¹ Tənə̀rh, fwǎr-na á bwəlse á cili, dwə́, cili-nə cɛ̀nɛ̀. Cɛ y ǹdə́ kɔn rɛ́ tɛ̀bɛ́ gakó rə̀ wɔ è yó mó cili, lũ w ǹdə́ kɔn rɛ́ tɛ̀bɛ́ gakó rə̀ n'ê shí ò wẽ́ mó cili. ² Cinu lyim-cəcɔ̌ w zɛ̃̀ ò n'ô yì tənèsé gakó, ń lyim zɛ̃̀ rə̀ n'ê yì sə̀ shə̀dɛ́ɛ́sɛ́ púlə́púlə́ dɛ̃́dɛ̃́. Ń la sɛ gu lyə́m lyə́m, ń ce bə̀ la sɛ gurhu. ³ Bə̀ m'a ló sə̀ cùùrí tɛ̃́ rə gùlí dwã, sə̀ cùùrí lwẽ́ námmədɔ̀rhɔ̀ w m'a zɛ̃̀ tɛ̃́, sə sə̀ jal mɔ́ m'a dùr pyàr rɛ́ yó, ⁴ Dɛ̃̌-yi rí cã̀mə́sɔ̌sɛ́ gakó m'a dɛ̀rhɛ̀, bə̀ m'a pyípyílí dɛ̃̌-yi rí ǹdə sɛ́bɛ́ ta, sə rə̀ cã̀mə́sɔ̌sɛ́ gakó m'a ló tɛ̃́, ǹdə də̀vɛ̃́-cǒ vɔr rɛ́ gə́ n'ê lwé tɛ̃́ nɛ́ e súlí ǹdə épyìlú vɔr rɛ́ myɛ ta. Edɔm tənà y lyì bí gurhu nánfɔ̀lɔ̀ wá ⁵ Cinu wə̀lə̀: à búlə́ shù w j'a sú jal mɔ́ mə̀ zhe w dɛ̃̌-yi wə. Nyǐ ò j'â n'ô mà Edɔm, dwí rí tɛ̀bɛ́ à la gu lyə́m lyə́m mó. ⁶ Cinu búlə́ shù w j'a sú jal mɔ́, ò sú nwǐsí, ò sú pyì-bwǎlsɛ́ ǹdə́ bə̀-cǐlsí jal mɔ́, ò sú pyì-byesé ocə̀-pwala nɛ́ nwǐsí sə̀ dɛ̃ nɛ mɔ́, bə̀ bə̀ la vwĩ̀ zwə́l Bɔsəra nɛ́ Cinu yilə, bə̀ la lyì gurhu Edɔm tənà y wa. ⁷ Gɔ-nɛ̃ nɛ́ ǹdə́ nə̀-byesé e súlí eshə-byesé myɛ m'a tó be sə ló tɛ̃́: bə̀ tənà y m'a nyɔ̀ jal mɔ́ e sú mə zə ya, è shó w m'a sú nwǐsí. ⁸ È wɔ́ jim cṹ dɛ̃ Cinu yilə, bùrsi bǔr byin, ńmyɛ̌ ǹdə́ Səyɔ̃ yò w shò kwã nɛ́. ⁹ Edɔm tənà y nə̀-gwààlɛ́ m'a jǐrh malmal, è shó w jǐrh kwə́. Tənà y kɛ̀bɛ́ m'a jǐrh malmal mə̀ zhe myǐn, ¹⁰ mə̀ j'â t'â la cú nə̀nyɔ́nɔ́ ǹdə́ cəcɛ̃ ga myɛ yé: nyɛ̀rh m'à j'â n'ê dwi mə̀ wẽ́ sə̀ t'â zhɛ̀ yé: tənà y m'a j'a yə̀ pòpòlò, byin byin gakó, bə̀ k'ê t'â la è wẽ́ tó bə lyɛ̃ gaga yé. ¹¹ È m'a yə̀ èkwə̀l-byṹ ǹdə́ lúbə̀sɔwa ǹdə́ èkwə̀l-pwã̀ ǹdə́ kɔ̀rhɔ̀ jàà. Cinu mà n ce bə zə cə-fò nyíní y ǹdə́ kɔn rɛ́ tɛ̀bɛ́ rə̀ gakó gùlí dwã nɛ́ nyíní y bə m'e mɛrhɛ. ¹² Lyì-fwààlɛ́ k'ê t'â la pyɛ̀lɛ̀ pyɔ̌ nɛ pɔ gàà yé, bə̀ yó-cìnə́ gakó m'a jé tɛ̃́. ¹³ Ésɔ́ndɛ m'a lyĩ è jì-fwàlsɛ́ wẽ́, gɔ-bəlɔ̀lɔ́ ǹdə́ bàasɔ̌brɛ m'a lyĩ è jààsɛ́ shɛ̀bɛ́ bə̀ lù byíl-fwàlsɛ bə m'e kə́kɛ́lɛ́ mɔ́ wẽ́. È m'a yə̀ gɔ-kǔlse pwə́l, pyɔ̌-cə́lne jàà. ¹⁴ Gɔ-bwə̌lsé m'a jəl yǔlné gàà, sətyiiribá m'a bə̀ sə shɛ̀ dwã gàà. Wɔ́ gàà myɛ Liliiti mà n bə̀ n jòm né: ń mà n nə shìrhə́ gàà. ¹⁵ Wɔ́ gàà dɔm mɔ́ m'a nə mə̀ bɔ̀l mɔ́ nɛ́, mə ji mə̀ càlà nɛ́ nɛ́, mə zhǎ nɛ, mə yìlì ni nə lwərh né. Wɔ́ gàà myɛ zúmə́ né m'a bə̀ nə nə dwã nɛ́, nə̀myɛ́ rə̀dù rə̀dù gakó ǹdə́ mə̀ tó-dõ. Zúmǝ́ né shò kwã nɛ́ ¹⁶ Pyǎ-na Cinu sɛ́bɛ́ rɛ́ wẽ́, sə á kàrmə: «Nə̀myɛ́ rə̀dù ga t'â la kál yé, nə̀myɛ́ rə̀dù ga wu t'â la zã̀ɔ̃̀ rə̀ dõ shò kwã yé, bə̀ wɔ́ Cinu nyú w nyí rí shí ní, wɔ́ ńmyɛ̌ éshìrhə́ y è n'ê cĩ́ ni dwã yó. ¹⁷ Ńmyɛ̌ cìcì ń tɔ́ tántɛ́ɛ́ nə̀myɛ́ rə̀dù gakó yilə, ń jɛ̃̀ y zɛ̃̀ e zə mɔrhɔ nyíní y e m'e tə̀ nɛ tənà yá. Nə̀ m'a j'a cìní yə, gaga yilə, nə j'a mɛ̃ gàà, byin byin gakó.»