¹ Bə̀kɔ́n ná-dwí lwɛlɛ! Bə̀ n'ê swé bə̀ zhə̀l Ezhibti sɛ̃ɛ̃́ pyǎ è sõ yilə. Bə̀ j'a kwè bə̀ cìn bə ce shəshərh jɔ̃̀ wa, bə̀ zhe eshə-vwə̃tur rí zhə̀nà, rə̀ gə́ já mɔ́ yilə, bə̀ zhe eshə-jòmnə bé zhə̀nà, bə̀ gə́ zhe jàn yilə, sə bə̀ yírhə́ j'â t'â pyǎ Esərayɛl Yi rí tɛ̀bɛ́ rə̀ bə dõ zhe mó yó yé, bə̀ t'â pyà Cinu yé. ² E jà, ńmyɛ já ń búl ń wɔ́ surhə cə́bal: ń wɔ̌ ń ce lwɛlɛ twí. Ń tá ń kwàrh kɔn rɛ́ tɛ̀bɛ́ ń wə̀l mó yé. Ń já ń nə́ ń bwí ǹdə́ lwɛlɛ cìnə́ bé kùkùl ré, ǹdə́ lyì bí byɛ̀bɛ́ bə̀ n'ê twĩ̀ lwɛlɛ, bə̀ n'ê byẽ̀ bə̀ bə̀ b'e sɛ̃ mɔ́. ³ Ezhibti lò wɔ́ numbyíní, ń də̀ yi yé, ń shəshəsé wɔ́ vwàmá, sə̀ də̀ éshìrhə́ kɔn yé. Cinu gə tú ń cèlè ń jɛ̃̀ y yi ní, yìlnə mó mà n mà ń nà, sə lò mó mɔ̀bɔ́ ń nə́ ń yìlì mú mà n tu tɛ̃́: bə̀ gakó m'a tó dwã bə jé tɛ̃́. ⁴ Nyǐ Cinu nyí rí ń cĩ́ ni mú: Bɔrɔ w ráá bwar-byǐ y gə pyě ò kɔn rɛ́ tɛ̀bɛ́ ò zɔ mɔ́ yó ò n'ô ŋwɔ̀nà, e jà bə byẽ̀ vwã̌-ènɔ̀nà nánjə̀jóló bə̀ la bú ǹdə́ w yi ní, bə̀ búbwéésé myɛ cìcì k'ê t'â zɛ̃̀ ò wu ni yé, s'e m'e zɔ̀m sɔ̀ w kɔ̀bɔ́ bə̀ n'ê ce mó yé. Wɔ́ èta dõ lũ gakó Cinu mú, mà n só n bə̀ Səyɔ̃ pyɔ̀ w yó, ń pyɛ̀lɛ́ y yó, ń la mə n bú búlə́ né né. ⁵ Lũ gakó Cinu mú mà n yə̀ Zhərəzalɛm cɔ w yə́-pɛ̀lɛ́ w n mə n yìlì wə, ǹdə kúmsí gə́ y'a lɛ̀lɛ̀ sə̀ vɔ̀mɛ̀ nɛ́ nɛ́. Ń mà n yìlì wə, n súlí n bú n zwẽ wə, ń mà n ce o lú n súlí n vwǎrh wa. ⁶ Kwɛ̃̀-na á bə̀ mɔ̀bɔ́ bə̀ j'a búl bə pyìrhí bə̀ kwã bə m'e zǎ mɔ mɔ́ sõ, Esərayɛl lyì byǎ. ⁷ Dɛ̃ rɛ́ rə̀myɛ́ mɔ́ yù wə, lò gakó mà n zhɛ̃̀ ń yə né nə̀ zùrhì ǹdə́ sə̀byǐ mú ǹdə́ ń yə né nə̀ zùrhì ǹdə́ sánə́má mɔ́, yə né nyɛ̀bɛ́ á jɛ̀sɛ́ sə̀ twĩ̀ tɛ̀bɛ́ rə̀ bə càn mɔ́ zùrhì mú. ⁸ Búlə́ shù kɔ̀bɔ́ ò də̀ numbyíní shù m'a cĩ́ Ashəri tɛ̃́, è də̀ numbyíní shù ò la y jú yé. È m'a dùr búlə́ shù w yé né, sə bə̀ m'a ce è bɔ́bwá-dàlá bɛ́ byɛ̀bɛ́ bə̀ wɔ́ shə̀dɛ́ɛ́sɛ mɔ́ tũ̀-kùlə̀ ne. ⁹ Ywẽ nánfɔ̀lɔ̀ m'a ce Ashəri pàtá y dùr, sə è yó-cìnə́ bé wun m'a zhìlì, ku w bə̀ zhẽ̌ bə ce dɛ̃̌ mɔ́ yé né, wɔ́ Cinu mú mɔ̀bɔ́ ń myǐn mú ŋwɛ́nɛ́ Səyɔ̃ nɛ́, ń myìn-shɔ̃́ w zɛ̃̀ ò ŋwɛ́nɛ́ Zhərəzalɛm nɛ́ mɔ́ nyí rí.