¹ Nyǐ Cinu nə́ ń cɔ̀ cɛ yá, ń já ń nə́ ń cɔ̀ y lyə́m lyə́m, ń nə́ ń cɔ̀ è yé y ń gùlí dwã, ń nə́ ń làà è lyì bí, ² vwĩ̀-zwə́lnə bé ǹdə́ dwí rí ga, yó-cə́bal mɔ́ ǹdə́ ń tùntùnnə mó ga, kɛ̃ mɔ́ ǹdə́ ń tùntùnnə mó mɔ̀bɔ́ ń wɔ́ kɛ̃-byǐ ga, lò mó mɔ̀bɔ́ ń nə́ ń dɔ̌l mɔ́ ǹdə́ lò mó mɔ̀bɔ́ ń nə́ ń yè mó ga, lò mɔ̀bɔ́ ń nə́ ń jìmì ń kɔn mɔ́ ǹdə́ lò mɔ̀bɔ́ ń nə́ ń jìmì kɔn ń dõ sõ mó ga, lò mɔ̀bɔ́ bə̀ zhe ń jim ǹdə́ lò mɔ̀bɔ́ ń zwẽ jim mú ga. ³ Cɛ y m'a j'a cɔ̀ lyə́m lyə́m, bə̀ m'a pwà è wẽ̀ ré púlə́púlə́ bə yẽ̌ yə, kɔn tó nyí rí tɛ̀bɛ́ Cinu kwè mó ne. ⁴ Cɛ y è wɔ wu-zhùlù wẽ́ mó j'â n'ê cɔ̀ è la, lũ w púlə́púlə́ n'ô cɔ̀, ò j'â n'ô cɔ̀ ò la, pyǎlsɛ myɛ tó cɛ y nɛ sə̀ n'ê cɔ̀. ⁵ Cɛ y lyì bí nèsé byèlè yə, bə̀ bə̀ gar nyə́ né, bə̀ lyə́r lùl-e-púrsí, bə̀ cɔ̀ dɔbrɛ́ à y'à zɔ ǹdə́ bɛ twéé twéé yil mú. ⁶ Wɔ́ rə̀myɛ́ rə̀ ce bwelé námməlwɛ̀lɛ́ y j'â n'ê jí cɛ yá, è lyààrɛ́ zɛ̃̀ rə̀ zhe lyì bí byɛ̀bɛ́ bə̀ wɔ è yó mó. Wɔ́ rə̀myɛ́ rə̀ ce cɛ yó lyì bí j'â n'ê nywɛ̀ bə̀ la, è j'â wɔ́ bə̀ màngɛlɛ́ sásálaa bə̀ dàl. Cɔ w kɔ̀bɔ́ wu-zhùlù zhe w mó: də̀vɛ̃́ ǹdə́ wu-nyɔ̃̀ k'ê tɛ̀nɛ́ yé. ⁷ Wu-zhùlù zhe də̀vɛ̃́ nándwə̃̀ yə́, də̀vɛ̃́-cèmé né cɛ y n'ê cɔ̀ è la, lyì bí byɛ̀bɛ́ gakó bə̀ wun y'à nyɛ̀ mɔ́ n'ê wɔ́wɛ́lɛ́. ⁸ Gǔlsí wu-nyɔ̃̀ cəl ré guwə, lyì bí byɛ̀bɛ́ bə̀ y'à n'ê fùù mú sɔ̀ nánfɔ̀lɔ̀ w guwə, zɔ̃̀ w wu-nyɔ̃̀ cəl ré guwə. ⁹ Bə̀ k'ê t'â nywɛ̀ də̀vɛ̃́ ǹdə́ bə̀ n'ê nún yé, sə̀-kùùlí jǐrh cɛ̀ɛ́ rə̀ nyɔ̀rna bɛ́ nyú wə. ¹⁰ Cɔ w kɔ̀bɔ́ kaka tə̀ ò wẽ́ mó wǔr o shíshìrí tɛ̃́, jìsí gakó pyi, lò wàr ń zwì sə̀ wẽ́ yé. ¹¹ Sɔ́msɛ́ yó, bə̀ j'â zhe byã nɛ bə̀ n'ê bwə̀rh də̀vɛ̃́ bwə̀rhə́, fùwə́ dwí gakó jé, wu-nyɔ̃̀ j'a jé tɛ̃́ lyə́m lyə́m tənà y wa. ¹² Wu-zhùlù dúdú ò dàl cɔ w wa, bòlò w ò cɔ̀ mɔ́, j'a bɔbwɛlɛ kókó. ¹³ Tənà y wa, ǹdə́ dwə́ né ga sõ mó, è j'â nyɛ̌ ǹdə olyivyə́ə́ré byǎ bɛ́ kõ yi rí ta, ǹdə də̀vɛ̃́-cǒ byǎ bɛ́ gǔn mú yi rí ta, bə̀ gə tú bə̀ pɔ̌r bɛ bə̀ zhɛ̀ kwã nɛ́ mɔ́. Lũ gakó wu-nyɔ̃̀ búbwéésé ¹⁴ Lyì bí byɛ̀bɛ́ n'ê ce bə̀ cələ dwi, bə̀ n'ê mà wu-nyɔ̃̀ búbwéésé bə̀ m'ê nún Cinu zùwə́ nánfɔ̀lɔ̀ wá. Bə̀ zhǐ nə̀-fɔ̀lɔ̀ w səta bə̀ n'ê fùù ǹdə́ wu-nyɔ̃̀. ¹⁵ Bə̀ n'ê cèrhé Cinu, Yi-púrhí sõ, bə̀ n'ê cèrhé Cinu, Esərayɛl Yi rí yil ré, cɛmɛ nɛ́ nyɛ̀bɛ́ nə̀ wɔ nə̀-fɔ̀lɔ̀ w cəcəl w mó wẽ́. ¹⁶ Nə́ j'á zhǐ lũ w cə-yala gakó w nə́ nyɛ̌ bə̀ gə́ n'ê nún ní: «Cángá cə́bal mɔ́ nə còrhó!» Lũ gakó dwã nɛ gùlú mú Sə à wə̀lə̀: Kɔn zhɛ̀ à yilə, kɔn zhɛ̀ à yilə! Zwini zhe ne! Myìnù cìnə́ bé myìnì. Myìnù tũ̀twĩ̀ĩ̀! Myìnù cìnə́ bé myìnì. ¹⁷ È wɔ́ ywẽ nánfɔ̀lɔ̀ ǹdə́ gɔ́rɔ́ nánlyilyùmú ǹdə́ pɔ̀mɔ̀, ǹmyɛ́ mɔ̀bɔ́ ǹ wɔ́ tənà y lò mó yilə. ¹⁸ Lò mɔ̀bɔ́ ń mà n dùr ywẽ nánfɔ̀lɔ̀ w wùrhí y yé né mó, mà n tu gɔ́rɔ́ w nánlyilyùmú w wẽ́, lò mó mɔ̀bɔ́ ń mà n ŋwɛ̀nɛ́ n shí gɔ́rɔ́ nánlyilyùmú w n du mú, mà n tu pɔ̀mɔ̀ w wa, o zə mɔ. Dɛ̃̌-yi rí cə̀-zhã̌ nɛ́ pul, cɛ y kùr rí gə́ cĩ́ tɛ̃́ mə̀gã̌ mɔ́ n'ê zhízhǐ. ¹⁹ Cɛ y n'ê lwe dwã wa, cɛ y lo e bɔbwɛlɛ è j'â n'ê zhízhǐ dɛ̃́dɛ̃́. ²⁰ Cɛ y n'ê shìì ǹdə sə̀-nyɔ̀rɔ́ ta, è n'ê zhízhǐ ǹdə kòrhó ta. È yə̀-bəlɔ̀lɔ́ w dùmì rí n'ê pyárh y tɛ̃́, è tu tɛ̃́ è k'â wàr è la zã̀ɔ̃̀ yé. ²¹ Dɛ̃ rɛ́ rə̀myɛ́ mɔ́ yù wə, Cinu mà n bú ǹdə́ dɛ̃̌-yi rí shə̀dɛ́ɛ́sɛ, dɛ̃̌-yi rí wə, ń mà n bú ǹdə́ cɛ yó pyǎ bɛ́ myɛ, cɛ y yó. ²² Bə̀ m'a zə bɛ yómə́ bə ló dwã yó, gɔ́rɔ́ w nánlyilyùmú w wẽ́, bə̀ m'a ce be byə̀nə́-jù w bə pyi bə̀ nyí ni, sə kɔn gə tú è dɛnɛ kwã nɛ́, bə̀ m'a bùr bə̀ bùrsi. ²³ Bə̀ m'a ce cìzhìl cànà y nɛ, bə ce cìzhìl nánfɔ̀lɔ̀ gu nə̀nyɔ́nɔ́ wá. Zhə̀nà, lũ gakó Cinu mú wɔ́ pyɔ̌, Səyɔ̃ pyɔ̀ w yó ǹdə́ Zhərəzalɛm nɛ́, ń zùwə́ y wẽ́, náncɛsɛ́ yé né.