¹ Sə èlǎsɛ̃́, nyǐ Cinu mú mɔ̀bɔ́ ń wɛ̀rhɛ́ mɔ́ mɔ́ Zhakɔɔbɛ, mɔ̀bɔ́ ń mɛ́nɛ́ mɔ́ mɔ́ Esərayɛl, nyí rí: bə̀k'á dùr ywẽ yé, b'à zwẽ mó, à zə ǹ yil ré a m'a byẽ̀ mó, àmyɛ́ à cǐ mú. ² Ǹ gə la nàná byɔrhɔ myɛ, à m'a yə̀ nɛ́ ǹdə́ mɔ́, bù-fwàlsɛ́ ǹ la byɔrhɔ mɔ́ myɛ, t'â la mɔ́ mɔ́lɔ́ yé. Ǹ gə tó myǐn cəcəl w ǹ nə́ ǹ zhə̀l myɛ, mə̀ t'â la mɔ́ mɔ̌r yé, sə myìn-zhù w k'ô t'â la ǹ cəcə-bwál rɛ́ jú dɔ́dɔ́ yé, ³ b'àmyɛ́, Cinu mú, à wɔ́ ǹ Yi, Esərayɛl Yi rí rə̀ bə dõ zhe mó, ǹ Zwennə mó. À pɔ Ezhibti a m'a zwẽ mó, a pə Ecopyi ǹdə́ Səba ǹ jàà wa, ⁴ ǹ gə́ sú à yírh dɛ̃́dɛ̃́ mɔ́ yilə, ǹ gə́ zhe dùmì, àmyɛ́ j'à só mó mó yilə; rə̀myɛ́ ce à n'â pɛ lyì ǹmyɛ́ jàà wa, à n'â pɛ dwə́ ǹ jàà wa, a m'a zwẽ ǹmyɛ́. ⁵ Bə̀k'á dùr ywẽ yé, b'à ŋwɛ́nɛ́ ǹdə́ mɔ́, à m'a ce ǹ dwí rí shí yi-púrhí sõ rə kwɛ̃̀ rə bà, a ce ń shí yi-zùr sõ ń bə̀ dwã yó. ⁶ À m'a wɔ̀ jə̀-gwã̀ sõ ne: «Pa», a zɛ̃̀ a wɔ̀ jə̀-jĩ́ sõ ne: «Bə̀k'á cə̀r ń cĩ́ ǹ sõ yé! Ce à byǎ bɛ́ shí tənà y kɛ̀bɛ́ è nyɛ wẽ́ sə à bə̀kwá bɛ́ shí lũ kùr w bə kwɛ̃̀ bə bà, ⁷ lyì bí byɛ̀bɛ́ gakó bə̀ n'ê zə à yil ré bə̀ m'ê byẽ̀ be, à wɛ̀rhɛ́, a mɛ́nɛ́ a ce bə̀ ŋwɛ́nɛ́ à yil ré còrhó yil mú! ⁸ Ce-nə dwí rí tɛ̀bɛ́ rə̀ wɔ́ lyìlyǒ, rə j'à zhe yírhə́ mó, lyì bí byɛ̀bɛ́ bə̀ wɔ́ sə̀bwààrhɛ, e j'à bə̀ zhe zhã̌ mɔ́, du pwẽ̀ ne.» Yi rí páá mɔ́ dúdú rə̀ n'ê bwə̀l vwàrh mɔ́ nyí rí rə j'à n'ê pyìrh ri ⁹ Bə̀ tənèsé púlə́púlə́ tó dwã sə bə̀ dwã yó, sə dwə́ né bə̀ nə jòm dwã yó: Mɔ̌ ń yàl nə̀ cəcəl wə, n byili ywẽ̀ né nə̀myɛ́ mɔ́, ń yà ń ce nə́ nyɛ̀ɛ̀ ywẽ̀ né nã́yə́ə́ né, bə̀ ce bə̀ zhǝ̀n-cìnə́ yə̀ nɛ́, sə bə byili bə̀ bə̀ zhe bùrì, sə zhǝ̀n-cìnə́ bé nyɛ̀ɛ̀ sə bə wɔ̀: «Wɔ́ zhə̀nà.» ¹⁰ À zhǝ̀n-cìnə́ bé wɔ́ ámyɛ̌, wɔ́ Cinu nyí rí, ámyɛ̌ á wɔ́ à tùntùnnə mó mɔ̀bɔ́ à cír mùnì ga á nyɛ̀ɛ̀ rə̀ kùrə̀, á zə à zhə̀nà, sə á lwar bə̀ wɔ́ èta à j'â wɔ́ nɛ́: yi rə̀dù ga yə̀ nɛ jɛ̀rɛ̀ rə yə̀ nɛ́ yé, yi myɛ k'ê t'â la nɛ́ yál à kwã yé. ¹¹ Wɔ́ àmyɛ́, wɔ́ àmyɛ́ à wɔ́ Cinu mú kɔn gə lyɛ̃ àmyɛ́, Zwennə kə́ ń tɛ̀nɛ́ yé. ¹² Wɔ́ àmyɛ́ à bwə̀l vwǎrh mɔ́ nyí rí, a j'a pyìrh re, àmyɛ́ à ce bə nyɛ̀ɛ̀ rɛ, è də̀ yi dõ rə̀ ce bə nyɛ̀ɛ̀ rɛ á sõ yé. Rə̀myɛ́ ce á wɔ́ à zhə̀n-cìnə́, àmyɛ́ zɛ̃̀ à wɔ́ Yi, wɔ́ Cinu nyí rí. ¹³ Zhə̀nà, kɔn zhí zà, wɔ́ kɔn rɛ́ tɛ̀bɛ́ à wɔ́ mɔ́: Lòlò wàr ń la kɔn vwǎrh à jɔ̃̀ w yé; kɔn rɛ́ tɛ̀bɛ́ à n'â wɛ̀rhɛ́ mɔ́, mɔ̌ ń mà n byirh ri n ji tɛ̃́? ¹⁴ Nyǐ Cinu mú, mɔ̀bɔ́ ń nə́ ń zwẽ ába, Esərayɛl Yi rí rə̀ bə dõ zhe mó nyí rí: À tə̀ ámyɛ̌ yil a twĩ̀ Babyəlɔnɛ nɛ́, zhə̀nà, à ce bə̀ gakó só ǹdə lyì bí byɛ̀bɛ́ bə̀ n'ê dùr mùnì ga bə lú mú ta, Kalədɛ lyì bí, bə̀ y'à wɔ bǔ-bwələ né nyɛ̀bɛ́ yó, bə̀ m'ê mà wu-nyɔ̃̀ búbwéése mó. ¹⁵ À wɔ́ Cinu mú, á Yi rí rə̀ bə dõ zhe mó, tɛ̀bɛ́ rə̀ wɛ̀rhɛ́ Esərayɛl mɔ́, á Pyɔ̌ mɔ́. ¹⁶ Nyǐ Cinu mú nyí rí, ńmyɛ̌ mɔ̀bɔ́ ń ju sɔ́má nə̀-fɔ̀lɔ̀ w cəcəl wə, n ji sə-byǐ nàná bɛ́ bə̀ y'à n'ê fùù cəcəl w mó, ¹⁷ ńmyɛ̌ mɔ̀bɔ́ ń cĩ́ eshə-vwə̃tur ǹdə́ eshərh e súlí shə̀dɛ́ɛ́sɛ kùkùlə̀ ǹdə́ búlə́ kàndar dwã yó, rə̀ gə́ j'a tu rə̀ k'ê yə̀ ŋwɛ̀nɛ́ rə zɛ̃̀ yé, bə nyɛ́ɛ́ rɛ rə cì ǹdə pàntɛ́mɛ́ ta mɔ́: ¹⁸ Á bə̀k'á k'á lyǐrh ywẽ̀ nã́yə́ə́ né nə̀ wɛ̀rhɛ́ mɔ́ yò yé, á bə̀k'á j'á n'á bùl shãã shãã ga ywẽ̀ né bùlə̀ yé. ¹⁹ Nyǐ àmyɛ́ la kɔn nándùl wɔ̀rhɔ́, rə̀ gaga mɔ́ dámǎ rə̀ n'ê púrhə́; á nə t'á la rə̀ pár lwar nà? Zhə̀n ga, à m'a ji sɔ́má gɔ-elũ èpòlò w cəcəl wə, a ji sə-byǐrh jə́ y wə: ²⁰ gɔ-wẽ̀ ré m'a cèrhé ne, gɔ-kǔlsé ǹdə́ pyɔ̌-cə́lné, b'à ce nɛ̃̌ ŋwɛ́nɛ́ gɔ-elũ èpòlò w cəcəl wə, a ce bù-fwàlsɛ ŋwɛ́nɛ́ jə́ y wə, mùnì ga à dwí rí tɛ̀bɛ́ à cír mú nyɔ̀, ²¹ dwí rí tɛ̀bɛ́ à tɛnɛ à cìn yilə, e jà rə̀ la nɛ còrhó pɔ mɔ́. Yi bə rə̀ dwí rí jim zhe yé, e jà rə̀ m'a cĩ́ bwəl rə̀ yó, rə ce rə pù ²² È j'â də̀ ǹmyɛ́ ǹ byẽ̀ ne yé, Zhakɔɔbɛ, má ǹ búl lyɛ̀ɛ̀ à yil myɛ, Esərayɛl; ²³ è j'â də̀ ǹmyɛ́ ǹ pɔ nɛ ǹ vwə̃̀ námpúmə́ cɛ̃́ɛ̃́ nɛ́ pyì-bwǎlsɛ́ yé, ǹ yə̀ ǹ vwə̃̀ né myɛ dɛnnɛ tó ń súlí à còrhó w yé. À j'â yə̀ ce ń jǐrh yóm mùnì ga a ŋwɛ̀nɛ́ a nə pansɛ yé, à j'â yə̀ mó lyɛ̀ɛ̀ myɛ mùnì ga a nə ãsã́ yé. ²⁴ Ǹ já ǹ yə̀ ǹ sə̀byǐ zə ń mə́ yè vwal-gɔ ò lwẽ́ nã́nyə̀nyɛ̀lɛ́ ń pɛ̃ yé. Ǹ já ǹ yə̀ nɛ ǹ vwə̃̀ né nwǐsí pɛ a jí kɔn lyɛ̃ cɛ nɛ myɛ yé! Sə è wɔ́ ǹmyɛ́ ǹ zə ǹ dwə́ə́ré ń ce a jǐrh yóm, ǹmyɛ́ ǹ zə ǹ lwɛlɛ rɛ́ ń mə́ lyɛ̀ɛ̀ nɛ; ²⁵ Sə è gə wɔ́ àmyɛ́ yilə, à gə́ wɔ́ nɛ́ mɔ́ ce, à ce ǹ yó-kùùlí tũ̀twə̃̀ə̃̀ né jé tɛ̃́, à cìcì mú yilə, à t'â cĩ́ ǹ dwə́ə́ré à wẽ́ à m'â lyǐrh rə̀ yò yé. ²⁶ Byili ni kɔn rɛ́ tɛ̀bɛ́ rə̀ n'ê lyǐrh ǹ ywẽ̀ né yò mó a nyì wé, sə nə́ bùr ǹdə́ dwã, ǹmyɛ́ cìcì mú lyǐrh re ń mə́ byili bə̀ ǹ zhe bùrì: ²⁷ ǹ nàmbal nã́yə́ə́ mó yà ń dówə́, ǹ nyí-cínnə bé cẽ à nyí ni, ²⁸ rə̀myɛ́ ce à co cìzhìl yó-cìnə́ bé bə̀ mə̌ dwã sə bə nyàm bɛ ǹdə́ Yi nyɔ̀mɔ̀ w mɔ́ nɛ, à gurhi Zhakɔɔbɛ dwí rí lyə́m lyə́m Cinu yilə, a ce Esərayɛl zwə̀ bé n'ê mɔ̀n mɔ.