¹ Dwã nɛ́ nə̀myɛ́ mɔ́ wẽ́, Ezəcaasɛ tú n bə̀ n tu címí sə ń yà ń dǎl námpɔ́lɛ́ sə n cì. Amɔɔsɛ byǐ, nyì-zwennə Ezəyi zɛ̃̀ n bə̀ n nə mɔ, n wɔ̀ mɔ: «Nyǐ Cinu nyí rí: Pə ǹ nyə́ né ǹ kɛ̀lɛ́ y lyì bí ni, nyǐ ǹ m'ǎ cì, ǹ tá ǹ la bwəl yé!» ² Ezəcaasɛ pyìrhí ń yé n mə n zǎ byílí y ni, n ce Cinu. ³ Ń ywə̀lə̀: «Cinu, à n'â lwə̀l mó bə̀ ǹ lyǐrh b'à yàl wu-põ̀ ǹdə́ zhə̀n cə́bal ǹdə́ mɔ́, à súlí a wɛ̀rhɛ́ kɔn rɛ́ tɛ̀bɛ́ rə̀ càn ǹ yírh wə.» Ezəcaasɛ kúrh n bobwere yə́-nàná tɛ̃́. ⁴ Cinu zɔ̀m ǹdə́ Ezəyi, n wɔ̀: ⁵ «Zhəl ń vò ń wɔ̀ Ezəcaasɛ nɛ: Nyǐ Cinu ǹ nàmbal Dəvyidi Yi rí nyí rí: À nyɛ̀ɛ̀ ǹ lwə̌l mó, a súlí a nə ǹ yə́-nàná nɛ́. À m'a súlí byinə shí ǹdə́ nə̀nu ǹ byinə né yó wə. ⁶ À m'a zwẽ ǹmyɛ́ ǹdə́ cɔ w kɔ̀bɔ́ Ashəri pyɔ̌ mɔ́ jɔ̃̀ wa; à m'a yìlì cɔ w kɔ̀bɔ́. ⁷ Sə nyǐ kɔn tɛ̀bɛ́ rə̀ m'a shí Cinu sõ rə yə̀ myɔrhɔ bə̀ Cinu la kɔn rɛ́ tɛ̀bɛ́ ń wə̀l mó pyǐrh mú: ⁸ Nyǐ à m'a ce ywə́l mó mə̀ só tɛ̃́ Akaazɛ nə̀rh-cṹ-byílsí yó mó k'a twə̀r mə bə̀ mə̀ kwã, kɔn myɛrhɛ nə̀rh-cṹ-byílsi shíyə́.» Sə zhə̀n ga, nə̀nyɔ́nɔ́ w k'a kwɛ̃̀ o b'ò kwã nə̀rh-cṹ-byílsí yó, kɔn myɛrhɛ nə̀rh-cṹ-byílsi shí yə́, shɛ̀bɛ́ ò y'à só tɛ̃́ sə̀ yó mó. ⁹ Zhəda pyɔ̌ Ezəcaasɛ nwə̃́ y ń ju, ń gə́ tú n wárh n zɛ̃̀ ń címí y w kwã mɔ́. ¹⁰ Àmyɛ́ wə̀lə̀: wɔ́ à gə tú à n'â nɛ à nyǔ mú nyàn rɛ́ yi ní mú, à mə̌ s'a zhǐr. Bə̀ ce à zhǐ cúlú bwə̀ə̀lé nyí ní, à byinə né nyɛ̀bɛ́ nə̀ dàl mɔ́ yilə. ¹¹ À wə̀lə̀: à j'â k'â t'â la Cinu nɔ gaga lyì-nyìrh cɛ y yó yé. À k'â t'â la ŋwɔ̀nɔ́ a nə numbyíní yé-zwã̌, tənà y kɛ̀bɛ́ kɔn gakó n'ê zhì è wẽ́ mó lyì bí cəcəl w yé. ¹² Bə̀ vwǎrh à nyǔ mú ǹdə́ jàn, bə zə mɔ bə m'e zhǐr à nyí ni bə lyɛ̃ bə vò pyépyé, ǹdə vwã̌-ènɔ̀n kòrhó ta. À pyípyílí à nyǔ mú a yí mə̀ yó-gùrə́ yə́, ǹdə sɔ́rá sɔ̀rnà gə́ ya n pyípyílí ń gã̀-jɛ̃̀ nɛ́, tə́tɔ̃̌ nyínsí sə̀ y'à zhílí sə̀ dwã bɛ́ nɛ mɔ́ sɔ́wá. E zhì nəkɔkɔ́lɛ́ kɔn la m'e yí cəcɛ̃ y mɔ́, ǹdə́ ǹ zhɛ̀ ǹd'â yò wə́. ¹³ Cɛ y m'à la m'e lə́ mɔ́, ǹd'â jǐrh kɔn nánfò. Ń bɔbwɛlɛ à kúr rí gakó ǹdə bɔrɔ ta. E zhì nəkɔkɔ́lɛ́ kɔn la m'e yí cəcɛ̃ y mɔ́ ǹdə́ ǹ zhɛ̀ ǹd'â yò wə́. ¹⁴ à n'â cəcɛ̃ ǹdə jíjílí ta ráá ǹdə kúmí námpɔ́lɛ́ ta, à n'â kúrh ǹdə épwèné ta. À yírhə́ né nə̀ pyǎ ǹ yó mó jàn rɛ́ n'ê gɛ: Cinu, kɔn rɛ́ du à jàn, ce nyí à kwã nɛ́. ¹⁵ Bə̀kɔ́n à m'a wɔ̀ sə n mə n lyár nɛ, è gə́ wɔ́ ńmyɛ̌ ń nə́ ń twĩ̀ mú yilə? À m'à j'â n'â nwɛ̀nɛ̀ à byinə né gakó yó wə́, ǹdə́ wu-zhùlù nánfɔ̀lɔ̀ w kɔ̀bɔ́ ò zhe ne mó. ¹⁶ «Cinu ŋwɛ́nɛ́ ń lyì bí yala nɛ: bə̀ m'a zə myə̌l, sə ń shíshìrhə́ y m'a ce kɔn tɛ̀bɛ́ gakó rə̀ wɔ bə̀ wẽ́ zə nyǔ», rə̀myɛ́ ce myɛ ǹ m'ǎ k'á wárh nɛ ń súlí ń ce a k'a zə myə̌l. ¹⁷ À wu-zhùlù nánfɔ̀lɔ̀ w jǐrh cìn-nɛrɛ́. Ǹ swéné à myə̌l ré, mùnì ga à bə̀k'a tu gɔ́rɔ́ nánlyilyùmú w w yé, ń zɛ̃̀ ń dul à yə̀-bəlwàálɛ́ gakó ǹ cã̌-kwã nɛ́. ¹⁸ Bə̀ cúlú w wàr ò m'a cèrhé mó yé, Cu mú myɛ wàr mə̀ m'a nún mú yé. Lyì bí byɛ̀bɛ́ bə̀ wɔ lú-bɔ̀l mɔ́ w mɔ́, k'ê t'â dɛ̃̀ kaka ǹ wu-bɔ̀nɔ̀ w shò kwã yé. ¹⁹ Lò mó mɔ̀bɔ́ ń yírhə́ ŋwɛ́nɛ́ mɔ́, ńmyɛ̌ dúdú ń nə́ ń cèrhé mó, ǹdə àmyɛ́ ta zà mɔ́. Da mɔ́ mà n ce ń byǎ bɛ́ lwar ǹ wu-bɔ̀nɔ̀ w párá. ²⁰ Cinu ǹ gə́ vwǎrh nɛ mɔ́ ce, nə́ m'ǎ ce nə́ dɛ̀lɛ̀ wẽ̀ ré cələ du, nə́ nyǔ mú dwã nɛ́ gakó, Cinu jì y wẽ́. ²¹ Ezəyi wɔ̀: «Zə-na épyìlə́ ŋwɛ̀mɛ́ á m'á bà! sə bə cĩ́ y pyɔ̌ mɔ́ yala nɛ́ gə́ mà pə́pàárɛ́ mə̀gã̌ mɔ́ yó.» Pyɔ̌ mɔ́ já n wárh. ²² Ezəcaasɛ zɛ̃̀ n bwə̀rh n wɔ̀: «Myɔrhɔ kɔ̌ dɛnnɛ à m'a tó né a lwar b'à m'a ŋwɛ̀nɛ́ a vò Cinu jì y wẽ́?»