¹ Yɔtam byǐ Akaazɛ, Ozhaasɛ nɔ̃̌ wá, ń yà ń wɔ́ Zhəda pyɔ̌ mɔ́, pyɛ̀lɛ̀ rɛ́ jú yi ní, Siri pyɔ̌ Erɛsɛ̃ ǹdə́ Esərayɛl pyɔ̌ Pɛka, Erəmalya byǐ mú, zɛ̃̀ bə bə̀ bə̀ la bú ǹdə́ Zhərəzalɛm cɔ wá, sə bə̀ yə̀ ŋwɛ̀nɛ́ bə bú ǹdə́ w yé. ² Bə vò bə cĩ́ nyí Dəvyidi kɛ̀lɛ́ y lyì bí ni bə wɔ̀: «Siri lyì bí cĩ́ bə̀ zulə́ jàà y Efərəyim ní.» Rə̀myɛ́ yi ní, ńmyɛ̌ ǹdə́ ń dwí rí wun j'a zɛ̃̀ nə̀ n'ê vɔ́vwǎ ǹdə zho gə́ y'a ce tú w cèmé né zɛ̃̀ nə̀ n'ê shìì ní. ³ Cinu wɔ̀ Ezəyi ni: «Du ń vò ń jəl Akaazɛ, ǹmyɛ́ ǹdə́ ǹ byǐ Shəyar-Yəshuubi, gɔ́rɔ́ w kɔ̀bɔ́ nɛ̃̌ mɔ́ n'ê tó mə̀ m'ê zhə̀l dɛ̃̌-sõ póló w wẽ́ mó yə́-pɛ̀lɛ́ y səta, lyì bí byɛ̀bɛ́ bə̀ n'ê shɛ̀rh gàndɛ́ mɔ́ cɛ y sɔ́má y səta. ⁴ Ǹ m'ǎ wɔ̀ mɔ: J'á jòm shɛ́ɛ́, bə̀k'á dùr ywẽ yé! ǹ wu bə̀k'a ga, myǐn-dǎr nánkùkǔlsí shɛ̀bɛ́ sə̀lyè y sə̀ kwɛ̃́ myǐn sə̀ zhe, Siri lyì bal Erɛsɛ̃ ǹdə́ Erəmalya byǐ mú lyim rí rə̀ j'a zɛ̃̀ rə̀ n'ê yì dɛ̃́dɛ̃́ mɔ́ yil yé. ⁵ Siri lyì bí gə́ pyà ǹ yò zhùlù, bə̀myɛ́ ǹdə́ Efərəyim e súlí Erəmalya byǐ mú, bə̀ y'à m'ê zɔ̀m bə̀ zhe: ⁶ ‹Bà-na nə́ vò nə́ ce ywẽ zə Zhəda tənà yá, nə́ zù è wẽ́ nə́ m'é ce e zù nə́ba, sə nə́ ce Tabəyɛl byǐ mú yə̀ è pyɔ̌ n jòm gàà› mɔ́ ce, ⁷ 7 nyǐ Cinu Yi nyí rí: rə̀myɛ́ mɔ́ t'â la ŋwɔ̀nɔ́ yé, rə̀myɛ́ mɔ́ t'â la yál yé! ⁸ Bə̀ Siri cə-fɔ̀lɔ̀ w wɔ́ Damaasɛ Erɛsɛ̃ zɛ̃̀ ń wɔ́ Damaasɛ yó-cə́bal mɔ́, è gwẽ̌ dǎl byinə shə́-shə̀ldù ǹdə́ nə̀nu, sə Efərəyim bə̀ la tɛ̃́ nɔ́m bə bɔbwɛlɛ mɔ́ k'ê t'â la dwí yál yé, ⁹ Efərəyim cə-fɔ̀lɔ̀ w wɔ́ Samarɛ, Erəmalya byǐ mú zɛ̃̀ ń wɔ́ Samarɛ yó-cə́bal mɔ́. Á gə yə̀ nyí zwẽ, á t'á la lú yé.» Emawəə mó myɔrhɔ wá ¹⁰ Cinu kə́ n zɔ̀m ǹdə́ Akaazɛ n wɔ̀: ¹¹ «Lwə̌l myɔrhɔ Cinu ǹ Yi rí ni, ǹ cìn yilə; lwə̌l w o shí cɛ y kùr w tɛ̃́tɛ̃́, ráá pyàr rɛ́ yə́-pǎlsɛ́ wa, dɛ̃̌-yi rí wə» ¹² Akaazɛ lyár n wɔ̀: «À t'â la w lwə̌l yé, e j'à t'â la Cinu zhõ̀ yé.» ¹³ N zɛ̃̀ n wɔ̀: Rə̀myɛ́ yilə, cili-nə, Dəvyidi kɛ̀lɛ́ y lyì! Á gə́ n'á lyɛ̀ɛ̀ numbyínsí mú j'â gwẽ̌ yə̀ yí, á zɛ̃̀ á n'á yǎl á lyɛ̀ɛ̀ à Yi rí myɛ á súlí? ¹⁴ Rə̀myɛ́ yilə, Cinu cìcì mú mà n pə ába myɔrhɔ: «Nyǐ kə-bóma mó zhe pǔ, ń mà n lù bal-byǐ. sə ń mà n ce è yil bə̀ Emawǝǝb.» ¹⁵ Yil nwə̃̌ ǹdə́ tùr ń mà nə́ ń jí, ń mà nə́ ń ŋwɛ̀nɛ́ ń cẽ lwɛlɛ yò, n zɛ̃̀ ń nə́ ń cír tɛ̀bɛ́ rə̀ càn. ¹⁶ Sə bə̀sɔ́bwɛ̀lɛ́ y la m'e ŋwɛ̀nɛ́ e cẽ lwɛlɛ yò s'e m'e ŋwɛ̀nɛ́ e cír tɛ̀bɛ́ rə̀ càn mɔ́, tənà y kɛ̀bɛ́ ǹ nə́ ǹ dùr è pyǎ bɛ́ bə̀lyè y ywẽ mó, pyǎ bɛ́ m'a kwɛ̃̀ bə yẽ̌ yə. ¹⁷ Cinu mà n ce dwã nɛ́ nyɛ̀bɛ́ nə̀ dwí gwẽ̌ yə̀ nɛ́ yàl gaga, Efərəyim gə́ vùr è cìn Zhəda wẽ́ yi ní ga mɔ́, yí ǹmyɛ́ ǹdə́ ǹ dwí rí ǹdə́ ǹ da kɛ̀lɛ́ y lyì bí yilə, — Ashəri pyɔ̌ mɔ́. ¹⁸ Dɛ̃ rɛ́ rə̀myɛ́ mɔ́ yù wə, Cinu mà n byẽ̀ zɔ̀sɛ́ sə̀ ŋwɛ́nɛ́ Ezhibti nɛ̃̌-gwáárɛ́ yə́-pɛ̀lɛ́ w mɔ́ ǹdə́ twìsí sə̀ wɔ Ashəri tənà y w mɔ́. ¹⁹ Sə̀ m'a bà, sə sə̀ gakó m'a jòm nə̀-gwààlɛ́ nánlyilyǐmdí ǹdə́ nə́kulə né nə̀ lo lo mó bɔ̀là bɛ́ wẽ́, ǹdə́ swààlɛ́ gakó e súlí ǹdə́ gɔ-dɔ́m-jààsɛ́ gakó wẽ́. ²⁰ Dɛ̃ rɛ́ rə̀myɛ́ mɔ́ yù wə, Cinu mà n fɔ̃̀ yó w ǹdə́ nèsé kur rí ǹdə́ fwɛ̀nɛ̀ kɛ̀bɛ́ ń zwẽ ń la mə n twĩ̀ sə n kwɛ̃̌, Efəraatɛ bù-fwɛ̀lɛ̀ y èpákɛ̀, Ashəri pyɔ̌ mɔ́ sõ mó. Tama nɛ́ myɛ m'a fɔ̃̀. ²¹ Dɛ̃ rɛ́ rə̀myɛ́ mɔ́ yù wə, lò gakó mà n kɔ̃̀ nə̀cɛl rə̀dù, vwàmá nánfwààlɛ́ yilə, ǹdə́ vwàmá nə̀lyè, vwə̌-ywàálɛ́ yilə, ²² sə yil mú gə́ la jɛ́nɛ́ zal dɛ̃́dɛ̃́ mɔ́ ce, bə̀ m'a jí yil nwə̃̌; zhə̀n ga, wɔ́ yil nwə̃̌ ǹdə́ tùr lyì bí byɛ̀bɛ́ bə̀ la tənà y w dǎl mɔ́ m'a m'e kɔ̃̀ bə̀ cìnə̀. ²³ Dɛ̃ rɛ́ rə̀myɛ́ mɔ́ yù wə, jàà kɛ̀bɛ́ gakó də̀vɛ̃́-cèmé mɔ̀rhɔ̀ y'à wɔ è wẽ́, nə̀ ye y y'à yú wár-kùlsi mɔ̀rhɔ̀ mɔ́, m'a jǐrh bàasɔ̌brɛ ǹdə́ ésɔ́ndɛ. ²⁴ Bə̀ m'a zə cama ǹdə́ twã bə m'e b'è wẽ́, bə̀ tənà y púlə́púlə́ m'a jǐrh bàasɔ̌brɛ ǹdə́ ésɔ́ndɛ. ²⁵ È gə wɔ́ pyàr rɛ́ tɛ̀bɛ́ gakó bə̀ y'à n'ê sàrh ǹdə́ bə̀tó-sɔ̀rhɔ́ mɔ́, bə̀ k'ê t'â la bàasɔ̌brɛ ǹdə́ ésɔ́ndɛ ywẽ dǔr rə̀ wẽ́ yé: è m'a yə̀ nɛ̃ ǹdə́ pyììsi gɔ-dɔ́m-jàà.