¹ Bə̀kɔ́n ná-dwí lwɛlɛ! Efərəyim sə̀-nyɔ̀ɔ́rɛ́ yó-dɛ̃̌-zhõ̌ pyɛ̀lɛ̀ yə́-pú, ǹdə́ pùnə́ námpyɛ̀ndɛ́ rə̀ wɔ́ è gàndɛ́ bɔ́bwár wẽ̀ ré, jə́ y è wẽ̀ ré n'ê zhĩ mú yə́-pɛ̀lɛ́ w mɔ́, ámyɛ̌ byɛ̀bɛ́ də̀vɛ̃́ y gu e cĩ́ tɛ̃́ mɔ́. ² Nyǐ Cinu shə̀də́-bya èdù, è wɔ́ ǹdə odũ̀kwələ dwà nánfwɛ̀lɛ̀ ta, ǹdə zho nánfɔ̀lɔ̀ kɔ̀bɔ́ ò j'â n'ô cɔ̀ kɔn gakó ta, è wɔ́ ǹdə dwà kɛ̀bɛ́ è nàná bɛ́ n'ê swí tɛ̃́ cə-yala gakó bə̀ n'ê wùl ǹdə́ jàn mɔ́ ta: è m'a wǔr kɔn gakó e ló tɛ̃́ ǹdə́ jàn. ³ Bə̀ m'a cèè y tɛ̃́ nə̀rh kùr wə, Efərəyim sə̀-nyɔ̀ɔ́rɛ́ yó-dɛ̃̌-zhõ̌ pyɛ̀lɛ̀ yə́-pú wə́, ⁴ ǹdə́ pùnə́ námpyɛ̀ndɛ́ rə̀ wɔ́ è gàndɛ́ bɔ́bwár wẽ̀ ré, jə́ y è wẽ̀ ré n'ê zhĩ mú yə́-pɛ̀lɛ́ w mɔ́, m'a yə̀ ǹdə épyìlí tɛ̀bɛ́ rə̀ pár rə byì ta, rə̀ byìl ǹdə́ cə-lumu w yi rí gwẽ̌ yə̀ yí yé: lò gə nɔ rɛ, ń gə já ń zɔ rɛ ń jɔ̃̀ wa, ǹdə́ ń lyìl ri. ⁵ Dɛ̃ rɛ́ rə̀myɛ́ mɔ́ yù wə, lũ gakó Cinu mú, mà n yə̀ ń dwí rí kùr ré rə̀ dàl mɔ́ pyɛ̀lɛ̀ yə́-pú kɔ̀bɔ́ ò n'ô jə́jɛ̀mɛ́ ǹdə́ rə̀ ŋwɔ̀nɔ́ w e súlí rə̀ bɔ́bwár kɔn rɛ́. ⁶ Ń mà n yə̀ cángá tũ̀twĩ̀ĩ̀ éshìrhə́ y lò mó mɔ̀bɔ́ ń nə́ ń bùr bùrsí yilə, n yə̀ lyì bí byɛ̀bɛ́ bə̀ n'ê ce búlə́ né k'a kwɛ̃̀ nə̀ la cɔ w bwə̀rə̀ w mɔ́ wu-jɔ̀ wá. Sə̀-nyɔ̀ɔ́rɛ zɔ̀mà ⁷ Də̀vɛ̃́ y n'ê dwĩ̀ vwĩ̀-zwə́lnə bé ǹdə́ nyì-zwənnə bé myɛ cìcì mú, sə̀-kùùlí ce bə̀ n'ê tutwi, sɛ̃́ mɔ́ n'ê dwĩ̀ bi, də̀vɛ̃́ y n'ê ŋwɛ̀nɛ́ bɛ, sə̀-kùùlí ce bə̀ n'ê tutwi, bə̀ k'ê yə̀l kɔn tɛ̀bɛ́ Yi n'ê ce bə̀ nɛ mɔ́ yé shò yé, bə̀ n'ê ce tə́tɔ̀ná bùrsí kɔ́ mɔ́ yi ní. ⁸ Tabəlsɛ́ gakó sú ǹdə́ tɔtɔɔlɛ ǹdə́ rə̀ lwẽ́ dúdú: jàà kɛ̀bɛ́ è wɔ́ zwẽ́zwẽ́ tɛ̀nɛ́ yé. ⁹ E jà bə zɛ̃̀ bə̀ n'ê wə̀lə̀: «Mɔ̌ nɛ ńa nə́ ń yǎl n pə còrhò? Mɔ̌ nɛ ń nə́ ń yǎl n byili kɔn tɛ̀bɛ́ Yi ce n nə mɔ́ kùrə̀? Bə̀sɔ́ná bɛ́ byɛ̀bɛ́ bə̀ gwẽ̌ kwər yil ne mó? Byì-shɛ̌msɛ shɛ̀bɛ́ sə̀ gwẽ̌ yẽ̌ yil ne dùlì dùlì mú? ¹⁰ Ń nə́ ń wə̀l ń kə́ ń bwérhé: Sawlasaw, sawlasaw, kawlakaw, kawlakaw, zɛɛ̀r sham, zɛɛ̀r shamb.» ¹¹ Zhə̀n ga, wɔ́ zɔ̀mà dwí tɛ̀bɛ́ rə̀ gòm gòm kókó, wɔ́ ǹdə́ dwí dõ zɔ̀mà, Cinu la n mə n zɔ̀m ǹdə́ dwí rí tɛ̀bɛ́, ¹² ńmyɛ̌ mɔ̀bɔ́ ń yà ń wə̀l be: «Nyǐ shìrhə́ yə́, yẽ̌-nə lò mó mɔ̀bɔ́ ń lyɛ̀ɛ̀ mɔ́ nɛ n shǐrh, nyǐ yə̀-zùlə́ né», sə bə̀ yə̀ shɛ̀nɛ́ bə cili yé. ¹³ 13 Rə̀myɛ́ yilə, Cinu zɔ̀mɛ̀ rɛ́ myɛ m'a yə̀: «Sawlasaw, sawlasaw, kawlakaw, kawlakaw, zɛɛ̀r sham, zɛɛ̀r sham.» bə̀ yilə, rə̀myɛ́ mɔ́ m'a ce, bə̀ gə tú bə̀ zɛ̃̀ bə̀ n'ê zhə̀l yi ní, bə̀ m'a ló tɛ̃́ bə̀ cə̌rh yó, bə̀ m'a kə́ bə̀ cə̌rh, bə̀ m'a tu pɔ̀mɔ̀ wẽ́, sə ò m'a zə bɛ́. Dɔbrɛ́ ǹdə́ Cu mú ǹdə́ jì y jàn nǝ́kulu wǝ́ ¹⁴ Rə̀myɛ́ ce, cili-nə Cinu zɔ̀mɛ̀ rɛ́, ámyɛ̌ mɔ̀nna bɛ́ á cǐ dwí rí tɛ̀bɛ́ rə̀ wɔ Zhərəzalɛm nɛ́ mɔ́. ¹⁵ Á n'á wə̀lə̀: «Nə́ zɔ dɔbrɛ ǹdə́ Cu mú, nə́ dwĩ̀ nyí ǹdə́ cúlú wə́. Màbyóó w ò zɛ̃̀ tɛ̃́ ǹdə́ jàn mɔ́, t'â la nə́ba zal, ò gə tú ò n'ô lyɛ̃ yi ní yé, bə̀ nə́ ce kɔma bɛ́ jǐrh nə́ shòò jàà, nə̀rh sə̀lyè zhəl mó zɛ̃̀ mə jǐrh nə́ cìn-cúrhú jàà.» ¹⁶ Rə̀myɛ́ ce, nyǐ Cinu Yi nyí rí: Nyǐ à n'â cĩ́ nə́kulu kɔ̀bɔ́ kɔn gakó m'a yíní w tɛ̃́ Səyɔ̃ nɛ́, jì y jàn nǝ́kulu wǝ́, kɔ̀bɔ́ ò j'â càn, bə̀ cír w ò la yə̀ jì y kùr ré cṹ nə́kulu wə́. Kaka t'â la lò mó mɔ̀bɔ́ ń zhí w mú jǎr yé. ¹⁷ Kɔn rɛ́ tɛ̀bɛ́ rə̀ mə̌ mɔ́ m'à yə̀ nyíní kɛ̀bɛ́ à la m'a mɛrhɛ, cángá tũ̀twĩ̀ĩ̀ rí yə̀ kɔn rɛ́ yó gə́ mə̌ dwã má mɔrhɔ kɔn rɛ́. Bədũ̀kwələ né m'a zwàr kɔma bɛ́ shòò jàà yá, nàná bɛ́ m'a swə̀l á cìn-cúrhú jàà y bə m'e lyɛ̃. ¹⁸ Á dɔbrɛ́ ǹdə́ Cu mú m'a cɔ̀, nyí rí á dwĩ̀ ǹdə́ cúlú w mú kê t'â la jú yé. Màbyóó w ò zɛ̃̀ tɛ̃́ ǹdə́ jàn mɔ́, m'a cèè ába tɛ̃́ o bɔbwɛlɛ ába, ò gə tú ò n'ô lyɛ̃ yi ní. ¹⁹ Ò gə tú ò n'ô lyɛ̃ yi ní gakó, ò m'a zə ába, b'ò m'à j'â n'ô lyɛ̃ nəkɔkɔ́lɛ́ nəkɔkɔ́lɛ́, cəcɛ̃ ǹdə́ nə̀nyɛ́nɛ́, sə è m'a yə̀ ywẽ nánfɔ̀lɔ̀ dúdú, bə̀ gə́ m'a nyɛ̀ɛ̀ kɔn rɛ́ tɛ̀bɛ́ Yi ce bə nə rə̀ shò kwã mɔ́ kùr ré yi ní. ²⁰ Pyə̀nə̀ y m'a jǐrh náàkùlí dɛ̃́dɛ̃́ ǹdə́ pyõ̌, gàmə̀lyɔ̀nɔ̀ m'a jǐrh námpɔ́lɛ́ dɛ̃́dɛ̃́ ǹdə́ cìn pyípyílú. Á bə̀k'á wɛ̀rhɛ́ ǹdə mɔ̀nna bɛ́ ta yé ²¹ Zhə̀nà, Cinu mà n kə́ n shí tɛ̃́ n zɛ̃̀ ǹdə Pərəsim pyɔ̀ w yó ta, ń yala m'a cəcɛnɛ ǹdə Gabaɔ̃ jə́ y w mó ta, ń gə tú ń la ń tum rí tũ̌ yi ní, tum rí tɛ̀bɛ́ rə̀ n'ê jàr mɔ́, ń gə tú ń la ń tum rí tũ̌ yi ní, tum rí tɛ̀bɛ́ rə̀ n'ê zɛ̃̀ wu ni mú. ²² Sə èlǎsɛ̃́ á bə̀k'á wɛ̀rhɛ́ ǹdə mɔ̀nna bɛ́ ta yé, mùnì ga á lyẽẽ́sé bə̀k'a kwɛrhɛ sə lyẽ sə zù yé, b'à nyɛ̀ɛ̀ Cinu Yi, lũ gakó Cinu mú sõ, bə̀ tənà y gakó cɔ̌ mɔ́ nyí rí kwè. Pɔ̀rɔ́ w kwã, wɔ́ twã́ nɛ́ dú mú ²³ Pyèrhè-nə á zhã̌, á cili ni. Cili-nə cɛ̀nɛ̀, cili-nə à zɔ̀mà nɛ́! ²⁴ È nə j'â wɔ́ twéé gakó vwàlna mɔ́ já ń nə́ ń pɔ̌r ń cɛ yá, ń nə́ ń jǐrh yə, ń nə́ ń mà bwər nánfwààlɛ́ ń lwe ń twã́ nɛ́ dú yil nà? ²⁵ È nə də̀ zhə̀n bə̀ ń nə́ ń ce ń cɛ y mɛrhɛ dwã, n zɛ̃̀ n lə nəzhɛ́ɛ́lɛc yá, n dù kumɛ̃́ yá, n zɛ̃̀ n du bə̀lɛ́ y ǹdə́ orzhɛ y ǹdə́ epótərɛ y cɛ y vɔ̃̀ nɛ nàd? ²⁶ E jà wɔ́ ń Yi rí rə̀ n'ê byili mu sɔ́mà y ń mə̌ sə n tó mó, rə j'à n'ê cèrhè mo myɛ. E mà, sə è də̀ e mà e bɔbwɛlɛ yé ²⁷ Bə̀ bə mə̌ sə bə zə vwə̃tu w dɔ̌ w kɔ̀bɔ́ bə̀ m'ê mà wẽ̀ ré mó, bə m'e nɔ̀ nəzhɛ́ɛ́lɛ y tɛ̃́ bə bɔbwɛlɛ yé, vwə̃tu nèsé myɛ bə mə̌ sə sə tó kumɛ̃́ y yó sə lyɛ̃ yé, è wɔ́ də̀-dɔ̀lɔ̀ bə̀ m'ê mà nəzhɛ́ɛ́lɛ yá, də̀dàlsɛ bə̀ m'ê mà kumɛ̃́ yá. ²⁸ Bə̀ n'ê bɔbwɛlɛ bə̀lɛ́ y nà? Gaga, bə̀ j'â t'â mà y bə̀ j'â ŋwɛ́nɛ́ bə̀ ŋwɛ́nɛ́ yé; bə̀ n'ê ce vwə̃tu w nèsé ǹd'ô dǎr rɛ́ ga tó è yó rə lyɛ̃, sə bə̀ t'â bɔbwɛlɛ y yé. ²⁹ Sə rə̀myɛ myɛ n'ê shí lũ gakó Cinu mú sõ, ńmyɛ̌ mɔ̀bɔ́ ń já ń nə́ ń pɛ cúcú nántwə̌, n jà ń yě kɔn wɔ̀rhɔ́ yé shò mó.