¹ Dɛ̃ rɛ́ rə̀myɛ́ mɔ́ yù wə, bə̀ m'a ji nwə̃́ y kɛ̀bɛ́ Zhəda tənà y wa: Nə́ zhe cɔ kɔ̀bɔ́ ò zhe jàn. Cinu lù byíl-fwɛ̀lɛ̀ n súlí n lù byílí dõ è kùr wə, n mə n kə́kɛ́lɛ́ wa. ² Pul-nə bwə̀rsé: tənà y kɛ̀bɛ́ è wɔ́ cángá mɔ́ zwí, èmyɛ́ kɛ̀bɛ́ è j'â zhǐ nà èdù yó mó! ³ Ǹ já ǹ nə́ ǹ pɛ y yə̀-zùlə́, zhə̀n zhə̀n ga, è gə́ zhe ǹmyɛ́ zhə̀n mɔ́ yilə. ⁴ Zə-na Cinu zhə̀nà, twéé twéé yilə, Cinu ń wɔ́ pàtá y kɛ̀bɛ́ è j'â ŋwɛ́nɛ́ twéé twéé mó, ⁵ bə̀ ń ce lyì bí byɛ̀bɛ́ bə̀ y'à jě pyǎlsɛ́ yó mó só tɛ̃́, n wǔr cɔ w kɔ̀bɔ́ lò yà ń wàr ń zwì ò wẽ́ mó n ló tɛ̃́, ń wǔr w n ce o mɛrhɛ dwã ǹdə́ cɛ yá, n ce ò n'ô dwə̀rh shó wə́. ⁶ Bə̀ m'a cèè w tɛ̃́ nə̀rh kùr wə, cìn-lwəl cìnə́ bé nə̀rh kùr wə, ǹdə́ bə-jàn-zhe cìnə́ bé nə̀rh kùr wə. ⁷ Wu-cángá cə́bal sɔ́má y j'â wɔ́ cángá, sə ǹ nə́ ǹ ce wu-cángá cə́bal sɔ́má y è wɔ́ cángá mɔ́ mɛrhɛ dwã. ⁸ Cinu, nə́ n'é dɛ̃̀ kɔn ǹmyɛ́ sõ, sɔ́má y kɛ̀bɛ́ ǹ nyə́ né ju nə pə nə́ba mɔ́ yó, kɔn rɛ́ tɛ̀bɛ́ nə́ bùlə̀ né n'ê pyà mɔ́, wɔ́ nə́ k'á byẽ̀ ǹ yil ré. ⁹ Cəcɛ̃ nɛ, wɔ́ ǹmyɛ́ à ywə́lə́ y j'â n'ê pyà, à wu w wẽ́, à surhə né j'â n'ê pyà mɔ́. Ǹ nyə́ né gə tú nə̀ n'ê pyìrh cɛ y yó yi ní, lũ w lyì bí n'ê cèrhè cángá tũ̀twĩ̀ĩ̀ tũ̌. ¹⁰ Sə bə̀ gə dùr lyì-bəlwɛ̀lɛ́ nɔ̀nɔ̀, è t'â cèrhè cángá tũ̀twĩ̀ĩ̀ tũ̌ yé. Tənà y kɛ̀bɛ́ bə̀ twĩ̀ kɔn rɛ́ tɛ̀bɛ́ rə̀ mə̌ è wẽ́ mó, è n'ê twĩ̀ lwɛlɛ e j'à bə Cinu zùwə́ y nánfɔ̀lɔ̀ w nɛ yé. ¹¹ Cinu, ǹ jɛ̃̀ y zhẽ̌ dɛ̃̌, sə bə̀ bə y nɛ yé, bə̀ m'a nə ǹ sónó nánfɔ̀lɔ̀ w ǹ zhe ǹ dwí rí yil mú, sə cìzhìl nánfɔ̀lɔ̀ m'a zə bɛ, myǐn mú mɔ̀bɔ́ ǹ tɛnɛ ǹ zwə̀ bé yil mú m'a jí bi. ¹² Cinu, ǹ nə́ ǹ pɛ nə́ba yə̀-zùlə́, wɔ́ ǹmyɛ́ ǹ nə́ ǹ pyìrh kɔn tɛ̀bɛ́ gakó nə́ n'ê wɛ̀rhɛ́ mɔ́, ǹ pɛ nə́ba. ¹³ Cinu, nə́ Yi, yó-cìnə́ dwã cìní nə́ba, sə wɔ́ ǹmyɛ́ yil ré dúdú nə́ k'é n'é byẽ̀. ¹⁴ Lyì bí byɛ̀bɛ́ bə̀ cù gə́ wàr bə̀ m'a k'e zə nyǔ, cùùrí myɛ gə́ k'ê wàr rə̀ zɛ̃̀ mɔ́ ce, ǹ tú ń bə̀ ń ce rə jé tɛ̃́ lyə́m lyə́m, ń súlí ń ce rə̀ yò lyǐrh mú myɛ jé tɛ̃́. ¹⁵ Ǹ ce tənà y jǐrh nánfwɛ̀lɛ̀, Cinu, ǹ ce tənà y jǐrh nánfwɛ̀lɛ̀, ǹ byili ǹ còrhó wə́, ǹ twẽ̌ tənà y swã́ nɛ́ gakó nə vò nə̀ kwã. ¹⁶ Cinu, zúzúnú yi ní, wɔ́ ǹmyɛ́ yó w bə̀ n'ê nyǐ ní. Ǹ gə tú ǹ nə́ ǹ pɛ còrhò-tum yi ní, bə̀ y'a j'a zɛ̃̀ yi-cər wɔ̀rhɔ́ nɛ. ¹⁷ Nə́ yàl ǹ yé né, Cinu, ǹdə kɛ̃ mɔ̀bɔ́ ń zhe pwǐ, ń bwə́l lúl ta, ń nə́ ń pyìrhí tɛ̃́ e jà ń nə́ ń kúrh yin rí kùr wə. ¹⁸ Nə́myɛ y'ǎ zɔ pwǐ, nə́ nwɛ̀nɛ̀ yin rí kùr wə, sə è nyɛ̌ dwã ǹdə wɔ́ zho nə́ lùl ta: nə́ yə̀ vwǎrh zə nə́ m'é bə̀ cɛ y yil yé, nə́ k'é yə̀ lyì-dùlə̀ myɛ zə nə́ bə̀ nə́ pə lũ w ni yé. ¹⁹ Ǹ lyì bí byɛ̀bɛ́ bə̀ cù mú m'a k'a zə nyǔ, bə̀ cùùrí m'a bùrhì. Zɛ̃̀-na tɛ̃́, búbwéé-nə wu-nyɔ̃̀ búbwéése, ámyɛ̌ byɛ̀bɛ́ á wɔ shó w kùr w mú! Bə̀ ǹ myɔ̀nɔ̀ w wɔ́ pwẽ̀ myɔ̀nɔ̀, sə cɛ y m'a k'a pə cə-kɔ́lɔ́ lyì bí byɛ̀bɛ́ bə̀ cù mú ni. Còrhò-tum rí bə̀ la pɔ cɛ y ǹdə́ nə̀-fɔ̀lɔ̀ w ga yó mó ²⁰ Zhəl, à dwí, zú ǹ sõ, sə́ vwɛ̃ ǹ bòlò w jɛ̀sɛ́ sə̀lyè y ga ń pyi ǹ cìn nyí ni. Shèè ǹ cìn ń dɛ̃̀ námpɔ́lɛ́, lyim rí só mó yi rí, ²¹ bə̀ nyǐ Cinu ń shí ń sõ jù w ń nə́ ń dwi, ń la còrhò-tum pɔ cɛ yó lyì bí ni bə̀ lwɛlɛ rɛ́ yilə. Sə cɛ y m'a yẽ̌ bə nə jal mɔ́, è k'ê t'â la lyì bí byɛ̀bɛ́ bə̀ gu mú shòò yé.