¹ Rə̀myɛ́ yó, pyɔ̌ mɔ́ mà n jí pyɛ̀lɛ̀ rɛ́ ǹdə cángá tũ̀twĩ̀ĩ̀ rí gə́ n'ê yǎl nɛ́, yó-cìnə́ bé m'a zə lyì bí ǹdə́ tɛ̀bɛ́ rə̀ mə̌ mɔ́ surhə né. ² Bə̀myɛ́ mə̀dù gakó mà n yə̀ ǹdə shòò jàà ta zho yi ní, cìn-cúrhú jàà dwà yi ní, bə̀ m'a yə̀ ǹdə bǔrh ta, cɛ kɛ̀bɛ́ è kùl wẽ́, ǹdə nə́kul-fɔ̀lɔ̀ ywə́l ta, cə-kùlì tənà wẽ́. ³ Lyì bí byɛ̀bɛ́ bə̀ yírhə́ nɛ nɛ́ mɔ́ yírhə́ né k'ê t'â la pyu yé, lyì bí byɛ̀bɛ́ bə̀ zhã̌ nɛ́ nyɛ̌ mɔ́ zhã̌ nɛ́ m'a kwɛrhɛ nə cili náàcɛ̀nɛ́. ⁴ Lyì bí byɛ̀bɛ́ bə̀ wun ní bə jě mó m'a zhì bə tɛ́rɛ́ mùnì ga bə sú rə̀ kùrə̀, sə lyì bí byɛ̀bɛ́ bə̀ n'ê búbwə̌ mó, mə̀jə̀ə̀lé m'a zɔ̀m làlà, sə rə̀ m'à n'ê zɔ̀m wárhgáá. ⁵ Bə̀ k'ê t'â la lyì-nyɔ̃̀ yil ré lyì-bəyuru ni co yé. sə bə̀ k'ê t'â la myìnù cə́bal nɛ wál bə̀ ń wɔ́ wu-bɔ̀nɔ̀ cə́bal yé. ⁶ Zhə̀n ga, nyə̀nyà zɔ̀mà nɛ́ wɔ́ nyə̀nyààrɛ̀ zɔ̀mà, sə è wɔ́ lwɛlɛ rɛ́ è j'â n'ê tɛ́rɛ́ è wu w wẽ́: è n'ê twĩ̀ ǹdə lò mɔ̀bɔ́ ń wɔ́ lwɛlɛ cə́bal ta, e súlí è n'ê tùrh Cinu, è n'ê yẽ̌ lò mɔ̀bɔ́ nɔrh zhe ne, ń pǔ nánfóó, e yẽ̌ lò mɔ̀bɔ́ nə̀-nyɛ̀lsɛ zhe mo ne n lyɛ̃̀ kɔ̀-nyɔ̀ɔ̀mà. ⁷ È gə wɔ́ myìnù cə́bal mɔ́ yilə, ń tũ̀twə̀ə̀ né j'â wɔ́ námməlwǎlsɛ: ń já ń nə́ ń tɛnɛ myìnù tũ̀twə̃̀ə̃̀, mùnì ga n tó kɔn rɛ́ tɛ̀bɛ́ ń la bwə̌l n byili rə̀ wɔ́ kɔma mɔ́ dɛnnɛ n cɔ̀ zúzúnú cìnə́ bé yò, yi rí tɛ̀bɛ́ nə̀mwà bɛ́ bə̀myɛ́ mɔ́ gə tú bə̀ n'ê pyà bə̀ yò w kɔrhɔ mɔ́. ⁸ Sə lò mɔ̀bɔ́ ń wɔ́ lyì-nyɔ̀ mɔ́ bùlə̀ né j'â càn, è j'â wɔ́ tumə nyɛ̀bɛ́ nə̀ càn dúdú myɛ ń já ń nə́ ń twĩ̀. Á m'ǎ kəkə, ámyɛ̌ kana bɛ́ byɛ̀bɛ́ kaka twə́lə́ bə zhe mó... ⁹ Kə-nə̀wàcɛ̃̀nyəla, zɛ̃̀-na dɛ̃̌, cili-nə ne! Kana-byǎ byɛ̀bɛ́ kaka twə́lə́ bə zhe mó, pyèrhè-nə á zhã̌ á cili kɔn rɛ́ tɛ̀bɛ́ à la wál mɔ́: ¹⁰ Byin námpúm gə tú rə̀ pyìrh, á m'ǎ kəkə, ámyɛ̌ kana bɛ́ byɛ̀bɛ́ kaka twə́lə́ bə zhe mó, bə̀ rə̀myɛ́ ǹdə́ bə̀ pɔ̌r də̀vɛ̃́-cǒ byǎ bɛ́ bə zhɛ̀, e jà jòró w myɛ k'ô t'â la nɛ́ yál yé. ¹¹ Kəkə-nə, kə-nə̀wàcɛ̃̀nyəla, didi-nə, ámyɛ̌ kana bɛ́ byɛ̀bɛ́ kaka twə́lə́ bə zhe mó, lwə̌r-nə á gàndɛ́, lwə̌r-nə á yẽ̌ á cìn ni nánlwə̀rh, ce-nə gɔ̀nɔ̀ á cã̌ nɛ́. ¹² Bə̀ n'ê mà bə̀ nə̀bán bə̀ m'ê wɔ́wɛ́lɛ́ cɛsɛ́ cɛ̀nɛ̀ rɛ́ ǹdə́ də̀vɛ̃́-cèmé cɛsɛ́ sə̀ zhĩ mú shò kwã nɛ́, ¹³ ǹd'â dwí rí cɛ y sɔr rɛ́ lyĩ è wẽ́ mó, ǹdə́ cɔ w ò wɔ fùwə́ wẽ́ mó kǎlsɛ́ gakó sə̀ sú ǹdə́ wu-nyɔ̃̀ mɔ́ shò kwã nɛ́. ¹⁴ Bə̀ dùr bə yẽ̌ pyɔ̌-kɛ̀lɛ́ y nɛ, bə̀ yẽ̌ cɔ w kɔ̀bɔ́ ò y'à sú ǹdə́ sɔ̀ mɔ́ nɛ. Ofɛɛlɛ y ǹdə́ jì nánjíjíní y è lù e vò dɛ̃̌dɛ̃̌ cɔ w yùlù yil mú, m'a jǐrh myə̀lə́ twéé twéé yilə, gɔ-bə̀nərh wu-nyɔ̃̀ ǹdə́ vwàmá nɛ́ kùjú jàà... Yə̀-zùlə́ né m'a yə̀ cángá tũ̀twĩ̀ĩ̀ rí nyɔ̀ɔ̀rhɛ́ ¹⁵ ... kɔn m'e yí, éshìrhə́ y shí dɛ̃̌ e b'e só nə́ yó wə. Rə̀myɛ́ yi ní, gɔ-elũ èpòlò w m'a jǐrh cèmé nánzhəzhɔ̌ jàà, sə cèmé nánzhəzhɔ̌ jàà y m'a jǐrh ǹdə tú ta. ¹⁶ Kɔn rɛ́ tɛ̀bɛ́ rə̀ mə̌ mɔ́ m'a yə̀ gɔ-elũ èpòlò w wə, sə cángá tũ̀twĩ̀ĩ̀ rí m'a cĩ́ kùr cèmé nánzhəzhɔ̌ jàà y wa. ¹⁷ Yə̀-zùlə́ né m'a yə̀ cángá tũ̀twĩ̀ĩ̀ rí nyɔ̀ɔ̀rhɛ́: cángá tũ̀twĩ̀ĩ̀ rí m'a bə̀ ǹdə́ shìrhə́ ǹdə́ yə̀-zùlə́ twéé twéé yilə. ¹⁸ Á dwí rí m'a jòm jàà kɛ̀bɛ́ è zhe yə̀-zùlə́ wẽ́, jààsɛ shɛ̀bɛ́ bə̀ zhe sə̀ zhə̀nà, shìrhə́ jààsɛ shɛ̀bɛ́ sə̀ zhe yə̀-zùlə́ wẽ́, ¹⁹ sə bədũ̀kwələ né m'a cɔ̀ tú w kókó, sə cɔ w m'a tu tɛ̃́. ²⁰ Á m'ǎ yə̀ wu-nyɔ̃̀ cìnə́: á m'ǎ dù twã́ nɛ̃̌ gə́ wɔ mə̀gã̌ gakó, sə á m'ǎ lwə̌r nɔ̃ w ǹdə́ bə̀na y ga á yẽ̌ tɛ̃́, á t'á la gárá rə̀ nèsé ne co yé.