¹ Gɔ-elũ èpòlò w ǹdə́ cə-kùlì y ce rə̀ wu yə̀ nyàn, jə́ y fǔ ǹdə́ wu-nyɔ̃̀ s'e pùrh pùnə́, ² è j'a pyi ǹdə́ cɛsɛ́ pùnə́ né, è fwɛ̃́ s'e sa, s'e súlí e mà wu-nyɔ̃̀ búbwéése! Bə̀ pɔ y Lyəbã còrhó wə́, e súlí Karəmɛl ǹdə́ Sarɔ̃ cɛ̀nɛ̀ rɛ́, sə bə̀ m'a nə Cinu còrhó wə́, nə́ Yi rí cɛ̀nɛ̀ rɛ́. ³ Ce-nə jɛ̀sɛ́ shɛ̀bɛ́ sə̀ lyɛ̀ɛ̀ mɔ́ zə jàn, Cə-nə nə̀dwə́nə́ né nyɛ̀bɛ́ nə̀ n'ê jə́jɔ̌ mɔ́ zə nə yə̀ kẽkẽ. ⁴ Wál-na byɛ̀bɛ́ bə̀ wun n'ê zɛ̃̀ mɔ́ nɛ: Zə-na wu-jɔ̀, á bə̀k'á dùr ywẽ yé. Nyǐ á Yi rí: è wɔ́ jim cṹ dɛ̃ rə̀ bànà, còrhò-tum rí Yi la pɔ mɔ́. Rə̀ cìcì mú bàn ába vwǎrh. ⁵ Rə̀myɛ́ yó, lyìlyə̌r yírhə́ m'a nə nɛ́, sə sǝ̀bwààrhɛ̀ zhã̌ m'a pul. ⁶ Rə̀myɛ́ yó, gwànà m'a zɛ̃̀ e fwɛ̃́ ǹdə ta ta, sə nyì-bədɔ̃ɔ̃ nyí rí m'a mà wu-nyɔ̃̀ búbwéé. Nàná m'a púrh tɛ̃́ gɔ-elũ èpòlò w wə, sə nə̀-gwààlɛ̀ m'a du tɛ̃́ jə́ y wə. ⁷ Cɛ y kɛ̀bɛ́ è n'ê fúl mú m'a jǐrh bwǐ, nə̀-nyɛ̀lsɛ́ tənà y nyí rí m'a jǐrh jàà y kɛ̀bɛ́ nə̀-bùlsi n'ê púrh tɛ̃́ è wẽ́. Pwə́l mó mɔ̀bɔ́ gɔ-kùlí y n'ê pyẽ̀ mə̀ wẽ́ mó, gɔ w m'a jǐrh vwal-gɔ ǹdə́ pəpyəruusia. ⁸ Bə̀ m'a ji sɔ́má gàà mɔ́, sə bə̀ m'a byẽ̀ y bə̀ sɔ́má kɛ̀bɛ́ bə̀ pɔ Yi ni. Jìmdi cə́bal tá ń la y kǒ yé, bə̀ wɔ́ Cinu cìcì mú ń mà n yə̀ yé né, sə bǝ-surhǝ-zhe cìnǝ́ bé t'â bàn bə̀ cìn dũ̌ è yó yé. ⁹ Bə̀ t'â la bɔrɔ jəl è yó yé, gɔ-ku òdù ga myɛ t'â bàn è yó yé, bə̀ t'â la w nɛ́ nɔ yé. Lyì bí byɛ̀bɛ́ Cinu cǐ mú bə̀ m'a kwè sɔ́má y èmyɛ́ mɔ́. ¹⁰ Lyì bí byɛ̀bɛ́ Cinu zwẽ mó, m'a kwɛ̃̀ bə bà, bə̀ m'a yí Səyɔ̃ ǹdə́ wu-nyɔ̃̀ búbwéése. Bə̀ yésé m'a sú ǹdə́ wu-nyɔ̃̀ kɔ̀bɔ́ ò bə zhɔ̌ zhe! Fùwə́ nánfɔ̀lɔ̀ ǹdə́ wu-nyɔ̃̀ m'a b'e jəl be, wu-zhùlù ǹdə́ wɔ́wɔ́lɔ́ m'a jé tɛ̃́.