¹ Á Yi rí wə̀lə̀: Zə-na à dwí rí wu ni, zə-na rə̀ wu ni, ² zɔ̌m-na ǹdə́ Zhərəzalɛm cɔ wá, kɔn dwə̀rh wə, bwə̌l-nə á byili wə, b'ò tũ̀-kùlə̀ né zhɛ̀, b'ò còrhò-tum rí pyìrh, b'ò zwẽ ò dwə́ə́ré kwǎndɛ́ kɔn yí twər kùrə̀ nə̀lyè Cinu cìcì jɔ̃̀ wa. ³ Cəl n'ê bwə̀l rə̀ zhe: «Ji-nə sɔ́má gɔ-elũ èpòlò w wə, Cinu yilə, Kwɛrhɛ-na sɔ́má e mɛrhɛ dwã jə́ y wə, nə́ Yi rí yilə. ⁴ Bǝ̀ shĩ gɔ́rɔ́ dwí gakó o zɛ̃̀ dɛ̃̌; bǝ̀ só pyɔ̀ dwí gakó ǹdǝ́ pyɛ̀lɛ́ dwí gakó tɛ̃́; bǝ̀ ce jàà y kɛ̀bɛ́ è zɛ̃̀ dɛ̃̌ gakó jǐrh jə́, bǝ̀ ce də̀dwə́ə́lé gakó só tɛ̃́! ⁵ Rə̀myɛ́ yi ní, bə̀ m'a nə Cinu còrhó wə́, sə numbyínsí gakó m'a tó dwã sə lwar bə̀ wɔ́ Cinu nyú w rə̀ shí ní.» ⁶ Cəl rə̀dù zɛ̃̀ rə wɔ̀: «Bwə̌l ń byili!», rə̀ dõ bwə̀rh rə wɔ̀: «Bə̀kɔ́n à m'a bwə̀l a byili?» «Numbyínsí gakó wɔ́ gɔ, sə̀ cɛ̀nɛ̀ rɛ́ púlə́púlə́ j'â wɔ́ ǹdə cɛsɛ́ pùnə́ né cɛ̀nɛ̀ rɛ́ ta: ⁷ Gɔ w n'ô kùlǝ̀, pùní rí myɛ n'ê pyɛ̀nɛ̀, Cinu shíshìrhə́ né gə mà rɛ ǹdə́ jàn yi ní. Zhə̀nà, dwí rí j'â wɔ́ gɔ: ⁸ Gɔ w n'ô kùlǝ̀, ò pùní rí n'ê pyɛ̀nɛ̀, sə nə́ Yi rí zɔ̀mɛ̀ rɛ́ m'à j'â ŋwɛ́nɛ́ twéé twéé yilə!» ⁹ Sə è gə wɔ́ ǹmyɛ́ yilə, jíl pyɔ̀ kɔ̀bɔ́ ò wɔ́ dɛ̃̌dɛ̃̌ mɔ́ yó, Səyɔ̃, tùntúm mɔ̀bɔ́ ń wu j'â nyɛ̀ mɔ́, ce ǹ cəl ré du ǹdə́ jàn, Zhərəzalɛm, tùntúm mɔ̀bɔ́ ń wu j'â nyɛ̀ mɔ́, ce rə du dɛ̃̌, bə̀k'á dùr ywẽ yé, wál Zhəda cɛmɛ nɛ́ nɛ: «Nyǐ á Yi rí, ¹⁰ nyǐ Cinu Yi! Ń bàn ǹdə́ jàn, sə ń vɔ̃̀ w m'a pɔ̃ ŋwɔ̀nɔ́; nyǐ ń kwǎndɛ́ ŋwɛ́nɛ́ ǹdə́ mɔ, sə ń nyɔ̀ɔ̀rhɛ́ wɔ ń yé né. ¹¹ Ń nə́ ń kál ń vwàmá nɛ́ ǹdə ènɔ̀n ta, ń zə ń jɛ̃̀ y ń mə́ ń pɛ́ nɛ n cĩ́ dwã yó; ń nə́ ń pwà pyì-byǐsí ń dɛ̃ ń nə̀bán nɛ, ń nə́ ń ce pyììsí shɛ̀bɛ́ sə̀ n'ê ŋwɔ̀ mɔ́ j'â wɔ twɛ́nɛ́ wẽ́.» Yi n'ê zal rə̀ dwí rí wu ni: rə̀ n'ê pɛ rɛ wu-jɔ̀ ¹² Mɔ̌ lò ń gwẽ̌ ló nə̀-fɔ̀lɔ̀ w nàná bɛ́ ń jɔ̃̀ w n mə n mɛrhɛ bɛ, ráá ń gwẽ̌ mɛrhɛ dɛ̃̌-yi rí wàn rɛ́ ǹdə́ ń jɛ̃̀-wàn, ráá ń gwẽ̌ mɛrhɛ cɛ y shó w ǹdə́ wẽ̀ mɔrhɔ ku, ráá ń gwẽ̌ mɛrhɛ pyàr rɛ́ dùmì rí dùmì mɔrhɔ ku nánfɔ̀lɔ̀ yó, ráá ń gwẽ̌ mɛrhɛ pyǎlsɛ́ dùmì rí dùmì mɔrhɔ ku yó? ¹³ Mɔ̌ lò ń zə ń cìn n mɛrhɛ Cinu éshìrhə́ y n zɛ̃̀ n byili mu lò mó mɔ̀bɔ́ ń mà n pyìrh kɔn rɛ́ tɛ̀bɛ́ ń tɛ́rɛ́ ń la wɔ̀rhɔ́ mɔ́ párá? ¹⁴ Mɔ̌ lò sõ ń gwẽ̌ zwẽ cúcú mɔ̀bɔ́ mə̀ wɔ̌ mə̀ m'a sɛ̃ mɔ nɛ́, mə̀ m'a cèrhè mo bùrsi gə́ n'ê kɛ́ nɛ́, mə̀ m'a cèrhè mo ywẽ̀ lwar, mə byili mu surhə sɔ́má yá? ¹⁵ Nyǐ tənèsé j'â nyɛ̌ ǹdə nɛ̃̌ mə̀ shí só w mə twər tɛ̃́ ta! Sə̀ nyɛ̌ ǹdə shó kɔ̀bɔ́ ò wɔ mɔrhɔ ku w yó ta. Nyǐ tənèsé shɛ̀bɛ́ nɛ̃̌ kə́kɛ́lɛ́ sɛ mɔ́: ń nə́ ń zhẽ̌ se dɛ̃̌ ǹdə kɔ́kɔ̀rhɔ́ w ta. ¹⁶ Lyəbã t'â la yú myǐn mú jóó yil yé, è gɔ-nàmá bɛ́ myɛ j'â t'â la yú vwĩ̀ námpúm cɛ̃́ɛ̃́ rɛ́ yil yé. ¹⁷ Tənèsé gakó j'â nyɛ̌ ǹdə kə̀-fò ta ń yé né; sə̀ j'â wɔ́ kə̀-fò ǹdə́ kə̀-fóó ń yilə. ¹⁸ Mɔ̌ lò ne á m'ǎ zə Yi á mɛrhɛ, nyɔrhɔ kɔn dɛ̌ á m'ǎ cĩ́ rə̀ yala nɛ á m'á mɛrhɛ rɛ? ¹⁹ Yi rí tɛ̀bɛ́ bə̀ zùrhì mú? Wɔ́ wə̀-zùrhnə ń yə̌l ku n mə n zùrhì ri; fwə̌rhnə zɛ̃̀ n yə̌l sánə́má n mə n zù ri, n súlí n fwə̌rh sə̀byì-kùlì nyáná námpɔ́lsɛ. ²⁰ Lò mó mɔ̀bɔ́ ń jɛ̃̀-kɔn rɛ́ mùrì ń jɛ̃̀-jirə́ yí rí còrhó wẽ̀ ré shò kwã nɛ́ mɔ́, wɔ́ dɔ̌ kɔ̀bɔ́ ò t'â jí ń ya n pyà. N zɛ̃̀ n pyà lò mó mɔ̀bɔ́ ń yě tum yé shò, n sə̀ yi tɛ̀bɛ́ rə̀ wɔ̌ rə̀ zhì dɛ̃̌ rə̀ t'â zhízhǐ. ²¹ Á yə̀l nà, á gwẽ̌ yə̀ nyɛ̀ɛ̀ myɛ nà, bə̀ j'â yə̀ ába cĩ́ kùr-ju yi ní ga nà, á yə̀ lò mó mɔ̀bɔ́ ń ce cɛ y ŋwɛ́nɛ́ mɔ́ pár lwar nà? ²² Ńmyɛ̌, já ń ŋwɛ́nɛ́ ku w ò pú cɛ y tɛ̃́ mɔ́ yə́-pɛ̀lɛ́ wa, cɛ y kɛ̀bɛ́ è lyì bí nyɛ̌ ǹdə səsɔ̀mɛ̀ ta mɔ́! ń lɛ̀lɛ̀ dɛ̃̌-yi rí n lyẽ dɛ̃̌ ǹdə étwí-ènyí rí gɔ̀nɔ̀ ta! ń lɛ̀lɛ̀ rɛ n lyẽ ǹdə kòrhó ta, ń la n mə n yə̀ gàà ²³ Ń nə́ ń ce tənèsé yó-cìnə́ bé jǐrh kɔn nánfò, n ce lũ w bù-kárna bɛ́ jǐrh wẽ̀ nánfwə́ə́re; ²⁴ 2zhə̀nà, má bə̀ cĩ́ kùr tɛ̃́ myɛ; má bə̀ làà jààsɛ wẽ́ myɛ; má bə̀ kùr zù tɛ̃́ cɛ y wẽ́ myɛ! ǹdə́ rə̀myɛ́ ga, ń gə já ń fùrh zho bə̀ yó wə, làlà ǹdə́ bə̀ n'ê kùlə̀, kùlmə̀ zɛ̃̀ mə̀ n'ê pwà bɛ mə̀ lyɛ̃ ǹdə gɔ ta. ²⁵ Yi rí tɛ̀bɛ́ rə̀ bə dõ zhe mó n'ê bwə̀rh rə̀ zhe: «Mɔ̌ lò ne á m'ǎ zə nɛ á mɛrhɛ? Mɔ̌ lò à nə m'a nyɛrhɛ?» ²⁶ Búl-nə á kwẽ̌ á nyǐ dɛ̃̌-yi wə, nyǐ-nə á nyì: mɔ̌ lò ń wɛ̀rhɛ́ wẽ̀ ré rə̀myɛ́ mɔ́? Lò mó mɔ̀bɔ́ ń nə́ ń cĩ́ rə̀myɛ́ èta mɔ́ gakó yó w dwã yó, ń nə́ ń byẽ̀ rə̀myɛ́ òdù gakó ǹd'ô yil ré mó. Ń jàn rɛ́ j'â já dɛ̃́dɛ̃́, ń ŋwɔ̀nɔ́ w myɛ j'â zhǐ ò nà y yó ce, wẽ̀ ré rə̀myɛ́ òdù ga t'â mùrì yilə né byõ̌ yi ní yé! ²⁷ Zhakɔɔbɛ, bə̀kɔ́n yil ǹ nə́ ǹ wə̀lə̀, Esərayɛl, bə̀kɔ́n yil ǹ zhe: «À sɔ́má y shèè Cinu yé né, À Yi rí bə kɔn rɛ́ tɛ̀bɛ́ à mə̌ ǹdə́ rɛ mɔ́ nɛ yé.» ²⁸ Ǹ nə yə̀l nà, ǹ nə gwẽ̌ yə̀ nyɛ̀ɛ̀ myɛ nà? Cinu wɔ́ Yi rí tɛ̀bɛ́ rə̀ j'â ŋwɛ́nɛ́ twéé twéé yilə, ń nə́ ń ce lũ w cə-yala gakó yàl nɛ́. Ń jàn rɛ́ t'â gɛ, ń tá ń lyɛ̀ɛ̀ myɛ yé; kɔn tɛ̀nɛ́ bə̀ la m'e lwar ń surhə né gə́ wɔ́ nɛ́ ma yé, ²⁹ ń nə́ ń pɛ jàn lò mó mɔ̀bɔ́ ń bə jàn zhe mó ne, ń nə́ ń súlí cìn-pyɔ́nɔ́ lò mó mɔ̀bɔ́ ń bə jɛ̀ mɔ́ nɛ. ³⁰ Ebɔ́-dàlá bɛ́ jàn rɛ́ n'ê gɛ, e jà bə̀ n'ê lyɛ̀ɛ̀, lyì bí byɛ̀bɛ́ bə̀ yě kɔn du bə̀ dwã bɛ́ cìcì mu myɛ j'â búl bə̀ n'ê mà bə̀ nə̀rh zhə̀n zhə̀nà! ³¹ Sə lyì bí byɛ̀bɛ́ bə̀ n'ê dɛ̃̀ kɔn Cinu sõ mó k'â n'ê nɛ jàn-dùl: bə̀ n'ê zɛ̃̀ ǹdə ényə̌lsɛ ta, bə̀ j'â n'ê dùrə̀, e jà bə̀ t'â lyɛ̀ɛ̀ yé, bə̀ n'ê zhə̀l bə̀ la, e jà bə̀ jàn rɛ́ t'â bɔ̀ yé!