¹ Ámyɛ̌ cɛmɛ nɛ́ nyɛ̀bɛ́ nɛ̃̌ kə́kɛ́lɛ́ ába mɔ́, jǒm-nə àmyɛ́ yé né á nyí cám, sə cɛmɛ nɛ́ lyì bí k'e zə jàn-dùl; bə̀ fwǎr bə bwəlse, sə bə zɛ̃̀ bə zɔ̀m! Bà-na nə́ tó dwã nə́ vò bùrsí jàà wa, nə́ bùr ǹdə́ dwã: ² Mɔ̌ lò ń ce bù-kárna shí yi-púrhí sõ n du tɛ̃́, n byẽ̀ mo n tó ń kùrə̀, n ce n cìní tənèsé, n ce cìzhìl pyǎ bɛ́ nɛ, n ce ń lyì bí byɛ̀bɛ́ bə̀ n'ê bwí ǹdə́ bùlə́ shù mú pù bə yə̀ ǹdə shó ta, n ce lyì bí byɛ̀bɛ́ bə̀ wɔ́ twərh cìnə́ mó jǐrh nánzhɔ̌ ǹdə màálɛ tɛ̀bɛ́ zho nánfɔ̀lɔ̀ pwà ta, ³ rə̀myɛ́ zɛ̃̀ rə ce n pú bə̀ dwã bɛ́ kùr ń nə́ ń jì, n tó èpákɛ̀ n lyɛ̃, ń yó w ga, ǹdə́ ń nà yə̀ cɛ y nɛ dwə̀rh yé. ⁴ Mɔ̌ lò ń tɛnɛ ywẽ̀ né nyɛ̀bɛ́, n zɛ̃̀ n pyìrh ri mú? Lò mó mɔ̀bɔ́ ń nə́ ń byẽ̀ byinə né nə̀ pú pú dwã nɛ mɔ́ lyì bí, n cĩ́ dwã yó, kùr-ju yi ní ga mɔ́: Àmyɛ́ à wɔ́ Cinu mú, nã́yə́ə́ mó, sə à gwẽ̌ m'a yə̀ èta ǹdə́ lyì-kwaá bɛ́ myɛ. ⁵ Cɛmɛ nɛ́ nyɛ̀bɛ́ nɛ̃̌ mɔ́ kə́kɛ́lɛ́ nɛ mɔ́ nɔ mɔ: nə̀ wun n'ê zɛ̃̀, lũ w n'ô kəkə ò cə-yala gakó, nə̀ j'â n'ê nyǐ kɔn gə́ n'ê zhə̀l né yò w shò kwã mɔ́, nə zɛ̃̀ nə̀ n'ê zhə̀lə̀. ⁶ Lò gakó nə́ ń sɛ̃ ń tó-dõ ne, n zɛ̃̀ n wɔ̀ ń dõ ne: «Zə ǹ wu!» ⁷ Sə̀lnə mó nə́ ń zal fwə̌rhnə mó wu ní. mɔ̀bɔ́ ń nə́ ń zal kɔkwaá ń mə́ ń pyárh lù w o jǐrh náápǎ mɔ́ nə́ ń zal mɔ̀bɔ́ ń nə́ ń mà shèlè ré mó wu ni; ń nə́ ń wə̀l kɔn rɛ́ tɛ̀bɛ́ bə̀ zùrhì mú shò kwã nɛ́: «Rə̀ càn», n zɛ̃̀ n zə dàdɔ̌bsɛ n mə n ce rə zhǐ dɛ̃̌, mùnì ga rə̀ bə̀k'a zhízhǐ yé. ⁸ Sə ǹmyɛ́, Esərayɛl, à tùntùnnə mó, Zhakɔɔbɛ, ǹmyɛ́ mɔ̀bɔ́ à cír mú, à dɔwa Abəraam dwí, ⁹ ǹmyɛ́ mɔ̀bɔ́ à zɔ a m'a shí cə-yala gakó mó, ǹmyɛ́ mɔ̀bɔ́ à byẽ̀ ń shí lũ w jààsɛ́ shɛ̀bɛ́ sə̀ nyɛ wẽ́ mó, ǹmyɛ́ mɔ̀bɔ́ à wə̀l mó: «Ǹ wɔ́ à tùntùnnə, à cír mú, à yə̀ mó zhɛ̃̀ mɔ́», ¹⁰ bə̀k'á dùr ywẽ yé, b'à ŋwɛ́nɛ́ ǹdə́ mɔ́, bə̀k'á nyǐ ǹdə lò mó mɔ̀bɔ́ wu-zɛ̃ɛ̃́ zhe ta yé, b'à wɔ́ ǹ Yi. À m'a ce ń yə̀ nánkokoro, zhə̀nà, à n'â sɛ̃ mɔ́, zhə̀nà, à m'a kwɛ̃́ mɔ́ ǹd'â jə̀-jĩ́ jɛ̃̀ y è n'ê kɛ́ bùrsí ǹdə́ cángá tũ̀twĩ̀ĩ̀ rí gə́ n'ê yǎl nɛ́ mɔ́. ¹¹ Nyǐ bə̀ m'a j'a jí cìzhìlə̀, tùùrhi m'a gu bi, lyì bí byɛ̀bɛ́ gakó bə̀ lyim y'à zɛ̃̀ rə̀ n'ê yì mú mú: lyì bí byɛ̀bɛ́ bə̀ n'ê bwí ǹdə́ mɔ́ mɔ́ m'a yə̀ ǹdə kɔn nánfò ta, sə bə̀ m'a cì; ¹² ǹ m'ǎ zɛ̃̀ ǹ nə́ ǹ pyà lyì bí byɛ̀bɛ́ bə̀ n'ê cĩ́ zãã y ǹdə́ mɔ́ mɔ́, sə ǹ kə́ ǹ tá ǹ la bɛ nɔ yé; lyì bí byɛ̀bɛ́ bə̀ n'ê bwí ǹdə́ mɔ́ mɔ́, m'a yə̀ kə̀-fò, ǹdə́ kə̀-fóó. ¹³ B'àmyɛ́ Cinu, à wɔ́ ǹ Yi rí tɛ̀bɛ́ rə̀ zhe ǹ jə̀-jĩ́ ni, rə̀ n'ê wə̀l mó: «Bə̀k'á dùr ywẽ yé, wɔ́ àmyɛ́ à n'â sɛ̃ mɔ́ mɔ́.» ¹⁴ Bə̀k'á dùr ywẽ yé, Zhakɔɔbɛ, ǹmyɛ́ ǹ wɔ́ zə̀zɔ̀mɛ́ zà zà mɔ́, Esərayɛl, ǹmyɛ́ ǹ wɔ́ cùù zà zà mɔ́, wɔ́ àmyɛ́ à n'â sɛ̃ mɔ́, lò mó mɔ̀bɔ́ ń kwɛ̃̌ n mə n zwẽ mó mó, wɔ́ Esərayɛl Yi rí rə̀ bə dõ zhe mó, wɔ́ Cinu nyí rí. ¹⁵ À m'a ce ń yə̀ cɔ̀bɔ́ ǹd'ô yə́lə́, ò wɔ́ nándũ̀ ò yə́lə́ né myɛ j'â jɛ̀: ǹ m'ǎ nɔ̀ pyàr rɛ́ tɛ̃́ ń bɔbwɛlɛ rɛ, ǹ m'ǎ ce pyǎlsɛ́ jǐrh ǹdə jíjí púúli ta, ¹⁶ ǹ m'ǎ cèlè re, sə zho m'a zə rɛ o lyɛ̃, kùlmə̀ m'a làà rɛ dwã nɛ. Sə ǹmyɛ́ m'ǎ fùù ǹdə́ wu-nyɔ̃̀ Cinu jàn yilə, ǹ m'ǎ zhẽ̌ ǹ yó dɛ̃̌, Esərayɛl Yi rí rə̀ bə dõ zhe mó jàn yilə. ¹⁷ Nə̀mwà bɛ́ ǹdə́ zúzúnú cìnə́ bé byɛ̀bɛ́ bə̀ n'ê pyà nɛ̃̌ bə̀ gɛ mɔ́, bə̀ mə̀jə̀ə̀lé j'â n'ê kùlə̀ nə̀nyɛ̀lsɛ yil mú, àmyɛ́ Cinu, à m'a lyár bɛ, àmyɛ́ Esərayɛl Yi rí, à t'â la bɛ tɛ̃́ yǎrh yé. ¹⁸ À m'a ce bù-fwàlsɛ púrh pyǎlsɛ́ shɛ̀bɛ́ sə̀ ywẽ́ né pyě nánsə̀rh mó yó, a ce nə̀-bùlsì púrh tɛ̃́ pyə̀-gwáárɛ́ wẽ́. À m'a ce gɔ-elũ èpòlò w jǐrh bù-sàà, a ce cə-kùlì y jǐrh nɛ̃̌ mə̀ n'ê púrh tɛ̃́ jàà. ¹⁹ À m'a zhele sɛ́ɛ́dərɛ ǹdə́ ákáshá ǹdə́ myiirətia e súlí olyivyé gɔ-elũ èpòlò w wə; à m'a ce səpərɛ́ɛ́sɛb y ǹdə́ ormɛc y e súlí bwǐsid y ga jə́ y wə, dwã yó, ²⁰ mùnì ga lyì bí nə sə bə lwar, bə zhì shɛ́ɛ́ bə nyǐ, sə bə tó dwã bə nyɛ̀ɛ̀ rə̀ kùrə̀, bə̀ wɔ́ Cinu jɛ̃̀ y è twĩ̀ ri, bə̀ wɔ́ Esərayɛl Yi rí rə̀ wɛ̀rhɛ́ rɛ. Cinu co yə né ǹdə́ nə̀ tùntùnnə bé cìzhìlə̀; ń nə́ ń byili ń tùntùnnə mó párá ²¹ Cinu nə́ ń wə̀lə̀: cĩ́-nə nyí á yò w shò kwã nɛ́. Zhakɔɔbɛ Pyɔ̌ mɔ́ nə́ ń wə̀lə̀: byili-nə tɛ̀bɛ́ rə̀ m'a ce á nə bùrì mú; ²² bə̀ twẽ̌ bə yí, bə byili nə́ba, ywẽ̀ né nyɛ̀bɛ́ nə̀ la tɛ̃́ zã̀ɔ̃̀ mɔ́! Ywẽ̀ né nyɛ̀bɛ́ nə̀ jɛ̀nɛ̀ nə yə̀ nɛ́ mɔ́, è yàl nyɛ̌ ǹdə́ nə̀ dwã? lyǐrh-nə nə́ba kɔn rɛ́ tɛ̀bɛ́ rə̀ swal nɛ mɔ́: nə́ m'ǎ tɛ́rɛ́ nə̀ shò kwã nɛ́ náàcɛ̀nɛ́, nə́ zɛ̃̀ nə́ lwar nə̀ gə́ pyìrh ní! Ráá sə á byili nə́ba ywẽ̀ né nyɛ̀bɛ́ nə̀ gwẽ̌ bàn mɔ́, ²³ swal-na ywẽ̀ né nyɛ̀bɛ́ nə̀ bàn mɔ́, nə́ m'ǎ zɛ̃̀ nə́ lwar b'ǎ wɔ́ yə! Nyǐ-nə wé! ámyɛ̌ wúrí á ce kɔ-ècɛ̀nɛ́ ráá kɔ̀-bəlwɛ̀lɛ́ yə̀ nɛ́, rə̀myɛ́ yó nə́ gakó m'ǎ zɛ̃̀ nə́ gõ̀ dwã ǹdə́ yírhə́, nə́ nyì! ²⁴ Nyǐ-nə kɔn rɛ́ tɛ̀bɛ́ á j'á wɔ́ mɔ́: á yə̀ kaka kùr myɛ nɛ yí yé; kɔn rɛ́ tɛ̀bɛ́ á wɛ̀rhɛ́ mɔ́ myɛ yə̀ kaka kùr myɛ nɛ yí yé! Ku w kɔ̀bɔ́ ò cír ába á wɔ́ ò lyì mú myɛ j'â wɔ́ pɔrha kɔna. ²⁵ À ce lò shí jə̀-gwã̀ sõ n du tɛ̃́, sə ń túwə́; ń nyɛ̌ bə̀ j'â n'ê byẽ̀ ń yil ré, kɔn gə́ zhì yi rí gə́ n'ê púrh má mɔ́; ń nə́ ń cèè tənèsé yó-cìnə́ bé tɛ̃́ ń nə̀rh kùr w ǹdə bɔ̀bɔ̀rɔ̀ ta, ǹdə dɔ-mɔrna gə́ nə́ ń cèè dɔ tɛ̃́ ǹdə́ ń nə̀kúlə́ né né. ²⁶ Mɔ̌ lò ń nə yà ń swal rɛ kùr-ju yi ní ga, sə nə́ lwar rə̀-ná-cí párá, yi rí tɛ̀bɛ́ rə̀ lyɛ̃ mɔ́ yi ní ga, sə nə́ m'é wɔ̀: «Nyǐ rə̀ wɔ́ zhə̀nà!» Gaga, lòlò də́-byǐ yà ń yə̀ re swal yé; gaga, lòlò də́-byǐ yà ń yə̀ ce rə tu zhɛ̃̌ w yé; gaga, lòlò də́-byǐ yà ń yə̀ á zɔ̀mà nɛ́ nyɛ̀ɛ̀ yé. ²⁷ Wɔ́ Səyɔ̃ cɔ w kɔ̀bɔ́ èta mɔ́ yilə, lò mó mɔ̀bɔ́ ń nə́ ń zɔ̀m mɔ́, wɔ́ lyì-yə́ə́ mó, ń nə́ ń zɔ̀mà, wɔ́ Zhərəzalɛm sõ à n'â twĩ̀ tùntúm ní. ²⁸ À j'a nyǐ nyǐ: lò mə̀dù ga tɛnɛ yé, cícírnə mə̀dù ga myɛ tə̀ bə̀ cəcəl w yé! À y'à m'a bwə̀rh be, sə bə̀ y'à m'a lyár nɛ! ²⁹ Nyǐ kɔn rɛ́ tɛ̀bɛ́ bə̀ gakó j'â wɔ́ mɔ́: lwɛlɛ cìnə́ dúdú! Bə̀ tumə né? wẽ̀ nánfwə̀r! Bə̀ yə né? zho ǹdə́ wẽ̀ nánfwə́ə́re!