¹ Bə̀kɔ́n ná-dwí lwɛlɛ! Arəyɛl! Arəyɛl! Cɔ w kɔ̀bɔ́ Dəvyidi yà ń pú n bú ǹdə́ w mɔ́. Bə̀ byin dõ súlí tɛ̀bɛ́ nɛ rə̀myɛ́ ǹdə́ címsí ǹdə́ sə̀ gə́ pú pú dwã nɛ mɔ́, ² à m'a j'a kã̀ Arəyɛl cɔ wá: ò m'a j'a sú ǹdə́ wu-zhùlù ǹdə́ wɔ́wɔ́lɔ́ dúdú, ò m'a jǐrh ǹdə arəyɛl ta àmyɛ́ yilə. ³ À m'a b'a pú mú à la bú ǹdə́ mɔ́ ǹdə Dəvyidi ta, à m'a lù byíl-fwàlsɛ a m'a kə́kɛ́lɛ́ mɔ́, à m'a cĩ́ búlə́ wẽ̀ tɛ̃́ à la m'a pú mú mùnì ga a bú ǹdə́ mɔ́. ⁴ Ǹ gə tú ǹ tu ǹ pyě tɛ̃́ yi ní, ǹ m'ǎ pyẽ̀ tɛ̃́ cɛ y yó ǹ mə́ ǹ zɔ̀mà, sə ǹ cəl ré rə̀ jàn rɛ́ bɔ̀ rə̀myɛ́ yi ní mú m'a shí shó w wə, ǹ cəl ré m'a shí cɛ y kùr w ǹdə wɔ́ yóló cəl ta, ǹ zɔ̀mà nɛ́ m'a shí shó w kùr w ǹdə shìlì ta. ⁵ Ǹ zwə̀ bé nánjə̀jóló w m'a yə̀ ǹdə tɔ̀mɔ̀ gúmgúm ta, wu-bárhɛ́ cìnə́ nánzhəzhɔ̌ w m'a yə̀ ǹdə jíjí-púúlí zho n'ô pwà ta... Sə twər rə̀dù sá, ⁶ lũ gakó Cinu mú mà n tó dwà-byɛɛ́sɛ ǹdə́ cɛ zhízhǔ, ǹdə́ sɔ̀ nánfɔ̀lɔ̀, ǹdə́ kùlmə̀ ǹdə́ dwà-zho nánfɔ̀lɔ̀ e súlí myìn-zhù ò j'â n'ô jí kɔn gakó dɛnnɛ n bə̀ ǹ sõ. ⁷ Sə rə̀myɛ́ yi ní, è m'a yə̀ ǹdə dàrhà ta, ǹdə kɔn tɛ̀bɛ́ Yi la ce ń nə cəcɛ̃ nɛ ta, lyì nánjə̀jóló w kɔ̀bɔ́ ò y'à n'ô pyà Arəyɛl cɔ w nyí mú, ǹdə́ lyì bí byɛ̀bɛ́ gakó bə̀ y'à n'ê bwí ǹdə́ wa, bə̀ n'ê zwì ò wẽ́, bə súlí bə̀ n'ê nwɛ̀nɛ̀ w mɔ́ yilə. ⁸ È m'a yə̀ ǹdə wɔ́ lò mɔ̀bɔ́ nɔrh zhe, n zɛ̃̀ ń nə́ ń dàrh bə̀ ń nə́ ń jí kùjú, n zɛ̃̀ n bùrhì ǹdə́ pù-fóó ta, ráá ǹdə wɔ́ lò mɔ̀bɔ́ nə̀-nyɛ̀lsɛ zhe, n zɛ̃̀ ń nə́ ń dàrh bə̀ ń nə́ ń nywɛ̀ nɛ̃̌, n zɛ̃̀ n bùrhì ǹdə́ ń já n lyɛ̀ɛ̀, ń byã kùl kókó ta. Wɔ́ èta kɔn m'a yə̀ nɛ́ lyì nánjə̀jóló w kɔ̀bɔ́ ò y'à n'ô bwí ǹdə́ Səyɔ̃ pyɔ̀ w mɔ́ yilə. ... sə á j'á bə kaka kùr nyɛ̌ rə̀ shò kwã yé ⁹ Kɔn jǎr ába, sə á j'á mɛ̃ nyí cám, jǐrh-nə lyìlyə̌r, sə á j'á mɛ̃ èta, kɔn zə ába, sə è bə̀k'a yə̀ də̀vɛ̃́ yé, tutwi-nə, sə è bə̀k'a yə̀ kɔ̀-nyɔ̀ɔ̀ma mə̀ ce yé, ¹⁰ bə̀ Cinu ce jan nánfɔ̀lɔ̀ éshìrhə́ bə̀ á yó wə, ń pyi á yírhə́ né, nyì-zwennə bé, ń zə kàmə̀jɛ̃̀ n mə n pyìlì á ywẽ́ né, ámyɛ̌ byɛ̀bɛ́ á nɛ̃́ mɔ́. ¹¹ Ywẽ̀ né nə̀myɛ́ mɔ́ gakó Yi ce á nə mɔ́ nyɛ̌ ǹdə sɛ́bɛ́ tɛ̀bɛ́ bə̀ cĩ́ myɔrhɔ rə̀ yó zɔ̀mà ta, bə̀ kwè bə pə lò mó mɔ̀bɔ́ ń yě kàrmə nɛ, bə zɛ̃̀ bə̀ n'ê wə̀l mo: «Kàrmə tɛ̀bɛ́», n zɛ̃̀ n lyár n wɔ̀: «À wàr yé, bə̀ bə̀ cĩ́ myɔrhɔ sɛ́bɛ́ rɛ́ yó». ¹² Bə zɛ̃ bə kwè re bə pə lò mɔ̀bɔ́ ń yə̀l kàrmə nɛ, bə̀ m'ê wə̀lə̀: «Kàrmə tɛ̀bɛ́», n zɛ̃̀ n lyár n wɔ̀: «À yə̀l kàrmə yé.» ¹³ Cinu wə̀lə̀: Dwí rí tɛ̀bɛ́ j'â wɔ́ rə̀ nyì-zɔ̀mà nɛ́ dúdú dɛnnɛ rə̀ n'ê tó né rə̀ m'ê bwəlse à nyí ni, rə̀ nyì-vɔr rɛ́ dúdú rə̀ n'ê cèrhé né, sə rə̀ wu w j'â nyɛ ǹdə́ nɛ. Nyɔ̀mɔ̀ w kɔ̀bɔ̀ rə̀ m'ê nyàm nɛ mɔ́, wɔ́ nyí tɛ̀bɛ́ numbyínsí vùr dúdú, còrhò mɔ̀bɔ́ bə̀ cèrhè dúdú. ¹⁴ Wɔ́ rə̀myɛ́ rə̀ ce à m'a j'â gwẽ̌ n'â twĩ̀ tũ̀-fwààlɛ à pɛ rɛ, èta lárma cìnə́ bé lárma mɔ́ t'â la rə̀ kùr nyɔ̀ɔ̀ yé, sə surhə cìnə́ bé surhə né m'a pyà nə̀ cìnə̀. ¹⁵ Bə̀kɔ́n ná-dwí lwɛlɛ! Bə̀ n'ê tó tɛ̃́ bə̀ twĩ̀ mùnì ga bə shèè kɔn rɛ́ tɛ̀bɛ́ bə̀ tɛnɛ bə̀ la wɔ̀rhɔ́ mɔ́ Cinu yé né. Bə̀ n'ê twĩ̀ bə̀ tumə né cə-byín rí wẽ́, bə zɛ̃̀ bə̀ n'ê wə̀lə̀: «Mɔ̌ lò ń nə nə́ba? Mɔ̌ lò ń nə́ ń lwar nə́ nyí ni?» ¹⁶ Nyǐ bə̀ tumə né tũ̌ mú gə́ jǐrh rə̀ kwərh né! Bə̀ nə m'a zə dɔ-mɔrna bə m'e yə̀ dɔ w nà? Kɔn rɛ́ tɛ̀bɛ́ bə̀ wɛ̀rhɛ́ mɔ́ nə m'a wɔ̀ lò mó mɔ̀bɔ́ ń wɛ̀rhɛ́ rɛ mɔ́ nɛ: «Ń yə̀ nɛ wɛ̀rhɛ́ yé» nà? Ku kɔ̀bɔ́ bə̀ mɔ mɔ́ nə m'a wɔ̀ dɔ-mɔrna nɛ: «Ń yə̀l tum rí yé shò yé» nà? ¹⁷ Kɔn yə̀ dàl námpɔ́lɛ́ dɛ̃́dɛ̃́, sə Lyəbã nə jǐrh cèmé jàà, sə cèmé né jàà y zɛ̃̀ e jǐrh tú nà? ¹⁸ Dɛ̃ rɛ́ rə̀myɛ́ mɔ́ yù wə, sə̀bwààrhɛ́ m'a nyɛ̀ɛ̀ sɛ́bɛ́ rɛ́ kàrmɔ̀ mɔ́, sə lyìlyə̌r ré rə̀ la byín rí ǹdə́ cə-byín rí w shú rə du mú, yírhə́ né m'a nə nɛ́. ¹⁹ Cìn-lwəl cìnə́ bé wu-nyɔ̃̀ w m'à j'â n'ô súlí Cinu wẽ́, sə nə̀mwà bɛ́ m'a fùù ǹdə́ wu-nyɔ̃̀, Esərayɛl Yi rí rə̀ bə dõ zhe mó yilə, ²⁰ bə̀ kɔn m'a j'a yə̀ wu-bárhɛ́ cìnə́ bé nyí ga, mɔ̀nna bɛ́ m'a jé tɛ̃́, sə bə̀ m'a ce lyì bí byɛ̀bɛ́ gakó bə̀ j'a tɛnɛ bə̀ zhǐ bə̀ n'ê pyà lwɛlɛ wɔ̀rhɔ́ mɔ́ jé tɛ̃́ lyə́m lyə́m: ²¹ è wɔ́ lyì bí byɛ̀bɛ́ bə̀ n'ê tó bə̀ zɔ̀mà nɛ́ dɛnnɛ bə̀ ce bə cĩ́ dóó lò yó w mó, ǹdə́ lyì bí byɛ̀bɛ́ bə̀ n'ê pàm pɔ̀mdɛ́ tɛ̃́ bù-kárna bɛ́ gə tú bə̀ n'ê bùr bǔrsi yi ní bə zɛ̃̀ bə vwɛ̃ bə-dóó-zhe-cí mú bə ji gɔ́rɔ́ nánlyilyùmú w mú. Èlǎsɛ̃́ myɛ̌, bə̀ m'a nyɛ̀ɛ̀ rə̀ kùrə̀ ²² Rə̀myɛ́ ce, nyǐ Cinu, Zhakɔɔbɛ kɛ̀lɛ́ y Yi rí, ńmyɛ̌ mɔ̀bɔ́ ń zwẽ Abəraam mɔ́, nyí rí: kɔn zhí zà, Zhakɔɔbɛ wu k'ê t'â la zhìlù yé, cìzhìl k'ê t'â la ce ń yé y lyə́r yé, ²³ bə̀ ń byǎ bɛ́ gə́ b'a nə kɔn rɛ́ tɛ̀bɛ́ à wɛ̀rhɛ́ bə̀ cəcəl w mó, bə̀ m'a ce bə lwar b'à yil ré bə dõ zhe yé, bə̀ m'a ce bə lwar bə̀ Zhakɔɔbɛ Yi rí rə̀ bə dõ zhe mó j'â bə dõ zhe zhə̀n ga, bə̀ m'a kəkə Esərayɛl Yi rí yé né. ²⁴ Lyì bí byɛ̀bɛ́ bə̀ surhə né y'à jé mó, m'a nə surhə, sə lyì bí byɛ̀bɛ́ bə̀ y'à n'ê cẽ nyí ni zõ mó m'a shɛ̀nɛ́ bə cèrhè be.