¹ À m'a ji nwə̃́ a pə à dɔwa mɔ́ nɛ, dɔwa-mɔ́-mɔ̀bɔ́-bə̀-só mó ǹdə́ ń də̀vɛ̃́-cèmé né cɛ y nwə̃́ yə́: À dɔwa-mɔ́-mɔ̀bɔ́-à-só mó yà ń zhe də̀vɛ̃́-cèmé cɛ, pyɛ̀lɛ́ nə̀bán nɛ, cɛ kɛ̀bɛ́ è y'à càn wẽ́. ² Ń jǐrh cɛ y gàà mɔ́, n vùr è nə́kulə né, n zɛ̃̀ n zhele də̀vɛ̃́-cèmé né nyɛ̀bɛ́ nə̀ j'â búl nə̀ càn mɔ́ è wẽ́. N lù jì nánjíjíní e vò dɛ̃̌dɛ̃̌ nə̀ cəcəl wə, n súlí n kù gɔ́rɔ́ də̀vɛ̃́-cèmé né byǎ bɛ́ pyárh mɔ́ yilə. Ń yà ń nə́ ń dɛ̃̀ bə̀ nə̀ ce də̀vɛ̃́-cèmé byǎ náàcɛ̀nà, nə zɛ̃̀ nə k'a ce byǎ námməywààlɛ. ³ Èlǎsɛ̃́ ámyɛ̌ byɛ̀bɛ́ á jě Zhərəzalɛm nɛ́ mɔ́ ǹdə́ Zhəda lyì, yál-na bù-kárna àmyɛ́ ǹd'â də̀vɛ̃́-cèmé né cɛ y cəcəl wə. ⁴ À nə y'à wɔ̌ à m'a wɛ̀rhɛ́ kɔn rə k'e dwini tɛ̀bɛ́ à wɛ̀rhɛ́ à də̀vɛ̃́-cèmé né cɛ y yil mú? À y'à n'â dɛ̃̀ bə̀ nə̀ ce byǎ náàcɛ̀nà, è nə wɔ́ byè yil nə̀ k'a kwɛ̃̀ nə ce byǎ námməywààlɛ? ⁵ Rə̀myɛ́ yilə, à m'a byili ába kɔn rɛ́ tɛ̀bɛ́ à la à də̀vɛ̃́-cèmé né cɛ y nɛ wɔ̀rhɔ́ mɔ́: à m'a wǔr è bɔ́ɔ́ wá, mùnì ga vwàmá dɔ̃̀ də̀vɛ̃́-cèmé né, a kǎr è byílí y jàà èdù, mùnì ga bə cèè y tɛ̃́. ⁶ À m'a ce e yə̀ pyɛ̀lɛ́ nə̀bán tɛ̀bɛ́ rə̀ pyě tɛ̃́ nánfò, bə̀ t'â la də̀vɛ̃́-cèmé né jɛ̀sɛ́ góm yé, bə̀ t'â la nɛ vwál myɛ yé, bàasɔ̌brɛ ǹdə́ ésɔ́ndɛ m'a lyĩ cɛ y wẽ́, sə à m'a cə̀r éban rɛ́ rə̀ bə̀ dwà y nɛ̃̌ mɔ́ gàà mɔ́ lwé yé. ⁷ Lũ gakó Cinu mú də̀vɛ̃́-cèmé né cɛ yá, wɔ́ Esərayɛl kɛ̀lɛ́ yá, Zhəda lyì bí zɛ̃̀ bə̀ wɔ́ də̀vɛ̃́-cèmé né ń yà ń só dɛ̃́dɛ̃́ mɔ́. Ń yà ń nə́ ń dɛ̃̀ cángá tũ̀twĩ̀ĩ̀ bə̀ sõ, sə è k'â wɔ́ tɛ̀bɛ́ rə̀ bə mə̌ mɔ́ bə̀ n'ê wɛ̀rhɛ́. Ń yà ń nə́ ń dɛ̃̀ cángá tũ̀twĩ̀ĩ̀ bə̀ sõ, sə è k'â wɔ́ zúzúnú cìnə́ búbwéése dúdú ń na. Bwəlse námməlwǎlsɛ shə̀ldù Zhəda lyì-fwààlɛ́ shò kwã nɛ́ ⁸ Bə̀kɔ́n ná-dwí lwɛlɛ! Lyì bí byɛ̀bɛ́ j'â n'ê súlí jì è dõ ne, bə̀ n'ê súlí kɛ́lɛ́ è dõ ne, kɔn m'e yí bə j'a zwẽ jàà y púlə́púlə́, bə zɛ̃̀ bə̀ jě bə̀ dúdú tənà y cəcəl wə. ⁹ Lũ gakó Cinu mú nyí rí ń bwəl mó shɛ̀ à zhɛ̃̌ wa; ń wə̀lə̀: Jìrh nánzhəzhɔ̌, sə̀ já e jà sə̀ càn myɛ, m'a búl sə cɔ̀, lyì gə́ k'ê t'â la nɔ bə yə̀ sə̀ wẽ́ mó yilə. ¹⁰ Də̀vɛ̃́ cèmé cɛ nyə́ shí m'a nə də̀vɛ̃́ lyítərə shə́-èna sásá, twã́ dwí cəə́le zɔ̌m m'a ce cəə́le shí sásá. ¹¹ Bə̀kɔ́n ná-dwí lwɛlɛ! Bə̀ y'a pyẽ̀ pyẽ̀ bə zɛ̃̀, bə j'â n'ê dùr sə̀-kùùlí kwã, cɛ y yìì e lyɛ̃ myɛ, bə̀ j'â gwẽ̌ n'ê nywɛ̀ də̀vɛ̃́ bə̀ dwini bə̀ cìnə̀. ¹² Zɔ̀n ǹdə́ bwàárɛ ǹdə́ gǔlsi n'ê dwí, wúrh n'ê wúlə́, bə̀ sáná bɛ́ nyɔ́ kɔn lyɛ̃ cɛ nɛ yi ní, e jà bə̀ j'â t'â nyǐ kɔn rɛ́ tɛ̀bɛ́ Cinu nə́ ń wɛ̀rhɛ́ mɔ́ yé, bə̀ súlí bə̀ bə kɔn rɛ́ tɛ̀bɛ́ ń jɛ̀sɛ́ n'ê twĩ̀ mú nɛ yé. ¹³ Wɔ́ rə̀myɛ́ rə̀ ce bə̀ m'a pwà à dwí rí bə m'e vò jàà dõ wə, rə̀ gə́ yə̀ kɔn yé shò lwar mɔ́ yilə. Nɔrh m'a gu rə̀ lyì-fwààlɛ́, sə nǝ̀nyɛ̀lsɛ m'a gu lyì-zhɔ̌ w dwã bɛ́. ¹⁴ Rə̀myɛ́ yi ní Cúlú m'a kǎl ò nyí rí kɔn lyɛ̃ cɛ nɛ, o súlí o wɛ̀lɛ̀ ò byã yá; lyì-fwààlɛ́ ǹdə́ lyì-zhɔ̌ w dwã bɛ́ m'a ló rə̀ wẽ́, ǹdə́ bə̀ wu-nyɔ̃̀ sɔ̀ wá. ¹⁵ Numbyínsí m'a j'a lwəl sə̀ cìn tɛ̃́, bǝ̀ m'a lwəl numbyíní y tɛ̃́, cìn-byilu cìnə́ bé m'a j'a ce bə̀ yírhə́ né tɛ̃́. ¹⁶ Bə̀ m'a cèrhé lũ gakó Cinu mú ń bùrsí bǔr mú yilə, sə Yi rí tɛ̀bɛ́ rə̀ bə dõ zhe mó, m'a tó rə̀ cángá tũ̀twĩ̀ĩ̀ rí dɛnnɛ rə ce bə lwar bə̀ rə̀ bə dõ zhe yé. ¹⁷ Pyì-bwǎlsɛ m'a dɔ̃̀ gɔ gàà mɔ́ ǹdə sə̀ gɔ-dɔ́m-jàà y w ta, bɔ̀-bwǎlsɛ́ bə̀ n'ê kɔ̀n mɔ́ m'a dɔ̃̀ gɔ jì-bwə̀r ré yó. ¹⁸ Bə̀kɔ́n ná-dwí lwɛlɛ! Bə̀ n'ê vwɛ̃ yə̀-bəlɔ̀lɔ́ w tɛ̃́ ǹdə́ kɔma bɛ́ nyínsí, bə zɛ̃̀ bə̀ n'ê vwɛ̃ dóó w tɛ̃́ ǹdə́ vwə̃tu nyínsi. ¹⁹ E jà bə zɛ̃̀ bə̀ n'ê wə̀lə̀: «Ń wɛ̀rhɛ́ làlà, ń twĩ̌ ń tum rí làlà mùnì ga nə́ nə rɛ. Bə̀ kɔn rɛ́ tɛ̀bɛ́ Esərayɛl Yi rí rə̀ wɔ́ Yi rí tɛ̀bɛ́ rə̀ bə dõ zhe tɛnɛ rə̀ la wɔ̀rhɔ́ mɔ́ bà, sə rə súlí rə pyìrh, nə́ m'ǎ zɛ̃̀ nə́ lwar rə̀ párá.» ²⁰ Bə̀kɔ́n ná-dwí lwɛlɛ! Bə̀ n'ê wə̀l bə̀ tɛ̀bɛ́ rə̀ wɔ́ lwɛlɛ mɔ́ càn, bə zɛ̃̀ bə wɔ̀ bə̀ tɛ̀bɛ́ rə̀ càn mɔ́ wɔ́ lwɛlɛ. Bə̀ n'ê zə cə-byín rí bə̀ m'ê yàl pwẽ̀ ré, bə zɛ̃̀ bə zə pwẽ̀ ré bə̀ m'ê yàl cə-byín rí. Bə̀ n'ê wə̀l bə̀ kɔn tɛ̀bɛ́ rə̀ wɔ́ jwàrɛ̀ mɔ́ nyɛ̌ cɛ̀ɛ́, bə zɛ̃̀ bə wɔ̀ bə̀ tɛ̀bɛ́ rə̀ wɔ́ cɛ̀ɛ́ mɔ́ nyɛ̌ jwàrɛ̀. ²¹ Bə̀kɔ́n ná-dwí lwɛlɛ! Bə̀ wɔ́ lárma cìnə́ bə̀ cìn yírh wə, bə̀ wɔ́ surhə cìnə́, bə̀ cìcì bùlə̀ né wẽ́. ²² Bə̀kɔ́n ná-dwí lwɛlɛ! Bə̀ wɔ́ də̀vɛ̃́ nyɔ́ e lyɛ̃ cɛ nɛ kàndar, sáná dwã nɛ gùlú e nyɔ̀ lyì-byərh. ²³ Bə̀ y'a tə̀ pɛnɛ́ yilə, bə swàr yò dóó cə́bal yó wə, bə zɛ̃̀ bə cẽ bə̀ bə̀ t'â la bə-dóó-zhe cə́bal mɔ́ yò w swǎr ń yó w yé. ²⁴ Wɔ́ rə̀myɛ́ yilə, ǹdə myǐn mú gə́ y'a jí màálɛ nɛ́, e súlí ǹdə gɔ gə́ y'a jé myǐn mú w ní, bə̀ m'a tó bə̀ nèsé ne bə dɛ̀rhɛ̀, bə̀ pùnə́ né m'a jǐrh kɔ́kɔ̀rhɔ́, zho zə o m'o lyɛ̃, bə̀ gə́ cẽ lũ gakó Cinu byilu mú yò yilə, bə̀ gə́ fulsi Esərayɛl Yi rí rə̀ bə dõ zhe zɔ̀mɛ̀ rɛ́ mɔ́ yilə. Cinu lyim rí ²⁵ Wɔ́ rə̀myɛ́ rə̀ ce Cinu lyim j'a zɛ̃̀ rə̀ n'ê yì ń dwí rí dɛ̃́dɛ̃́, n cèlè ń jɛ̃̀ ń la rɛ mǎ, pyàr rɛ́ zɛ̃̀ rə̀ n'ê zhízhǐ, sə bə̀ cùùrí wɔ́ ǹdə ywə̀ə̀rhe ta sɔ́msɛ́ cəcəl wə. E jà ǹdə́ rə̀myɛ́ ga, ń lyim rí j'â yə̀ pɛ́ rə vò kwã yé, ń jɛ̃̀ y myɛ y'à j'â gwẽ̌ zhẽ̌ dɛ̃̌ e cèlè è zhǐ. Tənà è wɔ pyépyé n'ê zɛ̃̀ wun ni ²⁶ Ń zhẽ̌ ku n ce dɛ̃̌ ń nə́ ń byili tənà è wɔ pyépyéa ne, ń wúl ń mə́ ń byẽ̀ y lũ w cə-yala gakó wə, nyǐ y è zɛ̃̀ è n'ê ce jàn nɛ, è dùr e bə̀ e yí làlà. ²⁷ È lò mə̀dù ga myɛ já ń yə̀ lyɛ̀ɛ̀ yé, mə̀dù ga myɛ já ń tá ń mà ń nà yé, jan j'â t'â zal lò mə̀dù ga myɛ yé, lò mə̀dù ga myɛ já ń tá ń dɛ̀ɛ̀ yé. Cã̌-tàndɛ́ yə̀ lwə̌r yé, nə̀cìlə̀ né nyínsí myɛ yə̀ sɛ́ yé. ²⁸ È cama nɛ́ nyə́ né dwèlè, è twesé gakó pàmà. Bə̀ y'à wɔ̌ bə̀ zə è shəshesé nə̀-càr rɛ́ bə̀ yàl nə́kulu, bə zə è shəshə-vwə̃tur rí nèsé bə m'e yə̀ kùlmə̀. ²⁹ È n'ê swər ǹdə bwar-nyɔ̃̀ ta, è n'ê swər ǹdə bwar-byǎ ta, è ce è cəl ré n'ê domə, è zɔ è nyí-kɔn rɛ́, e zə rɛ e m'e lyɛ̃, sə lòlò tɛ̀nɛ́ ń la rɛ vwǎrh è sõ yé. ³⁰ Sə dɛ̃ rɛ́ rə̀myɛ́ mɔ́ yù wə, dweme m'a dom rə ce yə, rə̀ m'a yə̀ ǹdə nə̀-fɔ̀lɔ̀ w dweme ré ta. Bə̀ m'a nyǐ tənà y səta, sə bə̀ m'a púrí: cə-byín ǹdə́ zúzúnú dúdú, sə ébɔ̃ námbyṹ m'a círhí pwẽ̀ ré.