¹ Cinu, ǹmyɛ́ ǹ wɔ́ à Yi, à n'â zhẽ̌ ǹ yil ré dɛ̃̌, à n'â shènè ǹ yil ré, bə̀ ǹ twĩ̀ tũ̀-fwààlɛ, nyɛ̀bɛ́ ǹ tɛnɛ shãã shãã ga mɔ́, nə̀ j'â gwẽ̌ wɔ́ nə̀myɛ́ cìcì, nə̀ də̀ lyə́r kɔn mɔ́. ² Ǹ ce cɔ w jǐrh nə́kulə púl, ń ce cɔ w kɔ̀bɔ́ bə̀ lù byíl-fwàlsɛ bə kə́kɛ́lɛ́ w mɔ́ jǐrh jì-bwə̀r jàà. Zhələ bé cɔ w bə̀ lù bə kə́kɛ́lɛ́ mɔ́ k'ê də̀ cɔ yé, bə̀ j'â k'ê t'â la w kɔrhɔ bə lù w gaga yé. ³ Wɔ́ rə̀myɛ́ rə̀ ce dwí tɛ̀bɛ́ rə̀ zhe jàn mɔ́ n'ê cèrhé mó, wu-bárhɛ́ cìnə́ tənà y n'ê nyàm mɔ́ dɛ̃́dɛ̃́. ⁴ Bə̀ ǹ wɔ́ bǝ-jàn-zhǝǝre cí shòò jàà, ǹdə́ nə̀mɔ̀ mɔ́ shòò jàà, ń zúzúnú w yi ní, ǹdə́ shòò jàà y dwà zhò nánfɔ̀lɔ̀ w yi ní, ǹdə́ ywə́l mó cə-lumu w yi ní, bə̀ wu-bárhɛ́ cìnə́ shíshìrhə́ né nyɛ̌ ǹdə dwà-zho nánfɔ̀lɔ̀ ò n'ô ce byílí yó ta, ⁵ nə̀ nyɛ̌ dwã ǹdə nə̀nyɛ́nɛ́ lumi rí cə-kùlì yó ta. Ǹ nə́ ǹ ce zhələ bé gu bə̀ sɔ̀ wá, ǹdə ébɔ̃ ywə́l mó gə́ n'ê wɛ̀rhɛ́ cə-lumu w ní, ǹ nə́ ǹ ce wu-bárhɛ́ cìnə́ bé wə̀-dúúrí gwi. Címsi nánfɔ̀lɔ̀ dwə́ né gakó yilə ⁶ Lũ gakó Cinu mú mà n tɛnɛ címsi nánfɔ̀lɔ̀ pyɔ̀ w kɔ̀bɔ́ yó dwə́ né gakó yilə, nàmá bə̀ zhe nwə̃̌ ǹdə́ də̀vɛ̃́ nándwã́ címsi nánfɔ̀lɔ̀, nàmá byɛ̀bɛ́ bə̀ zhe nwə̃̌ è jà bə̀ zhe zhe gwàl ǹdə́ də̀vɛ̃́ nándwã́ kɛ̀bɛ́ bə̀ lyəl mó dwí dwí címsi nánfɔ̀lɔ̀. ⁷ Ń mà n ce kàmə̀jɛ̃̀ y è pyìlì dwə́ né gakó tɛ̃́ mɔ́ jé tɛ̃́ pyɔ̀ w òmyɛ́ mɔ́ yó, kàmə̀jɛ̃̀ y kɛ̀bɛ́ è pyìlì tənèsé gakó tɛ̃́ mɔ́. ⁸ Ń mà n ce cu mú jé tɛ̃́ gaga yilə. Cinu Yi mà n pɔ́pɔ̌ yésé gakó yə́-nàná nɛ́, sə ń mà n vùr ń dwí rí cìzhìl ré tənà y púlə́púlə́ wẽ́. Wɔ́ ńmyɛ̌, Cinu mú, ń wə̀l ré. ⁹ Dɛ̃ rɛ́ rə̀myɛ́ mɔ́ yù wə, bə̀ m'a wɔ̀: Wɔ́ ńmyɛ̌ ń wɔ́ nə́ Yi rí. Nə́ dɛ̃̀ kɔn ń sõ, sə ń nə́ ń zwẽ nə́ba. Wɔ́ Cinu mú mɔ̀bɔ́ nə́ dɛ̃̀ kɔn ń sõ mó. Fǔ-nə nə́ fùù, cə-nə nə́ wun yə̀ nyàn dɛ̃́dɛ̃́, ń gə́ nə́ ń vwǎrh nə́ba mɔ́ yilə. Bə̀ nɔ̀m Mɔwaabɛ tɛ̃́ bə bɔbwɛlɛ ¹⁰ Cinu jɛ̃̀ y m'a zhì pyɔ̀ w kɔ̀bɔ́ yó. Sə bə̀ m'a nɔ̀ Mɔwaabɛ tənà y tɛ̃́ bə bɔbwɛlɛ kùr yó, ǹdə bə̀ gə́ y'a kə́ màálɛ́ bə nyɔ́nyɔ́ pùlú gɔ́rɔ́ w nɛ́. ¹¹ Gàà mɔ́, è m'a cèlè è jɛ̀rh ǹdə bə̀ gə́ y'a cèlè jɛ̀rh bə̀ m'ê yɛ nɛ̃̌ nɛ́. È cìn-byilu mú m'a tó lyààrɛ tumə né nyɛ̀bɛ́ è jɛ̀sɛ́ la tũ̌ mú dɛnnɛ mə só. ¹² Cinu mà ǹ yìrh ǹ byílsí jàn rɛ́ jààsɛ́ bə̀ wàr bə̀ yí sə̀ nyí ni mú, n ló tɛ̃́, n bɔbwɛlɛ sɛ, n ce sə mɛrhɛ dwã ǹdə́ cɛ yá, cɛ y shó wə́.