¹ Dɛ̃ rɛ́ rə̀myɛ́ mɔ́ yù wə, kana bwàlpyɛ̀ m'a j'a pyɛ́l bal mə̀dù ni bə̀ m'ê wə̀l mo: «Nə́ cìcì m'ǎ nyǐ nə́ nyí kùjú w yò, nə́ pyà nə́ yala gàndɛ́, nə́myɛ̌ wúrí nə́ shɛ̀ ǹ yil réa: vǔr nə́ cìzhìl ré!» Cinu mà n yìlì Zhərəzalɛm lyì bí byɛ̀bɛ́ bə̀ lú mú ² Dɛ̃ rɛ́ rə̀myɛ́ mɔ́ yù wə, kɔn rɛ́ tɛ̀bɛ́ Cinu la ce rə tò mó, m'a yə̀ yó-dɛ̃̌-zhõ̌ ǹdə́ còrhó, sə byǎ bɛ́ byɛ̀bɛ́ tənà y la co mó m'a yə̀ Esərayɛl lyì bí byɛ̀bɛ́ bə̀ lú mú, yó-dɛ̃̌-zhõ̌ ǹdə́ bə̀ zùwə́ kɔna. ³ Rə̀myɛ́ yi ní, bə̀ m'a byẽ̀ Səyɔ̃ lyì bí kùr ré rə̀ dàl mɔ́, Zhərəzalɛm lyì bí byɛ̀bɛ́ bə̀ lú mú bə̀ Yi lyì: bə̀ m'a kɛ̃ bə̀ gakó yilə né Zhərəzalɛm nɛ́ mùnì ga bə zə myə̌l bə yə̀ nɛ́. ⁴ Cinu gə tú ń zə bùrsí bǔr zho w ǹdə́ myǐn nánfɔ̀lɔ̀ w zho w ń mə́ ń vùr Səyɔ̃ bə̀kwá bɛ́ jìmdí n súlí n shɛ̀rh Zhərəzalɛm cɔ wá, jal mɔ́ mɔ̀bɔ́ bə̀ ló tɛ̃́ ò wẽ́ mó shò kwã mɔ́ kwã, ⁵ ń mà n ce ébɔ̃ yə̀ nɛ́ nə̀nyɛ́nɛ́ nɛ, n ce nyɛ̀rh sə̀ pwẽ̀ ré wɔ́ ǹdə myìn-zhù pwẽ̀ ta yə̀ nɛ́ cəcɛ̃ nɛ, Səyɔ̃ pyɔ̀ w jààsɛ́ gakó wẽ́, lyì bí byɛ̀bɛ́ bə̀ n'ê twí dwã yó mó yə́-pɛ̀lɛ́ wa. Sə Cinu còrhó w ò m'a yə̀ rə̀ gakó yə́-pɛ̀lɛ́ w mɔ́, ⁶ m'a yə̀ ku w kɔ̀bɔ́ ò n'ô círhí ri mú, vɔr kòrhó, ò zhe ywə́l cə-lumu nánfɔ̀lɔ̀ dwã nɛ́ wẽ́, o j'à wɔ́ shòò jàà ǹdə́ cìn-cúrhú jàà dwà-zho nánfɔ̀lɔ̀ w ǹdə́ dwà y yi ní.