¹ Cinu wɔ̀ nɛ: «Kwě bwèlè nánfwɛ̀lɛ̀, sə́ zə lù ku ò nyí nánsə́sɔ́mɛ́, ò dwí rí wɔ tɛ̃́ mɔ́, ń mə́ kɛ̃ è yó bə̀: Mayɛr-Shalal-Ashɛ-Baazɛ yilə. Làlà-Wẽ̀-bə̀-pwà-búlə́-kwã-Kɔn-bwəlse-Bubu yilə» ² À zə lyì bí byɛ̀bɛ́ bə̀ y'à zhe bə̀ zhə̀n mɔ́, bə yə̀ zhə̀n cìnə́: vwĩ̀-zwə́lnə Urəya ǹdə́ Yəbərəca byǐ Zakarɛ. ³ 3 À twẽ̌ a yí kɛ̃ mɔ́ ń yà ń wɔ́ nyì-zwennə mó yala nɛ, sə ń kwè pǔ, n lù byǐ. Cinu wɔ̀ nɛ: «Ce ń yil bə̀ Mayɛr-Shalal-Ashɛ-Baazɛ, ⁴ bə̀ bə̀sɔ́bwɛ̀lɛ́ y la m'e ŋwɛ̀nɛ́ e wɔ̀ ‹À da› ǹdə́ ‹À ná› mɔ́, bə̀ m'a zə Damaasɛ cɔ w nə̀cɛ̀ndɛ́ ǹdə́ wẽ̀ ré tɛ̀bɛ́ bə̀ pwà búlə́ né kwã Samarɛ́ nɛ́ mɔ́ bə m'e bə̀ Ashəri pyɔ̌ mɔ́ yé né.» ⁵ Cinu kə́ n zɔ̀m ǹdə́ nɛ n wɔ̀: ⁶ Dwí rí tɛ̀bɛ́ gə́ n'ê cẽ Shilowe nàná bɛ́ bə̀ n'ê dùr màmà mɔ́ yò, rə zɛ̃̀ rə̀ n'ê fùù Erɛsɛ̃ ǹdə́ Erəmalya byǐ mú shò kwã mɔ́ ce, ⁷ Cinu mà n ce Efəraatɛ bù-fwɛ̀lɛ̀ y nàná bɛ́ bə̀ j'â jɛ̀ e jà bə̀ j'â já dɛ̃́dɛ̃́ mɔ́ bə̀ bə̀ yó, Ashəri pyɔ̌ mɔ́ ǹdə́ ń zùwə́ y gakó. È m'a sú è bù-yírh rí e zɛ̃̀ dɛ̃̌ rə̀ cə-yala gakó, è m'a gar è bù-cǔr rí gakó. ⁸ È m'a zwẽ Zhəda tənà yá, e sú y e bɔrh, e mɔ́lɛ́ ya, e yí è byã nɛ, sə è bù-cǔr rí rə̀ m'a twẽ̌ rə vò rə̀ kwã mɔ́, m'a kwè ǹ tənà y wɛ̃̀ rɛ́ gakó, Emawəə! Emawəə mó wɔ́ bɛlɛ jú myɔrhɔ ⁹ Kəkə-nə, dwə́, ywẽ búl nə gu abá! Lũ w tənèsé shɛ̀bɛ́ sə̀ wɔ pyépyé mó, pyèrhè-nə á zhã̌ á cili! Lyɛ̃̀-na á búlə́ wẽ̀ ré á cə̌rh ne, sə ywẽ búl nə gu ába! Lyɛ̃̀-na á búlə́ wẽ̀ ré á cə̌rh ne, sə ywẽ búl nə gu ába! ¹⁰ Tɛnɛ-na kɔn á la wɔ̀rhɔ́, rə̀ m'a làà tɛ̃́. Zɔ̌m-na zɔ̀mà, nə̀ m'a mɛ̃ nánfò, bə̀ Yi ŋwɛ́nɛ́ ǹdǝ́ nǝ́ba. È wɔ́ Cinu dúdú ywẽ bə̀ m'a dùr ¹¹ Zhə̀n ga, nyǐ kɔn tɛ̀bɛ́ Cinu wə̀l ne, ń jɛ̃̀ y gə́ zɔ nɛ, n zɛ̃̀ n pɛ̃ nyí b'à bə̀k'a kwè sɔ́má y kɛ̀bɛ́ dwí rí tɛ̀bɛ́ kwè mó yi ní mú: ¹² Á t'á la kɔn rɛ́ tɛ̀bɛ́ gakó dwí rí tɛ̀bɛ́ n'ê byẽ̀ bə̀ «myìnù tũ̀twĩ̀ĩ̀» mú byõ̌ bə̀ «myìnù tũ̀twĩ̀ĩ̀» yé. Á t'á la kɔn rɛ́ tɛ̀bɛ́ rə̀ n'ê dùr rə̀ ywẽ mó, ywẽ dǔr yé, rə̀ ywẽ myɛ j'â t'â la ába gu yé. ¹³ È wɔ́ lũ gakó Cinu mú á m'ǎ nyǐ ǹdə ń já ń bə dõ zhe ta; wɔ́ ńmyɛ̌ ywẽ á m'ǎ dùr, ńmyɛ̌ ywẽ myɛ á mə̌ s'á dùr dɛ̃́dɛ̃́. ¹⁴ Ń mà n yə̀ còrhó-jì ǹdə́ nə́kulu kɔ̀bɔ́ lyì n'ê zhə̀rə̀, ǹdə́ nə̀kul-fɔ̀lɔ̀ w kɔ̀bɔ́ nɛ lyì n'ê mà bǝ̀ nǝ̀rh bǝ̀ lwé tɛ̃́ mɔ́, Esərayɛl jìsí sə̀lyè y yilə, gùndwǐ ǹdə́ pɔ̀mɔ̀ Zhərəzalɛm lyì bí yilə. ¹⁵ Lyì nánjə̀jóló m'a mà bǝ̀ nǝ̀rh né, bə ló tɛ̃́, bə̀ m'a cɛ̀mɛ̀ dɛ̃́dɛ̃́, bə̀ m'a tu pɔ̀mɔ̀ wẽ́, sə bə̀ m'a zə bɛ. Bə̀ cili kɔn rɛ́ tɛ̀bɛ́ Cinu byili mú ǹdə́ zhə̀n rɛ́ tɛ̀bɛ́ ń pɔ mɔ́ ¹⁶ Ce zhə̀n rɛ́ à pɔ mɔ́ ǹdə́ kɔn rɛ́ tɛ̀bɛ́ à byili mú j'a mɛ̃ à kwã-lyì bí dúdú cəcəl wə. ¹⁷ À n'â dɛ̃̀ Cinu ń nə́ ń shèè ń yé-zwã̌ y Zhakɔɔbɛ kɛ̀lɛ́ y nɛ mɔ́, à j'â n'â nyǐ ń yó wə. ¹⁸ Àmyɛ́ ǹdə́ byǎ bɛ́ byɛ̀bɛ́ Cinu pɔ nɛ mɔ́, nə́ wɔ́ myaarhɛ ǹdə́ kɔn rɛ́ tɛ̀bɛ́ rə̀ bàn mɔ́ swalna Esərayɛl nɛ́, lũ gakó Cinu mú ń jě Səyɔ̃ pyɔ̀ w yó mó, yil yilə. ¹⁹ Sə bə̀ gə wə̀l ába: «Pyǎ-na á sú rə̀ kùr lyì bí byɛ̀bɛ́ bə̀ n'ê byẽ̀ ywə́lsé mó, ǹdə́ lyì bí byɛ̀bɛ́ bə̀ n'ê wúl shìlsi e jà bə̀ n'ê sɔ́sɔ́mɛ́ bə̀ nyú w mú sõ; dwí nə bə mə̌ sə rə pyà rə sú rə̀ yə né wun ǹdə́ rə̀ cùùrí wun lyì-nyìsí yil nà?» ²⁰ Bə̀ zhəl kɔn rɛ́ tɛ̀bɛ́ Cinu byili mú ǹdə́ zhə̀n rɛ́ tɛ̀bɛ́ ń pɔ mɔ́ nɛ! Bə̀ zɔ̀mà nɛ́ gə yə̀ zɔ̀mɛ̀ rɛ́ rə̀myɛ́ mɔ́ nɛ tó, bə̀ j'â t'â la cə-kɔ́lɔ́ zal yé... Lò mó mɔ̀bɔ́ ń tá ń la cə-kɔ́lɔ́ zal mɔ́ ²¹ Bə̀ m'a tó tənà y w bə lyɛ̃ ǹdə́ lyààrɛ ǹdə́ nɔrh. Nɔrh mɔ́ m'a ce bə̀ lyim zɛ̃̀ rə̀ n'ê yì, bə bwəl lwɛlɛ bə pə bə̀ pyɔ̌ mɔ́ nɛ bə súlí bə tùrh bə̀ Yi rí. Bə̀ m'a kwẽ̌ bə nyǐ dɛ̃̌-yi wə, ²² bə zɛ̃̀ bə k'a nyǐ cɛ yá, sə bə̀ m'a púrí j'â wɔ́: zúzúnú ǹdə́ cə-byín, cə-byṹ kɔ̀bɔ́ ò n'ô zɛ̃̀ wu ni, cəcɛ̃ kɛ̀bɛ́ bə̀ n'ê cìrh lyì bə̀ ce è wẽ́ mó. Yə̀-zùlə́ pyɛ̀lɛ̀ rɛ́ cə-kɔ́lɔ́ wá