¹ Dɛ̃ rɛ́ rə̀myɛ́ mɔ́ yù wə, Cinu mà n bə̀ ǹdə́ ń shù w ò zhe nyí mú, ò wɔ́ nánfɔ̀lɔ̀ mɔ́, e jà ò jɛ̀ mɔ́ n mə n bú ǹdə́ Ləvyatã, dɔm mɔ́ mə̀ só dǔr mú, n mə n bú ǹdə́ Ləvyatã, dɔm mɔ́ ǹdə́ mə̀ surhə námməlwɛ̀lɛ́ y mɔ́, ń mà n gu nə̀-fɔ̀lɔ̀ w Dɔm nánjǝ́gɔ́rɔ́ wá. Cinu ǹdə́ ń də̀vɛ̃́-cèmé né cɛ yá ² Dɛ̃ rɛ́ rə̀myɛ́ mɔ́ yù wə, nún-nə də̀vɛ̃́-cèmé né nə̀ byǎ bɛ́ nyɛ̀ mɔ́ cɛ yá. ³ Àmyɛ́ Cinu, à wɔ́ è yìlnə mó, à n'â tə̀l yi rí rə̀ mɛrhɛ dwã à m'â ji yə. À n'â dɛ̃̀ y cəcɛ̃ ǹdə́ nə̀nyɔ́nɔ́ ga, mùnì ga lò bə̀ká n jàr jàr n zù è wẽ́ yé. ⁴ À lyim k'ê t'â yì yé: à gə nɔ bàasɔ̌brɛ ǹdə́ ésɔ́ndɛ, à m'a bú ǹdə́ rɛ, a j'a súlí a ji ri myǐn, ⁵ sə lò mɔ̀bɔ́ ń mà n zə nɛ n yə̀ ń shòò jàà mɔ́, mà n ce dwã yó ǹdə́ nɛ, ń mà n ce dwã yó ǹdə́ nɛ. Zhakɔɔbɛ cɔ w dwirí y ǹdə́ ń sǔbri y pɔ mɔ́ ⁶ Dwã nɛ́ nyɛ̀bɛ́ nə̀ bàn mɔ́ wẽ́, Zhakɔɔbɛ mà n tò nə̀rh, Esərayɛl m'a púrh pùnə́, e mɛ́nɛ́ byǎ è byǎ bɛ́ m'a sú lũ wə́. ⁷ Cinu nə mà bɛ ǹdə ń gə́ mà lyì bí byɛ̀bɛ́ bə̀ y'à n'ê mà bɛ mɔ́ nɛ́ nà? Ń nə gurhi bi ǹdə ń gə́ gurhi lyì bí byɛ̀bɛ́ bə̀ y'à n'ê gurhi bi mú ta nà? ⁸ Ń jì bi n súlí n ce bə shə́r n mə n kə́ bə̀ bùrsi. Yi-púrhí zho dɛ̃ rə̀dù yù wə, ń zə ń zho nánfɔ̀lɔ̀ w n mə n kwè be. ⁹ Sə wɔ́ èta kɔn m'a tó né Zhakɔɔbɛ mə n nə ń lwɛlɛ rɛ́ sǔbri y ní, sə wɔ́ rə̀myɛ́ rə̀ m'a yə̀ ń yə̀-bəlɔ̀lɔ́ w sǔbri nɔ mɔ́ nyɔ̀ɔ̀rhɛ́: ń mà n wɛ̀rhɛ́ vwĩ̀-jùúlí nə́kulə né gakó ǹdə nə́kulə né nyɛ̀bɛ́ bə̀ n'ê lwe bə̀ bɔbwɛlɛ bə̀ m'ê pwèlè wẽ̀ ré ta, bə̀ k'ê t'â la Ashəra pálá nɛ́ ǹdə́ nə̀nyɔ́nɔ́ w myaarhɛ́ tɛ̃́ cùù yé. Cɔ w kɔ̀bɔ́ bə̀ dùr bə yẽ̌ mó ¹⁰ Cɔ w kɔ̀bɔ́ ò kə́kɛ́lɛ́ ǹdə́ byíl-fwàlsɛ mɔ́ m'a yə̀ ò dúdú, ò m'a pyẽ̀ nánfò, kùjú ò pyě ò la, bə̀ dùr bə yẽ̌ ǹdə gɔ-elũ èpòlò ta. Nũ̌-bwə̀lə́ y m'a b'e dɔ̃̀ gɔ gàà, è m'a pyẽ̀ gàà, è n'ê dɔ̀m cèmé né jɛ̀sɛ́. ¹¹ Cèmé né jɛ̀sɛ́ gə tú sə̀ kùlə̀, bə̀ m'a kə́ sɛ, kana m'a bə̀ bə ji si myǐn. Zhə̀nà, dwí rí tɛ̀bɛ́ j'â yə̀l ywẽ̀ né dwã w pɔr yé: wɔ́ rə̀myɛ́ rə̀ ce lò mó mɔ̀bɔ́ ń wɛ̀rhɛ́ rɛ mɔ́ tá ń dùr rə̀ nɔ̀nɔ̀ yé, lò mó mɔ̀bɔ́ ń mɔ rɛ mɔ́ tá ń ce nyí rə̀ kwã yé. Kwã̀ɔ̃̀ mɔ́ nánfɔ̀lɔ̀ wá ¹² Dɛ̃ rɛ́ rə̀myɛ́ mɔ́ yù wə, Cinu mà n mà jíjí rí kɔn zhì Efəratɛ bù-fwɛ̀lɛ̀ y nɛ e m'e vò e yí Ezhibti nə̀-gɔ̀lɔ̀ w nɛ. Sə wɔ́ ámyɛ̌ bə̀ m'a gǔn mə̀dù mə̀dù, Esərayɛl lyì byǎ. ¹³ Dɛ̃ rɛ́ rə̀myɛ́ mɔ́ yù wə, pɔ́lá y nánfwɛ̀lɛ̀ y m'a wúl. Lyì bí byɛ̀bɛ́ bə̀ y'à jé bə̀ wɔ Ashəri tənà y w mɔ́ m'a bà, bə̀myɛ́ ǹdə́ lyì bí byɛ̀bɛ́ bə̀ y'à jì bə ce Ezhibti tənà y w mɔ́, sə bə̀ m'a wùlì tɛ̃́ Cinu yé né, Yi pyɔ̀ w yó, Zhərəzalɛm nɛ́.