¹ 1 Nyǐ à tùntùnnǝ mó mɔ̀bɔ́ à nyí wɔ ń kwã mɔ́, mɔ̀bɔ́ à cír, à cìcì mú j'â só mó, à ce à Eshirhǝ y só ń yó wǝ. Ń mà n ce kɔn dɛ̀bɛ́ rǝ̀ wɔ́ cángá mɔ́ pwẽ̀ ne tənèsé yilə, ² 2 ń tá ń la byɛɛ́sɛ bya yé, ń tá ń la ce ń cəl du dɛ̃̌ yé, bǝ̀ t'â la ń cǝl nyɔ̀ɔ̀ rə̀ n'ê búbwéé sɔ́msɛ yó yé; ³ ń tá ń la vwal-gɔ kɔ̀bɔ́ ò lwəl tɛ̃́ mɔ́ kɔ́ yé, ń tá ń la pàntɛ́mɛ́ kɛ̀bɛ́ è n'ê cɛ́nɛ́ mɔ́ cú yé; sə ń mà n já n ce kɔn rɛ́ tɛ̀bɛ́ rə̀ wɔ́ cángá mɔ́ pwẽ̀ ne. ⁴ Ńmyɛ̌ jàn rɛ́ t'â la bɔ̌ yé, ń tá ń la tɛ̃́ lwəl yé, kɔn b'e yí n ce kɔn rɛ́ tɛ̀bɛ́ rə̀ wɔ́ cángá mɔ́ zwẽ lũ wə́, sə cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ myɛ m'a zɛ̃̀ nə̀ n'ê dɛ̃̀ ń nyə́ né. ⁵ Nyǐ Yi nyí rí, Cinu mú mɔ̀bɔ́ ń wɛ̀rhɛ́ dɛ̃̌-yi rí, e jà n lɛ̀lɛ̀ rɛ dɛ̃̌ mɔ́, ń lɛ̀lɛ̀ cɛ y ǹd'ê wẽ̀ ré tɛ̀bɛ́ rə̀ n'ê lyĩ è yó mó tɛ̃́, ń pɔ shíshìrhə́ lyì nánjə̀jóló w kɔ̀bɔ́ gakó ò wɔ è yó mó ne, e jà n pə shíshìrhə́ lyì bí byɛ̀bɛ́ bə̀ n'ê zhə̀l è yó mó ne: ⁶ Wɔ́ àmyɛ́ à wɔ́ Cinu mú, à byẽ̀ mó ǹdə cángá tũ̀twĩ̀ĩ̀ rí gə́ n'ê yǎl nɛ́, à zɔ ǹ jɛ̃̀ nɛ, à cĩ́ mú kwã nɛ́, à ce ǹ la yə̀ dwí rí dɔbrɛ́ ń yə̀ tənèsé pwẽ̀, ⁷ ń púr yírhə́ né nyɛ̀bɛ́ nə̀ bə nɛ́ nɛ mɔ́, ń vùr mɔ̀bɔ́ ń wɔ byə̀nə́-jù w mú, ń vùr lyì bí byɛ̀bɛ́ bə̀ wɔ cə-byín rí wẽ́ mó, jì y kɛ̀bɛ́ bə̀ co be è wẽ́ mó wə. ⁸ Wɔ́ àmyɛ́ à wɔ́ Cinu mú, wɔ́ rə̀myɛ́ rə̀ wɔ́ à yil ré; sə à t'â la à zùwə́ y lò dõ ne pɔ yé, à t'â la à còrhó w kɔ̀bɔ́ bə̀ mə̌ sə bə m'e cèrhé ne mó yə né myɛ nɛ pɔ yé. ⁹ Nyǐ ywẽ̀ né nã́yə́ə́ né nə̀ lyɛ̃, sə àmyɛ́ n'â swal nə̀ dwã nándùlə̀, à m'a dámǎ a ce á nyɛ̀ɛ̀ nə̀ yò éfòró nə yí. ¹⁰ Ji-nə nwə̃́ nándwə̃̀ Cinu yilə, nún-nə á cèrhé mo lũ w cə-yala gakó wə, ámyɛ̌ nə̀-fɔ̀lɔ̀ w lyì bí ǹdə́ kɔn rɛ́ tɛ̀bɛ́ rə̀ sú w mú, cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ ǹdə́ nə̀ lyì bí. ¹¹ Gɔ-elũ èpòlò w ǹd'ô cɛmɛ nɛ́ ce nə̀ cələ du dɛ̃̌, nə̀myɛ́ ǹdə́ cə-bwǎlsɛ́ shɛ̀bɛ́ Kədaarɛ jě sə̀ wẽ́ mó; Nə́kulu w lyì bí mǎ wu-nyɔ̃̀ búbwéése, bə̀ zhǐ pyàr rɛ́ yə́-pɛ̀lɛ́ w bə kǎrh; ¹² bə̀ cèrhé Cinu, bə̀ bwə̌l ń còrhó w cɛmɛ nɛ́ nyɛ̀bɛ́ nɛ̃̌ kə́kɛ́lɛ́ nɛ mɔ́ wẽ́! ¹³ Cinu mà n du pwẽ̀ ne ǹdə kàndɔ ta, ń bùrhì ń búlə́ bú shil ré ǹdə búlə́ búlnə ta, ń mà búlə́ bú búbwéé n ce ne, n ce dweme, ń zɛ̃̀ ń nə́ ń wɛ̀rhɛ́ ǹdə kàndɔ ta, ǹdə́ ń zwə̀ bé: ¹⁴ À j'a dɛnɛ dɛ̃́dɛ̃́ ǹdə́ kɔn wɔ̀rhɔ́, à y'à t'â wə̀l kaka yé, à y'à n'â zal à cìnə̀, à n'â wɔ́wɛ́lɛ́, à n'â shǐrh shǐrh à gɛ, à j'a súlí à n'â nwɛ̀nɛ̀ ǹdə kɛ̃ mɔ̀bɔ́ ń la lúl ta. ¹⁵ À m'a cɔ̀ pyàr rɛ́ ǹdə́ pyǎlsɛ́, a ce rə̀ wẽ̀ ré tɛ̀bɛ́ rə̀ lyĩ rə sú cɛ y mɔ́ gakó kù; à m'a ce bù-fwàlsɛ́ jǐrh cə-bwǎlsɛ nɛ̃̌ kə́kɛ́lɛ́ sɛ, a ce pwə́ə́lé pyẽ̀ nánkùùlì. ¹⁶ À m'a ce lyìlyə̌r ré kwè sɔ́má kɛ̀bɛ́ rə̀ yə̀l è pár mɔ́, à m'a ce rə kwè sə-byǐrh shɛ̀bɛ́ rə̀ yə̀l sə̀ pár mɔ́. À m'a ce cə-byín rí jǐrh pwẽ̀ rə̀ yé né, a ce sɔ́m-bəgɔ́lsɛ́ jǐrh cángá. À m'a j'a wɛ̀rhɛ́ kɔn rɛ́ rə̀myɛ́ à tɛnɛ à la wɔ̀rhɔ́ mɔ́, à t'â la rɛ yõ̌ gaga yé. ¹⁷ Nyǐ bi bə̀ càrh bə̀ kwã, cìzhìl la gu, lyì bí byɛ̀bɛ́ bə̀ zhe yi rí tɛ̀bɛ́ bə̀ wɛ̀rhɛ́ zhə̀n mɔ́, lyì bí byɛ̀bɛ́ bə̀ n'ê wə̀l lù w kɔ̀bɔ́ bə̀ yə̌l mó ne: «Ámyɛ̌ á wɔ́ nə́ yə né!» Yi n'ê bwí rə̀ lyì bí, e jà rə̀ n'ê bwəl be rə̀ vwǎrh mɔ́ nyí ¹⁸ Ámyɛ̌, sə̀bwààrhɛ́, nyɛ̀ɛ̀-na! Ámyɛ̌ lyìlyə̌r ré, nyǐ-nə sə á nə nɛ́! ¹⁹ Mɔ̌ ń yà ń wɔ́ lyìlyǒ, ǹd'ê gə y'à də̀ àmyɛ́ Tùntùnnə mó? Mɔ̌ ń yà ń wɔ́ sə̀bɔ̀rhɔ̀ ǹdə à Tùntúm mú mɔ̀bɔ́ à la tũ̌ mú ta? Mɔ̌ ń yà ń wɔ́ lyìlyǒ ǹdə Mɔ̀bɔ́-bə̀-kwɛrhɛ-ń-yò mó ta? Mɔ̌ ń yà ń wɔ́ sə̀bɔ̀rhɔ̀ ǹdə Cinu Tùntùnnə mó ta? ²⁰ Ǹ búl nə wẽ̀ nánzhəzhɔ̌, sə ǹ yə̀ kaka ǹ wẽ́ cĩ́ yé; zhã̌ nɛ́ pul, e jà nə̀ bə kaka nyɛ̌ yé! ²¹ Cinu cángá tũ̀twĩ̀ĩ̀ rí ce ń ce ń nyə́ né yə̀ nánfwààlɛ ǹdə́ náàcɛ̀nà, ²² sə nyǐ dwí bə̀ j'a bubu rə̀ jɛ̃̀ kɔn rɛ́ gakó bə pwà rɛ bə yẽ̌ re e jà bə súlí bə cɔ̀ rə̀ kɔn gakó: bə̀ co bə̀ gakó gwáárɛ wẽ́, bə shèè be byə̀nə́-jìrh wẽ́; bə̀ y'à n'ê bubu bə̀ wẽ̀ ré, sə lò yà ń tɛ̀nɛ́ ń la bɛ zõ yé, bə̀ y'à j'â n'ê cɔ̀ bə̀ kɔn gakó, sə lòlò yə̀ wə̀l: «Cǎrh rɛ!» yé. ²³ Á cəcəl wə, mɔ̌ lò ń mà n pyèrhè ń zhɛ̃̌ n cili zɔ̀mà nɛ́ nə̀myɛ́ mɔ́ náàcɛ̀nɛ́, mɔ̌ lò ń mà n zhìlì ń yala nɛ náàcɛ̀nɛ́ n cili tà-kwã nɛ? ²⁴ Mɔ̌ lò ń ce bə cɔ̀ Zhakɔɔbɛ kɔn gakó, mɔ̌ lò ń co Esərayɛl vwǎrhna bɛ́ jɔ̃̀ wa? È nə də̀ Cinu, mɔ̀bɔ́ nə́ dó mó, ńmyɛ̌ mɔ̀bɔ́ bə̀ yə̀ yǎl bə tó ń sɔ́msɛ́, bə súlí bə̀ yə̀ ń Nyə́ né zwẽ mó nà? ²⁵ Rə̀myɛ́ ce ń já n ló ń lyi-shùùrí càn rɛ́, búlə́ né lwɛlɛ rɛ́ Esərayɛl yó wə; lyi-shùùrí ce kɔn gə́ kə́kɛ́lɛ́ Esərayɛl nɛ́ mɔ́ jú myǐn sə Esərayɛl yə̀ yǎl e shɛ̀nɛ́ e zwẽ rə̀ nyí gaga yé; Myǐn mú j'a búl mə jí Esərayɛl cəcə-bwál rɛ́ cìcì mú dɔ́dɔ́, sə è yə̀ kaka kwè ǹdə kɔn ta yé!