¹ Ezəcaasɛ pyɛ̀lɛ̀ rɛ́ jú byinə shí ǹdə́ nə̀na nyǎn rɛ́, Ashəri pyɔ̌ Shənəkəriibi zhə̀l n bú ǹdə́ Zhəda cɛmɛ nɛ́ nə̀ kə́kɛ́lɛ́ ǹdə́ byíl-fwàlsɛ mɔ́ gakó, n zwẽ ne n cìní. ² Ashəri pyɔ̌ mɔ́ zhì Ləciishi n twĩ̀ ń sanna mɔ́ Zhərəzalɛm nɛ́ pyɔ̌ Ezəcaasɛ sõ, ǹdə́ shə̀dɛ́ɛ́sɛ nánzhəzhɔ̌. Ń sanna mɔ́ yí n zhì gɔ́rɔ́ w kɔ̀bɔ́ nɛ̃̌ mɔ́ n'ê tó mə̀ m'ê zhə̀l dɛ̃̌-sõ póló w wẽ́ mó nyí ni, lyì bí byɛ̀bɛ́ bə̀ n'ê shɛ̀rh gàndɛ́ mɔ́ cɛ y sɔ́má y yó. ³ Yələca byǐ Elyəcim ń yà ń wɔ́ pyɔ̌-kɛ̀lɛ́ y yó-cə́bal mɔ́, ǹdə́ sá-kanna Shəbəna e súlí Asaafɛ byǐ Yɔwa, pyɔ̌ mɔ́ nyì-zwennə mó du bə b'e jəl mo. ⁴ Pyɔ̌ mɔ́ sanna mɔ́ zɛ̃̀ n wɔ̀ bɛ: «Wál-na Ezəcaasɛ nɛ: Nyǐ Pyɔ̌ Nánfɔ̀lɔ̀ wá, Ashəri pyɔ̌ mɔ́ nyí rí: Bə̀kɔ́n zhə̀n ǹ zhe èta mɔ́? ⁵ Ǹ wə̀lə̀: ‹Nyì-zɔ̀mà dúdú wɔ̌ nə̀ zwẽ surhə ǹdə́ wu-jɔ̀ jàà búlə́ bú yilə!› Mɔ̌ lò zhə̀n ǹ zhe ń mə́ zɛ̃̀ ǹ kə́ ǹ tá ǹ zwẽ à nyí ni èlǎsɛ̃́? ⁶ Nyǐ ǹ zhe Ezhibti sɛ̃ɛ̃́ y zhə̀nà, Ezhibti kɛ̀bɛ́ è wɔ́ vwal-gɔ námbəkɔ́rɔ́ kɔ̀bɔ́, ò n'ô zwè lò mó mɔ̀bɔ́ ń zhí w mú jɛ̃̀ y ò kǎr y mɔ́: nyǐ wɔ́ èta Ezhibti pyɔ̌ Faraɔ̃ wɔ́ nɛ́ ǹdə́ lyì bí byɛ̀bɛ́ gakó bə̀ pɔ mɔ bə̀ zhə̀n rɛ́ mɔ́! ⁷ Dɛ̀ga ǹ m'ǎ wɔ̀ nɛ: ‹Nə́myɛ̌ wɔ́ Cinu nə́ Yi rí zhə̀n nə́ zhe!› Sə è nə də̀ ńmyɛ̌ vwə̃̀ né zwə́l jààsɛ́ ǹdə́ ń vwĩ̀-jùúlí Ezəcaasɛ ce rə jé tɛ̃́ n zɛ̃̀ n pə nyí Zhəda ǹdə́ Zhərəzalɛm lyì bí ni n wɔ̀: ‹È wɔ́ Zhərəzalɛm vwĩ̀-jùlú w yé né á mə̌ dwã sə á wùlì ní› nà? ⁸ È gə wɔ́ èta, sə́ gõ̀ à yó-cə́bal Ashəri pyɔ̌ mɔ́ ń nyì, àmyɛ́ m'a pɔ̃́ shəshərh mɔ̀ɔ̀rhɛ̀ rə̀lyè, ǹ gə b'ǎ nə eshə-jòmnə bə jòm se! ⁹ Etər ǹ m'ǎ tó né ń ce tənà y kə̀kàlà yó-cə́bal mɔ̀bɔ́ ń wɔ́ námpɔ́lɛ́ à yó-cə́bal tùntùnnə bé gakó wẽ́ mó myɛ cìcì twẽ̌ n vò ń kwã nɛ́, ǹmyɛ́ mɔ̀bɔ́ ǹ zhe Ezhibti zhə̀nà, búlə́ eshərh-vwə̃tur rí ǹdə́ eshə-jòmnə bé yilə? ¹⁰ È nə də̀ Cinu pùbùlə̀ à gaga mɔ́ m'a b'à la bú ǹdə́ tənà y kɛ̀bɛ́ a m'a cɔ̀ ya? Wɔ́ Cinu n wə̀l re ne: Zhəl ń vò ń bú ǹdə́ tənà y kɛ̀bɛ́ ń cɔ̀ ya.» ¹¹ Elyəcim ǹdə́ Shəbəna e súlí Yɔwa zɛ̃̀ bə wɔ̀ pyɔ̌ mɔ́ sanna mɔ́ nɛ: «Nə́ n'é lwə̀l mó bə̀ ǹ zɔ̌m Siri lyì bí zɔ̀mà nɛ́ ǹdə́ ǹ tùntùnnə bé bə̀ nə́ nyɛ̌ zɔ̀mà nɛ́ nə̀myɛ́ mɔ́; sə ǹ bə̀k'á zɔ̀m Zhide lyì bí zɔ̀mà nɛ́ yé, bə̀ lyì bí byɛ̀bɛ́ bə̀ wɔ byílí y yó mó n'ê cili.» ¹² Pyɔ̌ mɔ́ sanna mɔ́ lyár bɛ n wɔ̀: «Ǹ nə́ ǹ bùl bə̀ wɔ́ ǹmyɛ́ ǹdə́ ǹ yó-cə́bal mɔ́ dúdú ni à yó-cə́bal mɔ́ twĩ̀ ni b'à b'a cĩ́ zɔ̀mà nɛ́ nyɛ̀bɛ́ nà? È də̀ ǹdə́ lyì bí byɛ̀bɛ́ bə̀ jě dɛ̃̌ byílsí yó, bə̀ m'a ce bə jí bə̀ byə̀nə́ né bə súlí bə nyɔ̀ bə̀ shĩ mú, ǹdə ámyɛ ta mɔ́ nɛ nà?» ¹³ Pyɔ̌ mɔ́ sanna mɔ́ zɛ̃̀ n zhì dɛ̃̌, n bya dɛ̃̌dɛ̃̌ Zhide lyì bí zɔ̀mà nɛ́ wẽ́ n wɔ̀: «Cili-nə Pyɔ̌ Nánfɔ̀lɔ̀ wá, Ashəri pyɔ̌ mɔ́ nyí rí. ¹⁴ Nyǐ pyɔ̌ mɔ́ nyí rí: ‹Ezəcaasɛ bə̀ká n jə́jɛ̀nɛ́ ába yé, nyǐ ń wàr ába ń la zõ àmyɛ́ jɔ̃̀ w yé! ¹⁵ Ezəcaasɛ bə̀ká ń zhe: ‹Zhə̀n ga Cinu mà n zwẽ nə́ba; cɔ w kɔ̀bɔ́ t'â la Ashəri pyɔ̌ mɔ́ jɔ̃̀ w tu yé!, n mə n jə́jɛ̀nɛ́ ába á zə Cinu zhə̀n yé.› ¹⁶ Á bə̀k'á cili Ezəcaasɛ zɔ̀mà nɛ́ yé, cili-nə Ashəri pyɔ̌ mɔ́ nyí rí, ń nə́ ń ywə̀lə̀: Zə-na dɔbrɛ ǹdə́ nɛ, ce-nə á cìn à jɔ̃̀ wa, sə á yẽ̌ b'ǎ mə̀dù mə̀dù gakó mà n jí ń də̀vɛ̃́-cǒ byǎ bɛ́ ǹdə́ ń pyípyìlə́ né, n súlí n nyɔ̀ ń nɛ̃̌-gɔ́rɔ́ w ń kù mú nɛ̃̌ mɔ́, ¹⁷ á m'á dɛ̃̀ a b'a pwà ába a m'a vò tənà èdù è nyɛ̌ ǹdə á nyǎ y ta wẽ́, bə̀lɛ́ ǹdə́ də̀vɛ̃́ nándwə̃̀ tənà, búrú ǹdə́ də̀vɛ̃́-cèmé tənà. ¹⁸ Ezəcaasɛ bə̀ká n jə́jɛ̀nɛ́ ába ń mə́ ń zhe: ‹Cinu mà n zwẽ nə́ba yé!› Dwə́ né dwã bɛ́ yə né nə ŋwɛ̀nɛ́ nə zwẽ rə̀myɛ́ rə̀dù rə̀dù gakó tənà y Ashəri pyɔ̌ mɔ́ jɔ̃̀ wa? ¹⁹ Yẽ̀ Amaatɛ ǹdə́ Arəpaadɛ yə né ŋwɛ́nɛ́? Yẽ̀ Səfərəvəyim yə né ŋwɛ́nɛ́? Yə né nə̀myɛ́ ŋwɛ̀nɛ́ nə zwẽ Samarɛ à jɔ̃̀ wa? ²⁰ Tənèsé sə̀myɛ́ mɔ́ yə né gakó cəcəl wə, yi tɛ̌ rə̀ ŋwɛ̀nɛ́ rə zwẽ rə̀ tənà y à jɔ̃̀ wa, Cinu la mə n ŋwɛ̀nɛ́ n zwẽ Zhərəzalɛm àmyɛ́ jɔ̃̀ wa?› » ²¹ Lyì bí y'à jě bə̀ nyí cám, bə̀ t'â lyár mɔ bə̀ kaka yé, bə̀ pyɔ̌ mɔ́ yà ń pɔ bɛ nyí n wɔ̀: «Á bə̀k'á lyár mɔ yé!» ²² Yələca byǐ Elyəcim, pyɔ̌ mɔ́ kɛ̀lɛ́ y yó-cə́bal mɔ́ ǹdə́ sá-kanna Shəbəna e súlí pyɔ̌ mɔ́ nyì-zwennə mó, Asaafɛ byǐ Yɔwa kwɛ̃̀ bə bə̀ Ezəcaasɛ sõ ǹdə́ bə̀ gàndɛ́ rə̀ kǎr kǎr, bə cĩ́ mu Ashəri pyɔ̌ mɔ́ sanna mɔ́ zɔ̀mà nɛ́.