃̀ ń la lò mó mɔ̀bɔ́ ń mɔ mɔ mɔ́ búlə́ ju! Dɔ nə m'a bwə̀rh lò mó mɔ̀bɔ́ ń nə́ ń ce ò nyɛrhɛ kɔn mɔ́ nɛ: «Bə̀kɔ́n ǹ nə́ ǹ wɛ̀rhɛ́?», sə ku w kɔ̀bɔ́ ǹ mɔ mɔ́ myɛ nə m'a wɔ̀ mɔ́: «Ń bə jɛ̀rh zhe yé!»? ¹⁰ Lwɛlɛ zhe lò mó mɔ̀bɔ́ ń bwə̀rh lò mɔ̀bɔ́ ń wɔ́ da n wɔ̀: «Bə̀kɔ́n ǹ lùlə̀?», n zɛ̃̀ n bwə̀rh kɛ̃ n wɔ̀: «Bə̀kɔ́n ǹ lùlə̀?» ¹¹ Nyǐ Cinu, mɔ̀bɔ́ ń ce Esərayɛl ŋwɛ́nɛ́, ń súlí ń wɔ́ Esərayɛl Yi rí tɛ̀bɛ́ rə̀ bə dõ zhe mó nyí rí: Zə-nə à byã nɛ kɔn rɛ́ tɛ̀bɛ́ rə̀ mə̌ sə rə wɛ̀rhɛ́ à byǎ bɛ́ shò kwã nɛ́ mɔ́ yilə! Á nə m'ǎ pə nɛ nyə́ kɔn rɛ́ tɛ̀bɛ́ à jɛ̀sɛ́ wɛ̀rhɛ́ mɔ́ shò kwã nɛ́? ¹² Wɔ́ àmyɛ́ à wɛ̀rhɛ́ cɛ yá, a zɛ̃̀ a wɛ̀rhɛ́ numbyínə́ bé a cĩ́ è yó; Wɔ́ à jɛ̀sɛ́ sə̀ lɛ̀lɛ̀ dɛ̃̌-yi rí dɛ̃̌, a zɛ̃̀ à n'â pɛ nyə́ cã̌mə́sɔ̌sɛ́ gakó ne. ¹³ Wɔ́ àmyɛ́ à ce bal mɔ́ mɔ̀bɔ́ du tɛ̃́, ǹdə cángá tũ̀twĩ̀ĩ̀ rí gə́ n'ê yǎl nɛ́, sə à m'a ce ń sɔ́msɛ́ gakó mɛrhɛ dwã. Wɔ́ ńmyɛ̌ ń mà n kə́ n lù à cə-fɔ̀lɔ̀ wá, ń mà n ce à lyì bí bə̀ y'à pwà bə m'e vò yómə́-jè mó kwɛ̃̀ bə bà, e jà bə̀ t'â la kaka kwã̀ɔ̃́, bə̀ t'â la kɔn pɔ myɛ yé, wɔ́ lũ gakó Cinu mú nyí rí. ¹⁴ Nyǐ Cinu nyí rí: Ezhibti tum rí nyɔ̀ɔ̀rhɛ́ y ǹdə́ Ecopyi dɔ̌l mɔ́, ǹdə́ Səba lyì bí, bə̀ wɔ́ lyì-èdwààlɛ mɔ́, m'a bə̀ ǹ sõ, sə rə̀myɛ́ gakó m'a yə̀ ǹmyɛ́ nyǎn, bə̀ m'a lyẽ be ǹdə́ nyáná, bə tó ǹ kùrə̀. Bə̀ m'a wùlì tɛ̃́ ǹmyɛ́ yé né, bə lwə̀l mó bə wɔ̀: «Wɔ́ ǹmyɛ́ dúdú sõ Yi ŋwɛ́nɛ́, rə̀ dõ tɛ̀nɛ́ yé; yə né: wɔ́ kɔn nánfò! ¹⁵ Zhə̀n ga, ǹ wɔ́ Yi tɛ̀bɛ́ rə̀ shèè rə̀ cìnə̀, Esərayɛl Yi rí, tɛ̀bɛ́ rə̀ n'ê vwǎrh mɔ́! ¹⁶ Nyǐ bə̀ gakó cìzhìl zhe, tùùrhì myɛ bàn gu, zhə̀n ga, bə̀ n'ê zhə̀l bə̀ la ǹdə́ bə̀ n'ê tùrh bi, bə̀myɛ́ byɛ̀bɛ́ bə̀ n'ê wɛ̀rhɛ́ yə èsã̌yùúlí mú; ¹⁷ Cinu ce Esərayɛl nə è cìnə̀; sə cìn-nɛrɛ́ y èmyɛ́ mɔ́ j'â wɔ́ twéé twéé yilə; cìzhìl j'â t'â la ába zal yé, tùùrhi myɛ j'â t'â la ába tǔrh yé, sə rə̀myɛ́ mɔ́ j'â wɔ́ twéé twéé yilə, gaga yilə.» ¹⁸ E jà nyǐ Cinu mú mɔ̀bɔ́ ń wɛ̀rhɛ́ dɛ̃̌-yi rí nyí rí, ńmyɛ̌ mɔ̀bɔ́ ń wɔ́ Yi rí tɛ̀bɛ́ rə̀ tɛnɛ cɛ y rə zɛ̃̀ rə wɛ̀rhɛ́ y mɔ́, rə ce è zhǐ kẽkẽ, rə̀ yə̀ y wɛ̀rhɛ́ rə cĩ́ tɛ̃́ nánfò yé, rə̀ wɛ̀rhɛ́ y mùnì ga bə yə̀ è yó. Wɔ́ àmyɛ́ à wɔ́ Cinu mú, ń dõ tɛ̀nɛ́ yé. ¹⁹ À yə̀ cɛ y gɔ́gwã́ námbyĩ́ wẽ́ shèè a m'a zɔ̀m yé, à yə̀ Zhakɔɔbɛ dwí rí ni wə̀l: «Pyǎ-na nɛ cə-fò w yé!» Wɔ́ àmyɛ́ à wɔ́ Cinu: à n'â zɔ̀m tɛ̀bɛ́ rə̀ wɔ́ cángá mɔ́, à n'â bwə̀l tɛ̀bɛ́ rə̀ mə̌ mɔ́ à byili! ²⁰ Mú-nə dwã nɛ á bà, tó-nə dwã á bà, ámyɛ̌ tənèsé lyì bí á lú mú: byɛ̀bɛ́ bə̀ n'ê kwè bə̀ dɔ̌ yə né bə̀ ce dɛ̃̌ bə̀ zhĩ mú, e jà bə̀ n'ê byẽ̀ bə̀ ce yi tɛ̀bɛ́ rə̀ t'â vwǎrh mɔ́ nɛ j'â yə̀l kaka yé. ²¹ Bwə̌l-nə á ywẽ̀ né á byili! Yál-na yé né! Á gaga mɔ́ nə-na dwã á zhərh! Mɔ̌ lò ń ce bə nyɛ̀ɛ̀ rə̀myɛ́ mɔ́ shãã ga, e jà n dámǎ n swal rɛ shãã ga mɔ́? È nə d'àmyɛ́ Cinu nà, è gə d'àmyɛ́, yi dõ tɛ̀nɛ́ yé; yi rí tɛ̀bɛ́ rə̀ wɔ́ cángá cə́bal, rə̀ j'à n'ê vwǎrh mɔ́, rə̀ tɛ̀nɛ́ nɛ́ yé, è gə d'àmyɛ́ dúdú! ²² Pyìrhí-nə á zǎ àmyɛ́, sə nyǐ á m'ǎ nə á cìnə̀, ámyɛ̌ lũ w cə-yala nɛ́ gakó mó, bə̀ wɔ́ àmyɛ́ à wɔ́ Yi, rə̀ dõ tɛ̀nɛ́ yé. ²³ À zə à cìcì mú a m'a dwĩ̀ nyí, kɔn rɛ́ tɛ̀bɛ́ rə̀ mə̌ mɔ́ n'ê shí à nyú wə, zɔ̀mɛ̀ tɛ̀bɛ́ rə̀ t'â càrh rə̀ kwã nɛ́ mɔ́: « Nə̀dṍ gakó m'a wùlì tɛ̃́ àmyɛ́ yé né, sə mə̀jòlò gakó m'a dwĩ̀ nyí: ²⁴ Ò m'a wɔ̀ àmyɛ́ shò kwã nɛ́: è wɔ́ Cinu dúdú sõ cángá tũ̀twĩ̀ĩ̀ rí ǹdə́ ŋwɔ̀nɔ́ tũ̀twə̃̀ə̃̀ né ŋwɛ́nɛ́!» Lyì byɛ̀bɛ́ gakó bə̀ y'à zɛ̃̀ bə̀ n'ê bwí ǹdə́ mɔ mɔ́, m'a bə̀ ń sõ, sə cìzhìl m'a zə bɛ. ²⁵ Cinu nə̀jɛ̀lɛ̀ yilə, Esərayɛl dwí rí gakó, m'a jí bùrì, sə rə̀ m'a zhẽ̌ rə̀ cìn dɛ̃̌.