¹ Lyì bí byɛ̀bɛ́ bǝ̀ y'à n'ê zhə̀l cǝ-byín rí wẽ́ mó nɔ pwẽ̀ nánfɔ̀lɔ̀. Pwẽ̀ yǝ̌r lyì bí byɛ̀bɛ́ bǝ̀ y'à jě cu ywə́l tənà y w mɔ́. ² Ǹ ce bə̀ wu-nyɔ̃̀ fùwə́ y súlí dɛ̃́dɛ̃́, ǹ ce bə̀ wu-nyɔ̃̀ w pù. Bə̀ j'â n'ê fùù ǹ yé né ǹdə bə̀ gə́ y'a n'ê fùù jòró yi ní ta, ǹdə bə̀ gə́ y'a n'ê fùù wẽ̀ ré tɛ̀bɛ́ bə̀ pwà búlə́ kwã mɔ́ tòló yi ní ta. ³ Bə̀ ǹ kɔ́ zhĩĩ rí rə̀ dùmì rí y'à n'ê pyárh bɛ tɛ̃́ mɔ́, ǹdə́ də̀-dɔ̀lɔ̀ w bə̀ pyə́pyɛla nɛ́ w mɔ́, ǹdə́ bə̀ tũ̀-kùlə̀ né yó-cə́bal mɔ́ mã̀gwə̌ yə́, ǹ kɔ́ rɛ ǹdə Majã dɛ̃ rɛ́ yù w mú ta. ⁴ Nə̀cìl tɛ̀bɛ́ gakó rə̀ n'ê cèè cɛ y rə̀ m'ê dom y mó, ǹdə́ kàmə̀zù-fwɛ̀lɛ̀ kɛ̀bɛ́ gakó è byíbyílí jal wẽ́ mó, jǐrh myǐn ju dúdú kɔna, myǐn nyí-kɔna. ⁵ Bə̀ lùl bə̀sɔ́bwɛ̀lɛ́ bə pə nə́ba, bə̀ pɔ nə́ba bal-byǐ. Ŋwɔ̀nɔ́ wɔ è pyə́pyɛla nɛ́ yó. Bə̀ n'ê bwə̀l è yil ré bə̀: «Cícírnə-Nántwə̌, Yi rí tɛ̀bɛ́ rə̀ zhe jàn, Da gaga yilə, Yə̀-zùlə́ pyɔ̌.» ⁶ Dəvyidi pyɛ̀lɛ̀ də̀gwã́ y ǹdə́ ń pyɛ̀lɛ̀ rɛ́, ń la n tó kɔn tɛ̀bɛ́ rə̀ mə̌ ǹdə́ cángá tũ̀twĩ̀ĩ̀ rí dɛnnɛ n ce rə cĩ́ kùr e jà rə zhì kẽkẽ mó, m'a yə̀ ŋwɔ̀nɔ́ kɔ̀bɔ́ ò j'â já ǹdə́ yə̀-zùlə́ né nyɛ̀bɛ́ nə̀ bə zhɔ̌ zhe mó, kɔn zhí èlǎsɛ̃́ è m'ê la gaga yilə, lũ gakó Cinu sónó nánfɔ̀lɔ̀ w ò la rə̀myɛ́ mɔ́ wɔ̀rhɔ́. Samarɛ nɔr rɛ́ ⁷ Cinu zɔ̀m zɔ̀mɛ̀ n pə Zhakɔɔbɛ nɛ, sə rə̀ zɔ Esərayɛl. ⁸ Dwí rí púlə́púlə́ m'a nyɛ̀ɛ̀ rɛ, Efərəyim ǹdə́ Samarɛ lò mó mɔ̀bɔ́ gakó ń nə́ ń wə̀l ǹdə́ yó-dɛ̃̌-zhõ̌ e súlí ǹdə́ cìn-byilu: ⁹ «Bɔ-kwǎ bɛ́ ló tɛ̃́, nə́ m'ǎ lù ǹdə́ nə́kulə nyɛ̀bɛ́ nə̀ sə̀l mó, bə̀ kà shəkɔmɔɔrɛbá bə ló tɛ̃́, nə́ m'ǎ cĩ́ sɛ́ɛ́dərɛbá rə̀ jàà wa» mɔ́. ¹⁰ Cinu ce Erɛsɛ̃ zwə̀ bé zɛ̃̀ bə̀ n'ê bwí ǹdə́ dwí rí, ń cìrh rə̀ búl-dwã bɛ́ n ce né, ¹¹ Siri lyì bí wɔ yi-púrhí sõ, Shilisəti lyì bí wɔ bə̀ kwã nɛ́ yi-zùr sõ, bə j'a búl bə kǎl bə̀ nyə́ né gakó bə jí Esərayɛl. S'e jà ǹdə́ rə̀myɛ́ ga, ń lyim rí j'â yə̀ pɛ́ rə vò kwã yé, ń jɛ̃̀ y myɛ j'a gwẽ̌ zhẽ̌ dɛ̃̌ e cèlè è zhǐ. ¹² Sə dwí rí j'â yə̀ kwɛ̃̀ rə bə̀ lò mó mɔ̀bɔ́ ń yà ń nə́ ń mà rɛ mɔ́ sõ yé, bə̀ yə̀ lũ gakó Cinu mú pyà yé. ¹³ Rə̀myɛ́ ce Cinu já n tó dwã n gõ̀ yó w ǹdə́ nə̀byíl ré ga Esərayɛl nɛ́, kwã̌ jɛ̃̀ y ǹdə́ vwal-gɔ w ga dɛ̃ rə̀dù: ¹⁴ náncɛ y ǹdə́ lyì-fɔ̀lɔ̀ wá, wɔ́ yó wə́, nyì-zwennə mó mɔ̀bɔ́ ń nə́ ń cèrhè kɔma bɛ́ mɔ́, wɔ́ nə̀byíl ré. ¹⁵ Dwí rí tɛ̀bɛ́ yó-cìnə́ bé dwĩ̀ ri, sə lyì bí byɛ̀bɛ́ bə̀ y'à n'ê kál rɛ mɔ́ j'a kù gɔ́rɔ́ bə zù. ¹⁶ Wɔ́ rə̀myɛ́ rə̀ ce, Cinu wu t'â la nyàn zal ǹdə́ rə̀ ébwá-dàlá bɛ́ yé, ń tá ń la rə̀ bə̀tǎlsɛ́ ǹdə́ rə̀ ejə̀nə̀ bé nɔ̀nɔ̀ dǔr yé, bə̀ bə̀ gakó j'â wɔ́ lyì-bəlwǎlsɛ ǹdə́ lwɛlɛ cìnə̀, nyə́ né gakó j'a sú ǹdə́ zɔ̀mà nyɛ̀bɛ́ nə̀ bə kùr zhe. E jà ǹdə́ rə̀myɛ́ ga, ń lyim rí j'â yə̀ pɛ́ rə vò kwã yé, ń jɛ̃̀ y myɛ j'â gwẽ̌ zhẽ̌ dɛ̃̌ e cèlè è zhǐ. ¹⁷ Bə̀ wu-bárhɛ́ tũ̀twĩ̀ĩ̀ rí kwɛ̃́ rə̀ zhe ǹdə myǐn mɔ̀bɔ́ mə̀ n'ê jí bàasɔ̌brɛ́ ǹdə́ ésɔ́ndɛ́, mə zɛ̃̀ mə lyɛ̃ mə zù tú w swààlɛ́ wẽ́ ta, rə̀myɛ́ yi ní ǹdə́ mə̀ nyɛ̀ɛ̀sɛ́ n'ê mwɛ̃ dwã nɛ sə̀ la dɛ̃̌-yi wə. ¹⁸ Lũ gakó Cinu mú lyim rí rə̀ lyɛ̃ cɛ nɛ mɔ́ ce tənà y dom, dwí rí myɛ jǐrh ǹdə wɔ́ myǐn mú nyí-kɔn ta: lòlò kə́ ń tá ń yẽ̌ ń da-byǐ ni ń lú yé. ¹⁹ Bə̀ n'ê gòm jə̀-jĩ́ sõ, e jà nɔrh mɔ́ j'a gwẽ̌ cẽ mə̀ ŋwɛ́nɛ́, bə jí jə̀-gwã̀ sõ, e jà sú j'â tɛ̀nɛ́ yé, lò gakó nə́ ń dɔ̀m ń vɔ̃̀ w nàmá bɛ́. ²⁰ Manasɛ nə́ ń dɔ̀m Efərəyim, Efərəyim myɛ nə́ ń dɔ̀m Manasɛ, bə zɛ̃̀ bə ce nyí dwã w bə̀ m'ê bwí ǹdə́ Zhəda. ²¹ E jà ǹdə́ rə̀myɛ́ ga, ń lyim rí j'â yə̀ pɛ́ rə vò kwã yé, ń jɛ̃̀ y myɛ j'â gwẽ̌ zhẽ̌ dɛ̃̌ e cèlè è zhǐ.