¹ Yi rí rə̀myɛ́ mɔ́ wẽ́, Babyəlɔnɛ pyɔ̌ Myərɔdaakɛ-Baladã, Baladã byǐ mú, twĩ̀ bə b'e pə sábá ǹdə́ pansɛ Ezəcaasɛ nɛ, bə̀ ń yà ń nyɛ̀ɛ̀ ń gə́ yà ń bə jɛ̀ mɔ́ e súlí ń wárh mɔ́ nyí rí. ² Ezəcaasɛ wu yàl nyàn tùntúmə́ bé twírí y yilə, n zɛ̃̀ n ce bə byɛ́lɛ́ jààsɛ́ shɛ̀bɛ́ ń yà ń nə́ ń cĩ́ sə̀byǐ mú ǹdə́ sánə́má mɔ́, e súlí nǔrh sə̀ lwẽ́ nã́nyǝ̀nyɛ̀lɛ́ mɔ́ ǹdə́ ń búlə́ wẽ̀ ré gakó sə̀ wẽ́ mó; e súlí wẽ̀ ré tɛ̀bɛ́ gakó rə̀ y'à wɔ ń nə̀cɛ̀ndɛ́ jì y wẽ́ mó. Kaka tɛ̀nɛ́ ń kɛ̀lɛ́ y wẽ́ e súlí ń gə́ cǐ má nyí rí wẽ́ Ezəcaasɛ yə̀ be byili yé. ³ Nyì-zwennə Ezəyi zɛ̃̀ n bə̀ n nə Ezəcaasɛ, n bwə̀rh mo n wɔ̀: «Bə̀kɔ́n lyì bí byɛ̀bɛ́ wə̀l mó, e súlí myɛ wɔ́ yẽ̀ bə̀ shí ní?» Ezəcaasɛ lyár n wɔ̀: «Bə̀ shí tənà kɛ̀bɛ́ è nyɛ wẽ́, Babyəlɔnɛ gaga, bə b'à sõ.» ⁴ Ezəyi zɛ̃̀ n bwə̀rh mo n wɔ̀: «Bə̀kɔ́n bə̀ nɔ ǹ sõ jù wə?» Ezəcaasɛ lyár n wɔ̀: «Bə̀ nɔ kɔn rɛ́ tɛ̀bɛ́ gakó rə̀ wɔ à sõ jù w mú: à nə̀cɛ̀ndɛ́ rə̀dù ga tɛ̀nɛ́ à yə̀ be byili yé.» ⁵ Ezəyi wɔ̀ Ezəcaasɛ nɛ: «Cili lũ gakó Cinu mú nyí rí: ⁶ Nyǐ dɛ̃ ŋwɛ́nɛ́ rə̀ bànà, bə̀ m'a pwà kɔn rɛ́ tɛ̀bɛ́ gakó rə̀ ŋwɛ́nɛ́ ǹ sõ jù w mú, e súlí kɔn rɛ́ tɛ̀bɛ́ gakó ǹ nàmbala bɛ́ pyà bə cĩ́ dɛ̃̌ kɔn b'e yí zà mɔ́ gakó, bə m'e vò Babyəlɔnɛ; kaka myɛ t'â la dǎl yé, Cinu ń wə̀l re. ⁷ Bə̀ m'a pwà ǹ byǎ nánzhəzhɔ̌, byɛ̀bɛ́ bə̀ shí ǹ wẽ́, ǹmyɛ́ cìcì lùl mú: bə̀ m'a ce bə jǐrh tum-byǎ Babyəlɔnɛ pyɔ̌-kɛ̀lɛ́ y wẽ́.» ⁸ Ezəcaasɛ wɔ̀ Ezəyi ni: «Cinu nyí rí ǹ cĩ́ ni mú nyɛ̀.» Ń yà ń nə́ ń wə̀l ń cìn ni: «À gə j'â gwẽ̌ ŋwɛ́nɛ́ yi ní, nə́ m'ǎ jòm yə̀-zùlə́ wẽ́, wu-zɛ̃̀ɛ̃́ t'â la nə́ba zal yé.»