¹ Bə̀kɔ́n ná-dwí lwɛlɛ! Bə̀ wɔ́ byǎ byɛ̀bɛ́ bə̀ wɔ́ yó-kùùlì cìnə́, Bə̀ n'ê twĩ̀ tumə nyɛ̀bɛ́ nə̀ də̀ nyɛ̀bɛ́ àmyɛ́ tɛnɛ mɔ́, bə̀ n'ê zal dɔbrɛ tɛ̀bɛ́ rə̀ j'â t'â tó àmyɛ́ bùlə̀ né ne mó, èta, bə j'â n'ê súlí yə̀-bəlwàálɛ́ tɛ̀bɛ́ bə̀ n'ê wɛ̀rhɛ́ mɔ́ yó wə, wɔ́ Cinu nyí rí. ² Bə̀ n'ê swé bə̀ zhə̀l Ezhibti, e jà bə̀ t'â pyà bə̀ swí à wu yé, bə̀ n'ê zhə̀l bə̀ shèè bə̀ cìn Faraɔ̃ jàà y kɛ̀bɛ́ bə̀ lù bə kə́kɛ́lɛ́ ǹdə́ byíl-fwɛ̀lɛ̀ mɔ́ wẽ́, bə̀ n'ê zhə̀l bə̀ shèè Ezhibti ywə́l mó wə. ³ Faraɔ̃ jàà y kɛ̀bɛ́ bə̀ lù bə kə́kɛ́lɛ́ ǹdə́ byíl-fwɛ̀lɛ̀ mɔ́ m'a jǐrh á cìzhìl kɔna, sə shòò jàà y Ezhibti ywə́l mó w mó m'a jǐrh á yò zhùlù kɔna. ⁴ Á yó-cìnə́ bé gaga mɔ́ dámǎ bə̀ wɔ Səwan nɛ́, á tùntúmə́ bé yú Anɛɛsɛ. ⁵ Dwí tɛ̀bɛ́ rə̀ wàr kaka rə̀ la wɔ̀rhɔ́ bə̀ yilə, rə̀ wàr bɛ rə̀ la sãɔ̃ myɛ, è gə də̀ rə̀ la ce be cìzhìl rə súlí rə zhìlì bə̀ yil dɛ̃́dɛ̃́ mɔ́, m'a fǔr bə̀ gakó. ⁶ Kɔn rɛ́ tɛ̀bɛ́ bə̀ m'a bwə̀l bə byili mú: Nəgɛɛvɛ gɔ-vwàmá nɛ́ shò kwã nɛ́. Bə̀ pwà bə̀ nə̀cɛ̀ndɛ́, bə pwà bə̀ jɛ̃̀-kɔn rɛ́, bə̀nərh cə̌rh yó, ǹdə́ yómde dɔla yó, zúzúnú ǹdə́ ywẽ nánfɔ̀lɔ̀ ǹdə́ cə-kùlì ǹdə́ bwar-nyɔ̀ ǹdə́ bwar-bya ǹdə́ kùwə̀ e súlí dɔm nánjǝ́gɔ́rɔ́ kɔ̀bɔ́ ò n'ô zɛ̃̀ vɔ̀mɛ̀ mɔ́a, tənà y w bə bə̀ bə pə dwí tɛ̀bɛ́ rə̀ wàr kaka rə̀ la wɔ̀rhɔ́ bə̀ yil mú ni. ⁷ Wẽ̀ ré tɛ̀bɛ́ Ezhibti la m'e sɛ̃ mɔ́ m'a yə̀ zho ǹdə́ kə̀-fóó, wɔ́ rə̀myɛ́ rə̀ ce à co è yil bə̀ Araavɛ, mɔ̀bɔ́ ń já ń zhǐ ń jàà y w ń tá ń zhǐr mú. ⁸ Èlǎsɛ̃́, zhəl ń vò ń zhì bə̀ yé né, ń kɛ̃ rɛ twər kùrə̀ nə̀lyè, bwèlè yó, sə rə j'a yə̀ zhə̀n pɔ kɔn tɛ̀bɛ́ rə̀ j'â ŋwɛ́nɛ́ gaga, dwã nɛ́ nyɛ̀bɛ́ nə̀ bàn mɔ́ yilə. Bə̀ t'â yǎl bə nɛ nɛ́ yé ⁹ Bə̀ wɔ́ dwí tɛ̀bɛ́ rə̀ n'ê cẽ nyí ni, bə̀ wɔ́ byǎ byɛ̀bɛ́ bə̀ wɔ́ myìnù cìnə́, bə̀ t'â yǎl bə cili Cinu còrhò mó yé. ¹⁰ Bə̀ n'ê wə̀l byɛ̀bɛ́ bə̀ nɛ̃́ mɔ́ nɛ: «Á bə̀k'á nɛ nɛ́ yé», bə zɛ̃̀ bə̀ n'ê wə̀l nyì-zwennə bé ne: «Á bə̀k'á zɔ̀m nyì-zwennə zɔ̀mà ywẽ̀ né nyɛ̀bɛ́ nə̀ mə̌ mɔ́ shò kwã nɛ́ á pə nə́ba yé, cĩ́-nə nə́ba ywẽ̀ nyɛ̀bɛ́ nə̀ nyɛ̀ mɔ́, zɔ̌m-na nyì-zwennə zɔ̀mà ywẽ̀ nyɛ̀bɛ́ nə̀ wɔ́ jə́jɔ̀rɔ́ kɔn mɔ́ shò kwã nɛ́. ¹¹ Kwɛ̃̀-na á yẽ̌ sɔ́má y nɛ, kɔl-na á yẽ̌ sɔ́má y nɛ. Ce-nə Esərayɛl Yi rí rə̀ bə dõ zhe mó jé tɛ̃́ á pə nə́ba.» ¹² E jà, nyǐ tɛ̀bɛ́ Esərayɛl Yi rí n'ê wə̀l mó: Á j'á n'á zhɛ̃̀ à zɔ̀mɛ̀ rɛ́ rə̀myɛ́ mɔ́ zhə̀n ga, á zhe nɔ̀nɔ̀ w zhə̀nà, surhə námməlwɛ̀lɛ́ tùntwĩ̀ĩ̀ rí zɛ̃̀ rə̀ wɔ́ kɔn rɛ́ tɛ̀bɛ́ nɛ á n'á zhí mú. ¹³ Rə̀myɛ́ yilə, yə̀-bəlɔ̀lɔ́ w òmyɛ́ m'a yə̀ ǹdə byílí kɛ̀bɛ́ è lù e vò dɛ̃̌dɛ̃̌ mɔ́ lolweré ta: è y'a j'a zɛ̃̀ e dǔrh, e j'a zhì zhì e shíshìrí tɛ̃́. ¹⁴ Wɔ́ ǹdə dɔ-mɔrna mɔ́ zhǎ y gə y'a j'a lo, e bɔbwɛlɛ yəywaalɛ námpɔ́lsɛ sə̀ k'ê wàr sə̀ m'a zhí dwã nɛ, bə̀ j'â t'â la ésə̃̀-pyìrhə̀ myɛ nɔ è yə-ywaalɛ́ wẽ́, bə m'e twĩ̀ myǐn kúl wə, ráá bə m'e tɛ̃́ nɛ̃̌ póló w né ta. Ywə́l nánfɔ̀lɔ̀ dǔr ¹⁵ Nyǐ Cinu Yi, Esərayɛl Yi rí rə̀ bə dõ zhe mó nyí rí: Á cìn-nɛrɛ́ y m'a shí wu-pyùrhú ǹdə́ shìrhə́ wẽ́, á jàn rɛ́ m'a shí yala nɛ zhùlù ǹdə́ e zə à zhə̀n wẽ́, sə á t'á yǎl rə̀myɛ́ yé. ¹⁶ Á n'á wə̀lə̀: «Ɔ̃́'Ɔ̃, nə́ m'ǎ zə eshərh nə́ m'é dùr», wɔ́ rə̀myɛ́ è ce á m'ǎ dùr. «Nə́ m'ǎ jòm eshə-vwə̃tur tɛ̀bɛ́ rə̀ lum mú», lyì bí byɛ̀bɛ́ bə̀ n'ê jì á kwã mɔ́ myɛ m'a zə ywə́l. ¹⁷ Lò mə̀dù sásá mà n ji nunə mɔ̀rhɔ̀ ǹdə́ mə̀dù búlə́. Lyì bə̀nu m'a j'a ji ába búlə́, sə á m'ǎ dùr, sə á m'ǎ j'á jǐrh myɔrhɔ dúdú pyɔ̀ yə́-pɛ̀lɛ́ wa, ku bə̀ cìì tɛ̃́ pyɛ̀lɛ́ yó wə. Yə́-nàná k'ê t'â la nɛ́ yál yé ¹⁸ Sə Cinu nə́ ń dɛ̃̀ yi rí tɛ̀bɛ́ ń la á nɔ̀nɔ̀-dǔr mú, ń mà n zɛ̃̀ n byili ába ń nɔ̀nɔ̀-dǔr mú, bə̀ Cinu wɔ́ Yi rí tɛ̀bɛ́ rə̀ wɔ́ cángá cə́bal: lyì bí byɛ̀bɛ́ gakó bə̀ n'ê dɛ̃̀ kɔn ń sõ mó wɔ́ wu-nyɔ̃̀ cìnə́. ¹⁹ Zhə̀nà, ǹmyɛ́ Səyɔ̃ dwí rí ǹ jě Zhərəzalɛm nɛ́ mɔ́, ǹ kə́ ǹ tá ǹ la kúrh yé. Ǹ gə tú ǹ nə́ ǹ búbwéé yi ní, ń mà n dùr ǹ nɔ̀nɔ̀. Ń gə já ń nyɛ̀ɛ̀ ǹ búbwéé yə́, làlà ǹdə́ ń lyár mɔ́. ²⁰ Ń mà n pə ába búrú zúzúnú yi ní, n pə ába nɛ̃̌ á gə wɔ nɔ̀nɔ̀ wẽ́ yi ní, lò mó mɔ̀bɔ́ ń mə̌ sə n cèrhè mó mó, kə́ ń tá ń la jó ǹ yé né yé, ǹ yírhə́ m'a nə mɔ. ²¹ Ǹ zhã̌ m'a nyɛ̀ɛ̀ cəl ré ǹ kwã nɛ́, rə̀ n'ê wə̀l mó ǹ gə mə̌ dwã sə́ vò jə̀-jĩ́ ni ráá jə̀-gwã nɛ yi ní: «Nyǐ sɔ́má yá, kwě-nə èmyɛ́» ²² Ǹ m'ǎ nyǐ ǹ wẽ̀ ré sə̀sã̌yùúlí ǹ sə̀l ń yə̌l sə̀byǐ ń mə́ fwàl rɛ́ mɔ́ ǹdə́ ǹ yə né ǹ zùrhì ń yə̌l sánə́má ń mə́ fwàl nɛ mɔ́ ǹdə wẽ̀ nánfwə̀r ta. Ǹ m'ǎ dwĩ̀ ri ǹdə kɔn rɛ́ tɛ̀bɛ́ rə̀ wɔ́ jìmdi kɔn ta, ń zɛ̃̀ ń wɔ̀ rɛ: jé-nə tɛ̃́ nyɔ̀nɔ̀! ²³ Ń mà n pɔ̃́ dwà, wə̀-dwí rí ǹ du cɛ y w mɔ́ yilə, sə kùjú w kɔ̀bɔ́ ò la cɛ y w shú mú, m'a zə jɛ́nɛ́, e jà ò m'a zə nyàn myɛ. Dɛ̃ rɛ́ rə̀myɛ́ mɔ́ yù wə, ǹ vwàmá nɛ́ m'a ŋwɛ̀nɛ́ nə dɔ̃̀ gɔ, gɔ-dɔ́m-jààsɛ shɛ̀bɛ́ sə̀ wà wẽ́. ²⁴ Nɛ̃ nɛ́ nyɛ̀bɛ́ ǹdə́ bə̀nesé shɛ̀bɛ́ sə̀ n'ê vwàl cɛ y mɔ́ m'a dɔ̃̀ gɔ párɛ́, bə̀ m'a zə ku ǹd'ô yə́lə́ ǹdə́ pyə́l bə m'e lɛ̀lɛ̀ tɛ̃́ mɔ́. ²⁵ Bǔrh nánzhəzhɔ̌ m'a yə̀ pyɔ̀ kɔ̀bɔ́ gakó ò nyɛ̌ dɛ̃̌dɛ̃̌ ǹdə́ pyɛ̀lɛ́ kɛ̀bɛ́ gakó è zɛ̃̀ dɛ̃̌ mɔ́ yó, gurhu mú nánfɔ̀lɔ̀ w dɛ̃ rɛ́, jì-fwàlsɛ́ nánjíjínsí sə̀ lù sə vò dɛ̃̌dɛ̃̌ bə̀ m'ê yìlì cɛmɛ nɛ́ mɔ́ gə́ m'a shíshìrí tɛ̃́ yi ní mú. ²⁶ Cànà y pwẽ̀ ré m'a yə̀ ǹdə nə̀nyɔ́nɔ́ w nyǎn rɛ́ ta, sə nə̀nyɔ́nɔ́ w pwẽ̀ ré m'a ywə̌r twər tàlpyɛ̀ rə súlí, ǹdə dwã nyàlpyɛ̀ pwẽ̀ ta, Cinu gə tú ń bɔ ń dwí rí nyəla nɛ́, n súlí n shili cɔ̀mɔ̀ mɔ́ mɔ̀bɔ́ rə̀ cɛ̀mɛ̀ mɔ́ yi ní. Myǐn mú Cinu la mə n bú ǹdə́ Ashəri mú ²⁷ Nyǐ Cinu yil ré rə̀ shí pyépyé rə̀ bànà, ń lyim rí j'â cɛ̀, e jà rə̀ j'a shìlì myɛ, lyi-yùr rí j'a sú ń nyí rə̀ n'ê shə́r rə̀ lwé tɛ̃́, ń mə̀jòlò w j'â wɔ́ ǹdə myǐn mɔ̀bɔ́ mə̀ n'ê jí kɔn gakó ta. ²⁸ Ń shíshìrhə́ né wɔ́ ǹdə nə̀-gɔ̀lɔ̀ kɔ̀bɔ́ ò sú o bɔrh, ò nɛ̃̌ mɔ́ lyɛ̃ mə yí byã nɛ ta. Ń mà n ce tənèsé tó cɔ̌ mɔ́ wẽ́ n mə n pə sɛ còrhò-tum, ń mà n súlí n ce eshã-nyí-cɔ̀bɔ́ kɔ̀bɔ́ ò m'a dwĩ̀ lyì bí mú dwə́ né lyì bí nyú wə. ²⁹ Á m'ǎ nún ǹdə bə̀ gə́ y'a nún cəcɛ̃ kɛ̀bɛ́ bə̀ n'ê jí cìmsí mú ní, á wun m'a yə̀ nyàn, ǹdə lò mɔ̀bɔ́ bə̀ n'ê wúl wí bə̀ ce ń kùr w gə́ ya n vò né, lò mó mɔ̀bɔ́ ń nə́ ń zhə̀l ń la Cinu pyɔ̀ w səta, ń la Esərayɛl lyì byǎ bɛ́ pàtá y səta mɔ́ ta. ³⁰ Cinu mà n ce bə nyɛ̀ɛ̀ ń cəl ré rə̀ zhe zùwə́ nánfɔ̀lɔ̀ mɔ́, sə bə̀ m'a nə ń jɛ̃̀ y è tú tɛ̃́, ǹdə́ ń lyìm rí rə̀ cɛ̀, myǐn mɔ̀bɔ́ mə̀ n'ê jí kɔn gakó mó myìn-zhù wẽ́, ǹdə́ dwà-zho ǹdə́ bədũ̀kwələ wẽ́. ³¹ Cinu cəl ré m'a ce wu-zɛ̃̀ɛ̃́ nánfɔ̀lɔ̀ zə Ashəri, sə ń mà n zə ń gwə̌ y n mà ya. ³² Sə Cinu gə mà y də̀-dɔ̀lɔ̀ yírh gakó, gǔlsi ǹdə́ zɔ̀n m'a dú rə tó re, sə, ń gə zhẽ̌ ń jɛ̃̀ y ń co dɛ̃̌ yi ní, ń mà n bú ǹdə́ yá. ³³ Myǐn mú dǎr rɛ́ dámǎ rə tɛnɛ rə zhɛ̀, sə rə̀ tɛnɛ rə zhɛ̀ pyɔ̌ mɔ́ myɛ yilə. bə̀ shɛl dǎr nánzhəzhɔ̌ dwã yó, bə kə́kɛ́lɛ́, tɛ̃́ tɛ̃́ kùr wə, jàà kɛ̀bɛ́ è wà wẽ́, myǐn mú yilə. Cinu shíshírə́ né nə̀ wɔ́ ǹdə kwə́ nə̀-gɔ̀lɔ̀ ta m'a ji ri myǐn.