¹ Pyɔ̌ Ozhaasɛ cu mú byin rí, À nɔ Cinu ń yà ń jě pyɛ̀lɛ̀ də̀gwã́ è y'à j'â nyɛ̌ dɛ̃̌dɛ̃̌ yó. Ń gárfó w y'à j'a sú Còrhó-jì yə́. ² Sərafɛ̃́báa y'à zhǐ ń yə́-pɛ̀lɛ́ wa. Bə̀myɛ́ mə̀dù gakó yà ń zhe vɔ̀mɛ̀ nyə̀ldù: vɔ̀mɛ̀ nə̀lyè y'à wɔ́ bə̀ yésé pyìlù yilə, vɔ̀mɛ̀ nə̀lyè y'à wɔ́ bə̀ nèsé pyìlù yilə, vɔ̀mɛ̀ nə̀lyè dwã bɛ́ y'à wɔ́ bə̀ zã̀ɔ̃̀ mɔ́ yilə. ³ Bə̀ y'à n'ê bya bə̀ ce dwã nɛ bə̀ zhe: «Lũ gakó Cinu mú wɔ́ Cɛ̀nɛ̀ cǝ́bal, cɛ̀nɛ̀ cǝ́bal, cɛ̀nɛ̀ cǝ́bal, ń còrhó w sú lũ w gakó!» ⁴ 4 Còrhó-jì y bwə̀ə̀lé gə́ zhí zhí mə̀gã̌ mɔ́ j'a zɛ̃̀ rə̀ n'ê zhízhǐ mɔ̀bɔ́ ń yà nə́ ń bya mɔ́ cəl ré kùr wə, Còrhó-jì y j'a zɛ̃̀ è n'ê swí ǹdə́ nyɛ̀rh. ⁵ Rə̀myɛ́ yó à wə̀lə̀: «Zwini zhe ne! à yò zhìlì, b'à wɔ́ lò mɔ̀bɔ́ ń nyì-vɔr rɛ́ zhe jìmdi, à ŋwɛ́nɛ́ dwí tɛ̀bɛ́ rə̀ lyì bí nyì-vɔr rɛ́ zhe jìmdi cəcəl wə, e jà à yírhə́ jòm pyɔ̌ mɔ́, lũ gakó Cinu mú yó.» ⁶ Sərafɛ̃́bá mə̀dù zɛ̃̀ vɔ̀mɛ̀ n bə̀ à nyí ni, ǹdə́ myìn-cɛlɛ ń jɔ̃̀ wa, ń yà ń zə pyálsɛ n mə n kwè vwĩ̀-jùlú w yó. ⁷ N zə rɛ n dwə̀rh à nyí rí ni, n zɛ̃̀ n wɔ̀: «Tɛ̀bɛ́ gə́ j'a dwə̀rh ǹ nyì-vɔr rɛ́ nɛ mɔ́ ce, ǹ dóó w k'ô tɛ̀nɛ́ ǹdə́ mɔ́ yé, bə̀ vùr ǹ yə̀-bəlɔ̀lɔ́ wá.» ⁸ Rə̀myɛ́ yó à nyɛ̀ɛ̀ Cinu cəl ré rə̀ y'à n'ê bwə̀rh rə̀ zhe: «Mɔ̌ à nə m'a twĩ̀? Mɔ̌ ń nə mà n vò nə́ yilə?» a zɛ̃̀ a lyár a wɔ̀: «Nyǐn ni, twĩ̌ àmyɛ́!» ⁹ N wɔ̀: «Zhəl, ǹ m'ǎ wɔ̀ dwí rí tɛ̀bɛ́ nɛ: Cili-nə cɛ̀nɛ̀, e jà á t'á la rə̀ kùr nyɔ̀ɔ̀ yé, nyǐ-nə cɛ̀nɛ̀, e jà á t'á la rə̀ pár lwar yé. ¹⁰ Ce dwí rí tɛ̀bɛ́ wu w pyi, ce rə̀ zhã̌ nɛ́ bə̀k'a nyɛ̀ɛ̀ nàná yé, cìnì rə̀ yírhə́ né! Rə̀ bə̀k'a nyǐ ǹdə́ rə̀ yírhə́ né rə nə nɛ́ yé, rə̀ bə̀k'a nyɛ̀ɛ̀ ǹdə́ rə̀ zhã̌ nɛ́ yé! Rə̀ bə̀k'a nyɛ̀ɛ̀ rə̀ kùr yé! Rə̀ bə̀k'a ŋwɛ̀nɛ́ rə pyìrhí rə̀ wu, sə rə zɛ̃̀ rə wárh yé!» ¹¹ Rə̀myɛ́ yó, à bwə̀rh a wɔ̀: «Kɔn la m'e yí dǒ, Cinu?» N lyár n wɔ̀: «Kɔn la m'e yí cɛmɛ nɛ́ cɔ̀ lyə́m lyə́m, lòlò kə́ ń tə̀ nə̀ wẽ́ yé, lòlò kə́ ń tə̀ jìsí wẽ́ yé, cɛ y myɛ cɔ̀, e jǐrh wu-zhùlù jàà.» ¹² Cinu mà n ce lyì vò pyépyé, sə cɛrh nánzhəzhɔ̌ m'a pyẽ̀ tɛ̃́ nánfò tənà y wẽ́. ¹³ Sə lyì bí lò mə̀dù nunə shí yó w gə gwẽ̌ ŋwɛ́nɛ́ è wẽ́ myɛ, bə̀ m'a ji bə̀myɛ myǐn, ǹdə shɛ́ɛ́nɛ y ǹdə́ tərəbɛ̃́tɛ y bə̀ kà, è dǎl sə̀ kùrə̀ né dúdú mú ta, sə̀ kùrə̀ né wɔ́ dwí tɛ̀bɛ́ rə̀ wɔ́ Yi kɔna.