¹ Pyɔ̌ Ezəcaasɛ gə́ cili bə̀ nyí rí kwã nɛ́, ń kǎr ń gàndɛ́, n kwè yóló-gɔ̀nɔ̀ n zù, n zɛ̃̀ n vò n zù Cinu jì y wẽ́. ² Rə̀myɛ́ yi ní, n twĩ̀ pyɔ̌-kɛ̀lɛ́ y yó-cə́bal Elyəcim ǹdə́ sá-kanna Shəbəna e súlí vwĩ̀-zwə́lnə bé byɛ̀bɛ́ bə̀ y'à wɔ́ náncɛrh mɔ́, Amɔɔsɛ byǐ Ezəyi, nyì-zwennə mó sõ, bə̀ gakó y'à zù ywə́ə́le gàndɛ, ³ 3 bə̀ bə̀ zhəl bə wɔ̀ mɔ: «Nyǐ Ezəcaasɛ nyí rí: ‹Zà dɛ̃ rɛ́ wɔ́ wu-zhùlù ǹdə́ còrhò-tum e súlí cìzhìl dɛ̃. Byǎ bɛ́ lul dɛ̃ rɛ́ yúwə́, sə jàn tɛ̀nɛ́ bə̀ la m'e pwɛ̃̌ bə lù bi yé! ⁴ Dədɛ̌nnɛ, Cinu ǹ Yi rí mà n nyɛ̀ɛ̀ pyɔ̌ sanna mɔ́ zɔ̀mà nɛ́ nyɛ̀bɛ́ gakó, ń yó-cə́bal, Ashəri pyɔ̌ mɔ́, twĩ̀ n bə̀ n zɔ̀m n mə n tùrh Yi Nã́nyì rí mú, sə ń mà n pɔ̃ còrhò-tum zɔ̀mà nɛ́ nyɛ̀bɛ́ Cinu ǹ Yi rí la nyɔ̀ɔ̀ mɔ́ yilə! Lwə̌l Yi, dwí rí lyì bí kùr ré rə̀ dàl mɔ́ yilə›.» ⁵ Pyɔ̌ Ezəcaasɛ tùntúmə́ bé gə́ zhə̀l bə yí Ezəyi sõ yi ní, ⁶ Ezəyi wə̀l be: «Zhəl-nə á vò á wɔ̀ á yó-cə́bal mɔ́ nɛ: Nyǐ Cinu nyí rí: Bə̀k'á dùr ywẽ zɔ̀mà nɛ́ nyɛ̀bɛ́ ǹ nyɛ̀ɛ̀ mɔ́, zɔ̀mà nɛ́ nyɛ̀bɛ́ Ashəri pyɔ̌ mɔ́ tùntùnnə bé súlí bə m'e tùrh ni mú yil yé! ⁷ À m'a ce n tó kɔn rə̀dù ń la nyɔ̀ɔ̀ mɔ́ dɛnnɛ n kwɛ̃̀ n vò jè. Sə à m'a ce bə gu mu ǹdə́ búlə́ shù ń cìcì tənà y wẽ́.» ⁸ Ashəri pyɔ̌ mɔ́ sanna mɔ́ kwɛ̃̀ n bə̀ n nə Ashəri pyɔ̌ mɔ́ ǹdə́ ń yà ń nə́ ń bwí búlə́ ǹdə́ Lyəbəna. Ń yà ń nyɛ̀ɛ̀ bə̀ pyɔ̌ mɔ́ yà ń zhǐr Ləciishi ní, ⁹ bə̀ gə́ y'à cĩ́ mu nyí Nəbyi pyɔ̌ Tərəka shò kwã nɛ́ bə wɔ̀: «Nyǐ ń tɛnɛ ń bàn bú ǹdə́ mɔ́!» yi ní. Ashəri pyɔ̌ mɔ́ gə́ nyɛ̀ɛ̀ rə̀myɛ́ kwã, ń yà ń twĩ̀ tùntúmə́ Ezəcaasɛ sõ, ń wə̀l be: ¹⁰ «Á m'ǎ cĩ́ nyí Zhəda pyɔ̌ Ezəcaasɛ nɛ á wɔ̀: Bə̀ ǹ Yi rí tɛ̀bɛ́ ǹ zhe rə̀ zhə̀n mɔ́ bə̀k'a jə́jɛ̀nɛ́ mɔ́ rə̀ m'ê zhe: ‹Zhərəzalɛm t'â la Ashəri pyɔ̌ mɔ́ jɔ̃̀ w tu yé.› ¹¹ Ǹmyɛ́ cìcì mú lwar kɔn rɛ́ tɛ̀bɛ́ Ashəri pyǎ bɛ́ wɛ̀rhɛ́ tənèsé shɛ̀bɛ́ gakó bə̀ cɔ̀ lyə́m lyə́m mó ne mó, e zɛ̃̀ è nə wɔ́ ǹmyɛ́ ǹ m'ǎ lú! ¹² Tənèsé shɛ̀bɛ́ à nàmbala bɛ́ cɔ̀ mɔ́ yə né nə zwẽ Gɔzã ǹdə́ Aran ǹdə́ Erɛsɛɛfɛ cɛmɛ nɛ́ e súlí Edɛn dwí rí rə̀ y'à wɔ Təlasaarɛ nɛ́ mɔ́? ¹³ Yẽ̀ Amaatɛ pyɔ̌ mɔ́ ǹdə́ Arəpaadɛ pyɔ̌ mɔ́ ǹdə́ Ləyiiri pyɔ̌ mɔ́ ǹdə́ Səfərəvəyim ǹdə́ Yɛna e súlí Ava pyǎ bɛ́ nə ŋwɛ́nɛ́?» ¹⁴ Ezəcaasɛ zwẽ sɛ́bɛ́ rɛ́ Ashəri pyɔ̌ mɔ́ tùntúmə́ bé jɔ̃̀ wa, n kàrmə̀ rɛ, n zɛ̃̀ n jì n vò Cinu jì y wẽ́. N púr sɛ́bɛ́ rɛ́ n cĩ́ tɛ̃́ Cinu yé né, ¹⁵ Ń lwə̀l Cinu ni ń mə́ ń zhe: ¹⁶ «Lũ gakó Cinu, Esərayɛl Yi, ǹmyɛ́ mɔ̀bɔ́ ǹ jě ǹ pyɛ̀lɛ̀ rɛ́ də̀gwã́ y yó shərəbɛ̃́bá yó w mó, ǹ dúdú ǹ wɔ́ lũ w pyə̀-tənèsé púlə́púlə́ Yi. Wɔ́ ǹmyɛ́ ǹ wɛ̀rhɛ́ dɛ̃̌ ǹdə́ cɛ yá. ¹⁷ Cinu, pyèrhè ǹ zhɛ̃̌ ń cili! Cinu, púr ǹ yírhə́ ń nyǐ! Cili Shənəkəriibi ń twĩ̀ bə b'e tùrh Yi nã́nyì rí zɔ̀mà nɛ́ gakó! ¹⁸ Cinu, Ashəri pyǎ bɛ́ ce dwə́ ǹdə́ nə̀ tənèsé ga jé tɛ̃́ zhə̀nà. ¹⁹ Bə̀ ju nə̀ yə né myǐn, sə yə né nə̀myɛ́ mɔ́ y'à də̀ Yi yé; nə̀ y'à wɔ́ kɔn rɛ́ tɛ̀bɛ́ numbyíní wɛ̀rhɛ́ ǹd'ê jɛ̀rh, dɔ̌ ǹdə́ nə́kulu wẽ̀, sə Ashəri pyǎ bɛ́ cɔ̀ rɛ. ²⁰ Sə èlǎsɛ̃́ ǹmyɛ́ Cinu nə́ Yi, zwẽ nə́ba ń jɔ̃̀ wa, lũ w pyə̀-tənèsé púlə́púlə́ m'a zɛ̃̀ sə lwar bə̀ wɔ́ ǹmyɛ́ dúdú ǹ wɔ́ Cinu mú.» ²¹ 21 Amɔɔsɛ byǐ Ezəyi twĩ̀ bə vò bə wɔ̀ Ezəcaasɛ nɛ: «Nyǐ Cinu, Esərayɛl Yi rí tɛ̀bɛ́ ǹ lwə̀l re ǹ lwə̌l mó Ashəri pyɔ̌ Shənəkəriibi shò kwã nɛ́ mɔ́, nyí rí: ²² Nyǐ zɔ̀mɛ̀ rɛ́ Cinu nə́ ń zɔ̀m ń shò kwã nɛ́ mɔ́: Nyǐ kɛ̃-byǐ kɛ̀bɛ́ è yə̀l bal pár mɔ́, Səyɔ̃ bə̀kɔ́ mɔ́, j'â bə mɔ́ nɛ è yírh w yé, è n'ê mɔ̀n mɔ́. è n'ê zhízhí è yó ǹ cã̌ kwã nɛ́, Zhərəzalɛm bə̀kɔ́ mɔ́. ²³ Mɔ̌ lò ǹ tùrh ń súlí ń fulsi mú? Mɔ̌ lò ǹ zɔ̀m ń bya mɔ́, ń súlí ń nyǐ ń mùrì mú? Wɔ́ Esərayɛl Yi rí tɛ̀bɛ́ rə̀ bə dõ zhe mó. ²⁴ Ǹ tó ǹ tùntúmə́ bé dɛnnɛ ń tùrh Cinu. Ǹ yòwə̀: ‹À zə à búlə́ eshə-vwə̃tur nánjə̀jóló w a jì dɛ̃̌ pyàr rɛ́ yə́-pǎlsɛ́ wa, ǹdə́ Lyəbã jààsɛ́ shɛ̀bɛ́ sə̀ wẽ́ zhəl zum mú wẽ́, à m'a kà è sɛ́ɛ́dərɛbá shɛ̀bɛ́ sə̀ dwàl du sə̀ dwã bɛ́ mɔ́ ǹdə́ è səpərɛ́ɛ́sɛbá shɛ̀bɛ́ sə̀ càn du sə̀ dwã bɛ́ mɔ́, a súlí a yí è shòò jàà y kɛ̀bɛ́ è wɔ́ dɛ̃̌dɛ̃̌ du è dwã bɛ́ mɔ́ wẽ́, è tú w nánfɔ̀lɔ̀ wá. ²⁵ À kù zhǐlse a súlí a nyɔ̀ nàná, à ce Ezhibti bù-fwɛ̀lɛ̀ y jɛ̀sɛ́ gakó kù à nə̀rh kùr wə.› ²⁶ Pyɔ̌ Shənəkəriibi, ǹ yə̀l b'à dámǎ a tɛnɛ rə̀myɛ́ mɔ́ shãã ga a cĩ́ nà, ǹ yə̀l b'à tɛnɛ rɛ, kùr-ju yi ní ga a cĩ́ nà? Èlǎsɛ̃́ mɔ́, à zɛ̃̀ à n'â pyìrh ri: wɔ́ ǹmyɛ́ ǹ mə̌ sə́ ce cɛmɛ nɛ́ nyɛ̀bɛ́ bə̀ lù byílsi dɛ̃̌dɛ̃̌ bə m'e kə́kɛ́lɛ́ nɛ mɔ́ jǐrh nə́kul-púlə́. ²⁷ Nə̀ lyì bí jɛ̀sɛ́ wɔ́ ná-èkǔlsi, bə̀ wun gɔwa, cìzhìl zhe be; bə̀ nyɛ̌ ǹdə cɛsɛ́ gɔ w ta, e súlí ǹdə gɔ w dwí rí tɛ̀bɛ́ rə̀ n'ê lyĩ rə̀ pyìlì cɛ yá, nánlyɔ̀ w ta, bə̀ nyɛ̌ ǹdə gɔ w kɔ̀bɔ́ ò n'ô lyĩ lyarha nɛ́ wa, ǹdə́ gɔ sõ mó, ò gwẽ̌ yə̀ byìl o yí mú ta. ²⁸ À yě ǹ gə́ wɔ́ nɛ́ mɔ́ gakó: ǹ gə jě tɛ̃́, ǹ gə zɛ̃̀ ń du pwẽ̀ ne, ǹ gə zù jù wə, ǹ lyim gə tú rə̀ zɛ̃̀ rə̀ n'ê yì ni dɛ̃́dɛ̃́, ń zɛ̃̀ ǹ nə́ ǹ pə́pǎ yi ní myɛ à yě re. ²⁹ Ǹ lyim gə́ zɛ̃̀ rə̀ n'ê yì ni dɛ̃́dɛ̃́ ń zɛ̃̀ ń pə́pǎ mɔ́ ce, à zhã̌ myɛ j'a nyɛ̀ɛ̀ ǹ cìn-byilu zɔ̀mà nɛ́ mɔ́ ce, à m'a ce cìbyǔ ǹ myə̌l ré ne, a súlí a ce eshã-nyí-cɔ̀bɔ́ ǹ nyú wə: à m'a zə mɔ́ ń kwè sɔ́má y kɛ̀bɛ́ ǹ tó ń mə́ bə̀ mɔ́ ń mə́ kwɛ̃̀. ³⁰ Sə kɔn rɛ́ tɛ̀bɛ́ m'a yə̀ myɔrhɔ ǹ yilə: dùl byin rí bə̀ m'a jí bə̀lɛ́ y kɛ̀bɛ́ è lyĩ tɛ̃́ è cìn ni mú; byín rí tɛ̀bɛ́ rə̀ pú mú myɛ, bə̀ m'a jí bə̀lɛ́ y kɛ̀bɛ́ è lyĩ tɛ̃́ è cìn ni mú; sə byinə nə̀tɔ̀ nyǎn rɛ́, á m'ǎ dù á bə̀lɛ́ y á kwar, á súlí á zhele də̀vɛ̃́-cèmé, á jí nə̀ byǎ bɛ́. ³¹ Sə kɔn dɛ̀bɛ́ rə̀ lú Zhəda kɛ̀lɛ́ y wẽ́ mó, kɔn rɛ́ tɛ̀bɛ́ bə̀ yẽ̌ mó, m'a k'a tò nə̀rh sə zù tɛ̃́, sə rə̀ m'a ce byǎ rə̀ dɛ̃̌ sõ mó, ³² bə̀ lyì bí bə̀ dàl mɔ́ kùr ré m'a du tɛ̃́ Zhərəzalɛm nɛ́, lyì bí byɛ̀bɛ́ bə̀ lú mú m'a shí Səyɔ̃ pyɔ̀ w w bə du. Wɔ́ Cinu sónó nánfɔ̀lɔ̀ wá, ò la rə̀myɛ́ mɔ́ wɔ̀rhɔ́.» ³³ Wɔ́ rə̀myɛ́ rə̀ ce, nyǐ Cinu nyí rí Ashəri pyɔ̌ mɔ́ shò kwã nɛ́: «Ń tá ń la cɔ w kɔ̀bɔ́ wẽ́ zú yé, ń tá ń la cama tɔ ò wẽ́ yé, ń tá ń la nə̀kwə̀r zə n mə n bú ǹdə́ w yé, ń tá ń la bo-púl cṹ n mə n bú ǹdə́ w yé. ³⁴ Sɔ́má y kɛ̀bɛ́ ń kwè n mə n bə̀ mɔ́, èmyɛ́ ń mà n ká n kwè n mə n kwɛ̃̀; ń tá ń la cɔ w kɔ̀bɔ́ wẽ́ zú yé, wɔ́ Cinu nyí rí. ³⁵ À m'a yìlì cɔ w kɔ̀bɔ́ sə à m'a zwẽ wə, à cìn yilə, ǹd'â tùntùnnə Dəvyidi yilə.» ³⁶ Cinu màlɛ́ka y j'a du e gu nunə mɔ̀ɔ̀rhɛ̀ zɔ̌m ǹdə́ shə́-lyɛlɛ ǹdə́ rə̀nu (185 000) Ashəri lyì bí zulə́ jàà y wẽ́. Bə̀ gə́ zɛ̃̀ nəkɔkɔ́lɛ́ y bə̀ púrí wɔ́ cùùri dúdú rə̀ y'à pyě tɛ̃́. ³⁷ Ashəri pyɔ̌ Shənəkəriibi já n zɛ̃̀ n yẽ̌ ń zulə́ jàà y nɛ; n kwɛ̃̀ n vò Niniivi, n já n mɛ̃ gàà. ³⁸ Dɛ̃ rə̀dù, ń yà ń nə́ ń cèrhé ń yi Nəsərɔɔkɛ, rə̀ sõ jù wə; rə̀myɛ́ yi ní, ń byǎ bə̀lyè, Adəraməlɛɛkɛ ǹdə́ Sarəsɛɛrɛ zə búlə́ shù bə zò mo bə gu, bə zɛ̃̀ bə dùr bə vò Araraatɛ tənà y wẽ́. Wɔ́ ń byǐ dõ, Asaradɔ̃ ń yàl pyɔ̌ ń jàà wa.