¹ Bə̀kɔ́n ná-dwí lwɛlɛ! ǹmyɛ́ mɔ̀bɔ́ ǹ nə́ ǹ cɔ̀ e jà bə̀ j'â yə̀ mɔ́ cɔ̀ mɔ́, ǹmyɛ́ mɔ̀bɔ́ ǹ nə́ ǹ jàr lyì bí, e jà bə̀ j'â gwẽ̌ yə̀ mɔ́ jàr mɔ́, Ǹ gə tú ǹ yẽ̌ cɔ̌ mɔ́ nɛ yi ní, bə̀ m'a cɔ̀ mɔ́, ǹ gə tú ǹ zhɛ̀ ǹdə́ jǎr e twĩ̀ mú kwã, bə̀ m'a jàr mɔ́. ² Cinu, dǔr nə́ nɔ̀nɔ̀! Nə́ n'é dɛ̃̀ kɔn ǹmyɛ́ sõ. Yál nə́ jàn rɛ́, nəkɔkɔ́lɛ́ gakó, ǹdə́ nə́ zwẽẽ́ zúzúnú yi ní. ³ Dwà y gə bya, dwə́ né y'a j'a zɛ̃̀ nə̀ n'ê dùrə̀, ǹ gə já ǹ shí tɛ̃́ ń zɛ̃̀, tənèsé j'â n'ê làà dwã nɛ. ⁴ Kɔn rɛ́ tɛ̀bɛ́ bə̀ pwà búlə́ né kwã mɔ́ n'ê cĩ́ dwã yó pul ǹdə səsɔ̀mɛ̀ gə́ y'a mɔ dwã nɛ cìlú ní, bə̀ n'ê jɛ̀rɛ̀ dwã rə̀ yó, ǹdə səsɔ̀mɛ̀ gə́ n'ê jɛ̀rɛ̀ dwã nɛ́. ⁵ Bə̀ n'ê cèrhé Cinu, bə̀ ń wɔ dɛ̃̌-yi rí wə, ń ce kɔn rɛ́ tɛ̀bɛ́ rə̀ mə̌ ǹdə́ cángá tũ̀twĩ̀ĩ̀ j'a sú Səyɔ̃. ⁶ Ǹ gə́ la ǹ cìn nɔ ǹ nyǔ mú dɛ̃ gakó mɔ́ m'a yə̀ vwǎrh mɔ́ nə̀cɛ̀ndɛ́. Lárma ǹdə́ Cinu pár lwar e súlí Cinu nyám: wɔ́ rə̀myɛ́ rə̀ m'a yə̀ ń nə̀cɛ̀ndɛ́. Wu-zhùlù ǹdə́ myǐn ⁷ Nyì wé: Arəyɛl lyì bí n'ê wǔrh sɔ́msɛ́ yó, yə̀-zùlə́ tùntúmə́ bé j'â n'ê kúrh dɛ̃́dɛ̃́. ⁸ Sɔ́msɛ́ pyě nánfò, lòlò kə́ ń tá ń kwè sə-byǐsí yé. Dɔbrɛ́ cɔ̀, bə̀ zhɔ̃̀ cɛmɛ nɛ́, bə̀ k'ê t'â nyàm lò də́-byǐ yé. ⁹ Tənà y wɔ cu wu-zhùlù wẽ́, e zɛ̃̀ è n'ê kùlə̀. Cìzhìl zhe Lyəbã, e zɛ̃̀ è n'ê pyɛ̀nɛ̀. Sarɔ̃ jǐrh ǹdə Arabaa ta. Bashã y ǹdə́ Karəmɛl n'ê jǐrh nánsə̀rh. ¹⁰ Nyǐ Cinu nyí rí: èlǎsɛ̃́ à m'a zɛ̃̀, èlǎsɛ̃́, à m'a zɛ̃̀ a zhì dɛ̃̌, èlǎsɛ̃́, bə̀ m'a cèrhé ne. ¹¹ Á n'á zal gɔ w bə̀ n'ê kwar vwàmá yil mú pǔrh, á k'á lù gɔ dwí dõ á shíshìrhə́ né wɔ́ myǐn mú mɔ̀bɔ́ mə̀ la ába jú mú. ¹² Bə̀ m'a zə tɔ̀mɔ̀ námpõ̀ bə m'e ji dwə́ né myǐn, nə̀ m'a yə̀ ǹdə sɔr tɛ̀bɛ́ bə̀ kà, rə̀ n'ê jí myǐn ta. ¹³ Ámyɛ̌ byɛ̀bɛ́ á wɔ pyépyé mó, cili-nə tɛ̀bɛ́ à wɛ̀rhɛ́ mɔ́; ámyɛ̌ byɛ̀bɛ́ á wɔ bwə́lbwə́l mó, lwar-na à jàn rɛ́ gə́ wɔ́ kɔn ná-dwí yilə. Mɔ̌ ń nə mà n lú bùrsí yé né? ¹⁴ Səyɔ̃ nɛ́, ywẽ nánfɔ̀lɔ̀ cĩ́ yə̀-bəlwàálɛ́ cìnə́ bé tɛ̃́, lyì-bəlwǎlsɛ́ j'â n'ê kəkə. Mɔ̌ lò ń wɔ nə́ cəcəl w ń mà n ŋwɛ̀nɛ́ n zhì dɛ̃̌? Nyǐ wɔ́ myǐn mə̀ j'â n'ê jí kɔn gakó. Mɔ̌ lò ń wɔ nə́ cəcəl w ń mà n ŋwɛ̀nɛ́ n zhì dɛ̃̌? Nyǐ wɔ́ myìn-cɔ̀lɔ̀ kɔ̀bɔ́ ò t'â cì gaga mɔ́ shɔ̃́. ¹⁵ Lò mó mɔ̀bɔ́ ń cìn-zɛlɛ́ y n'ê tó cángá tũ̀twĩ̀ĩ̀ rí ni, ń tá ń byə́byɛ́lɛ́ kɔn cã̌ ń gə nə́ ń zɔ̀m yi ní, ń nə́ ń cẽ nɛrɛ́ kɛ̀bɛ́ è nɔ ǹdə́ jɔ́ɔ́rɛ mɔ́ yò, ń nə́ ń yə́yá ń jɛ̀sɛ́, ń mə́ ń cẽ pɛnɛ́ zõ yò, ń nə́ ń shĩ ń zhã̌ nɛ́ mùnì ga ń bə̀ká n cili numbyíní gu yò zɔ̀mà nɛ́, ń nə́ ń pyi ń yírhə́ né, mùnì ga ń bə̀ká n nyǐ kɔn rɛ́ tɛ̀bɛ́ rə̀ wɔ́ lwɛlɛ mɔ́, ¹⁶ rə̀-ná-cí mú mà n jòm pyǎlsɛ́ yó, nə́kul-fwààlɛ tɛ̀bɛ́ bə̀ wàr bə̀ yí rə̀ nyí ni mú m'a yə̀ ń shòò jàà yá, bə̀ m'a nə búrú bə pɔ̃, nɛ̃̌ myɛ m'a nə mə pɔ̃. Bə̀ bú bə zwẽ Zhərazalɛm ¹⁷ Ǹ yírhə́ m'a nə pyɔ̌ mɔ́ ń cɛ̀nɛ̀ rɛ́ wẽ́, bə̀ m'a nə tənà y è jɛ́nɛ́ rɛ́ gakó wẽ́. ¹⁸ Ǹ m'ǎ lyǐrh kɔn rɛ́ tɛ̀bɛ́ rə̀ y'à n'ê zɛ̃̀ ǹ wu ni dɛ̃́dɛ̃́ mɔ́ yò: Yẽ̀ lò mó mɔ̀bɔ́ ń yà ń nə́ ń byɛ́lɛ́ mɔ́ ŋwɛ́nɛ́? Yẽ̀ lò mó mɔ̀bɔ́ ń yà ń nə́ ń pyà rə̀ yó w mó nə ŋwɛ́nɛ́? Yẽ̀ lò mó mɔ̀bɔ́ ń yà ń nə́ ń byɛ́lɛ́ jààsɛ́ sə̀ lù sə kə́kɛ́lɛ́ mɔ́ nə ŋwɛ́nɛ́? ¹⁹ Ǹ ká ǹ tá ǹ la dwí rí tɛ̀bɛ́ rə̀ n'ê byili rə̀ cìn mú nɔ yé, dwí rí tɛ̀bɛ́ bə̀ wàr bə̀ nyɛ̀ɛ̀ rə̀ zɔ̀mà nɛ́ kùr mú, rə̀ zə̀zɔ̀mà nɛ́ n'ê ce mɔ̀n e jà bə̀ bə nə̀ kùr nyɛ̌ mɔ́. ²⁰ Nyǐ Səyɔ̃, nə́ címsí nánfwàlsɛ́ cɔ wá, ǹ yírhə́ m'a nə Zhərəzalɛm, yə̀-zùlə́ jàà yá, kòrhó w kɔ̀bɔ́ bə̀ k'ê t'â la wǔr gaga mɔ́, kɔ̀bɔ́ bə̀ k'ê t'â la ò pálá nɛ́ bə̀ m'e fwar w tɛ̃́ mɔ́ fwə̌rh gaga mɔ́, kɔ̀bɔ́ bə̀ k'ê t'â la ò nyínsí lwə̌r gaga mɔ́. ²¹ Wɔ́ gàà Cinu mà n byili bə̀ ń wɔ́ cɛ̀nɛ̀ cə́bal nɛ́, sə wɔ́ nə́myɛ̌ yilə, è m'a yə̀ bwǐsí shɛ̀bɛ́ sə̀ wà ǹdə́ nɛ̃̌ gwáárɛ tɛ̀bɛ́ rə̀ wà mɔ́ jàà; sə bǔ-bwəl tɛ̀bɛ́ bə̀ n'ê swàl mɔ́ rə̀dù ga myɛ t'â la gàà tó rə lyɛ̃ yé, bǔ-bwəl nánfɔ̀lɔ̀ t'â la jàà y èmyɛ́ mɔ́ wẽ́ tó o byɛrhɛ yé. ²² Zhə̀nà, Cinu wɔ́ nə́ bù-kárna mɔ́, wɔ́ ńmyɛ̌ ń nə́ ń pɛ nə́ba nyə́ né. Cinu wɔ́ nə́ pyɔ̌ mɔ́, wɔ́ ńmyɛ̌ ń nə́ ń zwẽ nə́ba. ²³ Ǹ nyínsí bwèlé, sə̀ k'ê yə̀ bǔ-bwəl ré kàmə̀jɛ̃̀ y dɔ̌ w lyẽ yé, bə̀ k'ê t'â ce bǔ-bwəl ré myɔrhɔ w dɛ̃̌ yé. Rə̀myɛ́ ce, bə̀ m'a tə̀ wẽ̀ ré tɛ̀bɛ́ bə̀ bubu rə̀ wɔ́ nánzhəzhɔ̌ mɔ́, gwànsɛ cìcì mú m'a tó sə bubu ri. ²⁴ Cɔ w lò mə̀dù ga kə́ ń tá ń la wál: «À bə jɛ̀ yé.» Lyì bí byɛ̀bɛ́ bə̀ jě Zhərəzalɛm nɛ́ mɔ́ m'a nə bə̀ yə̀-bəlɔ̀lɔ́ w sǔbri.